Lu ba Jehova

 1. Ki kabakalañi halukona kubulela kuli Jehova ki yena muñaa lika kaufela? (Mubone siswaniso sesi fahalimu.)

LIKA kaufela ki za Jehova! Ki yena muñaa “lihalimu . . . , nihaiba mahalimu a mahalimu, ni lifasi ni ze ku lona kaufela.” (Deut. 10:14; Sin. 4:11) Kacwalo, bakeñisa kuli Jehova ki yena yabupile batu, kaufelaa bona ki bahae. (Samu 100:3) Nihakulicwalo, kuzwa feela kwamulaho, Mulimu ubile ni batu baiketezi kuba batu bahae ka nzila yeipitezi.

 2. Ki bo mañi bababulezwi mwa Bibele kuli ki batu ba Jehova ka nzila yeipitezi?

² Ka mutala, liñolo la Samu 135 libulela za balapeli ba Jehova babasepahala ba mwa Isilaele waikale kuli neli “sicaba sahae tota.” (Samu 135:4) Hape, buka ya Hosea neipolofitile kuli batu babañwi bane basi Maisilaele nebakaba sicaba sa Jehova. (Hos. 2:23) Bupolofita bwa Hosea nebutalelelizwe Jehova hanaaketile batu bane basi Majuda kuli ni bona bayo busa ni Kreste kwa lihalimu. (Lik. 10:45; Maro. 9:23-26) “Sicaba sesikenile” seo ki “buswa” bwa Jehova “bobuipitezi,” mi batu ba mwa sicaba seo batozizwe ka moya okenile kuli bayo pila kwa lihalimu. (1 Pit. 2:9, 10) Kono kucwañi ka za buñata bwa Bakreste babasepahala kacenu babanani sepo ya kuto pila fa lifasi? Ni bona Jehova ubaanga kuli ki “sicaba” sahae ni “babaketilwe” bahae.—Isa. 65:22.

 3. (a) Ki bo mañi babali balikani ba Jehova kacenu? (b) Lukanyakisisañi mwa taba ye?

³ Kacenu, ba “mutapinyana” babanani sepo ya kuyo pila kwa lihalimu, ni ba “lingu zeñwi” babanani sepo ya kuto pila fa lifasi ki “mutapi ulimuñwi,” mi Jehova ubaanga kuli ki batu bahae. (Luka 12:32; Joa. 10:16) Luswanela kubonisa buitebuho bwaluna ku Jehova kabakala kulushemuba kuli lube balikani bahae. Mwa taba ye, lukanyakisisa linzila lisikai zelukona kubonisa ka zona kuli lwaitebuha zaluezelize Jehova ka kulufa tohonolo yeipitezi yeo ya kuba balikani bahae.

 4. Lukona kubonisa cwañi kuli lwaitumela ku Jehova kabakala kulukonisa kuba ni silikani ni yena, mi Jesu naaezize cwañi cwalo?

⁴ Lubonisa buitumelo bwaluna ku Jehova ka kuineela ku yena ka pilu yaluna kaufela. Halukolobezwa mwa mezi, lubonisa kwa nyangela kuli lwalemuha kuli Jehova ki yena muñaa luna mi lubata kuipeya kwatasaa hae. (Maheb. 12:9) Jesu ni yena naabonisize cwalo hanaakolobelizwe, mi nekuswana inge kuli naabulelela Jehova kuli: “Nilakaza kueza tato yahao.” (Samu 40:7, 8, litaluso ze kwatasi) Nihaike kuli Jesu naapepezwi mwa sicaba sene siineezi ku Mulimu, muhato wanaangile neubonisa kuli naabata kueza tato ya Jehova.

5, 6. (a) Jehova naaikutwile cwañi Jesu hanaakolobelizwe? (b) Mufe mutala obonisa kuli Jehova waitebuha haluineela ku yena nihaike kuli ki yena muñaa lika kaufela.

⁵ Jehova naaikutwile cwañi Jesu hanaakolobelizwe? Bibele ili: “Jesu hasaakolobelizwe, azwa mwa mezi kapili; mi hamubone! Mahalimu akwaluluha, mi abona moya wa Mulimu haushetumukela ku yena sina liiba. Hamubone! Hape kwautwahala linzwi lelizwa kwa mahalimu, lelili: ‘Yo ki Mwanaka, yalatwa, yanitabisa.’” (Mat. 3:16, 17) Nihaike kuli Jesu neli Mwanaa Mulimu nikale, Jehova naatabile kubona Mwanaa hae haitatela kueza tato yahae ka kutala. Ka mukwa oswana, lukatabisa Jehova haiba luineela ku yena, mi uka lufuyaula.—Samu 149:4.

⁶ Ka mutala, luungeni kuli ndate yomuñwi ucezi simu yetuna ya mbonyi. Zazi leliñwi, mwanaa hae wamusizana uyo loba mukuñu ulimuñwi wa mbonyi ni kuto ufa bo ndatahe sina mpo. Ki niti kuli bo ndatahe ki bona bañi ba simu yeo. Mi mwanana yo ufile bo ndatahe nto yeneli yabona nikale. Nihakulicwalo, bo ndatahe habana kumubulaisa lipuzo. Kono bakataba hahulu ni kuamuhela mpo yabafile mwanaa bona kakuli ka kueza cwalo, ubonisize kuli wabalata. Mane bo ndatahe bakaitebuha hahulu lilato labonisize mwanaa bona ka kubafa mukuñu wa mbonyi ulimuñwi wo nihaike kuli kunani mikuñu yemiñata mwa simu yabona. Jehova ni yena utabanga hahulu haluitatela kulapela feela yena.—Exo. 34:14.

 7. Malaki naabonisize cwañi mwaikutwela Jehova ka za batu babaitatela kumusebeleza?

⁷ Mubale Malaki 3:16. Haiba hamusika ineela kale ni kukolobezwa, mulemuhe kuli kueza cwalo ki kwa butokwa. Ki niti kuli kuzwa feela fomukaliseza kupila, mubile ba Jehova, sina batu kaufela. Kono munahane feela momuka tabiseza Jehova haiba mubonisa kuli mubata kubusiwa ki yena ka kuineela ku yena ni kueza tato yahae. (Liprov. 23:15) Jehova waziba baba musebeleza ka kuitatela, mi ukañola mabizo abona mwa “buka [yahae] ya kupulo.”

8, 9. Jehova utokwa kuli batu babañozwi mwa “buka ya kupulo” baezeñi?

⁸ Kunani lika zeluswanela kueza kuli libizo laluna liñolwe mwa “buka ya kupulo” ya Jehova. Malaki naabulezi kuli luswanela ‘kusaba Jehova ni kukengeyela libizo lahae.’ Haiba lulapela Mulimu usili kamba kusebeleza nto ifi kamba ifi, libizo laluna likatakulwa mwa buka ya Jehova ya bupilo ya swanisezo.—Exo. 32:33; Samu 69:28.

⁹ Kacwalo, kuineela ku Jehova hakutalusi feela kumusepisa kuli lukaeza tato yahae ni kukolobezwa mwa mezi. Lika zeo luliezanga feela hañwi ili mwa nako yekuswani. Kono kuli lube kwa lineku la Jehova, lutokwa kuzwelapili kubonisa kuli lwamuutwa ka nako ya cwale ni kwapili, ili mwahalaa nako ya bupilo bwaluna kaufela.—1 Pit. 4:1, 2.

10. Ki shutano mañi yeswanela kuba mwahalaa batu babasebeleza Jehova ni babasa musebelezi?

¹⁰ Mwa taba yefelile, nelunyakisisize litaba za mwa Bibele zeama Kaine, Salumoni, ni Maisilaele. Batu bao kaufela nebaipapata kuli nebalapela Jehova, kono nebasika sepahala ku yena ka kutala. Mitala yeo ibonisa hande kuli batu baba kwa lineku la Jehova baswanela kuzwelapili kueza lika zelukile ni kutoya bumaswe. (Maro. 12:9) Malaki hasaabulezi za “buka ya kupulo,” Jehova naabulezi kuli kukaba ni shutano “mwahalaa mutu yalukile ni mutu yamaswe, mwahalaa mutu yasebeleza Mulimu ni yasa musebelezi.”—Mala. 3:18.

11. Ki kabakalañi babañwi habaswanela kuiponela hande kuli lu balapeli ba Jehova?

¹¹ Kunani nzila yeñwi hape yelukona kubonisa ka yona kuli lwaitebuha kuli Jehova uluketile kuba batu bahae. Zwelopili yaluna ya kwa moya iswanela ‘kulemuhiwa ka kutala ki batu kaufela.’ (1 Tim. 4:15; Mat. 5:16) Luswanela kuipuza kuli: ‘Kana babañwi balemuha kuli nasepahala ka kutala ku Jehova? Kana natabela kuzibahala kuli ni yomuñwi wa Lipaki za Jehova?’ Jehova haana kutabela haiba hamulaho wa kuluketa kuba batu bahae, lupalelwa kuizibahaza ku babañwi kuli lu batu bahae.—Samu 119:46; mubale Mareka 8:38.

12, 13. Ki lika mañi zetahisize kuli Lipaki za Jehova babañwi basike bazibahala sina batanga ba Mulimu?

¹² Ka bumai, likezo za batu babañwi litahisize kuli kube taata kuziba kuli ‘basebeleza Mulimu kamba haba musebelezi’ kabakala kuli balikanyisa “moya wa lifasi.” (1 Makor. 2:12) Moya wa lifasi utahisa kuli batu bapile ka kuya ka “litakazo za nama.” (Maef. 2:3) Ka mutala, nihaike kuli selufilwe likelezo hañata-ñata ka za mutinelo ni za kuikabisa, kusanani babañwi babasa tina ni kuikabisa ka nzila yesaswaneli. Batinanga liapalo zekama ni zebelela, mane niha baya kwa mikopano ya Sikreste. Babañwi bona bakabisanga ni kukuta milili yabona ka nzila yetulile tikanyo. (1 Tim. 2:9, 10) Kacwalo, kukona kuba taata kuziba haiba ki batanga ba Jehova kamba ki ‘balikani ba lifasi’ habali mwahalaa babañwi.—Jak. 4:4.

¹³ Lipaki babañwi babonisize ka linzila zeñwi kuli habasika hana moya wa lifasi. Ka mutala, mubinelo wabona ni likezo zabona habali kwa mikiti libonisanga kuli habaezi lika sina Bakreste. Babañwi babeyanga maswaniso abona fa mawebusaiti a kulumelana ka ona mashango ni kuñola fateñi litaba zesaswaneli kwa Bakreste babahulile kwa moya. Nihaike kuli mwendi batu bao habasika eza sibi sesituna ilikuli bafiwe kalimelo mwa puteho ya Sikreste, bakona kusinya mikwa yeminde ya batanga ba Jehova babañwi babaikataza kuzwelapili kuba ni muzamao omunde.—Mubale 1 Pitrosi 2:11, 12.

14. Ki sika mañi seluswanela kueza kuli lusike lwasinya silikani saluna sesinde ni Jehova?

¹⁴ Lifasi lizwelapili kususueza batu kuba ni “takazo ya nama ni takazo ya meeto ni moya wa kuiponahaliseza zanani zona mutu mwa bupilo.” (1 Joa. 2:16) Kono bakeñisa kuli luna lu ba Jehova, Bibele ilueleza kuli luswanela “kuhana muzamao omaswe ni litakazo za lifasi” ni kuli luswanela “kupila ka kunahana hande ni ka kuluka ni ka kusepahala ku Mulimu mwa lifasi la cwale.” (Tite 2:12) Zelueza kaufela liswanela kubonisa kuli luineezi ku Jehova ka pilu kaufela, ibe lipulelo zaluna, mucelo kamba munwelo waluna, muapalelo ni muikabisezo waluna, ni moluezeza misebezi yelufilwe.—Mubale 1 Makorinte 10:31, 32.

15. Ki kabakalañi haluswanela kubonisa sishemo ni lilato kwa Bakreste babañwi?

¹⁵ Lubonisa kuli lwaitebuha silikani saluna ni Jehova ka moluezeza Bakreste babañwi. Luhupule kuli ni bona ki ba Jehova. Haiba luzwelapili kuhupula taba yeo, lukabonisa sishemo ni lilato kwa mizwale ni likaizeli baluna. (1 Mates. 5:15) Jesu naabulelezi balateleli bahae kuli: “Batu kaufela bakaziba kuli mu balutiwa baka ka taba ye—haiba mulatana mwahalaa mina.”—Joa. 13:35.

16. Ki taba mañi yebulezwi mwa Mulao wa Mushe yebonisa mwaikutwela Jehova ka za batu bahae?

¹⁶ Kuli luutwisise libaka haluswanela kupilisana hande ni babañwi mwa puteho, halunyakisiseñi mutala wo. Lisebeliso za mwa tempele ya Jehova neliingiwa kuli ki zekenile, mi neliswanela kuitusiswa feela mwa misebezi ya bulapeli bobukenile. Mulao wa Mushe neubonisa hande mwakubabalelela lisebeliso zeo, mi bane basaitusisi zona hande nebaswanela kubulaiwa. (Num. 1:50, 51) Haiba Jehova naababalela lisebeliso zesapili zeneitusiswa mwa bulapeli bwahae, uzibe ukasileleza hahulu batanga bahae babasepahala babaineezi ku yena, bona baiketezi kuli babe batu bahae! Jehova hanaabulela kwa sicaba sahae, naaize: “Mutu kaufela yamiswala uswala taku ya liito laka.”—Zak. 2:8.

17. Jehova ‘uutwanga ni kuteeleza’ kwañi?

¹⁷ Mulemuhe kuli Malaki naatalusize kuli Jehova “naanzaa utwa ni kuteeleza” batu bahae hane banze bakopana hamoho. (Mala. 3:16) Kaniti, Jehova “waziba babali bahae.” (2 Tim. 2:19) Uziba hande lika kaufela zelueza ni zelubulela. (Maheb. 4:13) Haiba lusabonisi sishemo kwa Bakreste babañwi, Jehova ‘wautwanga ni kuteeleza.’ Halubonisa moya wa kuamuhela baenyi, moya wa bufani, kuswalela babañwi, ni kubabonisa sishemo, luhupule kuli Jehova wabona zelueza zeo.—Maheb. 13:16; 1 Pit. 4:8, 9.

18. Lukona kubonisa cwañi kuli lwaitebuha tohonolo yelunani yona ya kuba batu ba Jehova?

¹⁸ Kaniti, lubata kubonisa Jehova kuli lwaitebuha tohonolo ya kuba batu bahae. Bakeñisa kuli lwaziba kuli Jehova ki yena muñaa luna, neluineezi ku yena ka kulata. Kacwalo, niha lupila mwa “lusika lolukopami ni lolubondokile,” lubata kuli batu baiponele kuli lu batu “babasa nyazahali ni babasina mulatu,” ili ‘bababenya sina mamonyi mwa lifasi.’ (Mafil. 2:15) Lutoile hahulu bumaswe. (Jak. 4:7) Mi lwalata Bakreste babañwi ni kubakuteka, kakuli lwaziba kuli ni bona ki ba Jehova.—Maro. 12:10.

19. Jehova ukafuyaula cwañi batu babali bahae?

¹⁹ Bibele isepisa kuli: “Jehova haana kufulalela batu bahae.” (Samu 94:14) Ka kulufa sepiso yetiile yeo, Jehova ubonisa kuli ukaba ni luna kusina taba ni miliko yekona kulutahela. Nihaiba lifu halikoni kulukauhanya kwa lilato la Jehova. (Maro. 8:38, 39) Bibele ili: “Halupila, lupilela Jehova, mi halushwa, lushwela Jehova. Cwale halupila ni halushwa, luba Jehova.” (Maro. 14:8) Kaniti, lunyolezwi kubona lizazi leo Jehova akazusa kwa bafu balikani bahae kaufela babasepahala. (Mat. 22:32) Kono nihaiba kacenu luikola limbuyoti zeñata. Mi sina moiboniseza Bibele, “tabo ki ya sicaba seo Jehova ali Mulimu wasona, sona sicaba saketile kuba liluwo lahae.”—Samu 33:12.