Libaka Lipaki za Jehova Ha Ba Libelela

“Mu libelele . . . kakuli ha mu zibi lizazi l’a ka taha Mulen’a mina.”—MATEU 24:42.

 1. Kelezo ya kuli “mu libelele” i sebeza ku bomañi?

KU MUTANG’A Mulimu kaufela—ku si na taba ni kuli mutu ki yo munca kamba ki ya supezi, ya sa z’o ineela kamba ya s’a bile mwa sebelezo ka nako ye telele—kelezo ye mwa Bibele y’a sebeza ye li: “Mu libelele”! (Mateu 24:42) Ki kabakalañi seo ha si li sa butokwa?

 2, 3. (a) Ki sisupo mañi seo Jesu n’a talusize ka ku utwahala, mi talelezo ya bupolofita i bonisize nto mañi? (b) Ki muinelo mañi o amilwe teñi kwa Mateu 24:42 o’ lika buniti bwa tumelo ya luna, mi ki kamukwaufi?

² Kwa mafelelezo a bukombwa bwa hae fa lifasi-mubu, Jesu n’a bulezi cimo sisupo sa ku ba teñi kwa hae ka ku s’a bonahala mwa m’ata a Mubuso. (Mateu, likauhanyo 24 ni 25) N’a talusize ka ku utwahala hande nako yeo ya ku ba teñi kwa hae ka bulena—mi likezahalo ze li talelezo ya bupolofita li bonisa kuli n’a yolisizwe sina Mulena mwa lihalimu ka 1914. Hape n’a supile kwa muinelo o ne u k’a lika buniti bwa tumelo ya luna ka nako yeo. Seo ne li ka ku ama kwa nako yeo na k’a nga muhato sina Muhali kuli a sinye muinelo o maswe o’ li teñi mwahal’a ñalelwa ye tuna yeo Jesu n’a bulezi kuli: “Haili ka za lizazi leo ni za nako yeo, ha ku na ya li ziba; mane ni mangeloi a kwa lihalimu h’a li zibi, nihaiba Mwana, konji Ndate a li nosi.” Ne li ka ku beya seo mwa munahano ha n’a bulezi kuli: “Mu libelele he, kakuli ha mu zibi lizazi l’a ka taha Mulen’a mina.”—Mateu 24:36, 42.

³ Ku sa ziba kwa luna lizazi ni nako yeo ñalelwa ye tuna i ka kalisa ki nto ye tokwa kuli haiba lu ipapata ku ba Bakreste, lu swanela ku pila sina Bakreste ba niti ka zazi ni zazi. Kana nzila ye mu itusisa ka yona bupilo bwa mina i k’a tahisa tumelezo ya Mulena muta ñalelwa ye tuna i k’a fita? Kamba haiba lifu li taha pili, kana u k’a mi hupula sina yo muñwi ya n’a sebelelize Jehova ka busepahali ku t’o fita ni kwa mafelelezo a bupilo bwa mina bwa cwale?—Mateu 24:13; Sinulo 2:10.

Balutiwa ba kwa Makalelo Ne Ba Likile ka T’ata ku Libelela

 4. Ki sifi se lu kona ku ituta kwa mutala wa Jesu wa ku libelela kwa moya?

⁴ Jesu Kreste yena ka sibili n’a tomile mutala o munde ka ku fitisisa wa ku libilela kwa moya. N’a lapela hañata ni ka buniti ku Ndat’ahe. (Luka 6:12; 22:42-44) Ha n’a talimana ni litiko, n’a itinga ka butuna fa ketelelo ye fumanwa mwa Mañolo. (Mateu 4:3-10; 26:52-54) N’a si ka itiselela ku yaululwa kwa musebezi w’o Jehova n’a mu file. (Luka 4:40-44; Joani 6:15) Kana bao ba ne ba ipala kuli ki balateleli ba Jesu ne ba k’a ba ni ku libelela ko ku cwalo?

 5. (a) Ki kabakalañi baapositola ba Jesu ha ne ba na ni but’ata mwa ku buluka buitikanelelo bwa kwa moya? (b) Ki tuso mañi yeo Jesu n’a file baapositola ba hae hamulaho wa zuho ya hae?

⁵ Ka linako ze ñwi, nihaiba baapositola ba Jesu ne ba yendukile hanyinyani. Kabakala tukufalelo ye tuna ni mihupulo ye fosahezi, ne ba na ni ku talimana ni maswabi. (Luka 19:11; Likezo 1:6) Pili ba si k’a ituta kale ku itinga ku Jehova ka ku tala, miliko ya ka sipundumukela ne i ba lyanganisize. Kacwalo, Jesu ha n’a tamilwe, baapositola ba hae ne ba balehile. Hamulaho, busihu b’o, Pitrosi, ka boi, a itatula Kreste ka ku kuta-kutela. Baapositola ne ba si k’a ikungela kale taelo ya Jesu ye li: “Mu tone, mi mu lapele.” (Mateu 26:41, 55, 56, 69-75) Hamulaho wa zuho ya hae, Jesu n’a itusisize Mañolo mwa ku tiisa tumelo ya bona. (Luka 24:44-48) Mi ha ne ku bonahalile kuli ba bañwi ku bona ne ba kana ba beya bukombwa bo ne ba filwe mwa sibaka sa bubeli, Jesu n’a tiisize takazo ya bona ya ku toma mamelelo ye tuna fa musebezi w’o wa butokwa ni ku fita.—Joani 21:15-17.

 6. Jesu kwa makalelo n’a lemusize balutiwa ba hae ka za malaba afi a mabeli?

⁶ Kwa makalelo ni ku fita, Jesu na lemusize balutiwa ba hae kuli ne ba si ke b’a ba kalulo ya lifasi. (Joa. 15:19) Hape n’a ba elelize kuli ba si ke ba busa fahalimw’a ba bañwi kono ba sebeze hamoho sina mizwale. (Mateu 20:25-27; 23:8-12) Kana ne ba utwile kelezo ya hae? Kana ne ba beile fapili musebezi wa n’a ba file?

 7, 8. (a) Se ne si ezizwe ki Bakreste ba mwa lilimo za mwanda wa pili si bonisa cwañi kuli ne ba mamezi kelezo ya Jesu? (b) Ki kabakalañi ku zwelapili ku libelela kwa moya ha ne kuli kwa butokwa?

⁷ Mwa nako kaufela yeo baapositola ne ba li teñi ku yona, ne ba silelelize puteho. Litaba za kwamulaho li paka kuli Bakreste ba kwa makalelo ne ba si ka ikenya mwa litaba za bupolitiki za mubuso wa Roma ni kuli ne ba si na sikwata sa ba bahulu ba bulapeli ba ba mwa litulo ze pahami. Kwa lineku le liñwi, ne ba li bashaeli ba ba tiile ba Mubuso wa Mulimu. Ha ku fitiwa kwa mafelelezo a lilimo za mwanda wa pili, ne se ba kutalize mwahal’a kalulo kamukana ya mubuso wa Roma, ili ku tahisa balutiwa mwa Asia, Yurope, ni kwa Mutulo wa Africa.—Makolose 1:23.

⁸ Nihakulicwalo, yona misebezi ye ne i petilwe yeo mwa ku kutaza ne i sa talusi kuli cwale ne ku si na tokwahalo ya ku libelela kwa neku la kwa moya. Ku taha kwa Jesu ko ne ku talusizwe cimo ne ku sa li kwahule. Mi puteho ha ne inze i kena mwa lilimo za mwanda wa bubeli C.E., miinelo ye ne ili ye lubeta kwa mayemo a kwa moya a Bakreste ne i fitile fa ku zuha. Kamukwaufi?

Ba Ne Ba Tuhezi ku Libelela

 9, 10. (a) Hamulaho wa lifu la baapositola, ki likezahalo mañi ze ne li bonisize kuli ba bañata ba ne ba ipala ku ba Bakreste ne ba s’a libeleli? (b) Ki mañolo afi a’ bonisizwe mwa paragilafu ye a n’a ka be a tusize ba ne ba ipala ku ba Bakreste ku siyala ba tiile kwa moya?

⁹ Ba bañwi ba ne ba tile mwa puteho ne ba kalisize ku bonisa litumelo za bona fa mutomo wa lituto za mihupulo ya batu za Sigerike, ilikuli ze ne ba kutaza li amuhelehe hahulu kwa batu ba lifasi. Hanyinyani-hanyinyani, lituto za sihedeni, ze cwale ka Silalu ni ku s’a shwa kwa ka taho kwa moyo wa mutu, za fita fa ku ba kalulo ya mufuta wa Bukreste bo bu kopami. Seo ne si tisize kuli ba fulalele sepo ya lilimo ze sikiti. Kabakalañi? Bao ba ne ba amuhezi tumelo ya ku s’a shwa kwa moyo ba fita fa ku hupula kuli limbuyoti za puso ya Kreste kaufel’a zona li ka fumanwa mwa liluko la kwa moya ki moyo o ne u ka punyuha lifu la mubili wa mutu. Kacwalo ne ba si ka bona tokwahalo ya ku libelela ku ba teñi kwa Kreste mwa m’ata a Mubuso.—Mu bapanye Magalata 5:7-9; Makolose 2:8; 1 Matesalonika 5:21.

¹⁰ Ona muinelo wo ne u ekelizwe ki likezahalo ze ñwi. Ba bañwi ba ne ba ipapata ku ba baokameli ba Sikreste ba kalisa ku itusisa liputeho za bona sina sipawana sa ku fumana ka sona libubo. Ka ku sa lemuseha ba tisa kuli mihupulo ni lituto za bona li fite fa ku ba za butokwa bo bu likana ni Mañolo kamba mane z’e butokwa ku fita Mañolo. Ha ne ku bile ni sibaka, yona keleke yeo ya bukwenuheli mane ya itisa ili yona mwa kalulo ya ku sebeleza licisehelo za muinelo wa bupolitiki.—Likezo 20:30; 2 Pitrosi 2:1, 3.

Ze Zwile mwa ku Libelela Ko Ku Ekezehile

11, 12. Ki kabakalañi Muhato wa ku Cinca Lika wa ba Protesitanti ha ne u si k’a ba sisupo sa ku kuta kwa bulapeli bwa niti?

¹¹ Hamulaho wa lilimo ze myanda-nda za tamaiso ye maswe kwa neku la Keleke ya Roma Katolika, batu ba bañwi ba ne ba bata ku Cinca Lika ba tumusa manzwi mwa lilimo za mwanda wa bu-16. Kono seo ne si si ka tahisa ku kutela kwa bulapeli bwa niti. Ki kabakalañi?

¹² Nihaike kuli likwata ze fitana-fitana za Siprotesitanti ne li itukuluzi kwa m’ata a Roma, ne li sa na ni lituto hamohocwalo ni likezo ze tomile fa bukwenuheli—muhupulo wa ku aluhana kwa ba bahulu ba bulapeli ni batu-tu fela, hape ni tumelo ya Silalu, ku s’a shwa kwa moyo, ni ku nyandiswa kwa ku ya ku ile hamulaho wa lifu. Mi, ka ku swana ni Keleke ya Roma Katolika, ne ba zwezipili ku ba kalulo ya lifasi, ka ku ba ni silikani se situna ni likopano za bupolitiki. Kacwalo ba tengamela kwa ku hana litibelelo lifi kamba lifi za ku taha kwa Kreste sina Mulena.

13. (a) Ki sifi se si bonisa kuli banna ba bañwi ka buniti fela ne b’a nga ka butuna Linzwi la Mulimu? (b) Mwahal’a lilimo za mwanda wa bu-19, ki kezahalo mañi ye ne i fitile fa ku ba ye hoha mamelelo ka ku ipitela ku ba bañwi ba ba ipala ku ba Bakreste? (c) Ki kabakalañi ba bañata ha ne ba fitile fa ku swaba?

¹³ Niteñi, Jesu n’a talusize cimo kuli hamulaho wa lifu la baapositola, bayoli ba Mubuso ba niti (ili bao na swaniselize kwa buloto) ne ba ka zwelapili ku hula mwahal’a Bakreste ba buhata (kamba, mufuka) ku fitela nako ya kutulo. (Mateu 13:29, 30) Kacenu ha lu koni ku kolokisa ka buikolwiso luli bao kaufela Mulena n’a ba bona sina buloto. Kono ki nto ye konwa ku lemuhiwa kuli mwahal’a lilimo za mwanda wa bu-14, wa bu-15, ni wa bu-16, ne ku na ni batu ba ne ba beile bupilo ni tukuluho ya bona mwa kozi kuli ba toloke Bibele mwa puo ya nyangela. Ba bañwi ne ba si ka amuhela fela Bibele sina Linzwi la Mulimu kono hape ne ba hanile Silalu sina se si si ka toma mwa Mañolo. Ba bañwi ne ba hanile ku lumela ku s’a shwa kwa moyo ni linyando la mwa lihele la mulilo kuli ki lika ze s’a lumelelani ka ku tala ni Linzwi la Mulimu. Hape, mwahal’a lilimo za mwanda wa bu-19, kabakala tuto ye ne i ekezehile ya Bibele, likwata ze ñwi mwa United States, Germany, England, ni Russia ne li kalisize ku utwahaza tumelo ya kuli nako ya ku kuta kwa Kreste ne se i li fakaufi. Kono buñata bwa litibelelo za bona ne li tisize maswabi. Kabakalañi? Ka ku fita fa sipimo se situna, ki ka libaka la kuli ne ba itingile fa batu ka ku tula tikanyo mi isiñi hahulu fa Mañolo.

Ka M’o Bao Ne Ba Fumanehezi ku Libelela

14. Mu taluse muatumelelo wa tuto ya Bibele o ne u itusisizwe ki C. T. Russell ni ba ne ba swalisani ni yena.

¹⁴ Cwale, ka 1870, Charles Taze Russell ni ba bañwi ba balikani ba hae ba toma sikwata sa tuto ya Bibele mwa Allegheny, Pennsylvania. N’e si bona ba pili mwa ku lemuha liniti ze ñata za mwa Bibele ili ze ne ba amuhezi, kono ha ne ba nze ba ituta, ne ba na ni mukwa wa ku tatuba ka tokomelo mañolo kaufela fa puzo ye ba na ni yona.a Mulelo wa bona, ne si wa ku fumana mañolo a’ yemela mihupulo ya mwa minahano fela ya bona, kono ne li ku ba ni buniti bwa kuli ba fumane maikuto a swalisana ni lika kaufela ze i bulela Bibele fa taba yeo.

15. (a) Ba bañwi kwand’a Muzwale Russell ne ba fitile fa ku lemuha nto mañi? (b) Ki sika mañi se ne si bonisa Baituti ba Bibele ku fapahana ku bao?

¹⁵ Ba bañwi ba ba balwa ba ne ba bile teñi pili ne se ba lemuhile kuli Kreste n’a ka kuta ka ku sa bonahala sina mutu wa kwa moya. Ba bañwi ne ba boni kuli mulelo wa ku kuta kwa Kreste, ne si wa ku cisa lifasi-mubu ni ku yundisa bupilo kaufela bwa mufuta wa mutu, kono, ka ku fapahana, ki ku fuy’ola mabasi kamukana a fa lifasi-mubu. Mane ne ku na ni ba sikai ba ne ba lemuhile kuli silimo sa 1914 ne si ka ba mafelelezo a Linako za ba Macaba. Kono haili kwa Baituti ba Bibele ba ne ba swalisani ni Muzwale Russell, zona zeo ne li fita lisupo fela za puhisano ya mwa tuto ya bulapeli. Ne ba tomile bupilo bwa bona ku zona liniti zeo ni ku li hasanya mwahal’a macaba ka sipimo se ne si si ka bonwa kale mwa nako yeo.

16. Ka silimo sa 1914, ki kabakalañi Muzwale Russell ha n’a ñozi kuli: “Lu mwa nako ya tiko”?

¹⁶ Nihakulicwalo, ne ba tokwa ku libelela. Kabakalañi? Sina ka mutala, nihaike kuli ne ba zibile kuli 1914 ne i supilwe ki bupolofita bwa Bibele, ne ba s’a zibi ka ku tala se ne si ka ezahala mwa silimo seo. Seo ne si ba tiselize tiko. Mwa The Watch Tower ya November 1, 1914, Muzwale Russel n’a ñozi kuli: “Lu hupule kuli lu mwa nako ya tiko. . . . Haiba ku na ni libaka lifi kamba lifi le ne li ka tisa kuli ufi kamba ufi a fulalele Mulena ni Niti ya Hae ni ku tuhela ku eza matabelo kwa Mulelo wa Mulena, kacwalo he haki lilato fela la ku lata Mulimu mwa pilu le li tisize kuli a be ni cisehelo ku Mulena, kono ki nto i sili; mwendi ka ku hupula kuli nako ikaba ye kuswani; kuli ku sumekelwa ne li fela kwa mwahal’a nako ye ñwi.”

17. A. H. Macmillan, ni ba bañwi ka ku swana ni yena, ne ba bulukile cwañi buitikanelelo bwa kwa moya?

¹⁷ Ba bañwi ne ba fulalezi sebelezo ya Jehova kwamulaho kwani. Kono Muzwale A. H. Macmillan ki yo muñwi ya n’a si ka eza cwalo. Hamulaho wa lilimo, a itumelela ka buniti kuli: “Fokuñwi litibelelo za luna kwa neku la za nako ye ñwi ne li fitelezi seo Mañolo a si bonisa.” Ki sika mañi se ne si mu tusize ku buluka buitikanelelo bwa kwa moya? Na lemuhile, ka ku ya ka mwa n’a bulelezi, kuli “zona litibelelo zeo ha ne li si ka talelezwa, seo ne si si ka cinca milelo ya Mulimu.” N’a ekelize kuli: “Ne ni itutile kuli lu swanela ku itumelela milatu ya luna ni ku zwelapili ku tatuba Linzwi la Mulimu kuli lu fumane monyehelo ye ekezehile.”b Ka buikokobezo, bona Baituti ba Bibele bao ba kwa makalelo ne ba tuhelezi Linzwi la Mulimu kuli li hakulule mubonelo wa bona.—2 Timotea 3:16, 17.

18. Ku libelela kwa Sikreste ne ku tahisize cwañi lituso ze zwelapili mwa taba ya ku s’a ba ba lifasi?

¹⁸ Mwahal’a lilimo ze ne li latelezi, tokwahalo ya kuli ba libelele ne i si ka kuyuka. Ne ba zibile, ka mo ku inezi fela, kuli Bakreste ne ba sa swaneli ku ba kalulo ya lifasi. (Joani 17:14; Jakobo 4:4) Ka ku swalisana ni seo, ne ba si ka kopana ni Krestendomu mwa ku yemela kopano ya League of Nations kuli kuti ki kalulo ya bupolitiki ya Mubuso wa Mulimu. Kono konji ka 1939 kihona fo ne ba utwisiselize ka ku tala luli taba ya buikambuso bwa Sikreste.—Mu bone The Watchtower, November 1, 1939.

19. Ki lituso mañi za mwa okamelo ya puteho ze tile kabakala kuli kopano ne i libelela?

¹⁹ Ni kamuta ne ba si ka ba ni sitopa sa ba bahulu ba bulapeli, nihailikuli maeluda ba bañwi ba ne ba ketilwe ka liketisa ne ba ikutwile kuli ku kutaza mwa puteho ki sona fela se si swanelwa ku libelelwa ku bona. Nihakulicwalo, ka ku ba ni takazo ye tuna ya ku latelela Mañolo, kopano ne i tatubile sinca kalulo ya maeluda mwa liseli la Mañolo, ya eza seo ka ku kuta-kutela ka makepe a The Watchtower. Lincinceho ne li ezizwe mwa tamaiso ka ku zamaelela ni seo Mañolo ne a bonisa.

20-22. Kopano kaufela i zwezipili cwañi ku lukiswa kwa neku la ku peta musebezi o’ bulezwi cimo wa ku shaela Mubuso mwa lifasi kamukana?

²⁰ Kopano kamukan’a yona ne i sweli ku itukiseza ku peta ka ku tala musebezi w’o Linzwi la Mulimu ne li u bonisize kuli u ka eziwa mwa lizazi la luna. (Isaya 61:1, 2) Taba ye nde ne i na ni ku shaelwa ka ku fita fa sipimo sifi mwa lizazi la luna? Jesu n’a bulezi kuli: “Evangeli i na ni ku bulelwa pili mwa macaba kaufela.” (Mareka 13:10) Ka mubonelo wa batu, lona likulutendano leo hañata se li bonahezi ku ba le li sa konahali.

²¹ Niteñi, ka ku ba ni buikolwiso ku Kreste sina yena Toho ya puteho, sitopa sa mutanga ya sepahala ni ya na ni kutwisiso se si hatezi fapili. (Mateu 24:45) Ka busepahali ni ka m’ata se ba bonisize kwa batu ba Jehova musebezi o na ni ku eziwa. Ku zwa ka 1919 ku ya cwalo fapili, koñomeko ye ekelizwe ne i filwe kwa bukombwa bwa mwa simu. Ku ba bañata, ne ku si ko ku bunolo ku ya fa ndu ni ndu ni ku bulela kwa batu b’a sa zibi mutu. (Likezo 20:20) Kono litaba za tuto ze cwale ka “Mbuyoti ki ya Ba Ba s’a Sabi” (mwa 1919) ni “Mu Be ni Bundume Bo Bunde” (mwa 1921) ne li tusize ba bañwi kuli ba kalise musebezi, ka sepo ku Jehova.

²² Mwa 1922, memo ya kuli “mu zibahaze, mu zibahaze, mu zibahaze, Mulena ni Mubuso wa hae” ne i tisize susuezo ye ne i tokwahala mwa ku fa ona musebezi wo mamelelo ye tuna ye ne u swanelwa ku fiwa. Ku zwa ka 1927 ku ya cwalo kwapili, maeluda ba ne ba si ka amuhela bona buikalabelo b’o bwa mwa Mañolo ne ba zwisizwe. Ibata i’ba ka yona nako yeo, bayemeli ba maeto ba Sosaiti, bazamai, ne ba filwe musebezi wa ku ba bazamaisi ba sebelezo mwa likalulo, ba nze ba fa litaelo za ka butu kwa bahasanyi mwa sebelezo ya mwa simu. Haki mutu kaufela ya n’a kona ku eza bupaina, kono kwa mafelelezo a viki ba bañata ne ba neela mazazi a tezi kwa sebelezo, ku kalisa kakusasana, ba pumula ka bukuswani fela ili ku ca kakushuko, mi cwale ni ku zwelapili mwa sebelezo ku fitela nako ya manzibwana. Zeo ne li linako ze zwile mubano za ku hula kwa teokratiki, mi lu fumana tuso ye tuna ka ku tatuba sinca nzila yeo Jehova n’a zamaisa ka yona batu ba hae. U zwelapili ku eza cwalo. Ka mbuyoti ya hae, musebezi wa ku kutaza taba ye nde ya Mubuso o tomilwe u ka fita fa mafelelezo a petehile hande.

Kana Mw’a Libelela?

23. Haili ka za lilato ni buikambuso bwa Sikreste kwa lifasi, luna ka buñwi lu kona ku bonisa cwañi kuli lu sweli ku libelela?

²³ Ka k’u nga muhato fa ketelelo ya Jehova, kopano ya hae i zwelapili ku lu lemusa ka za likezo ni mibonelo ye ne i ka lu bonahaza ku ba kalulo ya lifasi, ili ku ba mwa kozi ya ku yunda ni lona. (1 Joani 2:17) Ka ku swana, luna ka buñwi lu tokwa ku libelela ka k’u nga muhato fa ketelelo ya Jehova. Jehova hape u lu fa litaelo ka za mwa ku pilela ni ku sebeza hamoho. Kopano ya hae se i lu tusize kuli lu be ni buitebuho bwa seo lilato la Sikreste li talusa luli. (1 Pitrosi 4:7, 8) Ku libelela kwa luna ku tokwa kuli lu like ka buniti ku sebelisa kelezo yeo, ku si na taba ni ku s’a petahala kwa batu.

24, 25. Ki mwa miinelo mañi ye butokwa mo lu swanela ku libelela, ili ka ku beya mwa munahano tibelelo mañi?

²⁴ Ka ku s’a cinca-cinca, mutanga ya sepahala ni ya na ni kutwisiso u lu hupulisize kuli: “U sepe [Jehova, NW] ka pilu ya hao kaufela, mi u si ke wa tiyela fa butali bwa hao.” (Liproverbia 3:5) “Mu lapele ka ku sa lisela.” (1 Matesalonika 5:17) Lu laelezwi ku ituta ku toma likatulo za luna fa Linzwi la Mulimu, ili ku tuhela linzwi leo ku ba ‘lumonyi lwa kwa mautu a luna ni liseli la mwa nzila ya luna.’ (Samu 119:105) Ka lilato, lu susuelizwe ku beya kwapili mwa bupilo bwa luna ku kutaziwa kwa taba ye nde ya Mubuso wa Mulimu, ili musebezi w’o Jesu n’a bulezi cimo kwa neku la lizazi la luna.—Mateu 24:14.

²⁵ Ee, mutanga ya sepahala ni ya na ni kutwisiso kaniti luli wa libelela. Ka buñwi ni luna lu tokwa ku libelela. Bakeñisa ku eza cwalo, haike luna lu fumanwe mwahal’a bao ba ba yemi ka nzila ye amuheleha fapil’a Mwan’a mutu h’a ka taha ku t’o fitisa katulo.—Mateu 24:30; Luka 21:34-36.

[Litaluso za kwatasi]

Ka Ku Ba Lundululo

◻ Sina ka mo ku boniselizwe kwa Mateu 24:42, ki kabakalañi ha lu tokwa ku libelela?

◻ Jesu ni balateleli ba hae ba mwa lilimo za mwanda wa pili ne ba swalelezi cwañi ku libelela kwa moya?

◻ Haisali ku zwiwa ka 1870, ki likezahalo mañi ze se li bile teñi bakeñisa kuli batanga ba Jehova ba libelezi?

◻ Ki sifi se si k’a fa bupaki bwa kuli luna ka buñwi lu sweli ku libelela?

[Maswaniso a fa likepe 18]

Jesu n’a patehile mwa musebezi o’ filwe ki Ndat’ahe. Hape n’a lapezi ka maikuto a matuna

[Siswaniso se si fa likepe 19]

Charles Taze Russell mwa lilimo za hae za kwa mafelelezo

[Siswaniso se si fa likepe 20]

Bashaeli ba Mubuso ba ba fitelela 4,700,000 ba sweli ku sebeza mwa lifasi-mubu kaufela