Ku Siyala Inze Lu Kopani Hamoho Mwa Ku Punyuha Ni Ku Kena Mwa Lilimo Ze Sikiti
“Ikaba mutapi u li mu ñwi, ni mulisana a li muñwi.”—JOANI 10:16.
1. Ku Mulimu ya pila ku ya ku ile, lilimo ze sikiti li swana sina nto mañi?
JEHOVA ki yena Muezi wa nako kwa neku la mufuta wa mutu. Mi ku yena, Mulimu ya sa shwi y’a zwa ko ku si na makalelo ku yo fita ko ku si na mafelelezo, lilimo ze sikiti li swana sina lizazi le li ishimbulula ka bubebe mi mane sina nako ya mutonelo wa mwahal’a bo buñwi bwa masihu a luna.—Lisamu 90:4; 2 Pitrosi 3:8.
2. Ki nako ya butelele bo bu fita kai yeo Jehova u se a beile kwatuko mwa ku fuy’ola mufuta wa mutu kaufela?
2 Mulimu u se a tomile lizazi la swanisezo la lilimo ze sikiti ili leo mwahal’a lona u ka fuy’ola mishobo kamukana ya fa lifasi-mubu. (Genese 12:3; 22:17, 18; Likezo 17:31) Seo si kopanyelezwa cwalo ni bao ba se ba shwile ni ba ba sa pila. Mulimu u ka eza seo kamukwaufi? Ee, ka ku itusisa Mubuso wa Hae ka Jesu Kreste, yena “peu” ya musali ye li wa Hae wa swanisezo!—Genese 3:15.
3. (a) Lisito la Peu ya musali ye li wa Mulimu ne li lumilwe kamukwaufi, kono sona sitombo seo ne si folile kamukwaufi? (b) Kwa mafelelezo a Puso ya Jesu Kreste ya Lilimo ze Sikiti, ki sifi sa ka eza kwa noha ya swanisezo?
3 Lisito la swanisezo la Peu ya musali ye li wa Mulimu (kamba kopano ya hae ya kwa lihalimu) ne li lumilwe muta Jesu Kreste n’a fitile fa ku bulaiwa ni ku siyala cwalo inze a shwile mwahal’a likalulo za mazazi a malalu ka silimo sa 33 sa Nako ya luna ye Zibahala. Kono ka lizazi la bulalu, Mulimu Ya M’ata Ote, Mufani wa Bupilo Yo Mutuna, n’a folisize sona sitombo seo ka ku zuseza Mwan’a hae ya sepahala kwa bupilo bwa ku sa shwa mwa kalulo ya kwa moya. (1 Pitrosi 3:18) Bakeñisa kuli Jesu h’a na ku shwa hape, u mwa mayemo a ku kona ku busa sina Mulena fahalimw’a mufuta wa mutu ka lilimo ze sikiti ni ku “pyata” toho ya noha ya swanisezo, ku mu timeza ka ku tala hamulaho wa mafelelezo a Puso ya Lilimo ze Sikiti. Seo si ka ba mbuyoti hakalo kwa mufuta wa mutu o sepahala o kutisizwe sinca!
4. Ki tukiso ya mufuta mañi yeo Mulimu u se a zwiselize pili ni batu ba hae?
4 Ku kopanya lika hamoho ko kutuna ku se ku zwezipili mwahal’a batu ba Jehova lifasi kamukana mwahal’a “mafelelezo a muinelo wa linto” wo haisali ku zwiwa fa ku fela kwa Linako za Balicaba ka 1914. (Mateu 24:3; Luka 21:24, King James Version) Yona tukiso ye ya ku kopanya lika hamoho pili Lilimo ze Sikiti li si ka fita kale i sweli ya zwisezwapili ka ku ya ka tato mi ili mwatas’a Mukopanyi yo Mutuna, Jehova Mulimu. Ka musali ye li wa hae, kopano ya kwa lihalimu ye swana sina musali wa hae, ku pepiwa kwa Mubuso o ne u sepisizwe ka Jesu Kreste ne ku ezahezi ka 1914, sina seo ha si pakiwa ki talelezo ya bupolofita bwa Bibele.
5. Ki ku pepwa kwa nto mañi ko ne ku talusizwe cimo kwa Sinulo 12:5, mi seo ne si talusizwe lwa pili l’ili mwa The Watch Tower?
5 Kacwalo manzwi a a kwa Sinulo 12:5 a se a talelelizwe ka nzila ye kanya: “A pepa mwan’a mushimani ya ka lisa macaba kaufela ka mulamu wa sipi. Mwan’a hae a ngelwa ku Mulimu, ni kwa Lubona lwa hae.” Ku pepwa kwa Mubuso wa Jehova ka Kreste, sina ha u swaniselizwe ki mwana ya sa z’o pepwa wa musali ye li wa Mulimu, ne ku talusizwe lwa pili mwa The Watch Tower ya March 1, 1925. Ku pepwa kwa ona Mubuso wo wa Bumesia mwa lihalimu ka 1914 ku fapahana ni ku pepwa kwa “sicaba” sa ‘bana’ ba Sione fa lifasi-mubu ka 1919.—Isaya 66:7, 8.
6. (a) Ku pepiwa kwa Mubuso ne ku tahisize musebezi mañi o ne u talusizwe cimo ki Jesu? (b) Ku eza musebezi wo ne ku tokwa nto mañi kwa neku la batu ba Jehova, mi ki mayemo a mufuta mañi a se ba bile ni ona cwale?
6 Ku pepwa kwa Mubuso wa Jehova ili w’o ka ona u ka bubeka puso ya hae ye lukile fahalimw’a pupo kamukana—ehee, yeo cwale ne li nto ye ne i tokwa ku zibahazwa fa lifasi-mubu kamukana! Mi yeo cwale ne li nako ya ku talelezwa kwa manzwi a a Jesu a ama ka za bupaki bwa ku “taha” kwa hae ka ku sa bonahala: “Evangeli ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mateu 24:14) Ku kutaza ka ku fita fa sipimo sa mwahal’a macaba, ko ku swalisani ili ko ku zamaelela hamoho, ne ku ka tokwa luli ku kopanya hamoho kalulo ye bonahala ya kopano ya Jehova ya mwa pupo kamukana. Watch Tower Bible and Tract Society, sina ha ne i yemelwa ki ya n’a li prezidenti wa yona ka nako yeo, J. F. Rutherford, ne i tabela ona seo. Kacwalo, haisali ku zwiwa fa silimo sa hamulaho wa ndwa sa 1919, ku kopanyiwa hamoho kwa bayemeli ba ba sepahala ba Sosaiti sina sicaba se si kutisizwe sinca kwa zwelapili ka tundamo, ka tapelo ya ku kupa ketelelo ni mbuyoti ya Mukopanyi yo Mutuna, Jehova Mulimu. Mwahal’a Ndwa ya Lifasi ya II, ku si na taba ni twaniso ye tuna ye ne i zwelela kwa Ma-Fascisti, kopano ya Nazi ya Hitler, ni Muhato wa Katolika, Lipaki za Jehova lifasi-mubu kamukana ne ba yemi ka swalisano ye tiile mwa ku talimana ni lifasi la sila.
7. (a) Ki ka ku siyala mwa swalisano mañi yo muñwi ku yo muñwi batu ba Jehova ha ne ba kana ba libelela ku punyuha ñalelwa ye tuna? (b) Bapunyuhi ba Munda ne ba pululelize kamukwaufi Munda wa lifasi kaufela, mi ne ba swaniseza bo mañi?
7 Ki Lipaki za Jehova fela, bao ba bo masiyaleti ba ba tozizwe ni “buñata bo butuna,” ka ku ba sina kopano ye swalisani mwatas’a silelezo ya Mukopanyi yo Mutuna, ba ba na ni sepo ye tomile mwa Mañolo ya ku punyuha mafelelezo a atumela a muinelo wo o atulezwi timelo o busiwa ki Satani Diabulosi. (Sinulo 7:9-17; 2 Makorinte 4:4) Ki bona ba ba ka ba ‘libupiwa’ zeo Jesu Kreste n’a bulezi kuli li ka piliswa mwa ñalelwa ye tuna ni ku fita mwa litaba za mufuta wa mutu kamukana. Sina mo ne ku inezi mwa mazazi a Nuwe, sina ka mwa n’a bulelezi Jesu, ko na hape mo ku ka bela H’a ka fita fa ku bonahala. Mwahali a aleka ye ne i ngile lilimo ze ñata za mihato ye ne i swalisani hamoho mwa ku i feza, ne li mioyo ye supile ka u li muñwi fela ye ne i punyuhile Munda wa lifasi kamukana. Ne ba punyuhile sina sikwata sa lubasi lo lu swalisani. (Mateu 24:22, 37-39; Luka 17:26-30) Musal’a Nuwe u swana sina munyaliwa wa Kreste, mi bana ba hae ba bashimani ni basali ba bana ba hae ba swaniseza “lingu ze ñwi” za Jesu ba mwa lizazi la cwale, ili bao se ba yuyulukile ka ku fita fa ku ba buñata bo butuna bo bu nze bu ekezeha, mi buñata bwa bona kwa mafelelezo ha lu bu zibi cwale. (Joani 10:16) Kuli ba punyuhe ni ku kena mwa Lilimo ze Sikiti mwatas’a Nuwe yo Mutuna, Jesu Kreste, ba na ni ku siyala inze ba kopani hamoho ni bo masiyaleti ba ba tozizwe, “ba ba ketilwe” ili bao mazazi a “ñalelwa . . . ye tuna” a ka fukuzwa bakeñisa bona.—Mateu 24:21, 22.
Ku Punyuha Ni Ku Kena mwa Lilimo Ze Sikiti
8. Mwa ku feza bupolofita bwa hae bo bu ama ka za ku ba teñi kwa hae, ki swanisezo mañi ya n’a file Jesu, mi lizazi la June 1, 1935, ki la butokwa kamukwaufi kwa neku la ku i utwisisa?
8 Ka ku ya ka Evangeli ya Mateu, Jesu n’a felize bupolofita bwa hae ka za sisupo sa ku ba teñi kwa hae ka ku itusisa swanisezo. I zibahala hahulu sina nguli ya lingu ni lipuli, mi i sebeza ona cwale, mwahal’a mafelelezo a muinelo wo wa linto, a n’a kalile kwa mafelelezo a Linako za Balicaba ka 1914. (Mateu 25:31-46) Lizazi la Mukibelo, June 1, 1935, ne li li le li butokwa hahulu mwa ku fita fa ku ziba lingu za yona nguli yeo kuli ki lilama za buñata bo butuna. Ku lona lizazi leo, kwa mukopano o mutuna wa Lipaki za Jehova kwa Washington, D.C., batu ka buñwi ba ba fita fa 840 ne ba kolobelizwe ili ka poniso ya buineelo bwa bona ku Jehova Mulimu ka Jesu Kreste. Ba bañata mwahal’a bona bao ne ba ngile ona muhato wo wa kaputako bakeñisa ngambolo ya fa Sinulo 7:9-17 ye ne i filwe ki J. F. Rutherford. Ne ba na ni takazo ya ku fita fa ku ba kalulo ya buñata bo butuna bwa lingu ze ñwi za Mulisana yo Munde, ili ka ku ba ni sibaka sa ku punyuha ñalelwa ye tuna ye taha ni ku pila ka ku pululeza mafelelezo a muinelo wo mi ni ku kena mwa Puso ya Lilimo ze Sikiti ya Mulena y’a li Mulisana, Jesu Kreste. Kwa mafelelezo, ba fumana bupilo bo bu sa feli mwa paradaisi ya lifasi-mubu.—Mateu 25:46; Luka 23:43.
9. Ki kabakalañi lingu ha li memiwa kuli ba “yole mubuso o n’o lukiselizwe [bona],” mi ba mwa kalulo ye nde ka ku fitisisa ya ku eza ze nde kwa banyani ba Mulena kamukwaufi?
9 Ki kabakalañi bona bao ba ba swana sina lingu ha ba memiwa kuli ba “yole mubuso o n’o lukiselizwe [bona] haisamba lifasi li tomwa”? Mulena u ba bulelela kuli ki ka libaka la kuli ne ba ezize ze nde kwa “banyani” ba hae, mi kacwalo ba ezize zeo ku yena. Ka pulelo ya “banyani,” Mulena u talusa bo masiyaleti ba banyani ba hae ba kwa moya ba ba sa li teñi fa lifasi-mubu ku ona mafelelezo a a muinelo wa linto. Ka ku fita fa ku ba mutapi u li muñwi ni bona banyani bao ba Mulena y’a li Mulisana, Jesu Kreste, ne ba ka ba mwa swalisano ye tezi ni bo masiyaleti ba bona mi kacwalo ne ba ka ba mwa mayemo a mande a ku kona ku eza ze nde ku bona. Nihaiba mwa linzila za kwa mubili, ne ba ka tusa banyani ba Jesu mwa ku kutaza mwa lifasi kamukana taba ya Mubuso o tomilwe pili mafelelezo a si ka fita kale. Kwa neku la se, lingu ne li ka nga ka butuna tohonolo ya zona mwa ku kopana hamoho ni bo masialeti sina mutapi u li muñwi wa Mulisana a li muñwi.
10. Ku talusañi kuli lingu li ka “[yola] mubuso o n’o lukiselizwe [bona] haisamba lifasi li tomwa”?
10 Ku “[yola] mubuso o n’o lukiselizwe [bona]” ha ku talusi kuli lingu li ka busa ni Jesu Kreste ni banyani ba hae mwa lihalimu ka lilimo ze sikiti. Ka ku fapahana, ku zwa fela kwa makalelo a Lilimo ze Sikiti, lingu li ka yola kalulo ya Mubuso ya lifasi. Bakeñisa kuli ki bana ba Adama ni Eva, yona kalulo ye ya lifasi yeo Mubuso wa Mulimu ka Kreste u ka ba ni m’ata fahalimw’a yona ne i lukiselizwe bona “haisamba lifasi li tomwa” la mufuta wa mutu o kona ku liululwa. Ka ku ekeza, bakeñisa kuli lingu li fita fa ku ba bana ba fa lifasi-mubu ba Mulena, y’o a fita fa ku ba “Ndate wa Kamita” ku bona, ba ka yola kalulo, kamba sanda sa fa lifasi-mubu, mwatas’a Mubuso wa Mulimu.—Isaya 9:6, 7.
11. Lingu li bonisa cwañi kuli li yemi kwa lineku la Mubuso, mi kabakala sona seo, ki ifi mbuyoti ya zona?
11 Ka ku fapahana ni lipuli za swanisezo, bao ba ba swana sina lingu ku si na ku lyangana ba bonisa kuli ba yemi kwa lineku la Mubuso. Kamukwaufi? Ka likezo, isiñi ka manzwi fela. Bakeñisa kuli Mulena h’a bonahali mwa mahalimu, ha ba koni ku eza ze nde ku yena ka sibili ka ku yemela Mubuso wa hae. Kacwalo ba eza ze nde kwa banyani ba hae ba kwa moya ba ba sa li teñi fa lifasi-mubu. Nihaike seo si tisa sitoyo, twaniso, ni nyandiso ku zwelela kwa lipuli, mwa ku eza ze nde ze cwalo, lingu li talusezwa ki Mulena kuli li ‘fuy’ozwi ki Ndat’ahe.’
12. Lingu ze ka punyuha li ka ba ni tohonolo ya ku amuhela bomañi, mi kwa neku la se, ki ufi muhupulo w’o lilama za bo masiyaleti se ba bile ni ona?
12 Buñata bo butuna bwa bao ba ba swana sina lingu ba ba li batusi ba banyani ba Mulena ba kwa moya ba ka fuy’olwa ka tohonolo ya ku punyuha ni ku kena mwa Lilimo ze Sikiti. Mwahal’a nako ye swanela, ba ka abana mwa ku amuhela bafu ba ba inzi mwa mabita a kupuzo. (Joani 5:28, 29; 11:23-25) Bona bao ba ka kopanyeleza cwalo ni ba ne ba li litoho za masika ba ba sepahala ni bapolofita ba ne ba nyandile ni ku tiyela ze ñata kwa neku la ku bubeka bubusi bwa Jehova ili kuli ba “fumane zuho ya bafu ye nde ku fita,” mwendi ya kwa makalelo. (Maheberu 11:35) Bona banna ni basali ba tumelo ba ba zusizwe bao, ili ba ba bonisizwe ka licika fela kwa Maheberu kauhanyo 11, ba ka kopanyeleza cwalo ni Joani Mukolobezi. (Mateu 11:11) Bo masialeti ba bañwi ba ba tozizwe se ba hupuzi kuli ba ka punyuha ni ku zwelapili ku pila kuli mane ba fite ni fa ku amuhela basepahali ba ba zusizwe ba ba cwalo ba ne ba shwile pili Pentekonta ya 33 C.E. i si ka fita kale. Kana bo masiyaleti ba ka ba ni tohonolo ye cwalo?
13. Ki kabakalañi ha ku si ke kwa ba ko ku tokwahala kuli bo masiyaleti ba be teñi mwa ku amuhela ni ku babalela bao ba ba ka zusiwa fa lifasi-mubu?
13 Seo ha si na ku ba se si tokwahala. Buñata bo butuna bwa bapunyuhi ba ñalelwa ye tuna ba ka ba teñi ka lipalo ze likani mwa ku talima ka za muinelo ni ku ezisa ba ba zusizwe ku ba ba ba twaelani ni “lifasi le linca” mwatas’a “lihalimu le linca.” (2 Pitrosi 3:13) Nihaiba ona cwale, buñata bo butuna bu sweli bwa kopanyiwa hamoho kwa neku la seo. Kacenu, banyani ba Jesu ba kwa moya fa lifasi-mubu ka ku ya ka piho ba fita fela fa palo ye mwatas’a 9,000, ba ba ka punyuha mwahal’a bona mwa muinelo ufi ni ufi ba ka ba ba banyinyani hahulu kuli mane ha ba na ku kona ku talima ka za musebezi wa litukiso ze isa kwa zuho ya ka nañungelele. (Ezekiele 39:8-16) Fa, cwalehe, ki fona f’o buñata bo butuna, ili bao palo ya bona i fita ku bolule-lule, ba ka sebeza hande ni ku fita. Mi tohonolo ya mufuta o cwalo ku si na ku kakanya i bulukezwi bona.
14. (a) Ba bañata ba buñata bo butuna ba sweli ba lutiwa kwa neku la nto mañi, mi ki kabakalañi ba bañata ku bona cwale ha ba swanela ku nga buikalabelo? (b) Ki likezahalo lifi ze swanela ku ba teñi ona cwale-cwale fa, mi ki musebezi mañi o libelezi lingu ze ñwi?
14 Ba bañata mwahal’a buñata bo butuna ba se ba fitile fa ku lutiwa kale ka za buikalabelo bwa mwa puteho ni ka litukiso za ku yaha zeo kopano ya Mulimu i sweli ku li eza mwa lifasi-mubu kamukana. Mi kwa susueza ku bona kekezeho ya banna ba ba hulile kwa moya ba buñata bo butuna ha ba nze ba fiwa buikalabelo bo butuna ni ku fita mwa kopano yeo Jehova a i sebelisa fa lifasi-mubu. Bo masiyaleti ba ba tozizwe se ba fita fa ku atelwa ki lilimo mi ha ba sa kona hande ku lwala mushimbo ka nzila ye tezi. Bona banyani ba Mulena bao ba itebuha tuso ya ku kopana hamoho yeo maeluda ni batanga ba bukombwa ba ba fitile ku ze konisa za kwa moya ba kona ku fa. Ona cwale-cwale fa, Babilona yo Mutuna u ka be a zwisizwe fa lundandala lwa lifasi. Cwale, sina Sinulo 19:1-8 ka mo i boniseza, sinawenga sa Ngunyana ni munyaliwa wa hae wa ba 144,000 kaufela si ka ungekwa mwa mahalimu, mi lingu ze ñwi, ba ba sebeza sina lifasi le linca mwatas’a lihalimu le linca, ba ka yemela Mulena mwa ku zwisezapili musebezi o makaza wa ku kutisa lika sinca ku fitela lifasi-mubu kaufela ha li ka fita fa ku ba paradaisi ye tezi batu kwa neku la tumbo ku Jehova.—Isaya 65:17; mu bapanye Isaya 61:4-6.
15. Ki litibelelo lifi zeo buñata bo butuna bu na ni zona kwa neku la Lilimo ze Sikiti?
15 Mwahal’a Puso ya Kreste ya Lilimo ze Sikiti, bafu ba ba liuluzwi ba mufuta wa mutu ha ba ka zusiwa, buñata bo butuna ba ba ka punyuha ba ka ikola matohonolo a matuna ni a kutekeha. Ka nako yeo ba ka ba bana ba Mulena ba bashimani ni ba basizana. Ku ka ba ko ku konahala kwa bana ba bashimani ba ba cwalo kuli mwahal’a bona ku be ni ba ba ka ba mwa litulo za ku ba manduna, sina mane bana ba bashimani ba Mulena Davida ha ne ba li manduna ba buikalabelo bo bu fitana-fitana.a Seo si lu hupuza ka za Lisamu 45, ye ñozwi ka ku ama ku “mulena” ya tozizwe wa Jehova.
16. Lisamu 45 i supa ku mañi ka sibili, mi seo si kona ku boniswa kamukwaufi?
16 Lisamu 45 i supa ku mulena ufi luli? Ee, ku Jesu Kreste! Maheberu 1:9 i supa ku sona seo ka ku ama kwa Lisamu 45:7, ye bala kuli: “U lata niti, mi u toile bumaswe; Ki hona Mulimu, Mulimu wa hao, h’a ku tozize oli ya tabo, U beiwe fahalimw’a balikani ba hao.” Kacwalo ki ku Jesu Kreste ka sibili ya filwe kanya k’o Lisamu 45:16 i talusa kuli: “Mwa litulo za bokuku a hao ku ka ina bana ba hao, U ka ba beya manduna mwa naha kaufela.”
17. Ki mwa sikamañi mi ki ku mañi k’o Mulena, Jesu Kreste, a na ni cisehelo ye tuna ni ku fita?
17 Ka ku nepahala, Jesu u na ni cisehelo hahulu mwa nako ya hae ya kwapili ya ku busa sina Mulena ku fita mwa nako ya hae ya kwamulaho fa lifasi-mubu. Ka mo ku inezi fela, h’a libali yona nako yeo ya kwamulaho mi sihulu bo kukululu ba hae ba ne ba abani mwa sepiso ya Jehova ya ku fuy’ola macaba kamukana ka Peu ya Abrahama. Mwa nako ya cwale cisehelo ya hae ye tuna i mwa nako ya kwapilinyana sina ha i lelilwe ki Muezi wa Mulena, Jehova Mulimu. Kacwalo bana ba Jesu ba fa lifasi-mubu, sihulu bana ba bashimani mwahal’a bona ba ba fitile ku ze konisa za ku sebeza mwatas’a hae mwa litulo za bunduna, ba ka ba mwa kalulo ya cisehelo—ku fita bo kuku a hae ba fa lifasi-mubu.
18. Litoloko ze ñwi ze fitana-fitana za Lisamu 45:16 li koñomeka cwañi cisehelo ye tuna ya Jesu mwa bana ba ba li manduna ku fita bo kuku wa hae ba fa lifasi-mubu?
18 Cisehelo ya Jesu ye tuna mwa bana ba bashimani ba ba li manduna ku fita bo kuku a hae i koñomekilwe ki litoloko ze fitana-fitana za Bibele. Ki fa ka m’o ze ñwi li tolokela Lisamu 45:16: “Bana ba hao ba bashimani ba ka to yema mwa sibaka sa bo ndat’aho, ni ku fita fa ku ba manduna mwa naha kaufela.” (Moffatt) “Sibaka sa bo ndat’aho si ka ngiwa ki bana ba hao ba bashimani; u ka ba eza manduna mwa naha kaufela.” (Timana 17, The New American Bible) “Mwa sibaka sa bo ndat’aho bana ba ka pepiwa ku wena: u ka ba eza manduna mwa lifasi-mubu kamukana.”—The Septuagint Version, ye hatisizwe ki Samuel Bagster ni Sons.
19. Banna ba bañwi ba buñata bo butuna ba na ni buikalabelo mañi cwale mwa puteho, mi ki mwa sibaka mañi m’o Mulena, Jesu Kreste, n’a kana a ba ketela teñi mwahal’a Puso ya hae ya Lilimo ze Sikiti?
19 Ki tabo ye tuna ku luna, kuli bao ba ba ka ba manduna ba inzi mwahal’a luna ka sibili. Ba fumanwa mwahal’a lingu ze ñwi ba ba teeleza kwa linzwi la Mulisana yo Munde, Jesu Kreste. Sihulu se ba teelelize ku lona haisali ku zwiwa ka 1935, Sinulo 7:9-17 ha ne i talusizwe kwa mukopano o mutuna wa Lipaki za Jehova kwa Washington, D.C. Kacenu, likiti-kiti za bona buñata bo butuna b’o ba sebeza sina maeluda, kamba baokameli, mwa liputeho za Lipaki za Jehova ze fitelela 57,670 mwa linaha ze 212 ku potoloha lifasi. Ka ku siyala inze ba kopani hamoho ni bo masiyaleti ba banyani ba Jesu ba kwa moya ba ba sa li fa lifasi-mubu, bona banna bao ba na ni sibaka se sinde sa ku ngiwa ka ku tala sina bana ba bashimani ba Mulena, Jesu Kreste, mwahal’a Puso ya hae ya Lilimo ze Sikiti fahalimw’a lifasi le linca le li sepisizwe. (2 Pitrosi 3:13) Ka ku ba cwalo, ne ba kana ba ketwa sina manduna ba ba ka sebeza mwa lifasi le linca.
20. (a) Ki mubonelo ufi wa ka ba ni ona Mulena kwa neku la baketiwa ba hae fa lifasi-mubu? (b) Buñata bo butuna bu ka amuhela bo mañi, mi ki tohonolo mañi ye ka fiwa bao ba ba ka kuta?
20 Mulena, Jesu Kreste, u ka ba ya tabile mwa ku ziba bona manduna ba banca bao ba ba ketilwe, sina mane cwale ka mwa zibela buokameli bwa lingu ze ñwi ze sepahala mwa liputeho za mwa lizazi la cwale za Lipaki za Jehova. Lilama kamukana za buñata bo butuna bwa lingu ze ñwi—basali hamohocwalo ni banna—ba ka ba ni tohonolo ye makaza ya ku amuhela bafu bao kaufela ba ba ka utwa linzwi la Jesu ni ku nga muhato fa tohonolo ya ku fumana bupilo bo bu sa feli mwa bupetehi bwa butu fa lifasi-mubu le li kenisizwe le li ka fetulwa paradaisi ya lifasi kaufela. (Joani 5:28, 29) Bao ba ba shemubilwe hahulu ba ba zusizwe ba ka kopanyeleza cwalo ni bo kuku a hae Jesu Kreste ba ba liuluzwi, banna ba tumelo ba ne ba itatela ku bonisa buineelo bwa bona ku Jehova Mulimu nihaiba ka ku fita fa lifu ka sepo ya ku fumana “zuho ya bafu ye nde ku fita.” (Maheberu 11:35) Ku tahiswa kwa bona fa bupetehi bwa bupilo bwa butu mwahal’a Puso ya Lilimo ze Sikiti za Muliululi wa bona y’a li Mulena, Jesu Kreste, ki makalelo fela. Ka ku siyala inze ba kopani hamoho mwatas’a Jehova Mulimu ku si na ku yenduka mwahal’a tiko ya mafelelezo fahalimw’a mufuta wa mutu o kutisizwe sinca kwa mafelelezo a Lilimo ze Sikiti, ba ka iponahaza ili bona ku ba ba ba swanelwa ku fiwa bupilo bo bu sa feli mwa Paradaisi sina kalulo ya fa lifasi-mubu ya kopano ya Jehova ya mwa pupo kaufela.—Mateu 25:31-46; Sinulo 20:1–21:1.
[Litaluso za kwatasi]
a Mu bapanye 2 Samuele 8:18, New World Translation Reference Bible, litaluso za kwatasi.
Ne Mu Ka Alaba Cwañi?
◻ Ki nako ifi ya s’a beile Jehova kwatuko mwa ku fuy’ola mufuta wa mutu kaufela?
◻ Ki ka ku siyala mwa swalisano mañi yo muñwi ku yo muñwi ha lu kona ku punyuha ñalelwa ye tuna?
◻ Ku talusa nto mañi kuli lingu li ka ‘yola mubuso o n’o lukiselizwe bona haisamba lifasi li tomwa’?
◻ Mwahal’a Lilimo ze Sikiti, ki mwa matohonolo afi ao buñata bo butuna bu ka abana ku ona?