Ku Tusa Batu Kuli Ba Sutelele ku Jehova

“Ha ku na mutu ya ka taha ku Ndate, konji ka na.”—JOANI 14:6.

 1. Jesu ya zusizwe n’a file balutiwa ba hae taelo ifi, mi ku ezaheziñi Lipaki za Jehova ha ba i mamezi?

JESU KRESTE n’a laelezi balutiwa ba hae kuli “mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile.” (Mateu 28:19) Mwa lilimo ze lishumi ze felile, Lipaki za Jehova se ba tusize batu ba ba fitelela limilyoni ze talu kuli ba tahe ku Mulimu, mi kihona ba ba kolobeza ka ku bonisa buineelo bwa bona ku yena kuli ba eze tato ya hae. Lu wabezwi hakalo ku ba tusa ku sutelela ku Mulimu!—Jakobo 4:8.

 2. Nihaike ba bañata ba sweli ba kolobezwa, ku ezaheziñi?

² Nihakulicwalo, mwa linaha ze ñwi m’o balutiwa ba bañata se ba kolobelizwe, ha ku si ka ba ni kekezeho ye swana ya palo ya bahasanyi ba Mubuso. Ki niti kuli ku na ni be se ba timezi, kakuli ka silimo ku shwa batu ba ba eza 1 pesenti. Niteñi, mwa lilimonyana ze felile, ba bañata ba yendukile ka mabaka a mañwi. Mabaka afi? Taba ye ni ye latelela li ka tatubisisa m’o batu ba sutelezwa ku Jehova ni mabaka a akalezwa ba bañwi ha ba yenduka.

Ze Lu Kutaleza

 3. (a) Musebezi o filwe balutiwa ba Jesu u zamaelela cwañi ni wa lingeloi o bulezwi kwa Sinulo 14:6? (b) Ki ifi ye bile nzila ye sebeza hande hahulu ya ku ezisa batu ku tabela lushango lwa Mubuso, kono ki bufi butata bo bu li teñi?

³ Mwa “nako ya maungulo” ye, balutiwa ba Jesu ba eza musebezi wa ku hasanya “zibo” ka za “Evangeli ye ya mubuso.” (Daniele 12:4; Mateu 24:14) Musebezi wa bona u zamaelela ni wa lingeloi le ne li “sweli Evangeli ya linako ze sa feli, ku i bulelela ba ba yahile mwa lifasi, ba masika kamukana, ni mishobo, ni lipuo, ni macaba.” (Sinulo 14:6) Ka nañungelele, mwa lifasi le, le li patehisizwe maswe ki litaba za silifasi, nzila ye sebeza ka ku fitisisa ya ku ezisa batu ku tabela Mubuso wa Mulimu ni ku ba tusa ku sutelela ku Jehova ki ku ba bulelela ka za sepo ya bupilo bo bu sa feli mwa paradaisi fa lifasi fa. Nihaike kwa utwahala ku eza cwalo, ba ba swalisana ni sicaba sa Mulimu ka mulelo fela wa ku kena mwa Paradaisi ha ba si ka toma luli mwa nzila ye kumbani ye isa kwa bupilo.—Mateu 7:13, 14.

 4. Jesu ni lingeloi le li fufa mwa mbyumbyulu ba talusa kuli kiñi ze lu kutaleza?

⁴ Jesu n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Lingeloi le li fufa mwa mbyumbyulu li huweleza “Evangeli ya linako ze sa feli” mi li bulelela ba ba yahile fa lifasi kuli: “Mu sabe Mulimu, mu mu lumbeke; kakuli nako ya hae ya ku atula i tile; mu mu kubamele, Ya ezize lihalimu ni lifasi, ni liwate, ni maweluwelu a mezi.” (Sinulo 14:7) Kacwalo, libaka le lituna ka ku fitisisa le lu kutaleza taba ye nde kikuli lu tuse batu ku sutelela ku Jehova ka Kreste Jesu.

Mo Lu Amelwa mwa Musebezi wa Jehova

 5. Ki lifi ze ne ba bulezi bo Paulusi ni Jesu ze bonisa kuli musebezi o lu eza ki wa Jehova, isiñi wa luna?

⁵ H’a ñolela Bakreste ba ba tozizwe ba bañwi, muapositola Paulusi u talusa za “sebelezo ya kutisano” mi u bulela kuli Mulimu u kutiseza batu ku yena ka sitabelo se si liulula sa Jesu Kreste. Paulusi u bulela kuli ku swana “inge Mulimu u lapela ka luna” ni kuli “lwa mi lapela bakeñisa Kreste, lu li: Mu kutisane ni Mulimu.” Ki taba kwa munati! Ibe kuli lu batoziwa ba ba li “mandumeleti a Kreste” kamba linumwana ba ba sepa ku pila fa lifasi, lu si libali ni hanyinyani kuli musebezi w’o ki wa Jehova, haki wa luna. (2 Makorinte 5:18-20) Ki Mulimu luli ya suteleza batu ili ya luta ba ba taha ku Kreste. Jesu n’a ize: “Ha ku na mutu ya ka ta ku na, konji h’a ka hohiwa ki Ndate ya ni lumile; mi na, ni ka mu zusa ka lizazi la mafelelezo. Mwa Bupolofita ku ñozwi kuli: Kamukana ba ka lutwa ki Mulimu. Cwale mutu kaufela ya utwile Ndate, mi a lutilwe ki Yena, u taha ku na.”—Joani 6:44, 45.

 6. Jehova u nyanganyisa hanyinyani cwañi macaba, kono ki bomañi ba ba fumana silelezo mwa “Ndu” ya hae ya ku lapelela?

⁶ Mwa mazazi a maungulo a, Jehova u suteleza cwañi batu ni ku ba kwalulela “munyako wa tumelo”? (Likezo 14:27; 2 Timotea 3:1) U eza cwalo sihulu ka ku bona kuli Lipaki za hae ba shaela lushango lwa hae lwa puluso ni lwa katulo ya muinelo wa linto wo o maswe. (Isaya 43:12; 61:1, 2) Ku shaela k’o, ko ku ezwa mwa lifasi kaufela ku nyanganyisa hanyinyani macaba—mi ku twaleta ku tuba kwa katulo ko ku tuha ku taha. Nihakulicwalo, batu ba “butokwa hahulu” ku Mulimu ba sweli ku comaulwa mwa muinelo wo mi ba fumana kozo mwa “Ndu” ya hae ya bulapeli bwa niti. Jehova u taleleza cwalo manzwi a hae a bupolofita a n’a ñozwi ki Hagai, a’ li: “Ni ka nyanganyisa macaba kaufela; mi bufumu bwa macaba kamukana bu ka ta kwanu, kuli Ndu yeo i tale kanya ya ka.”—Hagai 2:6, 7, litaba za kwatasi, NW; Sinulo 7:9, 15.

 7. Jehova u kwalula cwañi lipilu za batu ni ku suteleza mutu ni mutu ku yena ni ku Mwan’a hae?

⁷ Jehova u kwalula lipilu za ba ba saba Mulimu bao—bona “lika ze nde ka ku fitisisa za macaba ote”—ilikuli ite ba “tokomele litaba ze bulelwa” ki Lipaki za hae. (Hagai 2:7, Bibele ya ba Jewish Publication Society; Likezo 16:14) Sina mo ne ku bezi mwa lilimo za mwanda wa pili, Jehova fokuñwi u itusisanga mangeloi a hae kuli a etelele Lipaki za hae kwa batu ba ba na ni niti ba ba lilokezi tuso ya hae. (Likezo 8:26-31) Batu ha ba nze ba ituta za litukiso ze nde-nde zeo Mulimu a ba ezelize ka Mwan’a hae, yena Jesu Kreste, ba sutelezwa ku Jehova ki lilato la hae. (1 Joani 4:9, 10) Ee, Mulimu u suteleza batu ku yena ni ku Mwan’a hae ka “sishemo,” kamba “lilato le li sepahala” la Hae.—Jeremia 31:3, litaba za kwatasi, NW.

Jehova U Suteleza Bomañi?

 8. Jehova u suteleza batu ba ba cwañi?

⁸ Jehova u suteleza ku yena ni ku Mwan’a hae ba ba futoka ku Mu bata. (Likezo 17:27) Kwa batu bao ku fumaneha “ba ba tonga, ni ba ba lila, kabakala bumaswe kaufela bo bu eziwa” mwa Krestendomu mi, mane, ni mwa lifasi kaufela. (Ezekiele 9:4) Ba “ikutwa bubotana mwa pilu.” (Mateu 5:3) Ee, ki “ba ba ishuwa [“ba ba ikokobeza,” litaba za kwatasi, NW] mwa lifasi,” ili ba ba ka yaha mwa paradaisi fa lifasi ku ya ku ile.—Zefania 2:3.

 9. Jehova u kona ku ziba cwañi batu “ba ba ketezwi bupilo bo bu sa feli,” mi bao u ba suteleza cwañi?

⁹ Jehova wa kona ku bona ze mwa pilu ya mutu. Mulena Davida n’a bulelezi Salumoni mwan’a hae kuli: “[Muñ’a] Bupilo u tatuba lipilu, mi u ziba milelo ni mihupulo kaufela. Ha u mu bata, u ka mu fumana.” (1 Makolonika 28:9) Jehova wa kona ku bona haiba mutu wa kona ku amuhela litukiso za Mulimu za swalelo ya libi ni sepo ya bupilo bo bu sa feli mwa muinelo o munca ili o lukile wa Mulimu, ili nto ye itingile ka mo i inezi pilu ya mutu ni moya, kamba buinelo bwa hae bo butuna. (2 Pitrosi 3:13) Ka Linzwi la hae, leo Lipaki za hae ba kutaza ni ku luta, Jehova wa suteleza ku yena ni ku Mwan’a hae “kaufela ba ba ketezwi bupilo bo bu sa feli,” mi bao ba fita fa ‘ku lumela.’—Likezo 13:48.

10. Kiñi se si bonisa kuli Jehova h’a suteleza ba bañwi ni ku siya ba bañwi ha ku talusi kuli u tomelanga cimo ze ka ezahala mwa nako ya kwapili?

¹⁰ Kana Jehova h’a suteleza ba bañwi ni ku siya ba bañwi ku talusa kuli wa tomelanga cimo ze ka ezahala mwa nako ya kwapili? Kutokwa! Mulimu h’a suteleza batu, ku itingile fa litakazo za bona. Wa kuteka tukuluho ya bona. Jehova u beya fapil’a bayahi ba lifasi kacenu keto ye swana ni ye ne ba filwe Maisilaele lilimo ze fitelela 3,000 kale-kale k’o, Mushe ha n’a ize: “Kacenu ni beile fapil’a hao bupilo ni bunde, lifu ni bumaswe . . . Kacenu ni biza lihalimu ni lifasi kuli li be lipaki ku mina, li pake kuli: Ni beile fapil’a hao bupilo ni lifu, ni beile mbuyoti ni sikuto. Hakulicwalo, iketele bupilo kuli u pile, wena ni baikulu ba hao. Iketele ku lata [Jehova, NW] Mulimu wa hao, ku utwa linzwi la hae ni ku mu kumalela; kakuli ki Yena bupilo bwa hao, mi butelele bwa mazazi a hao bu ku Yena.”—Deuteronoma 30:15-20.

11. Maisilaele ne ba ka keta cwañi bupilo?

¹¹ Mu lemuhe kuli Maisilaele ne ba ka keta bupilo ha ne ba ka ‘lata Jehova, ku utwa linzwi la hae, ni ku mu kumalela.’ Manzwi ao ha n’a bulezwi, sicaba sa Isilaele ne ba si ka hapa kale Naha ya Sepiso. Ne ba yemi fa mabala a Moabi, inze ba itukiseza ku sila nuka ya Jordani ni ku kena mwa Kanana. Nihaike ne ku lukile kuli ba nahane za naha “ye nde, ye tuna” ili “mo ku buba mabisi ni linosi” ye ne ba tuha ba fiwa, ne ba ka i fumana ibile fela ha ne ba ka lata Jehova, ku utwa linzwi la hae, ni ku mu kumalela. (Exoda 3:8) Mushe n’a talusize hande seo, ha n’a ize: “Haiba u mamela litaelo za Mulena, Mulimu wa hao, ze ni ku fa kacenu, mi haiba u mu lata, wa mu mamela, ni ku buluka milao ya hae kaufela, fohe, u ta iketa hande, mi u ta fetuha sicaba sa batu ba bañata. Mulena, Mulimu wa hao, u ta ku tohonolofaza mwa naha y’o tuha u hapa.”—Mulao 30:16, Bibele ye Kenile, hatiso ya 1984; litaku li siyamisizwe ki luna.

12. Mutala wa Maisilaele u swanela ku lu lutañi ka za musebezi wa luna wa ku kutaza ni ku luta?

¹² Kana litaba zeo ha li swaneli ku lu luta se siñwi ka za musebezi wa luna wa ku kutaza ni ku luta mwa nako ye ya maungulo? Lwa nahananga ka za Paradaisi fa lifasi ni ku bulela ka za yona mwa bukombwa bwa luna. Kono luna kamba balutiwa be lu tahisa ha lu na ku bona talelezo ya sepiso yeo haiba lu sebeleza Mulimu kabakala buitati. Sina Maisilaele, luna ni be lu luta lu lukela ku ‘lata Jehova, ku utwa linzwi la hae, ni ku mu kumalela.’ Ha lu hupula seo ha lu nze lu eza bukombwa bwa luna, lu ka na lu swalisana ni Mulimu mwa ku suteleza batu ku yena.

Ba Ba Sebeza Ni Mulimu

13, 14. (a) Liñolo la 1 Makorinte 3:5-9 li bonisa kuli lu fita cwañi fa ku ba ba ba sebeza ni Mulimu? (b) Ki mañi ya swanela ku lumbiwa ha ku ba ni kekezeho ifi kamba ifi? Libaka?

¹³ Paulusi n’a swaniselize ku swalisana ni Mulimu kwa ku lima mwa simu. N’a ñozi kuli: “Ibo Apolosi ki mañi? Ni Paulusi ki mañi? Ki batanga fela be mu lumezi ka bona, mutu ni mutu mw’a mu fezi Mulena. Na ni calile, Apolosi u selaezi mezi; kono ya melisize, ki Mulimu. Hakulicwalo, ya na ni taba, hasi yena ya cala, kamba ya selaela; kono ki Mulimu ya melisa. Ya cala ni ya selaela ki nto i liñwi fela; mi yo muñwi ni yo muñwi u ka amuhela mupuzo wa hae luli, ka tikanyo ya musebezi wa hae. Kakuli lu ba ba sebeza ni Mulimu; ki mina simu ya Mulimu.”—1 Makorinte 3:5-9.

¹⁴ Ka ku ba ba ba sebeza ni Mulimu, lu lukela ku cala “Linzwi la mubuso” ka busepahali mwa lipilu za batu, kihona lu ka selaela ku tabela kufi kamba kufi ko ba bonisa, ka misipili ya makutisezo ni lituto za Bibele ze itukiselizwe hande. Haiba mubu, yona pilu, i inzi hande, Jehova u ka peta musebezi wa hae ka ku melisa peu ya niti ya Bibele kuli i be simela se si beya ka buñata. (Mateu 13:19, 23) U ka suteleza mutu y’o ku yena ni ku Mwan’a hae. Kwa nalulelule, he, kekezeho ifi kamba ifi ya palo ya bashaeli ba Mubuso i tiswa ki z’a ezize Jehova kwa lipilu za batu, ili ku melisa peu ya niti ni ku suteleza ba ba cwalo ku yena ni ku Mwan’a hae.

Buyahi Bo Bu Ka Inelela

15. Paulusi n’a itusisize swanisezo ifi kuli a bonise mo lu tuseza ba bañwi ku ba ni tumelo?

¹⁵ Nihaike lwa tabela kekezeho, lu bata ka pilu kaufela ku bona batu inze ba zwelapili ku lata Jehova, ku utwa linzwi la hae, ni ku mu kumalela. Lwa swaba ha lu bona ba bañwi ha ba fola kamba ku yenduka. Kana ku na ni se lu kona ku eza kuli lu tibele nto yeo? Mwa swanisezo ye ñwi, Paulusi u bonisa mo lu kona ku tuseza ba bañwi ku ba ni tumelo. U ñola kuli: “Ha ku na ya ka yaha mutomo u sili, konji o ni yahile, ili Kreste. Yo muñwi h’a ka yaha fa mutomo wo ka gauda, kamba ka silivera, kamba ka macwe a butokwa, kamba ka likota, kamba ka musuhela, kamba ka mwange, musebezi wa mutu ni mutu u ka bonahala. Kakuli la ta lizazi le li ka u bonahalisa, li ka itahisa ka mulilo; mi mulilo u ka lika musebezi wa mutu ni mutu kana u cwañi.”—1 Makorinte 3:11-13.

16. Milelo ya liswanisezo ze peli za Paulusi i shutana cwañi? (b) Buyahi bwa luna bu kona ku sinyeha cwañi ni ku palelwa ku banduka mulilo?

¹⁶ Mwa swanisezo ya Paulusi ya za simu, kulo i itingile fa ku cala ka tokomelo, ku selaela ka nako ni nako, ni mbuyoti ya Mulimu. Swanisezo ye ñwi ya muapositola i koñomeka buikalabelo bwa sikombwa wa Sikreste ku ze ka ezahala kwa buyahi bwa hae. Kana u yahezi fa mutomo o tiile ka liyahiso za ngana? Paulusi u lemusa kuli: “Mutu ni mutu a tokomele mw’a yahela.” (1 Makorinte 3:10) Ha se lu ezisize mutu ku tabela ka ku mu bulelela ka za sepo ya bupilo bo bu sa feli mwa Paradaisi, kana lu luta fela matatekelo a zibo ya Mañolo mi kihona lu koñomeka fela z’a lukela ku eza mutu kuli a fumane bupilo bwa kamita? Kana buluti bwa luna bu swanela fela ku ba cwana: ‘Haiba mu bata ku pila ku ya ku ile mwa Paradaisi, mu lukela ku ituta, ku ya kwa mikopano, ni ku kutaza’? Haiba ku cwalo, u zibe ha lu yaheli tumelo ya mutu fa mutomo o tiile, mi ze lu yaha mwendi ha li na ku banduka mwa mulilo wa litiko kamba ku zwelapili ku yema ka nako ye telele. Ku lika ku suteleza batu ku Jehova ka sepo fela ya bupilo mwa Paradaisi hamulaho wa ku mu sebeleza lilimonyana ku swana ni ku yahisa ka “likota, kamba ka musuhela, kamba ka mwange.”

Ku Hulisa Lilato ku Mulimu ni Kreste

17, 18. (a) Ku tokwahalañi luli kuli tumelo ya mutu i tiye? (b) Lu kona ku tusa cwañi mutu kuli Kreste a yahe mwa pilu ya hae?

¹⁷ Kuli tumelo i zwelepili, i lukela ku toma fa swalisano ya ka butu ni Jehova Mulimu ka Jesu Kreste. Ka ku ba kuli ha lu si ka petahala, lu kona ku ipumanela silikani sa kozo seo ni Mulimu ka Mwan’a hae fela. (Maroma 5:10) Mu hupule kuli Jesu n’a ize: “Ha ku na mutu ya ka taha ku Ndate, konji ka na.” Mwa ku tusa ba bañwi ku ba ni tumelo, ‘ha ku na ya ka yaha mutomo u sili, konji o yahilwe, ili Kreste.’ Ku tokwahalañi f’o?—Joani 14:6; 1 Makorinte 3:11.

¹⁸ Ku yahela fa mutomo wa Kreste ku talusa ku luta ka nzila ye tusa muituti wa Bibele ku ba ni lilato le lituna ku Jesu ka zibo ye tezi ya kuli ki Yena Muliululi, Toho ya puteho, Muprisita yo Muhulu y’a lilato, ni Mulena y’a sweli ku busa. (Daniele 7:13, 14; Mateu 20:28; Makolose 1:18-20; Maheberu 4:14-16) Ku talusa ku ba tusa ku lumela kuli Jesu ki wa luli kuli mane ku swana inge u yahile mwa lipilu za bona. Tapelo ya luna ka za bona i swanela ku swana ni kupo ya Paulusi ya n’a ezelize Bakreste ba kwa Efese. N’a ñozi kuli: “Ni kubama ka mañwele fapil’a Ndate, . . . ni nze ni lapela kuli . . . Kreste a yahe mwa lipilu za mina ka tumelo; ni kuli [mu hule] mwa lilato ni ku tiya mwateñi.”—Maefese 3:14-17.

19. Ku swanela ku ezahalañi hamulaho wa ku hulisa lilato ku Kreste mwa lipilu za baituti ba luna ba Bibele, kono lu lukela ku lutañi?

¹⁹ Ha lu yaha ka nzila ye ka hulisa lilato la ku lata Kreste mwa lipilu za baituti ba luna, ku si na kuliñi seo si ka hulisa lilato la ku lata Jehova Mulimu. Lilato, maikuto, ni makeke a Jesu a bonisa hande mikwa ya Jehova. (Mateu 11:28-30; Mareka 6:30-34; Joani 15:13, 14; Makolose 1:15; Maheberu 1:3) Kacwalo batu ha ba nze ba ziba ni ku lata Jesu, ba ka ziba ni ku lata Jehova.a (1 Joani 4:14, 16, 19) Lu tokwa ku luta baituti ba Bibele kuli Jehova ki yena muñ’a zeo Kreste a ezelize batu ni kuli kabakaleo lu lukela ku mu lapela, ku mu lumba, ni ku itumela ku Yena ya li “Mulimu ya lu yamunwena.”—Samu 68:19, 20; Isaya 12:2-5; Joani 3:16; 5:19.

20. (a) Lu kona ku tusa cwañi batu ku sutelela ku Mulimu ni ku Mwan’a hae? (b) Ku ka nyakisiswañi mwa taba ye tatama?

²⁰ Ka ku ba ba ba sebeza ni Mulimu, lu tuse batu ku sutelela ku yena ni ku Mwan’a hae, ili ku ba tusa ku ba ni lilato ni tumelo mwa lipilu za bona. Jehova u ka ba cwalo wa luli ku bona. (Joani 7:28) Ka Kreste, ba ka kona ku swalana bulikani bo butuna ni Mulimu, mi ba ka mu lata ni ku mu kumalela. Ha ba na ku yubeka sebelezo ya bona ya ka lilato, inze ba lumela kuli lisepiso za Jehova ze nde-nde li ka talelezwa ka nako y’a tomile. (Malilo 3:24-26; Maheberu 11:6) Nihakulicwalo, ha lu nze lu tusa ba bañwi ku ba ni tumelo, sepo, ni lilato, lu lukela ku yaha tumelo ya luna tota kuli i be sina sisepe se si tiile se si kona ku tiyela mañungwa a’ bifile. Taba yeo i ka nyakisiswa mwa taba ye tatama.

[Litaluso za kwatasi]

Lundululo

◻ Hañata lu tusanga cwañi batu ku tabela lushango lwa Mubuso, kono ki lufi lubeta lo lu li teñi?

◻ Jehova u suteleza batu ba ba cwañi ku yena ni ku Mwan’a hae?

◻ Ne ku itingile fañi kuli Maisilaele ba kene mwa Naha ya Sepiso, mi lu kona ku itutañi ku seo?

◻ Lu amiwa cwañi mwa ku tusa batu ku sutelela ku Jehova ni ku Mwan’a hae?

[Siswaniso se si fa likepe 10]

Nihaike lu tahiseza batu sepo ya bupilo bo bu sa feli mwa Paradaisi, mulelo wa luna o mutuna kikuli lu ba suteleze ku Jehova

[Maswaniso a fa likepe 13]

Misipili ya luna ya makutisezo i kona ku ba ye sebeza hande hahulu haiba lu itukiseza hande