Bupilo Mwa Paradaisi Ye Nca

JESU na bulezi ka buikolwiso kuli kwa konahala ku pila hape, mi na bulelezi balutiwa ba hae kuli ba ba shwile ba ka zuha luli. Na ize: ‘Linto, nako ye li ka ezwa sinca,’ “[mu] ka ca sanda sa bupilo bo bu sa feli.” Kiñi sa na talusa Jesu ha na bulela kuli “linto, nako ye li ka ezwa sinca”?—Mateu 19:25-29.

Ka ku ya ka muñoli wa Bibele Luka, Jesu na bulezi kuli ‘mwa linako ze sa taha,’ balutiwa ba hae ba ka fumana “bupilo bo bu sa feli.” (Luka 18:28-30) Ki kabakalañi Bibele ha i bonisa kuli “linako ze sa taha” li swana ni ‘nako ye li ka ezwa sinca lika’?

Ku bonahala kuli ze i boniseza cwalo Bibele ki ku bata ku koñomeka taba ya kuli Jehova Mulimu u ka bona teñi kuli mulelo wa hae wa makalelo wa kuli batu ba ikole bupilo mwa paradaisi fa lifasi u ka talelezwa. Batu ba ka fiwa sinca bupilo bo bu petehile bo bu swana ni bo ne ba ikozi bo Adama ni Eva ba si ka eza kale sibi. Kacwalo, “mwa linako ze sa taha,” ‘lika li ka ezwa sinca’ sina mo ne li inezi mwa Paradaisi ye ne li teñi mwa simu ya Edeni.

Mo I Ka Kutisezwa Sinca Paradaisi

Jesu ha na li fa lifasi, na lutile balateleli ba hae ku kupa Mubuso wa ka itusisa Mulimu ku kutisa miinelo ye minde fa lifasi. Jesu na bulezi kuli lu lapelange kuli: “Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Mulimu na ketile Mwan’a hae kuli a be Mulena wa Mubuso wo, ili Mubuso o ka peta mulelo wa Mulimu kuli batu ba ikole ku pila mwa Paradaisi kai ni kai fa lifasi.

Ka za Yena ya ketilwe ki Mulimu kuli a be Mubusi, Bibele i li: ‘Lu pepezwi mwana, lu filwe wa mushimani: Bulena bu ka bewa fa liheta la hae; mi u ka bizwa Mulena wa Kozo. U ka hulisa Mubuso, ni ku tiisa kozo ye sa feli.’ (Isaya 9:6, 7) Kono cwale mulonga wo u ka peta cwañi tato ya Mulimu ka puso ya Mulena yo?

Bibele i alaba puzo yeo ka ku bulela kuli: “Mwa mazazi a malena ao, Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso kaufela; kono ona u ka ba teñi kamita ni ku ya ku ile.”—Daniele 2:44.

Ha lu nyakisiseñi miinelo mo i ka bela mwa paradaisi ye ka lukiswa sinca fa lifasi, ka ‘nako ye li ka ezwa sinca lika,’ muta Mwan’a Mulimu a ka busa sina Mulena mwa Mubuso wa Ndat’ahe.

Mo Bu Ka Bela Bupilo Mwa Paradaisi

Zuho ya Bafu

“Nako ya ta, mo ba ba li mwa mabita kaufela, ba ka utwa linzwi la hae, mi ba zwe.”—Joani 5:28, 29.

“Ku zuha kwa bafu ku ka ba teñi, kwa ba ba lukile ni ba ba si ka luka.”—Likezo 24:15.

Ha ku sa na hape ku ba ni makulanu, busupali, kamba lifu

“Meto a libofu kih’a ka tutubuluha, lizebe za bosusu li tibuluhe ni zona. Ibe ya toza u ka tula sina lizwii, lilimi la wa satambi li ka opela za tabo.”—Isaya 35:5, 6.

“Mulimu u ka ba ni bona, Yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”—Sinulo 21:3, 4.

Lico ze ñata

“Lifasi li tahisize lukau lwa lona; Mulimu, Yena Mulimu wa luna, u ka lu fuyola.”—Samu 67:6.

“Buloto bu ka ba bo buñata mwa naha, mane ni fahalimu a malundu.”—Samu 72:16.

Mandu a mande ni misebezi ye tabisa batu kaufela

“Ba ka yaha mandu, ba pile ku ona; ba cale likota za veine mi ba ce ze bewa ki zona. Ha ba na ku ikahela mandu mi ku pile ba sili mwateñi, kamba ku cala likota za veine mi li ciwe ki ba sili.”—Isaya 65:21, 22.

Ha ku sa na ku ba ni bumaswe, bukebenga, kamba lindwa

“Ba ba maswe ba ka kauhelwa mwa lifasi.”—Liproverbia 2:22.

“Ka mikwale ya bona ba ka tula mihuma, ka malumo a bona ba ka tula licekesi; sicaba se siñwi ha si sa na ku pumela se siñwi ka lilumo, mi ha ba sa na ku ituta ndwa.”—Isaya 2:4.

Ha ku sa na ku ikalelwa, mi kozo ikaba kai ni kai

“Ba ka pila mwa buiketo, ku si na ya ba sabisa.’—Ezekiele 34:28.

“Ha ku sa na ya ka holofaza kamba ku sinya fa lilundu la ka le li kenile; kakuli lifasi li ka tala zibo ya [Muñ’a] Bupilo, sina mezi mw’a kwahelezi liwate.”—Isaya 11:9.

Kaniti bupilo bu ka tabisa luli ku pila mwa miinelo ye minde yeo, muta batu kaufela mwa lifasi ba ka bonisa lilato ku Mulimu ni kwa batu ba bañwi! (Mateu 22:37-39) Mwa kona ku kolwa kuli Mulimu u ka taleleza lisepiso za hae kaufela ka nako yeo. Mulimu u bulela kuli: “Ki se ni bulezi . . . mi ni ka si feleleza.”—Isaya 46:11.

Ku na ni lika ze ñata ze mu tokwa ku ziba ka za Jehova Mulimu ni lifasi le linca la sepisize. Ka mutala, ki bufi bupaki bo bu bonisa kuli lifasi le linca leo li tuha li ba teñi? Mubuso wa Mulimu u ka yola cwañi milonga ya lifasi? Mi ki likezahalo mañi ze ka ba teñi pili Mubuso wa Mulimu u si ka eza kale cwalo? Lipaki za Jehova ba ka tabela ku mi tusa ku fumana likalabo za lipuzo zeo. Haiba mu tokwa ku ziba ze ñata, mu bone likepe 32 la magazini ye.

Batu se ba libelezi lifasi le linca ka lilimo ze ñata hahulu mi lilimo zeo li tuha li fela. Buñata bwa batu ba ba timezi ba ka pila hape. Ki tato ya Mulimu kuli bafu ba pile hape. Kwa konahala luli kuli mutu ya shwile a pile hape! Bo ki bona “bupilo sakata,” bona ‘bupilo bo bu sa taha.’—1 Timotea 4:8; 6:19.

[Siswaniso se si fa likepe 23]

Paradaisi, ye ne latehile bakeñisa ku sa utwa kwa batu ba babeli ba pili, i ka kutiswa sinca