Kwa mafelelezo, lizazi la swanisezo la mubeleko la fela ka lifu la Jesu, mi nako ya ku fa babeleki tuwelo ya fita fa ku ba teñi. Mulao wa sienyi wa ku fa tuwelo ku kalela ku wa mafelelezo pili wa latelelwa, sina ha ku talusizwe: “Nako ya manzibuana, muñ’a simu a li ku sikombwa sa hae: ‘Biza babeleki, mi u ba fe mali; u kale ka ba ba keni mwamulaho, u ise ku ba ba keni pili.’ Ha ba tile, ba ba keni ka nako ya 11, mutu ni mutu a’ muhela sixpence. Ba ba keni pili ha ba taha, ba hupula kuli ba ka fiwa ku fita; mi ni bona ba amuhela sixpence, mutu ni mutu. Ha ba i ngile ba halala ku muñ’a ndu, ba li: ‘Bao ba ba keni mwamulaho, ba sebelize nako i liñwi fela, mi u ba ezize sina luna ba ba lwezi bukiti bwa lizazi ni ku cisa kwa lona.’ A alaba yo muñwi wa bona, a li: ‘Munna, ha ni ku celi; kikuli n’o si ka utwana ni na ka sixpence i liñwi? Nga sa hao, mi u ikele. Ni lata ku fa wa mwamulaho sina mo ni ku fezi wena. U li, hasi tukelo ha ni eza ka za ka mo ni latela? Kamba liito la hao li na ni lunya, kakuli ni yo munde?’” Ka ku feza Jesu a kutela sisupo sa n’a bulezi kwa makalelo, kuli: “Kamukwaocwalo ba ba mwamulaho ikaba ba ba kwa pili; mi ba ba kwapili, ikaba ba ba mwamulaho.”

Ku amuhelwa kwa sixpence ne ku ezahalile, isiñi fa lifu la Jesu, kono fa Pentekonta ya 33 C.E., Kreste, “sikombwa,” ha n’a sululezi moya o kenile fa balutiwa ba hae. Balutiwa ba Jesu ne ba swana sina ba “mwamuhalo,” kamba babeleki ba nako ya 11. Sixpence ne i sa yemeli mpo ya moya o kenile ona ka sibili. Sixpence ne li nto ye ne i ka itusiswa ki balutiwa onafa fa lifasi-mubu. Ne li nto ye ne i talusa buiketo bwa bona, bupilo bwa bona bo bu sa feli. Ne li tohonolo ya bona ya ku ba Maisilaele ba kwa moya, ba ba tozelizwe ku kutaza ka za Mubuso wa Mulimu.

Hañi-hañi ba ne ba li ba makalelo mwa ku fiwa musebezi ba iponela kuli balutiwa ba Jesu ne ba filwe tuwelo, mi ne ba ba boni ha ba nze ba itusisa sixpence ya swanisezo. Kono ne ba tokwa nto ye fitelela moya o kenile ni matohonolo a Mubuso a zamaelela ni ona. Ku halala ni ku ñuñuna kwa bona ne ku ngile nzila ya ku nyandisa balutiwa ba Kreste, babeleki ba “mwamulaho” ba mwa simu ya veine.

◆ Ki sifi se si yemelwa ki simu ya veine? Ki bomañi ba ba yemelwa ki muñ’a simu ya veine ni babeleki ba ba sebelize ka lihora ze 12 ni ba i liñwi?