Kwa mafelelezo, lizazi la swanisezo la mubeleko la fela ka lifu la Jesu, mi nako ya ku fa babeleki tuwelo ya fita fa ku ba teñi. Mulao wa sienyi wa ku fa tuwelo ku kalela ku wa mafelelezo pili wa latelelwa, sina ha ku talusizwe: “Nako ya manzibuana, muñ’a simu a li ku sikombwa sa hae: ‘Biza babeleki, mi u ba fe mali; u kale ka ba ba keni mwamulaho, u ise ku ba ba keni pili.’ Ha ba tile, ba ba keni ka nako ya 11, mutu ni mutu a’ muhela sixpence. Ba ba keni pili ha ba taha, ba hupula kuli ba ka fiwa ku fita; mi ni bona ba amuhela sixpence, mutu ni mutu. Ha ba i ngile ba halala ku muñ’a ndu, ba li: ‘Bao ba ba keni mwamulaho, ba sebelize nako i liñwi fela, mi u ba ezize sina luna ba ba lwezi bukiti bwa lizazi ni ku cisa kwa lona.’ A alaba yo muñwi wa bona, a li: ‘Munna, ha ni ku celi; kikuli n’o si ka utwana ni na ka sixpence i liñwi? Nga sa hao, mi u ikele. Ni lata ku fa wa mwamulaho sina mo ni ku fezi wena. U li, hasi tukelo ha ni eza ka za ka mo ni latela? Kamba liito la hao li na ni lunya, kakuli ni yo munde?’” Ka ku feza Jesu a kutela sisupo sa n’a bulezi kwa makalelo, kuli: “Kamukwaocwalo ba ba mwamulaho ikaba ba ba kwa pili; mi ba ba kwapili, ikaba ba ba mwamulaho.”

Kana yona talelezo yeo ya mwa lilimo za mwa mwanda wa pili ki yona talelezo fela ya swanisezo ya Jesu? Batili, bahulu ba bulapeli bwa Krestendomu ba se ba bile ba “kwapili,” bakeñisa litulo ni buikalabelo mwa ku fiwa musebezi mwa simu ya Mulimu ya veine ili ya swanisezo. Ne ba talima bakutazi ba ba ineezi ba ne ba swalisani ni Watch Tower Bible and Tract Society sina ba “mwamulaho” mwa ku ba ni musebezi o utwahala mwa sebelezo ya Mulimu. Kono, kaniti luli, ki bona bao ka sibili ba ne ba nyazisezwa ki bahulu ba bulapeli ba ba amuhezi sixpence—tompo ya ku sebeza sina lindumeleti ba ba tozizwe ba Mubuso wa Mulimu wa lihalimu. Mateu 19:30–20:16.

◆ Ki sifi se si yemelwa ki simu ya veine? Ki bomañi ba ba yemelwa ki muñ’a simu ya veine ni babeleki ba ba sebelize ka lihora ze 12 ni ba i liñwi?