TUTO 42
Bibele Ibulelañi ka za Bukwasha ni Linyalo?
Mwa lizo zeñwi, batu balumela kuli mutu hakoni kuba ni tabo konji hakanyala kamba kunyalwa. Kono haki batu kaufela babanyezwi kamba kunyalwa babatabile, mi haki makwasha kaufela babasina tabo. Mane Bibele ibulela kuli bukwasha ni linyalo ki limpo.
1. Ki bufi bunde bwa kuba likwasha?
Bibele ibulela kuli: “Mutu kaufela yakena mwa linyalo ueza hande, kono mutu kaufela yasakeni mwa linyalo ukaeza hande hahulu.” (Mubale 1 Makorinte 7:32, 33, 38.) Ki mwa linzila mañi mo mutu yali likwasha akona ‘kueza hande hahulu’? Bakreste babali makwasha bashutana ni mutu ya mwa linyalo yanani buikalabelo bwa kueza zatokwa mutu yanyalani ni yena. Kacwalo, banani tukuluho yeñata. Ka mutala, babañwi bapetanga lika zeñata mwa musebezi wa kukutaza mwa linzila zeñata, inge cwalo kuyo kutaleza kwa naha isili. Mi sa butokwa ni kufita kikuli, bakona kuitusisa nako yabona yeñata kutiisa silikani sabona ni Jehova.
2. Ki bufi bunde bwa kunyala kamba kunyalwa ka mulao?
Sina feela bukwasha, linyalo ni lona linani bunde bwalona. Bibele ibulela kuli “bababeli bafita alimuñwi.” (Muekelesia 4:9) Taba ye ki ya niti sihulu kwa Bakreste babasebelisa likuka za mwa Bibele mwa linyalo labona. Muuna ni musali babanyalani ka mulao baitamanga kuli bakalatana, kukutekana, ni kuunga bakubona kuba ba butokwa hahulu mwa bupilo bwabona. Kabakaleo, batu babanyalani ka mulao basilelelizwe mi bashutana ni batu babapila feela hamoho basika nyalana ka mulao. Mi hape kutusa kuba ni lubasi lolunde lolusilelelizwe.
3. Jehova uunga cwañi linyalo?
Jehova hanaalukisize kuli muuna ni musali bapili banyalane, naabulezi kuli: “Muuna ukasiya ndatahe ni mahe mi ukakumalela musalaa hae.” (Genese 2:24) Jehova ubata kuli muuna ni musali baba mwa linyalo balatane mi bazwelepili kusepahala kufitela lifu. Ulumeleza feela kuli linyalo lifele haiba yomuñwi ku bona aeza bubuki. Mi nihaiba mwa muinelo ocwalo, Jehova ufile tukuluho ku musali kamba muuna ya mwa linyalo yasina mulatu, kuiketela kufelisa linyalo kamba kutokwa.a (Mateu 19:9) Jehova halumelezi Bakreste kukena mwa linyalo la libali.—1 Timotea 3:2.
MUBATISISE
Muitute zekona kumitusa kuba ni tabo ni zekona kumitusa kutabisa Jehova ibe kuli mu makwasha kamba mu mwa linyalo.
4. Musebelise hande bukwasha bwamina
Jesu naanga bukwasha sina mpo. (Mateu 19:11, 12) Mubale Mateu 4:23, mi kihona mukaalaba puzo yelatelela:
Jesu naaitusisize cwañi mpo ya kuba likwasha kusebeleza Ndatahe ni kutusa babañwi?
Bakreste bakona kuikola kusebelisa bukwasha bwabona sina mwanaaezelize Jesu. Mubuhe VIDIO, mi kihona mukaalaba puzo yelatelela.
Bakreste bakona kuitusisa cwañi bukwasha bwabona ka nzila yeka bafumanisa limbuyoti?
Kana mwaziba?
Mwa Bibele hakuna fokubonisa lilimo zaswanela kunyala kamba kunyalwa mutu. Nihakulicwalo, Bibele isusueza makwasha kulibelela “nako ya litakazo za kwa bunca” kufela, ili nako yeo litakazo za somano libanga zemaata hahulu mi likona kutahiseza mutu kusaeza katulo yende.—1 Makorinte 7:36.
5. Mukete hande mutu yemuka nyalana ni yena
Kuketa mutu wa kunyalana ni yena ki katulo ya butokwa hahulu yemuswanela kuisa pilu. Mubale Mateu 19:4-6, 9, mi kihona mukanyakisisa puzo yelatelela:
Ki kabakalañi Mukreste hasaswaneli kumatela kuba mwa linyalo?
Bibele yakona kumitusa kuziba zemuswanela kunyakisisa ku mutu yemubata kunyalana ni yena. Sa butokwa ni kufita ki kuli mubate mutu yalata Jehova.b Mubale 1 Makorinte 7:39 ni 2 Makorinte 6:14. Mi kihona mukaalaba lipuzo zelatelela:
Ki kabakalañi haluswanela kunyala kamba kunyalwa feela ki Mukreste sina luna?
Mubona cwañi, Jehova naaka ikutwa cwañi haiba munyala kamba kunyalwa ki mutu yasa mulati?
Haiba mupana lifolofo zepeli zeshutana kwa joko, likanyanda luli. Ka nzila yeswana, Mukreste yanyalana ni mutu yasalapeli Jehova, ukaba ni matata amañata
6. Muunge linyalo sina mwaliingela Jehova
Mwa Isilaele wa kwaikale, baana nebalelekanga basali babona ka mabaka asautwahali. Mubale Malaki 2:13, 14, 16, mi kihona mukanyakisisa puzo yelatelela:
Ki kabakalañi Jehova hatoile teleko?
Kufelisa linyalo kuutwisanga hahulu butuku mutu ya mwa linyalo yasika fosa mi banana baziyelehanga hahulu
Mubuhe VIDIO, mi kihona mukanyakisisa puzo yelatelela.
Haiba munyezwi ku mutu yasalati Jehova, ki lika mañi zemuswanela kueza kuli mube ni tabo mwa linyalo?
7. Musebelise likuka za Jehova mwa linyalo lamina
Mutokwa kueza momukonela kaufela kuli musebelise likuka za Jehova mwa linyalo lamina.c Haiba mueza cwalo, Jehova uka mifuyaula. Mubuhe VIDIO.
Mubale Maheberu 13:4, mi kihona mukanyakisisa lipuzo zelatelela:
Mubona cwañi, kana likuka za Jehova ka za linyalo lilukile? Ki kabakalañi hamualaba cwalo?
Jehova ubata kuli Bakreste banyalane ka mulao mi haiba bakauhana baeze cwalo ka mulao, mi mwa linaha zeñata kunani milao yebulela ka za manyalo ni litelekano yebaswanela kulatelela batu. Mubale Tite 3:1, mi kihona mukanyakisisa puzo yelatelela:
Haiba munyezi kamba kunyalwa, kana muñolisize linyalo lamina?
MUTU YOMUÑWI UKONA KUMIBUZA KULI: “Za kunyalana ka mulao ki zañi? Kana batu habakoni kupila feela hamoho esi kunyalana ka mulao?”
Nemuka alaba cwañi?
LITABA KA BUKUSWANI
Bukwasha ni linyalo ki limpo zezwa ku Jehova. Makwasha kamba batu baba mwa linyalo bakona kuba ni tabo haiba balatelela likuka za Jehova.
Mulundulule
Mutu ukona kusebelisa cwañi hande bukwasha bwahae?
Ki kabakalañi Bibele haibulela kuli luswanela kunyalela feela ku Mulena?
Ki lifi libaka la mwa Mañolo lelilumeleza batu babanyalani kufelisa linyalo?
MUBONE LITABA ZEÑWI
‘Kunyalela feela ku Mulena’ kutalusañi?
“Lipuzo Zezwa Kwa Babali” (Tawala ya Mulibeleli, July 1, 2004)
Mubuhe mavidio amabeli akona kumitusa kueza hande katulo ya kukala libato ni kunyala kamba kunyalwa.
Mubone libaka muzwale yomuñwi haikutwa kuli Jehova umufile lika zeñata kufita zasiile kwamulaho.
Ki lika mañi zaswanela kunyakisisa mutu pili asika nahana kale za kufelisa linyalo lahae kamba kukauhana ni mutu yanyalani ni yena?
“Mukuteke ‘Sakopanyize Mulimu’” (Tawala ya Mulibeleli, December, 2018)
a Mubone Litaluso za Kwa Mafelelezo 4 zebulela ka za kukauhana haiba yomuñwi mwa linyalo haasika eza bubuki.
b Mwa lizo zeñwi, bashemi baketelanga bana babona mutu wa kunyalana ni yena. Haiba kona mokuinezi cwalo komupila, bashemi babalilato baswanela kunyakisisa haiba mutu yebabata kuli mwanaa bona anyale kamba kunyalwa walata Jehova isiñi kabakala kuli ufumile kamba uzibahala hahulu.
c Haiba mupila ni mutu yemusika nyalana kale ni yena, muswanela kuatula haiba mukatuhela kupila ni yena kamba mukanyalana ni yena.