Ku ba ni Sishemo sa Mulimu ku Libisa Kwa Bupilo bo bu sa Feli

“Wena Muñaa Bupilo, u ka fuyola ya na ni niti; u ka mu sileleza ka sishemo sa hao inge tebe.”—Samu 5:12.

1, 2. Ki kupo mañi yeo Elia naa fitisize ku mbelwa wa kwa Sarepta, mi Elia naa mu sepisizeñi?

MUSALI ni mwanaa hae ne ba lapile, mi mupolofita wa Mulimu ni yena naa lapile. Mbelwa wa kwa Sarepta yo ha naa li a tukise mulilo wa ku apeela teñi, mupolofita Elia a mu kupa mezi ni sico. Na tabela ku mu fa mezi, kono haili sico, naa na ni feela “kabupinyana ka ka felela mwa lizoho, ka ka inzi mwa tubana, ni olinyana mwa silibelo.” Naa boni kuli naa sa koni ku fa mupolofita yo lico, mi a mu taluseza cwalo.—1 Mal. 17:8-12.

² Kono Elia a tundamena a li: “U ezeze na pili sinkwanyana, u ni tiseze sona; kihona u ka ikapeela wena ni mwanaa hao. Kakuli Muñaa Bupilo Mulimu wa Isilaele sa bulela ki se, u li; Bupi bo bu mwa tubana ha bu na ku fukuzeha, ni oli ye mwa silibelo ha i na ku fela.”—1 Mal. 17:13, 14.

 3. Ki taba mañi ya butokwa ye lu talimani ni yona?

³ Taba ya naa talimani ni yona mbelwa yo ne i sa ami feela ku atula sa naa ka eza ka za lico za hae za mafelelezo. Kana naa ka sepa kuli Jehova naa ka pulusa yena ni mwanaa hae kamba kana naa ka iyakatwa butokwi bwa hae bwa kwa mubili ku fita sishemo ni bulikani bwa hae ni Mulimu? Kaufelaa luna lu talimani ni puzo ye swana ni yeo. Kana lu ka iyakatwa hahulu ku shemubiwa ki Mulimu ku fita ku ipumanela bufumu? Lu na ni mabaka a tiile a ku sepa ni ku sebeleza Mulimu. Mi ku na ni mihato ye lu kona ku nga mwa ku bata ni ku fumana sishemo sa Mulimu.

‘Ki Wena ya Lukela ku Lapelwa’

 4. Ki kabakalañi Jehova haa lukela ku lapelwa ki luna?

⁴ Jehova u na ni tukelo ya ku libelela kuli batu ba ka mu sebeleza ka nzila ye swanela. Sikwata sa batanga ba hae ba kwa lihalimu ne si tiiselize buniti bwa taba yeo ka ku bulela hamoho kuli: “Mulena ni Mulimu wa luna, ki Wena ya lukela ku fiwa kanya, ni likute, ni maata; kakuli ki Wena ya ezize linto kamukana, mi ha li li teñi, niha ne li bupilwe, ki ka ku lata kwa hao.” (Sin. 4:11) Kabakala kuli ki yena Mubupi, Jehova wa lukela ku lapelwa ki luna.

 5. Ki kabakalañi lilato la Mulimu ha li swanela ku lu susuezwa ku mu sebeleza?

⁵ Libaka le liñwi le lu na ni lona la ku sebeleza Jehova ki lilato la hae le lituna ku luna. Bibele i li: “Mulimu a eza mutu ka siswaniso sa hae; a mu eza ka siswaniso sa Mulimu. A ba eza ili muuna ni musali.” (Gen. 1:27) Batu ba na ni maata e ba filwe ki Mulimu a ku nahana ni ku eza likatulo. Ka ku lu fa bupilo, Jehova u bile Ndataahe batu. (Luka 3:38) Sina ndate kaufela yo munde, Jehova u ezize ze tokwahala kaufela kuli bana ba hae ba ikole bupilo. ‘U pazulisa lizazi la hae’ ni ku ‘nelisa lipula za hae,’ ilikuli lifasi li lu tahiseze lico ze ñata, li nze li buheha.—Mat. 5:45.

6, 7. (a) Ki bumaswe mañi bo Adama naa tahiselize ba ba simuluha ku yena kaufela? (b) Sitabelo sa Kreste si ka ezezañi ba ba bata sishemo sa Mulimu?

⁶ Jehova hape u lu yangwezi ku ze maswe hahulu ze tahiswa ki sibi. Ka ku eza sibi, Adama naa bile sina sitakwa ya uzweza lubasi lwa hae ni ku yo nwa. Ka ku fetuhela Jehova, Adama naa palelwisize bana ba hae ku ba ni talelezo ya tibelelo ya bona, yona ya ku ba ni tabo ya ku ya ku ile. Buitati bwa hae bu kenyize batu mwa butanga bwa mubusi ya situhu, ili ku sa petahala. Kacwalo batu kaufela ba kana ba ba kula, ku swaba, mi kwa mafelelezo ni ku shwa. Ku lukulula mutanga ku tokwa tifo, mi Jehova u lifile tifo yeo ye kona ku lu yangwela kwa lika ze maswe zeo. (Mu bale Maroma 5:21.) Ka ku ya ka tato ya Ndataahe, Jesu Kreste naa fanile “bupilo bwa hae, kuli a liulule ba bañata.” (Mat. 20:28) Tuso ka ku tala ya sona sitabelo seo i tuha i fumanwa ki ba ba shemubiwa ki Mulimu.

⁷ Mubupi wa luna Jehova u ezize ze tuna ka ku fitisisa ili ku lu fa bupilo bwa tabo, bo bu na ni mulelo. Haiba a lu shemuba, lu ka kona ku bona mwa ka feliseza bumaswe kaufela bo bu nyandisize batu. Ka butu, mañi ni mañi wa luna u ka zwelapili ku boniswa ki Jehova mwa bela mufani wa ‘ba ba bata mupuzo.’—Maheb. 11:6.

“Sicaba sa Hao si Kopana si Nze si Lata”

 8. Ze ne ezahezi ku Isaya li lu lutañi ka za ku sebeleza Mulimu?

⁸ Ku fumana sishemo sa Mulimu ku tokwa ku sebelisa hande tukuluho ya luna ya ku iketela. Ku cwalo kakuli Jehova haa hapelezi batu ku mu sebeleza. Mwa linako za Isaya, Mulimu naa buzize kuli: “Ni ka luma mañi? Ku ka ya mañi bakeñisa luna?” Ka ku hupula kuli mupolofita yo naa na ni tukelo ya ku eza keto, Jehova naa mu kutekile. Mu nahane mwa naa ikutwezi hande Isaya ha naa alabile kuli: “Ki na yo, u lume na!”—Isa. 6:8.

9, 10. (a) Lu swanela ku sebeleza Jehova ka moya mañi? (b) Ki kabakalañi ha lu swanela ku sebeleza Jehova ka pilu kaufela?

⁹ Batu ba na ni tukuluho ya ku sebeleza Mulimu kamba ku sa eza cwalo. Jehova u bata kuli lu mu sebeleze ka ku itatela. (Mu bale Joshua 24:15.) Ba ba sa lati Mulimu kaufela, bulapeli bwa bona ha bu koni ku mu tabisa; mi hape ha tabeli bulapeli bwa bao mulelo wa bona ki wa ku tabisa feela ba bañwi. (Makolo. 3:22) Ha ne lu ka sebeleza Mulimu “ka ku zina-zina” ka ku lumeleza lika za lifasi ku lu hakanyisa mwa bulapeli, ne lu si ke lwa shemubiwa ki Mulimu. (Ex. 22:29, NW) Jehova wa ziba kuli ki ko kunde ku luna ku mu sebeleza ka pilu kaufela. Mushe naa susuelize Maisilaele ku keta bupilo ka ‘ku lata Muñaa Bupilo Mulimu wa bona, ku utwa linzwi la hae ni ku mu kumalela.’—Deut. 30:19, 20.

¹⁰ Mulena Davida wa Isilaele wa kwaikale naa opelezi Jehova kuli: “Sicaba sa hao si kopana si nze si lata, mwa lizazi la hao la ku puma ndwa, ka ze kenile za mikabo. Micaha ya hao i ta ku wena, sina puka ya malungasiku.” (Samu 110:3) Batu ba bañata kacenu ba iyakatwa hahulu minyaka ni bufumu. Kono ba ba lata Jehova bona, sebelezo ya bona ye kenile ki yona ya butokwa ka ku fitisisa. Cisehelo ye ba kutaza ka yona taba ye nde i paka hande kuli sa butokwa luli ku bona ki sifi. Ba na ni sepo ye tiile ya kuli Jehova wa kona ku ba fa ze ba tokwa ka zazi.—Mat. 6:33, 34.

Matabelo aa Libisa Kwa Sishemo sa Mulimu

11. Ki bunde mañi bo ne ba sepa Maisilaele ku fumana ka ku fa matabelo ku Jehova?

¹¹ Mwa bulikani bwa Mulao, batu ne ba fanga matabelo a swanela kuli ba shemubiwe ki Mulimu. Kwa Livitike 19:5 lu bala kuli: “Ha mu ka tiseza Muñaa Bupilo sitabelo sa buitumelo, mu ka si tisa ka mukwa o lumelelwa.” Mwa buka ye swana lu bala kuli: “Ha mu ka tiseza Muñaa Bupilo sitabelo sa buitumelo, mu si tiseza Muñaa Bupilo ka ku lata kwa mina.” (Liv. 22:29) Maisilaele ha ne ba fa matabelo a lifolofolo a swanela fa aletare ya Jehova, musi o ne u tunya teñi ne u li sina “munko o munati” ku Mulimu wa niti. (Liv. 1:9, 13) Naa tabiswanga ni ku katuluswa ki liponiso zeo za lilato ze ne eziwa ki batu ba hae. (Gen. 8:21, NW, litaluso za kwatasi) Mwa likalulo za Mulao zeo, lu fumana sikuka se si sebeza kacenu. Jehova u shemuba ba ba fana matabelo a swanela ku yena. Ki matabelo a cwañi aa amuhelanga? Ha lu nyakisiseñi likalulo ze peli za bupilo bwa luna, ili lipulelo za luna ni muzamao wa luna.

12. Ki likezo mañi ze ne ka ezisa ku ‘beela Mulimu mibili ya luna sina sitabelo’ ku ba nto ye mu filikanya?

¹² Mwa liñolo la naa ñolezi Maroma, muapositola Paulusi naa ñozi kuli: “Mu beele [Mulimu] mibili ya mina, ibe sitabelo se si pila, se si kenile, se si kateleha ku Mulimu; ki yona sebelezo ye mi lukezi.” (Maro. 12:1) Ku fumana sishemo sa Mulimu ku tokwa kuli mutu a buluke mubili wa hae u li o amuheleha ku Mulimu. Ha naa ka isilafaza ka kwai, milyani ye kola, kamba ka butahwa, sitabelo sa hae ne si ka ba sa mbango. (2 Makor. 7:1) Hape ka ku ba kuli “ya pila mwa buhule, u foseza mubili wa hae luli,” muzamao o maswe kaufela u tahisa kuli sitabelo sa hae si be se si filikanya Jehova. (1 Makor. 6:18) Mutu kuli a tabise Mulimu, u lukela ku ba ya ‘kenile mwa mizamao ya hae kaufela.’—1 Pit. 1:14-16.

13. Ki kabakalañi ha lu swanela ku lumbeka Jehova?

¹³ Sitabelo se siñwi se si tabisa Jehova si ama lipulelo za luna. Ba ba lata Jehova kamita ba bulelanga hande ka za hae fa nyangela ni fa malapa a bona. (Mu bale Samu 34:1-3.) Mu bale Lisamu 148-150, mi mu lemuhe mo lisamu ze taalu zeo li lu susueleza hañata-ñata ku lumbeka Jehova. Kaniti, “ku mu lumbeka, ku lukela ba ba lukile.” (Samu 33:1) Mi Jesu Kreste, yena Mutala wa luna, naa koñomekile butokwa bwa ku lumbeka Jehova ka ku kutaza taba ye nde.—Luka 4:18, 43, 44.

14, 15. Hosea naa susuelize Maisilaele ku fana matabelo a cwañi, mi Jehova naa ezanga cwañi ha na fiwa matabelo a cwalo?

¹⁴ Ka ku kutaza ka tukufalelo, lu bonisa kuli lwa lata Jehova mi lu lakaza ku shemubiwa ki yena. Ka mutala, mu bone ka mo mupolofita Hosea naa susuelelize Maisilaele ba ne ba keni mwa bulapeli bwa buhata ni ku latehelwa ki sishemo sa Mulimu. (Hos. 13:1-3) Hosea naa ba bulelezi ku kupa kuli: “U swalele bumaswe kaufela, mi u lu amuhele ka sishemo! Mi cwale bakeñisa lipoho, lu ku tiseze matabelo a manzwi a mwa milomo ya luna.”—Hos. 14:1, 2.

¹⁵ Pulelo ye li “matabelo a manzwi a mwa milomo ya luna” i talusa manzwi a buniti, a mande, a bulezwi ili ku lumbeka Mulimu wa niti. Jehova naa nga cwañi ba ba eza matabelo a cwalo? Naa ize: “Ni ka ba lata luli.” (Hos. 14:4) Ba ne ba fa matabelo a cwalo a tumbo, Jehova naa ba swalela, ku ba shemuba, ni ku ba mulikanaa bona.

16, 17. Tumelo ku Mulimu ha i susumeza mutu ku kutaza taba ye nde, Jehova u amuhelanga cwañi tumbo ya mutu yo?

¹⁶ Ku lumbeka Jehova patalaza kamita i bile nto ye tuna mwa bulapeli bwa niti. Ku lumbeka Mulimu ne li nto ye tuna ku walisamu kuli mane naa kupile Mulimu kuli: “Muñaa Bupilo na ku lapela, amuhela mpo ya buitumelo yo itamile ka yona mulomo wa ka; mi u ni lute likatulo za hao.” (Samu 119:108) Kacenu bo? Ha naa bulela za sikwata se situna sa batu mwa linako za luna, Isaya naa polofitile kuli: “Ba bubanise milumbeko ya Muñaa Bupilo. . . . [Limpo] li amuhelwe fa aletare” ya Mulimu. (Isa. 60:6, 7) Nto yeo ya talelezwa kakuli bolule-lule ba fana ku Mulimu “sitabelo sa milumbeko, kikuli bupaki bo bu zwa mwa milomo ye lumba Libizo la hae.”—Maheb. 13:15.

¹⁷ Mina bo? Kana mwa fana matabelo a swanela ku Mulimu? Haiba ha ku cwalo, kana mu ka eza licinceho ze tokwahala ni ku kala ku lumbeka Jehova patalaza? Tumelo ha i ka mi susueza ku kala ku kutaza taba ye nde, sitabelo sa mina si ka ba “se si ka tabisa Muñaa Bupilo, ku fita poho ye na ni manaka ni litaku.” (Mu bale Samu 69:30, 31.) Mu be ni buikolwiso bwa kuli “munko o munati” wa sitabelo sa mina sa milumbeko u ka fita ku Jehova ni kuli u ka mi shemuba. (Ezek. 20:41) Tabo ye mu ka ba ni yona foo i ka ba ye tuna ka ku fitisisa.

‘Jehova U ka Fuyola ya na ni Niti’

18, 19. (a) Ba bañata kacenu ba ikutwa cwañi ka za ku sebeleza Mulimu? (b) Ku latehelwa ki sishemo sa Mulimu ku tahisañi?

¹⁸ Kacenu, batu ba bañata ba nahana mo ne ba nahanela batu ba mwa linako za Malaki. Ba nahana kuli: “Ha ku tusi se siñwi ku sebeleza Mulimu! Lu fumanisizwe lifi ka ku mamela milao ya hae?” (Mala. 3:14) Ka ku zamaiswa ki litakazo za bufumu, ba nga kuli mulelo wa Mulimu ha u si ka konda ni kuli milao ya hae ha i sa ba ama. Ku bona, ku kutaza taba ye nde ki ku sinya nako mi kwa filikanya.

¹⁹ Moya o tahisa mihupulo ye cwalo u zwelela mwa simu ya Edeni. Ki Satani ya naa susuelize Eva ku sa tokomela butokwa luli bwa bupilo bo bunde bwa naa mu file Jehova ni ku nyaza sishemo sa Hae. Kacenu, Satani u kukueza batu ku lumela kuli ku eza tato ya Mulimu ha ku tusi. Kono Eva ni muunaa hae ne ba tilo lemuha kuli ku latehelwa ki sishemo sa Mulimu ne ku talusa ku latehelwa ki bupilo bwa bona. Ba ba latelela mutala wa bona o maswe cwale ni bona ba tuha ba lemuha kuli ku latehelwa ki sishemo sa Mulimu ku talusa ku latehelwa ki bupilo bwa bona.—Gen. 3:1-7, 17-19.

20, 21. (a) Mbelwa wa kwa Sarepta naa ezizeñi, mi ne ku bile cwañi ku yena? (b) Lu kona ku likanyisa cwañi mbelwa wa kwa Sarepta mi ki kabakalañi ha lu swanela ku eza cwalo?

²⁰ Mu bapanye mafelelezo a maswe a naa tahezi Adama ni Eva ni ze ne ezahezi kwa mafelelezo mwa litaba ze bulezwi kwa makalelo ka za Elia ni mbelwa wa kwa Sarepta. Ha saa utwile manzwi a susuezo a Elia, musali yo a kala ku besa sinkwa mi pili a fa mupolofita sinkwa seo. Mi Jehova a taleleza sepiso ya naa bulezi ka Elia. Bibele i li: “Musali a zamaya, a eza ka linzwi la Elia; mi Elia ni musali ni ba ndu ya hae ba ca mazazi a mañata. Bupi bo bu mwa tubana ne bu sa fukuzehi, ni oli ya mwa silibelo ne sa feli, sina mwa na bulelezi Muñaa Bupilo ka Elia.”—1 Mal. 17:15, 16.

²¹ Mbelwa wa kwa Sarepta naa ezize nto ye sa koni ku eziwa ki batu ba bañata ba ba pila kacenu. Naa sepile Mulimu ya pulusa, mi ni yena naa si ka mu yumba simulamu. Taba ye ni litaba ze ñwi ze mwa Bibele li bonisa buniti bwa kuli lwa lukela ku sepa Jehova. (Mu bale Joshua 21:43-45; 23:14.) Bupilo bwa Lipaki za Jehova ba ba li teñi kacenu bu fa bupaki bo buñwi hape bwa kuli haa na ku yubeka ba ba na ni tumelezo ya hae.—Samu 34:6, 7, 17-19.a

22. Ki kabakalañi ha lu tokwa ku bata sishemo sa Mulimu ka putako?

²² Lizazi la Mulimu la katulo fahalimwaa “ba ba yahile mwa lifasi kaufela” li sutelezi. (Luka 21:34, 35) Ha li konwi ku picukiwa. Ha ku na bufumu bo bu kona ku ba bwa butokwa inge ku utwa Muatuli ya ketilwe wa Mulimu haa li: “A mu tahe, mina ba ba fuyozwi ki Ndate, mu yole mubuso o no lukiselizwe mina haisamba lifasi li tomwa.” (Mat. 25:34) Ee, ‘Jehova u ka fuyola ya na ni niti; u ka mu sileleza ka sishemo sa hae inge tebe.’ (Samu 5:12) Kana ha lu lukeli ku bata sishemo sa Mulimu?

[Litaluso za kwatasi]

Kana Mwa Hupula?

• Ki kabakalañi ha lu swanela ku lapela Jehova ku zwelela kwa pilu?

• Ki matabelo mañi a amuhela Jehova kacenu?

• Pulelo ye li “matabelo a manzwi a mwa milomo ya luna” i talusañi, mi ki kabakalañi ha lu swanela ku fa matabelo a cwalo ku Jehova?

• Ki kabakalañi ha lu swanela ku bata sishemo sa Mulimu?

[Siswaniso se si fa likepe 13]

Mupolofita wa Mulimu naa fitisize taba mañi ya butokwa ku me ya naa li mwa butokwi?

[Siswaniso se si fa likepe 15]

Ki tuso mañi ye lu fumana ka ku fana matabelo a milumbeko ku Jehova?

[Siswaniso se si fa likepe 17]

Ku sepa Jehova kwa mina haa buniti ni kamuta ha ku na ku tahisa maswabi