11. Ki ifi taluso ye mutomo ya Zefania 1:8-11?

¹¹ Zefania 1:8-11 i ekeza z’e ka za lizazi la Jehova, kuli: “Ka lizazi la sitabelo sa [Muñ’a] Bupilo, ni ka kalimela manduna ni bana ba malena, kamukana ni ba ba apala liapalo za ku sili. Hape, mwa lizazi leo, ni ka kalimela kamukana ba ba tula libala la mwa munyako, ba ba taza ndu ya mulen’a bona ze hapilwe ka bulengwami ni ka bupumi. Mwa lizazi leo, ku bulela [Muñ’a] Bupilo, ku ka utwahala lilata la sihuwo kwa Munyako wa Litapi, ni la sililo mwa sifukambanda, ni misholoko ye mituna fa malundunyana. A mu bokolole, mina ba mwa Maketeshi, kakuli balekisi kaufela ba felile ku shwa mwa sicaba; ba ba ne ba hanelela ku fuma mali, ba yundisizwe.”

13. Ka ku ya ka bupolofita bwa Zefania, ne ku ka ezahalañi Mababilona ha ne ba ka lwanisa Jerusalema?

¹³ “Lizazi leo” la ku ikalabela kwa Juda li swana ni lizazi la Jehova la ku ota lila za hae, ku feza bumaswe, ni ku bonisa hande kuli ki yena ya m’ata ote. Mababilona ha ne ba nze ba lwanisa Jerusalema, kwa Munyako wa Litapi ne ku ka ba ni sihuwo. Mwendi munyako w’o n’o bulelwa ku ba wa litapi kakuli n’o li kwatuko ni musika wa litapi. (Nehemia 13:16) Mpi ya Mababilona ne i ka kena mwa sibaka se si bizwa sifukambanda, mi “misholoko ye mituna fa malundunyana” i kana ya talusa milumo ya Makalade ba ba taha. Ne ku ka utwahala “sililo” sa bayahi ba Maketeshi. Mwendi seo n’e li sibaka se si lumbile sa Musindi wa Tyropoeon. Ne ba ka bokololelañi? Kakuli ne ku ka feliswa lipisinisi, hamoho ni “ba ne ba hanelela ku fuma mali.”