Taba Ye Nde ya Batu ba Macaba Kaufela

“Mu ka ba lipaki za ka . . . ku isa kwa mafelelezo a lifasi.”—LIKEZO 1:8.

 1. Ka ku ba baluti ba Bibele, lu isanga mamelelo kwa nto mañi, mi ki kabakalañi?

BALUTI ba bande ba isanga mamelelo isiñi fela ku ze ba taluseza baituti ba bona kono hape ni kwa muezezo o ba itusisa. Ka ku ba baluti ba niti ya Bibele, ni luna lu ezanga nto ye swana. Lu isanga mamelelo kwa lushango lo lu kutaza ni kwa miezezo ye lu itusisanga. Lushango lwa luna, yona taba ye nde ya Mubuso wa Mulimu, ha lu cinci, kono fokuñwi lwa cincanga miezezo ya luna kuli i swanele bateelezi ba luna. Ki kabakalañi ha lu cinca-cincanga miezezo ya luna? Lu ezanga cwalo kuli lu kone ku fita kwa batu ba bañata hahulu.

 2. Muta lu cinca-cinca miezezo ya luna ha lu kutaza, ki bomañi bo lu likanyisa?

² Ha lu cinca-cinca miezezo ya luna lu likanyisa batanga ba Mulimu ba kwakale. Mu nyakisise mutala wa muapositola Paulusi. N’a ize: “Kwa Majuda ni ikezize inge ni Mujuda, . . . Ku ba ba si na Mulao, ni ikezize inge ha ni na Mulao . . . Ku ba ba fokola ni ikezize ya fokola, kuli ni luwe ba ba fokola; kwa batu kaufela ni ikezize linto kaufela, kuli ni pilise ba bañwi.” (1 Makorinte 9:19-23) Paulusi ha n’a cinca-cincize muezezo wa hae mwa bukombwa n’a konile ku fumana ze nde. Ni luna lu ka fumana ze nde haiba lu cinca mitahisezo ya luna ka ku ya ka miinelo ya be lu bulela ku bona.

Ni “mwa Mafelelezo a Lifasi”

 3. (a) Ki butata mañi bo lu kopana ni bona mwa musebezi wa luna wa ku kutaza? (b) Manzwi a kwa Isaya 45:22 a talelezwa cwañi kacenu?

³ Butata bo butuna bo ba kopana ni bona ba ba kutaza taba ye nde ki butuna bwa sibaka se ba kutaleza ku sona—“mwa lifasi kaufela.” (Mateu 24:14) Mwa lilimo ze mwanda ze felile, batanga ba Jehova ba bañata ne ba sebelize ka t’ata ka ku yo shaela taba ye nde mwa libaka ze nca. Ne ku zwileñi mwateñi? Ku bile ni yanduluko ye komokisa mwa lifasi kaufela. Kwa makalelo a lilimo za ma-1900, taba ye nde ne i kutazwa fela mwa linaha li sikai, kono kacenu le Lipaki za Jehova ba tukufalezwi ku kutaza mwa linaha ze 235! Kaniti, taba ye nde ya Mubuso i sweli ya shaelwa mane ni “mwa mafelelezo a lifasi.”—Isaya 45:22.

4, 5. (a) Ki bomañi ba ba sebelize ka t’ata mwa ku shaela taba ye nde? (b) Liofisi za mutai ze ñwi li bulelañi ka za ba ba zwa mwa linaha li sili ba ba sebeleza mwa libaka za yona?

⁴ Kekezeho yeo i tisizwe ki nto mañi? I tisizwe ki lika ze ñata. Balumiwa ba ba lutilwe kwa Sikolo sa Bibele sa Giliadi mi cwanoñu fa ni mizwale ba ba fitelela 20,000 ba ba keni Sikolo sa Tuto ya Bukombwa ba ekelize hahulu kwa kekezeho yeo. Mi hape ku na ni Lipaki ba bañata ba ba itombozi ka ku tutela kwa linaha ko ku na ni butokwi bo butuna bwa bahasanyi ba Mubuso. Bakreste bao ba ba na ni moya wa buitomboli—ili banna ni basali, banana ni ba bahulu, makwasha ni ba ba mwa manyalo—ba eza musebezi o mutuna hahulu wa ku kutaza lushango lwa Mubuso mwa lifasi kamukana. (Samu 110:3; Maroma 10:18) Ba itebuhiwa hahulu luli. Ha mu utwe ze ne li ñozi liofisi za mutai ze ñwi ka za ba ba zwa mwa linaha li sili ba ba tutezi mwa libaka za mitai yeo ze na ni butokwi bo butuna.

⁵ “Lipaki ba ba lateha ba, ba etelela ba bañwi mwa ku kutaza taba ye nde mwa libaka ze kwahule, ba tusa ku toma liputeho ze nca, mi ba ekeza kwa ku hula kwa moya kwa mizwale ni likaizeli ba mwa naha.” (Ecuador) “Mizwale ba bañata ba ba zwa mwa linaha li sili ha ne ba ka funduka, liputeho ne li ka fokola hahulu. Ku ba ni bona kwanu ki tohonolo.” (Dominican Republic) “Mwa liputeho za luna ze ñata, ku na ni likaizeli ba bañata, fokuñwi ba kona ku eza 70 pesenti ya bahasanyi. (Samu 68:11) Buñata bwa bona isali ba banca mwa niti, kono likaizeli ba makwasha ba mapaina ba ba zwa mwa linaha li sili ba fa tuso ya butokwa hahulu ka ku luta ba banca bao. Bona likaizeli ba ba zwa mwa linaha li sili ba ki mpo luli ku luna!” (Naha ye ñwi ya kwa Upa wa Yurope) Kana mu kile mwa singanyeka za ku yo sebeleza mwa naha i sili?a—Likezo16: 9, 10.

“Banna Ba Ba Lishumi, Ba Malimi Kaufela”

 6. Zakaria 8:23 i bonisa cwañi butata bwa ku kutaza kwa batu ba ba bulela lipuo ze ñata?

⁶ Butata bo buñwi bo butuna ki buñata bwa lipuo ze bulelwa mwa lifasi. Linzwi la Mulimu ne li sinuzi kuli: “Mwa mazazi ao, banna ba ba lishumi, ba malimi kaufela a macaba, ba ka swalelela mungundo wa kubo ya munna wa Mujuda, ba li: Lu ka ya ni mina; kakuli lu utwile kuli [Muñ’a] Bupilo u inzi ni mina.” (Zakaria 8:23) Mwa talelezo ya cwale ya bona bupolofita bo, banna ba ba lishumi ba swaniseza buñata bo butuna, bo bu polofitilwe kwa Sinulo 7:9. Kono hape mu lemuhe kuli ka ku ya ka bupolofita bwa Zakaria, “banna ba ba lishumi” ha ba na ku zwa fela mwa macaba kaufela kono hape ba ka zwa ni mwa ‘malimi kaufela a macaba.’ Kana lu boni talelezo ya yona taba ya butokwa ye ya bupolofita? Eni, lu i boni luli.

 7. Ki lipalo lifi ze bonisa kuli batu “ba malimi kaufela a macaba” ba utwa taba ye nde?

⁷ Mu nyakisise lipalo ze ñwi. Lilimo ze 50 kwamulaho, lihatiso za luna ne li hatiswa mwa lipuo ze 90, kono kacenu se li hatiswa mwa lipuo ze fitelela 400. “Mutanga ya sepahala, ya na ni kutwisiso” u ezize ka mwa konela kaufela ku sula lihatiso nihaiba mwa puo ye bulelwa ki batu ba sikai fela. (Mateu 24:45) Ka mutala, lihatiso ze tomile fa Bibele se li fumaneha mwa puo ya Greenlandic (ye bulelwa ki batu ba 47,000), ya Palauan (ye bulelwa ki batu ba 15,000), ni ya Yapese (ye bulelwa ki batu ba ba sa fiteleli 7,000).

“Munyako O Mutuna” O Libisa kwa Matohonolo A Manca

8, 9. Ki likezahalo mañi ze lu kwalulezi “munyako o mutuna,” mi ki lika mañi ze ba ezize Lipaki ba bañata?

⁸ Nihakulicwalo, kacenu ha lu tokwi ku ya kwa linaha li sili kuli lu yo bulelela batu ba malimi kaufela taba ye nde. Mwa lilimo za cwanoñu fa, ku taha kwa bazwahule ni babalehi ba ba eza bolule-lule mwa linaha ze fumile ku tahisize likwata ze ñata za batu ba malimi a shutana-shutana. Ka mutala, mwa Paris, kwa France, ku bulelwa lipuo ze bat’o ba 100. Mwa Toronto, kwa Canada, ku bulelwa lipuo ze 125; mi mwa London, kwa England, ku bulelwa lipuo za kwa linaha li sili ze fitelela 300! Ku ekezeha kwa palo ya batu ba ba zwa kwa linaha li sili mwa likalulo za simu ze ñata za liputeho ku kwaluzi “munyako o mutuna” o libisa kwa matohonolo a manca a ku taluseza batu ba macaba kaufela taba ye nde.—1 Makorinte 16:9.

⁹ Buñata bwa lipaki za Jehova ba ituta puo ya ku sili kuli ba kone ku kutaza kwa batu ba malimi a sili. Buñata bwa bona ku ba bela t’ata ku eza cwalo, kono buikatazo bwa bona bu fuyaulwa bakeñisa tabo ya ku tusa bazwahule ni babalehi ku ituta niti ya mwa Linzwi la Mulimu. Mwa silimo sa cwanoñu fa, ibat’o ba 40 pesenti ya ba ne ba kolobelizwe fa mukopano wa sikiliti mwa naha ye ñwi ya kwa Wiko wa Yurope ne ba zwa mwa naha i sili.

10. Mu itusisize cwañi bukanyana ya Good News for People of All Nations? (Mu bone kakwenda ka ka li “Ze Mwa Bukanyana ya Good News for People of All Nations,” ka ka fa likepe 26.)

¹⁰ Ki niti kuli, buñata bwa luna ha lu koni ku ituta puo i sili. Nihakulicwalo, lwa kona ku abana mwa ku tusa bazwahule ka ku itusisa hande bukanyana ye sa zo zusiwa ya Good News for People of All Nations,b ili ye na ni lushango lwa mwa Bibele lo lu fita kwa pilu mwa lipuo ze shutana-shutana. (Joani 4:37) Kana mwa itusisanga yona bukanyana ye mwa bukombwa?

Batu Ha Ba Sa Amuheli Taba Ye Nde

11. Ki butata mañi bo buñwi bo bu li teñi mwa likalulo ze ñwi za simu?

¹¹ Kukuezo ya Satani ha i nze i ekezeha mwa lifasi, lu kopananga ni butata bo buñwi hape—bona bwa ku kutaleza mwa libaka mo i sa amuhelwi taba ye nde. Kaniti, muinelo o cwalo ha u lu komokisi, kakuli Jesu n’a sinuzi kuli muinelo o cwalo u ka ba teñi. Ha n’a bulela ka za miteñi ya luna, n’a ize: “Lilato la ba bañata li ka fola.” (Mateu 24:12) Ku si na kuliñi, batu ba bañata ha ba sa lumela ku Mulimu ni ku kuteka Bibele. (2 Pitrosi 3:3, 4) Ka lona libaka leo, mwa libaka ze ñwi za lifasi, ki batu ba sikai fela ba ba fitanga fa ku ba balutiwa ba Kreste. Kono seo ha si talusi kuli buikatazo bwa mizwale ni likaizeli ba luna ba Sikreste ba ba kutaleza mwa libaka ze si na siselo zeo ki bwa mbango. (Maheberu 6:10) Kabakalañi? Mu nyakisise ze latelela.

12. Ki ifi milelo ye mibeli ya musebezi wa luna wa ku kutaza?

¹² Buka ya Evangeli ya Mateu i koñomeka milelo ye mibeli ya butokwa ye lu kutaleza. Mulelo wa pili kikuli lu ‘luta macaba kaufela’ kuli ba be balutiwa. (Matthew 28:19) Mi wa bubeli ki wa kuli taba ya Mubuso ki “bupaki.” (Mateu 24:14) Milelo yeo kaufela ki ya butokwa, kono wa ku fa bupaki ki ona wa butokwa ni ku fita. Libaka?

13, 14. (a) Ki ifi kalulo ya butokwa hahulu ya sisupo sa ku ba teñi kwa Kreste? (b) Ki nto mañi ye lu swanela ku hupula, sihulu ha lu kutaleza mwa sibaka mo batu ba sa amuheli taba ye nde?

¹³ Mateu, muñoli wa Bibele, n’a ñozi kuli baapositola ne ba buzize Jesu, ba li: ‘Ki sifi se si ka supa ku taha kwa hao, ni ku fela kwa lifasi’? (Mateu 24:3) Jesu a ba alaba kuli kalulo ye ñwi ya butokwa hahulu ya sisupo seo ikaba musebezi wa ku kutaza mwa lifasi kamukana. Kana n’a bulela ka za ku tahisa balutiwa? Kutokwa. N’a ize: ‘Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.’ (Mateu 24:14) Kacwalo, Jesu n’a bonisize kuli musebezi wa ku kutaza Mubuso u ka ba kalulo ya butokwa ya sona sisupo seo.

¹⁴ Kacwalo, ha lu nze lu kutaza taba ye nde ya Mubuso, lu hupula kuli nihaikaba kuli kamita ha lu konangi ku tahisa balutiwa, kono lwa konanga ku fa “bupaki.” Ku si na taba ni mo ba ezeza batu, ba ziba ze lu eza, mi kacwalo lu abana mwa ku taleleza bupolofita bwa Jesu. (Isaya 52:7; Sinulo 14:6, 7) Jordy, Paki wa mukulwani wa kwa Wiko wa Yurope, n’a ize: “Ni banga ya tabile hahulu ka ku ziba kuli ni itusiswa ki Jehova ka ku ba ni kabelo mwa ku taleleza Mateu 24:14.” (2 Makorinte 2:15-17) Ku si na ku kakanya ni mina kona mo mu ikutwela.

Lushango lwa Luna Ha Lu Lwaniswa

15. (a) Jesu n’a lemusize cimo balateleli ba hae ka za nto mañi? (b) Ki nto mañi ye lu konisa ku kutaza niha ku na ni twaniso?

¹⁵ Butata bo buñwi hape bo lu kopana ni bona ha lu kutaza taba ye nde ya Mubuso ki twaniso. Jesu n’a lemusize cimo balateleli ba hae, kuli: “Mu ka toiwa ki macaba kaufela kabakala Libizo la ka.” (Mateu 24:9) Ka ku swana ni Bakreste ba kwa makalelo, balateleli ba Jesu kacenu ni bona ba toilwe, ba lwanisizwe, ni ku nyandiswa. (Likezo 5:17, 18, 40; 2 Timotea 3:12; Sinulo 12:12, 17) Mwa linaha ze ñwi ba muuso ba kwalile musebezi wa bona. Nihakulicwalo, ka ku utwa Mulimu, Bakreste ba niti ba ba pila mwa linaha zeo ba zwelapili ku kutaza taba ye nde ya Mubuso. (Amosi 3:8; Likezo 5:29; 1 Pitrosi 2:21) Ki nto mañi ye ba konisa, ili ye konisa ni Lipaki ba bañwi mwa lifasi kamukana ku zwelapili ku kutaza niha ku na ni twaniso? Jehova wa ba tiisa ka m’ata a moya wa hae o kenile.—Zakaria 4:6; Maefese 3:16; 2 Timotea 4:17.

16. Jesu n’a bonisize cwañi swalisano ye mwahal’a musebezi wa ku kutaza ni moya wa Mulimu?

¹⁶ Jesu n’a koñomekile swalisano ye tuna ye mwahal’a moya wa Mulimu ni musebezi wa ku kutaza ha n’a bulelezi balateleli ba hae kuli: ‘Mu ka amuhela mata, Moya o Kenile ha u ka ta ku mina; mi mu ka ba lipaki za ka . . . ku isa kwa mafelelezo a lifasi.’ (Likezo 1:8; Sinulo 22:17) Mutatamanelo wa litaba mwa liñolo leo u butokwa hahulu. Pili, balutiwa ne ba amuhezi moya o kenile, mi cwale kihona ba kena mwa musebezi wa ku kutaza mwa lifasi kamukana. Ki moya wa Mulimu fela o n’o ka ba konisa ku ba ni m’ata a ku itiisa ku abana mwa ku fa “bupaki mwa macaba kamukana.” (Mateu 24:13, 14; Isaya 61:1, 2) Kona libaka he, Jesu n’a bulezi kuli moya o kenile ki “mutiisapilu.” (Joani 15:26) N’a bulezi kuli moya wa Mulimu ne u ka luta ni ku etelela balutiwa ba hae.—Joani 14:16, 26; 16:13.

17. Ha lu kopana ni twaniso ye tuna, moya o kenile u lu tusanga cwañi?

¹⁷ Moya wa Mulimu u lu tusa ka linzila lifi kacenu ha lu kopana ni twaniso ye tuna ya ku kutaza taba ye nde? Moya wa Mulimu wa lu matafaza, mi u lwanisa ba ba lu lwanisa. Kuli lu tolongoshe taba ye, mu nyakisise ze ne ezahazi mwa bupilo bwa Mulena Saule.

Ku Lwaniswa ki Moya wa Mulimu

18. (a) Saule n’a fetuhile cwañi ku ba mulena ya maswe? (b) Saule n’a itusisize linzila mañi kuli a nyandise Davida?

¹⁸ Saule n’a bile mutu yo munde kwa makalelo ha kala ku busa sina mulena wa pili wa Isilaele, kono hasamulaho a hana ku utwa Mulimu. (1 Samuele 10:1, 24; 11:14, 15; 15:17-23) Ze ne zwile mwa buipanguli bo kikuli moya wa Mulimu ne u tuhezi ku mu tusa. Saule a fita fa ku halifa hahulu ni ku bata ku bulaya Davida, yena ya n’a tozizwe ku ba mulena ya tatama ili ya n’a etelelwa cwale ki moya wa Mulimu. (1 Samuele 16:1, 13, 14) Ne ku bonahala kuli Davida n’a kona ku bulaiwa ka bunolo. Esi mane yena n’a sa shimbangi lilumo n’a shimbanga fela harepa mi Saule yena n’a lwalanga lilumo. Cwale ka zazi le liñwi, Davida ha n’a nze a liza harepa, “Saule a mu nepa ka lilumo, a ipulelisa, a li: Ni ka bulaela Davida kwa limota. Kono Davida a pima habeli fapil’a hae.” (1 Samuele 18:10, 11) Hamulaho wa fo, Saule a teeleza ku mwan’a hae Jonatani, mulikan’a Davida, mi a itama ka luci, a li: “Ka [Muñ’a] Bupilo Ya-Pila, [Davida] h’a na ku bulaiwa.” Kono ku zwa f’o, Saule hape “a lika ku bulaela Davida kwa limota ka lilumo.” Niteñi Davida “a pima, mi Saule a taba mwa limota ka lilumo.” Davida a ñweha ku saba, kono Saule a mu manama kwa n’a ya kaufela. Ka yona nako ye t’ata yeo, moya wa Mulimu wa kala ku lwanisa Saule. Ka mukwa ufi?—1 Samuele 19:6, 10.

19. Moya wa Mulimu ne u silelelize cwañi Davida?

¹⁹ Davida a sabela ku mupolofita Samuele, kono Saule a luma linumwana ku yo tama Davida. Kono ha ne ba fitile mwa sibaka sa n’a ipatile ku sona Davida, “moya wa Mulimu wa ta fahalimu a ba ba lumilwe ki Saule, mi ni bona ba polofita.” Ne ba susumelizwe hahulu ki moya wa Mulimu kuli mane ki ba ba libala ni musebezi wa bona. Saule hape a luma habeli linumwana ze ñwi ku yo tama Davida, mi nto ye swana ya ezahala ku bao kaufela. Kwa mafelelezo, Mulena Saule yena ka sibili a ya ku Davida, kono nihaiba yena Saule ka sibili n’a sa koni ku lwanisa m’ata a moya wa Mulimu. Mane, moya o kenile ne u mu palelwisize ku eza nto ni ye kana “mwa lizazi leo kaufela, ni busihu kaufela”—ili ku fa Davida sibaka sa ku baleha.—1 Samuele 19:20-24.

20. Ki tuto mañi ye lu ituta mwa taba ya Saule ya ku nyandisa Davida?

²⁰ Taba ye ya Saule ni Davida i na ni tuto ye tiisa luli: Ki tuto ya kuli, ba ba nyandisa batanga ba Mulimu ha ba na ku kona ku tula ha ba lwaniswa ki moya wa Mulimu. (Samu 46:11; 125:2) Jehova n’a lelile kuli Davida u ka ba mulena mwa Isilaele. Ha ku na mutu ni yo mukana ya n’a kona ku cinca ona mulelo wo. Mwa miteñi ya luna, Jehova u lelile kuli ‘Evangeli ye ya mubuso i ka bulelwa.’ Ha ku na mutu ni yo mukana ya kona ku palelwisa seo ku ezahala.—Likezo 5:40, 42.

21. (a) Kacenu balwanisi ba bañwi ba ezangañi? (b) Kono lu na ni sepo mañi?

²¹ Baeteleli ba bañwi ba bulapeli ni ba bupolitiki ba itusisa mashano mane nihaiba misunga kuli ba like ku lu palelwisa. Kono sina Jehova ha n’a silelelize Davida kwa moya, mi ni kacenu u ka sileleza batu ba hae. (Malaki 3:6) Kacwalo sina Davida, lwa kona ku bulela ka buikolwiso kuli: “Mulimu ki Yena ye ni sepile, ha ni sabi se siñwi; s’a ka ni eza mutu ki sifi?” (Samu 56:11; 121:1-8; Maroma 8:31) Ka tuso ya Jehova, haike lu zwelepili ku tiyela matata kaufela ha lu nze lu abana mwa musebezi o lu filwe ki Mulimu wa ku kutaza taba ye nde ya Mubuso kwa batu ba macaba kaufela.

[Litaluso za kwatasi]

Kana Mwa Hupula?

• Ki kabakalañi ha lu cinca-cincanga mikutalezo ya luna?

• Ki “munyako o mutuna” o libisa kwa matohonolo mañi a manca o kwaluzwi?

• Musebezi wa luna wa ku kutaza u petile nto mañi nihaiba mwa libaka ze si na siselo?

• Ki kabakalañi ha ku si na mulwanisi ni yo mukana ya kona ku palelwisa musebezi wa ku kutaza taba ye nde ya Mubuso?

[Mbokisi fa likepe 22]

Tabo Ya Ku Ba ni Kabelo mwa Musebezi

“Lu tabile mi lu ikola ku sebeleza Jehova hamoho.” Manzwi ao a talusa bupilo bwa lubasi lo ne lu tutile ku zwa kwa Spain ni ku ya kwa Bolivia. Mutangana wa mwa lubasi lo n’a tutezi kwa Bolivia kuli a yo tusa sikwata se si kwahule. Tabo ya n’a bile ni yona ne i susuelize hahulu bashemi ba hae kuli mane ku si ka fita nako lubasi kaufela—ku kopanyeleza ni bashimani ba lilimo ze mwahal’a 14 ni 25 za ku pepwa—ba kutaleza mwa Bolivia. Bashimani ba balalu ba mwa lubasi lo se ba se li mapaina, mi mutangana yani ya n’a kalile ku tuta, cwanoñu fa u keni Sikolo sa Tuto ya Bukombwa.

Angelica wa lilimo ze 30 za ku pepwa wa kwa Canada, ya sebeleza kwa Upa wa Yurope u li: “Matata ki a mañata, kono ni fumana tabo ka ku tusa batu mwa bukombwa. Mi hape ni susuezwanga hahulu ki manzwi a mañata a buitebuho a Lipaki ba ko ni sebeleza, ili ba ba itumelanga ku na kamita ka ku taha ku to ba tusa.”

Likaizeli ba ba li bana ba mba ba lilimo za ku bo ma-20 za ku pepwa ba kwa United States, ba ba sebeleza kwa Dominican Republic, ne ba ize: “Ne lu na ni ku twaelana ni lizo ze ñata ze fapahana-fapahana. Nihakulicwalo, ne lu itiisize mwa musebezi wa luna, mi ku be lu ituta ni bona Bibele, ba 7 se ba fumanehanga kwa mikopano.” Likaizeli ba babeli bao ne ba tusize hahulu kwa ku onga-onga sikwata sa bahasanyi ba Mubuso mwa tolopo mo ku si na puteho.

Laura, kaizeli wa lilimo za ku bo ma-20, s’a sebelelize mwa linaha li sili ka lilimo ze fitelela z’e ne. U li: “Ni ikatulezi ku nolofaza mupilelo wa ka. Ku eza cwalo ku tusize bahasanyi ku lemuha kuli ku pila mupilelo o bunolo ki keto mi ki poniso ya kuli mutu u na ni kutwisiso, isiñi kuli ki bunjebwe. Ku tusa ba bañwi, sihulu mikulwani, ku ni tahiselize tabo ye konile ku kuyula matata kaufela a ku sebeleza mwa naha i sili. Ha ni na ku tuhela sebelezo ya ka kwanu, kuli ni yo pila mupilelo u sili, mi ni ka ina ona kwanu ku likana ni mwa ka tokwela Jehova.”

[Mbokisi/Siswaniso se si fa likepe 26]

Ze Mwa Bukanyana ya Good News for People of All Nations

Bukanyana ya Good News for People of All Nations i na ni taba ye ñozwi fa likepe ni likepe mwa lipuo ze fita fa 92. Taba yeo i ñozwi ka nzila ye eza inge ki ya ku ambola fela ni mutu yo muñwi. Kacwalo, muñ’a ndu ha bala taba yeo, i utwahala inge kuli mu ambola fela ni yena.

Likepe la pili mwahali li na ni mapa ya lifasi. Mu itusise mapa yeo ka nzila ye ka mi konisa ku twaelana ni muñ’a ndu. Mwendi mwa kona ku supa naha mo mu pila ni ku mu bonisa kuli ne mu ka tabela ku ziba naha kwa zwelel’a yena. Ka nzila yeo, mu ka mu susueza ku lukuluha ni ku ambola ka silikani.

Manzwi a makalelo a bukanyana ye a bonisa mihato i sikai ye lu swanela ku nga kuli lu kone ku tusa hande batu ba ba bulela puo ye lu sa zibi. Shangwe mu bale ka tokomelo mihato yeo ni ku itusisa yona ka tokomelo.

Mukoloko wa ze mwahali ha u bonisi fela lipuo kono hape u bonisa ni lisupo za lipuo zeo. Nto yeo i mi tusa ku ziba lisupo za puo ze ñozwi fa matrakiti ni lihatiso za luna ze ñwi za mwa lipuo lisili.

[Siswaniso]

Kana mwa itusisa bukanyana ye mwa bukombwa?

[Maswaniso a fa likepe 23]

Lihatiso za luna ze tomile fa Bibele se li fumaneha mwa lipuo ze fitelela 400

GHANA

LAPLAND (SWEDEN)

PHILIPPINES

[Maswaniso a fa likepe 24, 25]

Kana mwa kona ku yo sebeleza ko ku na ni butokwi bo butuna bwa bashaeli ba Mubuso?

ECUADOR

DOMINICAN REPUBLIC