Mu Itibelele kwa ku Lapela Milimu ya Maswaniso kwa Mufuta Kaufela

“Tempele ya Mulimu i na ni tumelelano ifi ni maswaniso a’ lapelwa?”—2 MAKORINTE 6:16.

 1. Ki sika mañi se ne si yemelwa ki tabernakele ni litempele za Isilaele?

JEHOVA u na ni tempele mo ku s’a fumanehi milimu ya maswaniso. Ne i swaniselizwe ka tabernakele ya Isilaele ye ne i yahilwe ki Mushe ni ka litempele ze ne li yahilwe hamulaho mwa Jerusalema. Yona miyaho yeo ne i yemela “Tabernakele ya niti,” ili tempele ye tuna ya kwa moya ya Jehova. (Maheberu 8:1-5) Yona tempele yeo ki tukiso ye itusiswa ku atumela Mulimu mwa ku lapela ka mutomo wa sitabelo sa tiululo sa Jesu Kreste.—Maheberu 9:2-10, 23.

 2. Ki bomañi ba ba fita fa ku ba misumo ya tempele ye tuna ya Mulimu ya kwa moya, mi ki mayemo mañi a’ ikoliwa ki buñata bo butuna?

² Yo muñwi ni yo muñwi wa Bakreste ba ba tozizwe u fita fa ku ba “musumo mwa Tempele ya Mulimu,” ili ya fumana sibaka mwa lihalimu. “Buñata bo butuna” bwa balapeli ba Jehova ba bañwi bu “sebeleza [Mulimu]” ku se ne si swanisezwa ki lukwakwa lwa ba Macaba kwa tempele ye ne yahilwe sinca ki Heroda. Bakeñisa tumelo mwa sitabelo sa Jesu, ba na ni mayemo a’ kenile ili a’ tahisa ku bukelezwa mwa “ñalelwa ye tuna.”—Sinulo 3:12; 7:9-15.

 3, 4. Puteho ya Bakreste ba ba tozizwe fa lifasi-mubu i swanisezwa kwa sika mañi, mi i lukela ku ba ye si na silafazo ifi?

³ Puteho ya Bakreste ba ba tozizwe fa lifasi-mubu hape ka swanisezo i bapiswa kwa tempele ye ñwi ye si na bulapeli bwa milimu ya maswaniso. Ku ba ba cwalo ba ba “swailwe nombolo ka Moya o Kenile,” muapositola Paulusi n’a bulezi kuli: “Mu yahilwe fa mutomo wa baapositola ni wa bapolofita, o Jesu Kreste ili yena licwe le lituna la mwa lilulu. Ku yena ndu kaufela i kopani hande, mi inz’e hula ku ba Tempele ye kenile ya Mulena. Ni mina mu yahilwe hamoho ku yena, kuli mu be ndu ya Mulimu ka Moya.” (Maefese 1:13; 2:20-22) Bona bao ba 144,000 ba ba swailwe nombolo ki “macwe a’ pila” a’ yahiwa “ku eza ndu ya moya, [ku fetuha] buprisita bo bu kenile.”—1 Pitrosi 2:5; Sinulo 7:4; 14:1.

⁴ Bakeñisa kuli bona baprisitanyana bao ki “muyaho wa Mulimu,” h’a lumelezi kuli tempele yeo i silafazwe. (1 Makorinte 3:9, 16, 17) “Mu si ke mwa lwala coko i liñwi ni ba ba sa lumeli,” ki mwa lemuseza Paulusi. “Kakuli twaelano ki ifi ya se si lukile ni bukopo? Ni liseli li na ni kopano mañi ni lififi? Kreste u na ni kutwano mañi ni Beliale? Ni mulumeli s’a ka ikabela ki sifi ni ya si ka lumela? Tempele ya Mulimu i na ni tumelelano ifi ni maswaniso a’ lapelwa?” Bakreste ba ba tozizwe, bao ba ba li ba “[Jehova, NW] Ya-Mata-Kaufela,” ba lukela ku ambuka kwa ku lapela milimu ya maswaniso. (2 Makorinte 6:14-18) Ba buñata bo butuna ni bona ba lukela ku pima ku lapela milimu ya maswaniso kwa mufuta kamukana.

 5. Ka ku lemuha kuli Jehova u swanelwa ki buipeyo bwa ku ipeya ku yena fela, ki sifi seo Bakreste ba niti ba eza?

⁵ Ku na ni mifuta ya ku lapela milimu ya maswaniso ko ku itunumanezi fela ni ko ku mwa sikupuki. Batili, ku lapela milimu ya maswaniso ha ku si ka ciñekela fela fa ku lapela milimu ya buhata ya banna ni ya basali. Ki ku lapela nto ifi kamba ifi kamba mutu ufi kamba ufi y’a si Jehova. Ka ku ba yena Mubusi wa Pupo Kamukana, ka swanelo u tokwa mi u lukelwa ki buipeyo bwa ku ipeya ku yena a nosi fela. (Deuteronoma 4:24) Ka ku lemuha seo, Bakreste ba niti ba ipeya ku utwa litemuso kaufela za mwa Mañolo ze hanisa ku lapela kaufela kwa milimu ya maswaniso. (1 Makorinte 10:7) Ha lu nyakisiseñi mifuta ye miñwi ya ku lapela milimu ya maswaniso ko ku swanelwa ku pimiwa ki batanga ba Jehova.

Ku Lapela Milimu ya Maswaniso kwa Krestendomu ku Supezwi Cimo

 6. Ki lika mañi ze masila zeo Ezekiele n’a boni mwa pono?

⁶ Ha n’a li mwa butanga bwa Babilona ka 612 B.C.E., mupolofita Ezekiele n’a bile ni pono ya lika ze masila ze ne li eziwa ki Majuda ba bakwenuheli kwa tempele ya Jehova mwa Jerusalema. Ezekiele n’a boni “siswaniso sa lifufa.” Ba bahulu ba ba eza 70 ne ba bonwi ba fa insense mwa tempele. Basali ne ba bonwi ba lila mulimu wa buhata. Mi banna ba ba 25 ne ba lapela lizazi. Zona likezo za bukwenuheli zeo ne li talusa sika mañi?

 7, 8. “Siswaniso sa lifufa” mwendi ne li nto mañi, mi ki kabakalañi ha ne si fufabisize Jehova?

⁷ Ku lapela milimu ya maswaniso kwa Krestendomu ne ku supezwi cimo ka lika ze masila za n’a boni Ezekiele mwa pono. Sina ka mutala, n’a bulezi kuli: “Na bona kwa Mutulo, mwa munyako wa aletare, kuli siswaniso seo sa lifufa si inzi mwa makenelo. [Jehova Mulimu a] li ku na: Mwan’a mutu, kikuli wa si bona se ba eza? kikuli wa li bona ze masila a maswe ze ba eza mo ba ndu ya Isilaele, kuli ba ni sabiseze kwahule ni Sibaka sa ka se si kenile?”—Ezekiele 8:1-6.

⁸ Siswaniso sa lifufa seo sa bulapeli bwa milimu ya maswaniso mwendi ne si li musumo wa bulapeli o ne u yemela mulimu wa buhata wa musali o ne u’ ngiwa ki Makanana ku ba musal’a mulimu wa bona Baale. Ku si na taba ni seo siswaniso seo ne si li sona, ne si fufabisize Jehova kakuli ne si aluhanya buipeyo bwa Isilaele bwa ku ipeya ku yena fela ili ku loba milao ya hae: “Ki Na [Jehova, NW] Mulimu wa hao . . . U si ke wa ba ni milimu i sili fapil’a ka. U si ke wa ikezeza siswaniso se si betilwe, nihaiba siswaniso sifi kamba sifi sa linto ze kwahalimu mwa lihalimu, nihaiba sa ze mwatasi mwa lifasi, nihaiba sa ze mwa mezi mwatas’a lifasi. U si ke wa si kubamela, u si ke wa si sebeleza; kakuli Na, [Jehova, NW] Mulimu wa hao, ni Mulimu ya lifufa.”—Exoda 20:2-5.

 9. Krestendomu u fufabisize cwañi Mulimu?

⁹ Ku lapela siswaniso sa lifufa mwa tempele ya Mulimu ne li nto ye ñwi ya lika ze masila ze tuna ze ne li eziwa ki Maisilaele ba bukwenuheli. Ka ku swana, likeleke za Krestendomu li silafalizwe ka liswanisezo ni maswaniso a’ shwaula Mulimu ili a aluhanya buipeyo bwa ku ipeya ku yena fela bo ba ipapata ku fa ku Yena ye ba ikunga kuli ki yena ye ba sebeleza. Mulimu hape u fufabiswa bakeñisa kuli bahulu ba bulapeli ba hana Mubuso wa hae kuli ki yona sepo fela ya mufuta wa mutu mi ba eza Kopano ya ba Macaba ku ba mulimu wa siswaniso—“bumaswe bo bu shandaula . . . [bo] bu inzi mwa Sibaka se si kenile,” mo bu s’a swaneli ku ina.—Mateu 24:15, 16; Mareka 13:14.

10. Ki lika mañi zeo Ezekiele n’a boni mwahal’a tempele, mi zeo li bapanyeha cwañi ku ze lemuhiwa mwa Krestendomu?

¹⁰ H’a kena mwa tempele, Ezekiele u biha kuli: “Na bona ku swanisizwe mifuta kaufela ya ze zamaya ka mba, ni likokwani ze masila, ni maswaniso kaufela a ba ndu ya Isilaele, kuli a basizwe fa limota mwa maneku kaufela. Mi fapil’a ona ne ku yemi banna ba ba 70, ba bahulu ba ndu ya Isilaele . . . yo muñwi ni yo muñwi n’a sweli piza ya hae ya insense ka lizoho la hae; mi munko wa musi wa insense n’o pahamela kwahalimu.” A mu nahane fela! Ba bahulu ba Isilaele mwa tempele ya Jehova, ba fa insense kwa milimu ya buhata, ye yemelwa ki ze basizwe fa limota. (Ezekiele 8:10-12) Ka mukwa o’ bapanyeha, linyunywani ni lifolofolo za mwa naheñi za itusisiwa kwa ku yemela linaha za Krestendomu, ili zeo batu ba fa buipeyo. Fahalimu a seo, bahulu ba bulapeli ba bañata ba na ni mulatu wa ku tusa mwa ku yembulula likwanamunu ka ku fa kemelo kwa tuto ye fosahalile ya ku ipilaula kwa mutu ku zwa ku ze kwatasi, ili mifuta ya ze pila za lifolofolo mwa sibaka sa kuli ba tiise taba ya niti ye mwa Bibele ya za ku tahiswa ki Jehova Mulimu kwa pupo.—Likezo 17:24-28.

11. Ki kabakalañi basali ba Maisilaele ba bakwenuheli ha ne ba lila Tamuzi?

¹¹ Kwa makenelo a munyako wa ndu ya Jehova, Ezekiele n’a boni basali ba Maisilaele ba bakwenuheli ba lila Tamuzi. (Ezekiele 8:13, 14) Mababilona ni Maasirya ne b’a nga Tamuzi ku ba mulimu wa limela ze mela mwa nako ya litabula ni ku yunda mwa linako ze omile. Ku shwa kwa zona ne ku swaniseza lifu la Tamuzi, ya n’a liliwa ki balapeli ba hae ka silimo ni silimo ka nako ya mufutumala o mutuna ka ku fitisisa. Ka ku shoshela sinca kwa limela mwa nako ya litabula, ne ku lumelwa kuli Tamuzi na kutile ku zwa kwa sibaka ko ku pila mioya. Sisupo sa hae ne li taku ya pili ya libizo la hae, ye ne bizwa tau ya kwaikale ili ye ne li mufuta o muñwi wa sifapahano. Seo ne si kana sa lu hupulisa hape ka za ku kuteka hahulu sifapahano kwa Krestendomu.

12. Ezekiele n’a boni banna ba Maisilaele ba bakwenuheli ba ba 25 ba eza nto mañi, mi ki likezo mañi ze swana ze ezahala mwa Krestendomu?

¹² Mwa lukwakwa lwa mwahali lwa tempele, Ezekiele ka ku tatama n’a boni banna ba Maisilaele ba bakwenuheli ba ba 25 ba lapela lizazi—ili ku loba mulao wa Jehova o hanisa bulapeli bwa milimu ya maswaniso bo bu cwalo. (Deuteronoma 4:15-19) Bona balapeli ba milimu ya maswaniso bao hape ne ba kasheza kwa lingo za Mulimu, mutai wa matapa, ili w’o mwendi ne u yemela lilama za bunna za butu. Ha ku komokisi Mulimu ha n’a s’a alabi litapelo za bona, mane sina Krestendomu h’a ka bata tuso ya hae mwahal’a “ñalelwa ye tuna,” kono h’a na ku i fumana. (Mateu 24:21) Sina fela bona Maisilaele ba bakwenuheli b’ani ha ne ba lapezi lizazi le li fa liseli ba nze ba fulalezi tempele ya Jehova, ki cwalo Krestendomu a fulalela liseli le li zwa ku Mulimu, ku luta lituto za buhata, ku eza butali bwa silifasi ku ba mulimu wa siswaniso, ni ku lumeleza muzamao o maswe.—Ezekiele 8:15-18.

13. Ki ka mikwa ifi Lipaki za Jehova ba pima mifuta ya ku lapela milimu ya maswaniso ye ne i bonwi mwa pono ya Ezekiele?

¹³ Lipaki za Jehova ba pima mifuta ya ku lapela milimu ya maswaniso ye fumaneha mwa Krestendomu, kamba Jerusalema wa ka swanisezo, sina mo ne i bonezwi cimo ki Ezekiele. Ha lu ezi lisupo ze shwaula Mulimu ku ba milimu ya maswaniso. Nihailikuli lu fa likute ku “ba ba beilwe fa bulena” ba mulonga, ku ipeya kwa luna kwatas’a bona ku na ni maciñekelo. (Maroma 13:1-7; Mareka 12:17; Likezo 5:29) Buipeyo bwa luna bwa kwa pilu bu fiwa ku Mulimu ni kwa Mubuso wa hae. Ha lu beyi tuto ya ku ipilaula kwa lika mwa sibaka sa Mubupi ni pupo ya hae. (Sinulo 4:11) Ni kamuta ha lu lapeli sifapahano kamba ku eza buc’aziba, lituto za mihupulo ya butu, kamba mifuta ye miñwi ya butali bwa silifasi ku ba milimu ya maswaniso. (1 Timotea 6:20, 21) Hape lu itibelela kwa mifuta ye miñwi kaufela ya ku lapela milimu ya maswaniso. Ki ifi ye miñwi ya yeo?

Mifuta ye Miñwi ya ku Lapela Milimu ya Maswaniso

14. Ki mayemo afi ao batanga ba Jehova b’a nga ka ku ama kwa “sibatana” sa kwa Sinulo 13:1?

¹⁴ Bakreste ha ba abani ni mufuta wa mutu mwa ku eza “sibatana” sa swanisezo ku ba mulimu wa siswaniso. Ka mwa n’a bulelezi muapositola Joani: “Na bona sibatana se si omboka mwa liwate, si na ni manaka a lishumi, ni litoho ze 7; kwa manaka ne si na ni mishukwe ya bulena ye lishumi . . . Mi si ka lapelwa ki ba ba yahile mwa lifasi kamukana.” (Sinulo 13:1, 8) Libatana li kona ku yemela “malena,” kamba m’ata a puso a bupolitiki. (Daniele 7:17; 8:3-8, 20-25) Kacwalo litoho ze supile za sibatana sa swanisezo li yemela m’ata a puso ya lifasi—a Egepita, Asirya, Babilona, Midia ni Perezi, Grisi, Roma, ni Anglo-America ili swalisano ya Britain ni United States of America. Bahulu ba bulapeli ba Krestendomu ba bonisa lishwau le lituna ku Mulimu ni Kreste ka ku etelela mufuta wa mutu mwa ku eza muinelo wa bupolitiki wa Satani, yena “mulena wa lifasi le,” ku ba mulimu ya lapelwa wa siswaniso. (Joani 12:31) Nihakulicwalo, batanga ba Jehova ka ku ba Bakreste ba buikambuso ni bayemeli ba Mubuso, ba hana ku lapela milimu ya maswaniso ko ku cwalo.—Jakobo 1:27.

15. Batu ba Jehova b’a nga cwañi ba ba cul’okile ba silifasi, mi ki sifi seo Paki yo muñwi n’a bulezi ka ku ama ku seo?

¹⁵ Batu ba Mulimu hape ba tokolomoha ku eza ba ba cul’okile ku za ku itabisa ni lipapali ba silifasi ku ba milimu ye lapelwa. Hamulaho wa ku ba Paki ya Jehova, muopeli yo muñwi n’a bulezi kuli: “Lipina za ku itabisa ni za ku bina li kona ku zusulusa litakazo ze fosahezi . . . Muopeli u opela ka za tabo ni bunolo zeo bateelezi ba bañata ne ba kana ba ikutwa kuli za tondahala ku bosinyalana ni bona. Muopeli hañata u bonwa ku ba ya swalisani ni s’a opela. Baopeli ba bañwi ba ba li boc’aziba be ni ziba ba latiwa hahulu ki basali ka libaka leo. Mutu ha s’a tupwikezi mwa miinelo yeo ya mihupulo ye si na mutomo, i kona ku mu libisa kwa ku eza ya opela y’o ku ba mulimu ya lapelwa. Seo ne si kana sa kala ka mukwa o’ bata u’ ba o’ s’a holofazi ka ku kupa muñolo wa ku nyatela kwa hae kuli u be nto ya ku mu hupulela teñi. Kono ba bañwi ba fita fa ku bona muopeli y’o ku ba y’a ba fa mutala o petehile, mi ka ku mu beya fa mayemo a’ pahami, ba mu eza ku ba mulimu wa siswaniso. Ne ba kana ba mameka siswaniso sa muopeli y’o fa limota ni ku kalisa ku tina ni ku iponahalisa ka ku swana ni yena. Bakreste ba swanela ku beya mwa munahano kuli tompo ya bulapeli i lukelwa ku fiwa ku Mulimu fela.”

16. Ki sifi se si bonisa kuli mangeloi a’ kenile a’ hana bulapeli bwa milimu ya maswaniso?

¹⁶ Ee, ki Mulimu fela ya lukelwa ku fiwa tompo ya bulapeli kamba ku lapelwa. Muta Joani n’a kile a ‘wela mwa mautu ni ku kubamela lingeloi’ le ne li mu bonisize lika ze komokisa, sona sibupiwa sa kwa moya seo ne si hanile ku lapelwa sina mulimu wa siswaniso ka nzila ifi kamba ifi kono ne si bulezi kuli: “Si ezi cwalo! Ni mulikani wa hao mwa sebelezo, ni wa banabahenu ba bapolofita, ni wa ba ba mamela manzwi a mwa buka ye. Kubamela Mulimu.” (Sinulo 22:8, 9) Sabo ya ku saba Jehova, kamba ku mu tompa ko ku tungile, ku lu ezisa ku lapela yena a nosi fela. (Sinulo 14:7) Kacwalo, buipeyo bwa bumulimu bwa niti bu lu sileleza kwa ku lapela milimu ya maswaniso.—1 Timotea 4:8.

17. Lu kona ku itibelela cwañi kwa muzamao o maswe wa tobali wa ku lapela milimu ya maswaniso?

¹⁷ Muzamao o maswe wa tobali ki mufuta o muñwi wa ku lapela milimu ya maswaniso ko ku haniwa ki batanga ba Jehova. B’a ziba kuli “lihule kaufela, ni wa mikwa ye maswe, ni ya lata maluwo,—ili ku sebeleza milimu,—ku bona ha ku na ya ka yola sanda sa mubuso wa Kreste wa Mulimu.” (Maefese 5:5) Ku lapela milimu ya maswaniso kwa amiwa kakuli takazo ye tuna ya minyaka ye si ya ka mulao i fita fa ku ba nto ye fiwa buipeyo. Tulemeno twa mayemo a bumulimu tu beiwa mwa lubeta ka litakazo za tobali ze s’a swaneli. Ka ku sikekela meto ni lizebe za hae kwa lika za mayemo a mapunu, mutu u beya mwa lubeta swalisano ifi kamba ifi ya n’a kana a ba ni yona ni Mulimu ya kenile, Jehova. (Isaya 6:3) Cwale he, kuli ba itibelele kwa ku lapela milimu ya maswaniso ko ku cwalo, batanga ba Mulimu ba lukela ku tokolomoha lika za mayemo a’ mapunu ni lipina ze silafaza. Ba tokwa ku kumalela kwa lika ze butokwa za kwa moya ze tomile fa Mañolo, mi ba lukela ku buluka “mutu yo munca ya bupwa ka siswaniso sa Mulimu mwa ku luka, ni mwa ku kena kwa niti.”—Maefese 4:22-24.

Mu Pime Mukwañuli ni ku Lakaza ku Fuma

18, 19. (a) Mukwañuli ni ku lakaza ku fuma ki nto mañi? (b) Lu kona ku itibelela cwañi kwa mukwañuli ni ku lakaza ku fuma zeo li li ku lapela milimu ya maswaniso?

¹⁸ Bakreste hape ba itibelela kwa mukwañuli ni kwa ku lakaza ku fuma, ili mifuta ya ku lapela milimu ya maswaniso ye swana hahulu. Mukwañuli ki takazo ye si na sipimo kamba ya bulyangelino, mi ku lakaza ku fuma ki mukwañuli kwa neku la nto ifi kamba ifi ya mutu u sili. Jesu n’a lemusize ku tokolomoha ku lakaza ku fuma ha n’a bulezi ka za munna ya fumile ya n’a lakaza ku fuma ya n’a si ka kona ku fumana tuso kwa sifumu sa hae fa lifu la hae mi n’a li mwa muinelo o’ swabisa wa ku ba ya s’a “fumeli ku Mulimu.” (Luka 12:15-21) Paulusi ka ku swanela n’a elelize balumeli sina yena kuli: “Mu bulaye lilama za mina ze mwa lifasi, kikuli . . . takazo ya ku fuma ili nto ye swana sina sebelezo ya milimu.”—Makolose 3:5.

¹⁹ Bao ba ba hapilwe ki lilato la ku lata mali, ku ca maswe ni ku nwa maswe, kamba ku ba ni milelo ya ku ba ni m’ata a tamaiso ba eza litakazo ze cwalo ku ba milimu ya bona ya maswaniso. Ka mwa n’a boniselize Paulusi, mutu wa mukwañuli u lapela milimu ya maswaniso mi h’a na ku ca sanda sa Mubuso wa Mulimu. (1 Makorinte 6:9, 10; Maefese 5:5) Kacwalo, batu ka buñwi ba ba kolobelizwe ba ba eza bulapeli bwa milimu ya maswaniso ka ku ba ba mukwañuli ba konwa ku zwisiwa mwa puteho ya Sikreste. Niteñi, ka ku sebelisa Mañolo ni ku lapela ka buniti, lwa kona ku pima mukwañuli. Liproverbia 30:7-9 i bulela kuli: “Ni kupile linto ze peli ku Wena [Jehova Mulimu], u si ke wa ni tima zona ni si ka shwa: ‘Za buhata, ni ze puma, u li sutiseze kwahule ni na; u si ke wa ni fa bubotana, nihaiba bufumu; u ni tuse buhobe bo bu ni likana. Kakuli ha ni ka atelwa, ni ka swana na ku latula, na li: [Jehova, NW] ki mañi? Mi ha ni ka ba mubotana ni ka swana na uzwa, mi na nyefulisa Libizo la Mulimu wa ka.’” Mubonelo o’ cwalo w’a kona ku lu tusa ku itibelela kwa mukwañuli ni kwa ku lakaza ku fuma zeo ili ku lapela milimu ya maswaniso.

Mu Itibelele kwa ku Ikeza Milimu ya Maswaniso

20, 21. Batu ba Jehova ba itibelela cwañi kwa ku ikeza milimu ya maswaniso?

²⁰ Batu ba Jehova hape ba itibelela kwa ku ikeza milimu ya maswaniso. Mwa lifasi le ki nto ye atile ku mutu ku ikeza mulimu wa siswaniso yena ka sibili ni litato za hae. Takazo ya libubo ni tumbo i tahiseza ba bañata k’u nga mihato ka linzila ze ñetelela. Ba bata kuli tato ya bona i eziwe, mi isiñi ya Mulimu. Kono ne lu si ke lwa kona ku ba ni swalisano ni Mulimu ha ne lu ka komiwa ki ku ikeza mulimu wa siswaniso ka ku ñetelela ku eza se lu bata luna ka sibili ni ku lika ku busa ba bañwi. (Liproverbia 3:32; Mateu 20:20-28; 1 Pitrosi 5:2, 3) Ka ku ba balateleli ba Jesu, lu tuhezi za ku s’a sepahala za lifasi.—2 Makorinte 4:1, 2.

²¹ Mwa sibaka sa ku bata libubo, batu ba Mulimu b’a nga muhato ka ku lumelelana ni kelezo ya Paulusi y’e li: “Niha mu ca, niha mu nwa, niha mu eza nto ye ñwi, mu eze linto kaufela kuli Mulimu a lumbekwe ka zona.” (1 Makorinte 10:31) Ka ku ba batanga ba Jehova, ha lu piheleli ku eza ka mo lu latela ka mukwa wa ku ikeza mulimu wa siswaniso kono ka tabo lu eza tato ya bumulimu, ku amuhela ketelelo ye zwa ku “mutanga ya sepahala, ya na ni kutwisiso” ni ku swalisana ka ku tala ni kopano ya Jehova.—Mateu 24:45-47.

Mu Zwelepili ku Itibelela!

22, 23. Ki ka nzila mañi lu kona ku zwelapili ku itibelela kwa ku lapela milimu ya maswaniso kwa mufuta kaufela?

²² Ka ku ba batu ba Jehova, ha lu inameli milimu ya maswaniso ye pangilwe. Hape lu itibelela kwa mifuta ya ka sikupuki ya ku lapela milimu ya maswaniso. Ka buniti fela, lu lukela ku zwelapili ku pima ku lapela milimu ya maswaniso kwa mufuta kaufela. Kacwalo lu lumelelana ni kelezo ya Joani ye li: “Mu itibelele kwa milimu ya buhata.”—1 Joani 5:21.

²³ Haiba mu ba bañwi ba batanga ba Jehova, mu sebelise kamita lizwalo ni m’ata a mina a kutwisiso a’ twaelizwe hande ka Bibele. (Maheberu 5:14) Fo ha mu na ku silafazwa ki mubonelo wa lifasi wa ku lapela milimu ya maswaniso kono mu ka ba sina Maheberu ba ba sepahala ba balalu ni Bakreste ba kwa makalelo ba ba sepahala. Mu ka fa Jehova buipeyo bwa ku ipeya fela ku yena, mi u ka mi tusa ku itibelela kwa ku lapela milimu ya maswaniso kwa mufuta kaufela.

Mihupulo ya Mina Ki Ifi?

◻ Lipaki za Jehova ba pima cwañi mifuta ya ku lapela milimu ya maswaniso ye ne bonwi mwa pono ya Ezekiele?

◻ “Sibatana” sa kwa Sinulo 13:1 ki nto mañi, mi ki mayemo mañi ao batanga ba Jehova b’a nga ka ku ama ku sona?

◻ Ki kabakalañi ha lu na ni ku itibelela kwa ku lapela ba ba cul’okile ku za ku itabisa ni lipapali?

◻ Lu kona ku itibelela cwañi kwa ku ikeza milimu ya maswaniso?

◻ Ki kabakalañi ha lu na ni ku zwelapili ku itibelela kwa ku lapela milimu ya maswaniso kwa mufuta kaufela?