Maeluda—Mu Utwele Mutapi Wa Mulimu Butuku!

“Lwa ba ni musa mwahal’a mina; sina muanyisi mw’a babalelela bana ba hae ka lilato.”—1 MATESALONIKA 2:7.

 1. Ki kabakalañi Paki ya Jehova ya sepahala ufi kamba ufi h’a kona ku ikutwa ku ba mwa buiketo?

JEHOVA ki Mulisana yo Mutuna. U eza litukiso ze ñata-ñata kwa neku la batanga ba hae ba ba swana sina lingu mi u ba isa “mwa linzila za Ku Luka” kabakala libizo la hae le li kenile. Kacwalo, bao ba ba eza tato ya hae ha ba tokwi ku saba nto ni ye kana ye maswe mi ba kona ku talimela ku Mulimu wa bona y’a mufelañeke kuli u ka ba omba-omba. Ee luli, Paki ya Jehova ya sepahala ufi kamba ufi u na ni libaka le li utwahala la ku ikutwa ku ba mwa buiketo ili mwa pabalelo ya Mulimu ya lilato.—Lisamu 23:1-4.

 2. Ka ku ba sina ponahalo ya kanya ya Mulimu, ki tulemeno mañi twa bonisa Jesu?

² Jesu Kreste “ki yena ye li ponahalo ya kanya ya [Mulimu], ni siswaniso sa se A li sona.” (Maheberu 1:1-4) Kacwalo Jesu, Mulisana yo Munde, ni yena u bonisa lilato ni mufelañeke. (Joani 10:14, 15) Sina ka mutala, muta o muñwi “a bona undi wa nyangela, mi a ba utwela butuku, kakuli ne ba swana inge lingu ze si na mulisana; mi a kala ku ba luta litaba ze ñata.”—Mareka 6:34.

 3. (a) Ka ku swana sina Jehova Mulimu ni Jesu Kreste, balisana ba banyinyani ba Sikreste ba swanela ku bonisa tulemeno tufi? (b) Ki kelezo ni temuso ifi yeo muapositola Paulusi n’a file baokameli?

³ Bakreste kamukana ba swanela ku ‘likanyisa Mulimu ni ku zwelapili ku zamaya mwa lilato sina Kreste ka mw’a ba latezi.’ (Maefese 5:1, 2) Kacwalo ba swanela ku ba ni lilato ni mufelañeke. Seo sihulu si swanela ku ba sa niti kwa balisana ba banyinyani ba mutapi wa Mulimu. Muapositola Paulusi n’a bulezi kuli: “Cwale mina, mu itibelele, mi mu lise mutapi kaufela o mu beilwe balibeleli ba ona ki [moya o kenile], ku uta [puteho, NW] ya Mulimu ye a itekezi ka mali a [Mwan’a, NW] hae luli, a mwa mubili wa hae. Kakuli na ziba kuli, ha ni se ni ile, ku ka t’o kena ku mina litongwani ze buhali, ze li si ke za utwela mutapi butuku. Mi hape ni mwahal’a mina luli, ku ka zwa banna ba ba ka bulela litaba ze kopami, kuli balutiwa ba ba latelele.”—Likezo 20:28-30.

 4. (a) Nako ha ne inze i ya, ki sifi se ne si ezahezi ka ku lumelelana ni temuso ya Paulusi kwa Likezo 20:29, 30? (b) Ki lipuzo mañi cwale ze tokwa nahanisiso?

⁴ Nako ha ne inze i ya, bakwenuheli ba ba li “litongwani ze buhali” ba fita fa ku ba teñi mi ne ba si ka “utwela mutapi butuku.” Kono lu ba ba tabile hakalo kuli maeluda mwahal’a Lipaki za Jehova ha ba bonisi buimatalu bo bu cwalo! Niteñi, balumeli sina luna ba libelela ku ngiwa kamukwaufi ki maeluda ba ba ketilwe ka moya? Mi bona ba ba ketilwe ba ba cwalo ba kona ku bonisa cwañi mamelelo ye sishemo kwa lingu za Jehova?

Isiñi ku Busa Mutapi ka Tata

 5. (a) Baeteleli ba silifasi hañata ba zamaisa cwañi babusiwa ba bona? (b) Jesu n’a bonisize cwañi kuli buimatalu ha bu na sibaka mwahal’a balateleli ba hae?

⁵ Ka tukelo lwa kona ku libelela maeluda ba Sikreste ku lu babalela ka nzila ya mufelañeke. Ha ba swani sina babusi ba silifasi, ili bao ba busa babusiwa ba bona ka tata. Sina ka mutala, ne ku bihilwe kuli mulena wa si-Frank Charlemagne (ya n’a busize ka 768-814 C.E.) “n’a hapelelize ma-Saxon, mwatas’a butuku bwa lifu, kuli ba amuhele kolobezo, ni ku fa likoto ze tuna ka ku fitisisa balobi ba mulao o bizwa Lent [nako ya ku itima minyaka], mi kai ni kai m’ata n’a itusisizwe mwa sibaka sa susuezo.” (The History of the Christian Church, ka William Jones) Buimatalu ha bu na sibaka mwahal’a balateleli ba Jesu, kakuli n’a bulezi kuli: “Kakuli mwa ziba kuli babusi ba balicaba ba busa ka tata fahalimw’a bona, mi ba ba li ba batuna mwahal’a bona ba fita fa ku ba boimatalu fahalimw’a bona. Ha ku lukeli ku ba cwalo mwahal’a mina, kono mañi ni mañi ya bata ku ba yo mutuna mwahal’a mina u lukela ku ba mutang’a mina, mi mañi ni mañi ya bata ku ba mwa sibaka sa pili mwahal’a mina u lukela ku ba muzike ku mina, sina Mwan’a Mutu h’a si ka taha kuli a to libelelwa, kono ku to libelela batu ba bañwi, ni ku to fa bupilo bwa hae kuli a liulule ba bañwi ba bañata.”—Mateu 20:25-28, An American Translation.

 6. (a) Ka ku ama kwa maeluda, ki lika lifi ze mutomo ze fita fa ku zwa mubano? (b) Puteho i na ni libaka la ku libelela sikamañi ku zwelela kwa maeluda, mi bona banna bao ba swanela ku ipona cwañi ili bona?

⁶ Munna wa Sikreste ya ‘bata ku ba mwa kalulo ya buokameli u lakaza musebezi o munde.’ (1 Timotea 3:1) Ha lu nahanisisa ka za seo hamohocwalo ni kelezo ya Jesu ye sa z’o boniswa, likalulo ze ze mutomo li fita fa ku zwa mubano: (1) Maeluda ba Sikreste ha ba lukeli ku ba boimatalu fahalimw’a ba bañwi; (2) bao ba ba na ni buikalabelo mwahal’a balateleli ba Jesu ba lukela ku ba batanga ba bona, isiñi malena ba bona; ni (3) banna ba ba bata ku fita fa kalulo ya buokameli ba swanela ku talima seo sina “musebezi o munde,” isiñi sina situlo se si pahami. (Liproverbia 25:27; 1 Makorinte 1:31) Pulelo ya “eluda” ha i pahamisi mutu ufi kamba ufi fahalimw’a balapeli ba bañwi ba Jehova. Ka ku fapahana, puteho i na ni libaka la ku libelela maeluda kaufela ku ba ba ba tiile kwa moya, ba ba na ni yeloseli, ni banna ba ba ikokobeza ba b’a nga ketelelo mwa sebelezo ye kenile. Kaniti luli, maeluda ba swanela ku ipona ili bona sina batanga ba ba ikokobeza ba Jehova Mulimu, Jesu Kreste, ni Bakreste sina bona.—Maroma 12:11; Magalata 5:13; Makolose 3:24.

 7. (a) Maeluda ba swanela ku sebelisa 2 Makorinte 1:24 kamukwaufi mwa ku sebelisana kwa bona ni ba bañwi? (b) Ki sifi seo maeluda ba swanela ku si eza kwa neku la litaelo ze amuhezwi ku zwelela kwa Sitopa se si Busa?

⁷ Ku sebeleza ba bañwi ka buikokobezo ka mo ku inezi fela ku paleliswa eluda ku lika ku “busa ka tata” fahalimw’a bona. Mi ki ko ku nde hakalo kuli maeluda ba luna ba bonisa mubonelo o swana ni wa Paulusi! N’a taluselize Bakreste kwa Korinte kuli: ‘Ha lu busi ka tumelo ya mina, kono lu lata ku mi tusa ze mi tabisa.’ (2 Makorinte 1:24) Ka seo, bao ba ba bonisa buokameli bo bu lilato ha ba hateleli balumeli sina bona ka milao ya butu ye sa tokwahali. Ka ku fapahana, baokameli mwahal’a Lipaki za Jehova ba zamaiswa ki likuka za mwa Mañolo mi ba fa sebelezo ye sishemo, ili ye na ni tuso. Hape ba bonisa mamelelo ye tungile kwa mutapi wa Mulimu ka ku sebelisa ka bubebe litaelo ze amuhezwi ku zwelela kwa Sitopa se si Busa sa Lipaki za Jehova.—Likezo, kauhanyo 15.

 8. Ki mubonelo mañi wo Paulusi n’a na ni ona kwa neku la balumeli sina yena, mi seo si swanela ku ama cwañi maeluda ba mwa lilimo ze za mwanda wa bu 20?

⁸ Bakeñisa kuli Paulusi n’a na ni mamelelo ya ku utwela butuku mutapi wa Mulimu, n’a kona ku taluseza Bakreste kwa Tesalonika kuli: “Lwa ba ni musa mwahal’a mina; sina muanyisi mw’a babalelela bana ba hae ka lilato, Ni luna cwalo, mwa ku mi shemuba, ne lu lakaza ku mi fa, isi Evangeli ya Mulimu fela, kono ni bona bupilo bwa luna; kakuli ki mina balatiwa ba luna luli.” (1 Matesalonika 2:7, 8) Paulusi n’a ngile muhato o swana sina wa me y’a li muanyisi, ya lata bana ba hae hahulu kuli mane u beya licisehelo za bona fapil’a za hae ka sibili mi u na ni mamelelo ya ku ba utwela butuku. Seo si swanela ku susueza hakalo maeluda ba mwa lilimo ze za mwanda wa bu 20 mwa ku utwela butuku mutapi wa Mulimu!

Simuluho ya Kimululo ni Wetuluso

 9. Ki miinelo mañi ya batu ba Jehova ba mwa lizazi la cwale ye ne i talusizwe cimo kwa Isaya 32:1, 2?

⁹ Ka ku supa kwa lizazi le la puso ya Mubuso ka Jesu Kreste, mupolofita Isaya n’a talusize cimo kuli mulena u ka “busa ka ku luka” mi “makwambuyu ba ka zamaisa ka mulao.” Kacwalo, maeluda mwa kopano ya teokratiki ya mwa lizazi la cwale ba talima licisehelo za Mubuso wa mwa lihalimu o tomilwe—ki sebelezo ya sikwambuyu luli! Ku bona banna ba ba na ni buikalabelo ba, manzwi a Isaya a bupolofita a’ latelela a fita fa ku sebeza: “Mutu kih’a ka ba sina mukunda ha ku fuka moya, ni sina sisabelo ha ku taha liñungwa; a be sina linuka ze isa mezi mwa naha ye omile, ni sina muluti wa licwe le lituna mwa naha ye shukezwi mezi.”—Isaya 32:1, 2.

10. Eluda ni eluda mwahal’a Lipaki za Jehova u swanela ku ba simuluho ya nto mañi?

¹⁰ Ka ku fapahana ni bahulu ba bulapeli ba Krestendomu ili ba ba na ni buhateleli, maeluda mwahal’a Lipaki za Jehova ki simuluho ya kimululo ni wetuluso. Ka ku ba sina litopa za bann’a bahulu, ba tahisa kozo, mbombolelwa, ni buiketo mwahal’a batu ba Jehova. Ka buñwi, eluda ni eluda wa kona ku ekeza kwa muinelo wo o munde ka ku utwela mutapi wa Mulimu butuku.

Ka Katulo ye Nepahezi ni ku Luka

11. (a) Ki muinelo mañi wa ka nañungelele o ne u fumaneha mwahal’a Bakreste ba mwa lilimo za mwanda wa pili o’ fumaneha mwa liputeho ze ñata za Lipaki za Jehova kacenu? (b) Baokameli ba na ni buikalabelo mañi kwa neku la puteho, mi ki kabakalañi?

¹¹ Nihaike butata ne bu zuhile mwa liputeho ze ñwi za Sikreste mwa lilimo za mwanda wa pili, muinelo wa zona wa ka nañungelele ne li wa kozo, swalisano, ni tabo. (1 Makorinte 1:10-12; 3:5-9; Maefese 1:2; Jakobo 2:1-9; 3:2-12; 4:11, 12; 1 Joani 1:3, 4) Muinelo o munde wa kwa moya hape wa fumaneha mwa liputeho ze ñata za Lipaki za Jehova kacenu bakeñisa mbuyoti ya Mulimu, bueteleli bwa Kreste, ni musebezi wa ka busepahali wa baokameli ba ba ketilwe. Mwa ku bona teñi kuli mwa puteho ku na ni kozo, swalisano, ni tabo, bona banna bao ba bata tuso ya bumulimu mi ka tukufalelo ba lika ku buluka kopano ya Mulimu inze i kenile, mwa muzamao ni kwa moya. (Isaya 52:11) Kopano ye si ka kena ni kamuta ha i koni ku ba ya kozo ni ya tabo, mi kaniti luli ha i koni ku ba ye lumelelwa ki Mulimu ni ku fumana mbuyoti ya hae. Ki “wa meto a kenile a’. . . sa koni ku talima bumaswe,” ku tuhelela bufosi. (Habakuki 1:13) Mwahal’a lika ze ñwi, kacwalohe, maeluda ba libelezwi ku babalela litaba za buatuli ka mukwa o nepahezi, wa mwa Mañolo. Kono ki lifi lisupo ze ñwi ze na ni ku hupulwa ha ku talimwa litaba za mufuta o cwalo?

12. Nihaike kuli maeluda ha ba tokwiwi ku talima litaba ze li za ka butu ze sa lobi milao ni likuka za Bibele, ki sifi se si swanelwa ku ezwa ka ku beya mwa munahano Magalata 6:1?

¹² Mwa kalulo i liñwi, mwa litaba ze ama ku sa utwana kwa ka butu, ne ku kana kwa ba ko ku konahala kuli batu bona ka buñwi ba tatulule litaba za bona kwa mukunda. (Mateu 18:15-17) Bakeñisa kuli maeluda haki ‘babusi fahalimw’a tumelo ya luna,’ ha ba libelelwi ku talima litaba ze li za ka butu ka sibili ili ze sa ami ku lobiwa ko kutuna kwa milao ni likuka za Bibele. Ka mo ku inezi fela, haiba ku na ni bupaki bwa kuli mutu u “swelwi a eza mulatu [inze a si ka lemuha kale ka za ona, NW],” bao ba ba na ni ze konisa za kwa moya ba “mu kutise ka moya o musa.”—Magalata 6:1.

13. Mañolo a bonisa cwañi kuli maeluda ba swanela ku nga fela muhato ka ku toma fa bupaki bwa bufosi, isiñi fa mabulatwi?

¹³ Maeluda ba na ni ku sebeleza fa ku “zamaisa ka mulao,” kamita ka ku tokwa sobozi. Kacwalo ba swanela ku nga muhato ka ku toma fa bupaki bwa bufosi, isiñi fa mabulatwi. Paulusi na elelize kuli: “U si ke wa amuhela taba ye tama yo muhulu . . . , konji ha i bihiwa ki lipaki ze peli kamba ze talu.” (1 Timotea 5:19) Ka ku ya ka sipimo sa Jehova, mwa Isilaele wa ikale mutu ya na ni mulatu wa sibi se situna n’a na ni ku bulaiwa ka ku toma ‘fa mulomo wa lipaki ze peli kamba ze talu, isiñi a li muñwi.’ Fahalimw’a seo, ka mo ku bonahalela mutu ya filwe mulatu n’a na ni sibaka sa ku talimana ni ba ba mu tamile taba, mi haiba bupaki ne bu tiile, ‘mazoho a lipaki pili ne li ona a n’a ka fita fahalimw’a mutu y’o mwa ku mu bulaya.’—Deuteronoma 17:6, 7.

14. (a) Ki sifi seo Diotrefi n’a likile ku si eza ka mafosisa? (b) Mulimu u libelela nto mañi kwa maeluda ha ba talima litaba za buatuli?

¹⁴ Muhato wa buatuli u lukela ku ngiwa ku zwelela fa mutomo o utwahala wa mwa Mañolo. Lu ba ba tabile hakalo kuli baokameli bwa mwa puteho ha ba swani sina Diotrefi wa mwa lilimo za mwanda wa pili C.E. ya n’a ikaca! Ka mafosisa n’a likile ku “leleka mwa [puteho, NW]” bao ba ne ba lakaza ku amuhela ka mufutumala mizwale ba maeto. Muapositola Joani n’a si ka talima seo hamohocwalo ni lifoso ze ñwi ka nzila ya makutela-kaufi kono n’a lemusize kuli: “Ha ni taha, ni ka mi hupulisa misebezi ya hae.” (3 Joani 9, 10) Kacwalo, katengo ka buatuli ka mwa lizazi la cwale ka lukela ku ba ni buniti bwa kuli ku na ni mutomo wa mwa Mañolo wa muhato o b’a nga ufi kamba ufi wa ku zwisa mutu mwa puteho.a Ka mo ku inezi fela, Mulimu u libelela maeluda ba Sikreste kuli ba bonise katulo ye nepahezi mwa ku talimana kwa bona ni ba bañwi. Ee luli, bao ba ba zamaisa litaba za kopano ya Jehova ya fa lifasi-mubu ba lukela ku ba “banna ba ba butali . . . , ba ba saba Mulimu, banna-sakata.”—Exoda 18:21.

15. Ki ifi kalulo ye talelezwa ki tapelo fa mukopano wa buatuli?

¹⁵ Katengo ka buatuli ka Sikreste kafi kamba kafi ka swanela ku kupa tuso ya Jehova mwa tapelo ye zwelela kwa pilu. Mukopano wa ku ba hamoho ni muzwale kamba kaizeli ya tamilwe taba ya mafosisa a matuna u swanela ku kwalulwa ka tapelo. Ka buniti fela, ne ku ka ba ko ku lukile ku lapela ka nako ifi kamba ifi mwahal’a puhisano haiba ku zuha butokwi bo bu ipitezi bwa tuso ya Mulimu.—Jakobo 5:13:18.

16. Maeluda ba swanela ku talima litaba za buatuli kamukwaufi, mi ki kabakalañi?

¹⁶ Maeluda ba ziba kuli mulumeli sina bona ya tamilwe taba ya bufosi ki “ngu” ya mwa mutapi wa Mulimu mi u swanelwa ku utwelwa butuku. (Mu bapanye Ezekiele 34:7-14.) Lingu ka sibili li tokwa pabalelo ye sishemo, kakuli ki lifolofolo ze na ni boi ze itingile ku mulisana wa zona kwa neku la silelezo. Kacwalo, kucwañi ka za lingu za swanisezo za mwa puteho ya fa sibaka? Ku si na ku kakanya ba ikutwa ku ba mwa buiketo mwa pabalelo ya Mulisana yo Mutuna, Jehova Mulimu, ni Mulisana yo Munde, Jesu Kreste. Kono balisana ba banyinyani ba mutapi ba lukela ku eza ka linzila ze ekeza kwa kozo ya mwa munahano ni maikuto a buiketo a batanga ba Jehova ba ba swana sina lingu. Haiba mu balisana ba banyinyani ba Sikreste, kacwalohe, kana mizwale ba mina ni likaizeli ba mina ba ikutwa ku ba mwa buiketo ni mwa mbombolelwa ha ba li mwa pabalelo ya mina? Ki niti, maeluda ba lukela ku swala ka tata fa milao ni likuka za Bibele. Kono mwa Mañolo ba tokwiwa ku sebelisana ni lingu ka nzila ye lilato ni ku talima litaba za buatuli ka mukwa o wile pilu, wa ka mulao, o sishemo, ni o na ni mamelelo ku ba bañwi.

17. Ki lisupo lifi za mwa Mañolo zeo maeluda ba swanela ku beya mwa munahano, sihulu mwahal’a litaba za buatuli?

¹⁷ Bakeñisa kuli ha lu si ka petahala, “kaufela lu fosa mwa linto ze ñata” ze lu bulela. (Jakobo 3:2) Mañi ni mañi wa ku luna u tokwa mufelañeke wa Mulimu ni “sitabelo se si lifa libi” sa Kreste. (1 Joani 1:8–2:2; Lisamu 130:3) Kacwalo mulisana yo munyinyani wa Sikreste u swanela ku ba ni mubonelo wa buikokobezo. U swanela hape ku hupula manzwi a Jesu a’ li: “Mo mu latela kuli batu ba mi eze, mu ba eze cwalo ni mina.” (Luka 6:31) Kelezo ye i swanelwa ku itusiswa sihulu mwahal’a litaba za buatuli. Banna ba ba fitile ku ze konisa za kwa moya ba swanela ku lika ku sikulula Mukreste ya fitile fa ku eza mafosisa ‘ka moya o musa, ha ba nze ba fa tokomelo ku ili bona, ili kuli ba si ke ba likwa ni bona.’—Magalata 6:1; 1 Makorinte 10:12.

18. (a) Ki sifi se ne si kana sa ezahala haiba maeluda ba buhisana ni ba bañwi ka buhali mwahal’a litaba za buatuli? (b) Ka ku beya mwa munahano Mareka 9:42, maeluda hamohocwalo ni Bakreste ba bañwi ba swanela ku pima ku eza nto mañi?

¹⁸ Haiba maeluda ba buhisana ni ba bañwi ka buhali mwahal’a litaba za buatuli, seo ne si kana sa fumaneha ku ba se si kona ku holofaza batu ba ba cwalo ka buñwi. Kono niha ne i kana y’a ba kuli ha ku na kolofalo ya kwa maikuto kamba ya kwa mubili ye kona ku ba teñi, ku kona ku ba ni kolofalo ya kwa moya ye tuna hahulu, mi ze konisa za baokameli li kona ku tahiswa hape mwa puzo. (Mu bapanye Jakobo 2:13.) Kacwalohe, mwahal’a litaba za buatuli ni ka linako ze ñwi kaufela, maeluda ba swanela ku ba ni musa mi ba swanela ku pima ku sitatalisa ba bañwi. Ka mo ku inezi fela, Bakreste kaufela ba tokwa ku bonisa tokomelo kwa neku la se, kakuli Jesu n’a bulezi kuli: “Mutu h’a ka wisa yo muñwi wa ba banyinyani bao ba ba lumezi ku na, se sinde ku yena nekaba ku tamelwa mwa mulala licwe la ku belela, a nepelwe mwa liwate.” (Mareka 9:42) Licwe la ku belela la fahalimu ne li le lituna hahulu kuli mane m’ata a fita ku a folofolo n’a tokwahala hañata mwa ku li potolosa, mi ha ku na mutu ya n’a ka nepelwa mwa liwate inze a na ni buima bo bu fita f’o mwa mulala wa hae ya kona ku punyuha. Kaniti, kacwalohe, eluda u swanela ku ba ni tokomelo kuli a si ke a beya sisitataliso se si kona ku tisa kolofalo ya ku ya ku ile ya kwa moya ku yena ni ku mutu ka buñwi ya sitatalisizwe ka nzila yeo.—Mafilipi 1:9-11.

Mu Zwelepili ku Bonisa Mamelelo ya ku Utwela Butuku

19. Ki kelezo mañi ya n’a file Pitrosi kwa maeluda sina yena, mi ku nga muhato o lukile ku yona ku ama cwañi litibelelo za bona?

¹⁹ Muapositola Pitrosi n’a bonisize ka m’o baokameli sina yena ne ba na ni ku lisa mutapi ha n’a ñozi kuli: “Mu lise mutapi wa Mulimu o ku mina, isi ka ku hapelezwa, kono ibe ka ku lata ku ezeza Mulimu; isi kabakala bufumu bo bu maswe, kono ibe ka pilu ye lata; Isi ka ku busa mitapi ya mina ka tata, kono ka ku ezeza mutapi mutala. Mi Mulisana yo mutuna, nako y’a ka bonahala, mu ka amuhela kuwani ya bulena, kanya, ye sa sinyehi.” (1 Pitrosi 5:2-4) Ki ka ku sebelisa fela kelezo ye cwalo ni ka ku bonisa mamelelo ya ku utwela butuku mutapi wa Mulimu ko na baokameli ba ba tozizwe ba kona ku amuhela mupuzo wa bona wa kwa lihalimu sina libupiwa za kwa moya ze sa shwi mi ko na maeluda ba ba na ni lisepo za fa lifasi-mubu ba kona ku amuhela bupilo bo bu sa feli mwa Paradaisi ya lifasi kamukana ye taha.

20. (a) Balisana ba banyinyani ba Sikreste ba lukela ku sebelisana cwañi ni balumeli sina bona? (b) Mu ikutwa cwañi ka za sebelezo ye mutala ni pabalelo ya ku utwela butuku ya maeluda ba ba na ni lilato?

²⁰ Jehova Mulimu ni Jesu Kreste bubeli bwa bona ki Balisana ba ba na ni lilato, ili ba ba mufelañeke. Kacwalo hailifo balisana ba banyinyani ba Sikreste ba swala ka tata fa lipimo za bumulimu, ba lukela ku bonisa lilato ni mufelañeke mwa ku sebelisana ni balumeli sina bona ba ba swana sina lingu. Kaniti luli, Lipaki za Jehova kamukana ba ba sepahala ba itebuha ka butungi sebelezo ye mutala ya maeluda ba ba cwalo ba ba ifana sitabelo ba ba babalela mpo ya bona ya swalele ni ku utwela mutapi wa Mulimu butuku. Buitebuho b’o, hamohomocwalo ni likute le li swanela, li kona ku boniswa ka ku ipeya kwatas’a ba ba zamaisa mwahal’a luna.

[Litaluso za kwatasi]

Ki Ufi Muhupulo Wa Mina?

◻ Jesu Kreste n’a bonisize cwañi kuli buimatalu ha bu na sibaka mwahal’a balateleli ba hae?

◻ Ki sifi seo maeluda ba swanela ku si eza ha ku amuhezwi litaelo ku zwelela kwa Sitopa se si Busa?

◻ Ka ku ya ka Isaya 32:1, 2, maeluda ba swanela ku ba simuluho ya nto mañi?

◻ Mañolo a bonisa cwañi kuli maeluda ha ba swaneli ku nga muhato fa mabulatwi fela?

◻ Balisana ba banyinyani ba Sikreste ba swanela ku nga mutapi kamukwaufi?

[Siswaniso se si fa likepe 26]

Tapelo ye zwelela kwa pilu ki ya butokwa hahulu muta ba katengo ka buatuli ba kopana ni mulumeli sina bona