Bupilo ni Bukombwa bwa Jesu

Jesu ni Muluwi wa Mutangana ili Mubusi

JESU ha nze a zwelapili ku fita mwa sikiliti sa Perea mabapa ni Jerusalema, mutangana a mata ni ku to wa ka mañwele fapil’a hae. Mutu yo u bizwa kuli ki mubusi, mwendi ku talusa kuli u na ni situlo se si tuna mwa sinagoge ya mwa kalulo yeo kamba mwendi mane n’a li silama sa Kuta ya Sijuda. Hape, u fumile hahulu. “Muluti yo munde,” ko na mwa buzeza, “se ni tokwa ku eza ki nto mañi, kuli ni luwe bupilo bo bu sa feli?”

“Kiñi s’o ni bizeza yo munde?” Jesu wa alaba. “Yo munde h’a yo, konji Mulimu a nosi.” Ka mo ku bonahalela mutangana u itusisa linzwi la “yo munde” sina lilumbatina, kacwalo Jesu u mu bonisa kuli lilumbatina la mufuta o cwalo li swanela fela ku Mulimu.

“Kono,” Jesu u zwelapili, “ha u lata ku kena mwa bupilo, u mamele milao.”

“Ifi?” mutu y’o wa buza.

Ka ku bulela ye ketalizoho mwa Milao ye Lishumi, Jesu wa alaba: “U si ke wa bulaya; U si ke wa buka; U si ke wa uzwa; U si ke wa paka za buhata; Kuteka ndat’aho ni m’aho.” Mi mane ka ku ekeza teñi mulao o’ butokwa ni ku fita, Jesu u bulela kuli: “U late wahenu mo u itatela.”

“Zeo ni li mamezi ku kala kwa bwanana bwa ka,” mutu y’o wa alaba ka buniti luli. “Ni sa tokwile nto mañi?”

Ka ku teeleza kupo ye tuna, ili ye buniti ya mutu y’o, Jesu a ikutwa ku lata yena mutu y’o. Kono Jesu wa lemuha ñolamenyi yeo mutu y’o n’a na ni yona kwa sifumu sa hae sa kwa mubili, kacwalo a supa seo n’a si tokwa: “U sa tokwa nto i liñwi: U lekise z’o luwile kaufela mi u li fane kwa babotana, mi u ka ba ni bufumu kwa lihalimu, hape u tahe, u ni latelele.”

Jesu a mu kelyeka, ku si na ku kakanya ka maswabi, mutu y’o ha nze a yema ni ku fetuha ka ku funduka inze a swabile maswe. Sifumu sa hae si mu beile kapai kwa meto kuli mane a palelwa ku bona butokwa bwa sifumu sa niti. “Ku tata cwañi,” Jesu a bilaela, “kuli ba ba na ni bufumu ba kene mwa mubuso wa Mulimu!”

Manzwi a Jesu a makalisa balutiwa. Kono ba fita fa ku makala ni ku fita h’a zwelapili ku talusa mulao wa ka nañungelele wa kuli: “Se si bunolo kikuli kamele i kene mwa lisuba la ndonga, isi kuli muluwi a kene mwa mubuso wa Mulimu.”

“Hakulicwalo ku ka piliswa mañi?” balutiwa ba bata ku ziba.

Ka ku talimela ku bona ka ku nonga, Jesu wa alaba: “Kwa batu kwa pala; kono ku Mulimu linto kaufela za konahala.”

Ka ku lemuha kuli ba ezize keto ye fapahana ni ya muluwi wa mutangana y’a li mubusi, Pitrosi u bulela kuli: “A ku bone, luna lu tuhezi linto kaufela mi lu ku latelezi. Ku ka ba cwañi ku luna?”

“Linto, nako ye li ka ezwa sinca,” Jesu wa sepisa, “mi Mwan’a mutu a ina fa lubona lwa kanya ya hae, mina be mu ni latelezi, mu ka ina ni mina fa mabona a lishumi ka a mabeli, mu atule masika a Isilaele a lishumi ka a mabeli.” Ee, Jesu u bonisa kuli ku ka ba ni ku ezwa sinca kwa miinelo fa lifasi-mubu ili kuli lika li be sina mo ne li inezi mwa simu ya Edeni. Mi Pitrosi ni balutiwa ba bañwi ba ka amuhela mupuzo wa ku busa ni Kreste fahalimw’a Paradaisi ya lifasi kamukana. Kaniti, mupuzo wa mufuta o cwalo u fitela kwahule sitabelo sifi kamba sifi!

Niteñi, nihaiba ona cwale ku na ni mipuzo, sina Jesu ha n’a koñomekile kuli: “Ku bao kamukana ba ba tuhezi ndu, kamba banabahabo, kamba likaizeli, nihaiba m’a bona, kamba ndat’a bona, kamba bana, kamba masimu, kabakala ka ni la evangeli ha ku na nihaiba a li muñwi ku bona ya ka tokwa ku amuhela mwa nako ya cwale, lika ze mwanda ku si li siñwi se ba siile, ili mandu, ni banabahabo, ni likaizeli, ni bo-m’a bona, ni bana, ni masimu, hamoho ni ku nyandiswa; mi mwa linako ze taha, bupilo bo bu sa feli.”

Sina ka mwa sepiseza Jesu, kai ni kai mwa lifasi k’o balutiwa ba hae ba ya teñi, ba ikola silikani se si tuna ni se si butokwa hahulu ni Bakreste sina bona ku fita seo se si ikoliwa ni banabahabo mutu ba kwa nama. Muluwi wa mutangana y’a li mubusi ka mo ku bonahalela u latehelwa ki kalulo yeo hamohocwalo ni ya bupilo bo bu sa feli mwa Mubuso wa lihalimu wa Mulimu.

Hamulaho a f’o Jesu wa ekeza kuli: “Ba bañata ku ba ba kwapili, ikaba ba ba mwamulaho; mi ba ba mwamulaho ikaba ba ba kwapili.” Ki sifi sa talusa?

U talusa kuli batu ba bañata ba ba “kwapili” mwa ku ikola matohonolo a bulapeli, ba ba swana sina muluwi wa mutangana ili mubusi, ha ba na ku kena mwa Mubuso. Ba ka ba ba “mafelelezo.” Kono ba bañata, ku kopanyeleza cwalo ni balutiwa ba Jesu ba ba ishuwa, ba ba nyazisezwa ki Bafalisi ba buikungo sina ba ba “mwamulaho”—sina batu-tu fela ba naha, kamba ‛am ha·’aʹrets—ba ka ba ba “pili.” Ku ba kwa bona ba “pili” ku talusa kuli ba ka amuhela tohonolo ya ku ba babusi hamoho ni Kreste mwa Mubuso. Mareka 10:17-31; Mateu 19:16-30; Luka 18:18-30.

◆ Ka mo ku bonahalela, muluwi wa mutangana ki mubusi wa mufuta mañi?

◆ Ki kabakalañi Jesu a hana ku bizwa yo munde?

◆ Seo mubusi wa mutangana n’a ipumani ku sona si fa mutala mañi ka za kozi ya ku ba mufumi?

◆ Ki mipuzo mañi yeo Jesu a i sepisa balateleli ba hae?

◆ Ba pili ba fita cwañi fa ku ba ba mwamulaho, mi ba mwamulaho fa ku ba ba pili?