Mu Zamaye ka Mukwa Wo Jesu Kreste N’a Zamaile ka Ona

‘Ya bulela kuli u inzi ku [Mulimu] u swanezi ni yena ku zamaya ka mukwa o Jesu a zamaile ka ona.’—1 JOANI 2:6.

1, 2. Ku talimela ku Jesu ku talusañi?

MUAPOSITOLA Paulusi n’a ñozi kuli: “Lu zamaye inze lu mata ka ku itiisa mwa siyano ye lukiselizwe luna, lu nze lu talimile Jesu, yena Mutateki ni Mufelelezi wa tumelo.” (Maheberu 12:1, 2) Ku latelela nzila ya busepahali ku tokwa kuli lu talimele ku Jesu Kreste.

² Linzwi la Sigerike le li tolokilwe kuli ‘ku talimela’ ka mo li itusiselizwe mwa Mañolo a Sigerike a Sikreste, li talusa “ku isa hahulu mamelelo kwa sika ku si na ku hakanyiswa.” Hatiso ye ñwi i talusa kuli: “Mumati wa Mugerike a sa biula fela hanyinyani mamelelo ya hae kwa siyano ni sibaka kwa libile ni ku isa hahulu mamelelo kwa undi wa nyangela, kipeto ha sa na ku mata ka lubilo. Seo sa kona ku ezahala ku Mukreste.” Lika ze hakanyisa za kona ku lu paleliswa ku zwelapili kwa moya. Lu swanela ku talimela ku Jesu Kreste. Kono ki lika mañi ze lu talimela ku yena Mutateki wa tumelo ya luna y’o? Pulelo ya Sigerike ye tolokilwe kuli ‘mutateki wa tumelo’ i talusa “mueteleli yo mutuna, ya etelela mwa lika kaufela ni ku toma mutala.” Ku talimela ku Jesu ku talusa ku latelela mutala wa hae.

3, 4. (a) Lu tokwa ku ezañi kuli lu zamaye ka mukwa wo Jesu Kreste n’a zamaile ka ona? (b) Lu swanela ku isa mamelelo kwa lipuzo lifi?

³ Bibele i bulela kuli: ‘Ya bulela kuli u inzi ku Mulimu u swanezi ni yena ku zamaya ka mukwa o Jesu a zamaile ka ona.’ (1 Joani 2:6) Lu swanela ku ina ku Mulimu ka ku mamela litaelo za Jesu sina yena mwa n’a mamelezi litaelo za Ndat’ahe.—Joani 15:10.

⁴ Kacwalo ku zamaya ka mukwa wo Jesu n’a zamaile ka ona ku tokwa kuli lu utwisise hande-nde kuli ki yena Mueteleli yo Mutuna ni ku latelela hande mwa n’a fitile. Lipuzo za butokwa ze swanela ku nyakisiswa ki za kuli: Kreste u lu etelela cwañi kacenu? Ku latelela mukwa wa n’a zamaile ka ona ku swanela ku lu ama cwañi? Ki lituso mañi ze zwa mwa ku kumalela kwa mutala wa n’a tomile Jesu Kreste?

M’o Kreste A Etelela Balateleli Ba Hae

 5. Pili a si ka nyuluhela kale kwa lihalimu, Jesu n’a sepisizeñi balateleli ba hae?

⁵ Pili a si ka nyuluhela kale kwa lihalimu, Jesu Kreste ya zusizwe n’a iponahalize kwa balutiwa ba hae ni ku ba fa musebezi wa butokwa hahulu. N’a bulezi kuli: “Mu ye cwale, mu lute macaba kaufela.” Ka yona nako yeo, Mueteleli yo Mutuna a ba sepisa hape kuli u ka ba ni bona ha ba nze ba peta musebezi wo, ka ku bulela kuli: “A mu bone, na, ni inzi ni mina ka mazazi kaufela, ku isa kwa mafelelezo a lifasi.” (Mateu 28:19, 20) Jesu Kreste u inzi cwañi ni balateleli ba hae mwa nako ya mafelelezo a lifasi ye?

6, 7. Jesu u lu etelela cwañi ka moya o kenile?

⁶ Jesu n’a bulezi kuli: “Mutiisapilu, ona Moya o Kenile o Ndate a ka luma ka Libizo la ka, ki ona o ka mi luta litaba kaufela, u mi hupulise ze ni mi bulelezi kaufela.” (Joani 14:26) Moya o kenile o lumwa ka libizo la Jesu, wa lu etelela ni ku lu tiisa kacenu. Wa lu monyehela kwa moya ni ku lu tusa ku utwisisa “mane ni ze tungile za Mulimu.” (1 Makorinte 2:10) Mi mane tulemeno twa Sikreste to tu cwale ka ‘lilato, tabo, kozo, pilu-telele, musa, bunde, tumelo, ku ishuwa, ni buiswalo’ ki ‘muselo wa moya.’ (Magalata 5:22, 23) Ka tuso ya moya o kenile, lwa kona ku hulisa tulemeno to.

⁷ Ha lu ituta Bibele ni ku satalala ku sebelisa ze lu ituta, moya wa Jehova u ka lu tusa ku ekeza kwa butali, kutwisiso, ni zibo. (Liproverbia 2:1-11) Hape moya o kenile u lu tusa ku tiyela miliko. (1 Makorinte 10:13; 2 Makorinte 4:7; Mafilipi 4:13) Bakreste ba susuezwa ku ‘ikenisa kwa masila kaufela a nama ni a moya, ba nze ba peta ku ikenisa kwa bona.’ (2 Makorinte 7:1) Kambe ha lu tusiwi ki moya o kenile, ne lu si ke lwa kona ku kumalela lipimo za Mulimu za bukeni. Nzila ye ñwi yeo Jesu a lu etelela ka yona kacenu ki ka moya o kenile, wo Jehova Mulimu a file Mwan’a hae kuli a itusise ona.—Mateu 28:18.

8, 9. Kreste u itusisa cwañi “mutanga ya sepahala, ya na ni kutwisiso” kwa ku etelela puteho?

⁸ Hape ha mu nyakisise nzila ye ñwi yeo Kreste a etelela puteho ka yona kacenu. Ha n’a bulela za ku ba teñi kwa hae ni za mafelelezo a lifasi, Jesu n’a bulezi kuli: “Ki mañi mutanga ya sepahala, ya na ni kutwisiso, y’a ka beya Mulen’a hae ku lisa batanga ba hae, ku ba fa lico ka nako ye lukela? U na ni mbuyoti mutanga yo, nako y’a ka fita Mulen’a hae, a mu fumana a eza cwalo. Kaniti na mi bulelela, kuli u ka mu beya fa bukombwa bwa z’a luwile kaufela.”—Mateu 24:3, 45-47.

⁹ “Mulena” ki Jesu Kreste. “Mutanga” ki sikwata sa Bakreste ba ba tozizwe fa lifasi-mubu. Sitopa sa mutanga seo si filwe buikalabelo bwa ku babalela liluwo la Jesu fa lifasi ni ku sula lico za kwa moya ka nako ye lukela. Kakwatanyana ka baokameli ba ba fitile ku ze konisa ka ka mwa sitopa sa “mutanga ya sepahala, ya na ni kutwisiso” ka panga Sitopa Se Si Etelela, se si sebeza sina muyemeli wa sitopa sa mutanga. Kakwatanyana kao ka etelela musebezi wa ku kutaza mwa lifasi kaufela ni ku sula lico za kwa moya ze fepa ka nako ye lukela. Kacwalo Kreste u etelela puteho ka “mutanga ya sepahala, ya na ni kutwisiso” ya ketilwe ka moya wa Mulimu ni ka Sitopa sa hae Se Si Etelela.

10. Lu swanela ku nga cwañi maeluda, mi ki kabakalañi?

¹⁰ Hape Kreste u etelela puteho ka “batu ba ba li limpo”—bona maeluda ba Sikreste kamba baokameli. Ba filwe buikalabelo b’o “ili ku hulisa balumeli mwa bupetehi, ku eza sebelezo ya bulisana, ni ku yahisa mubili wa Kreste.” (Maefese 4:8, 11, 12, NW) Ka za bona, Maheberu 13:7 i bulela kuli: “Mu hupule ba ba mi zamaisa, ba ba mi bulelezi Linzwi la Mulimu; mu likanyise tumelo ya bona, mi mu lemuhe mafelelezo a bupilo bwa bona.” Maeluda b’a etelela mwa puteho. Bakeñisa kuli ba likanyisa Jesu Kreste, tumelo ya bona i swanelwa ku likanyiswa. (1 Makorinte 11:1) Lu ka bonisa buitebuho kwa tukiso ye ya maeluda ka ku ipeya ku ba utwa ni ku ipeya kwatas’a “batu ba ba li limpo” bao.—Maheberu 13:17.

11. Kreste kacenu u itusisañi kwa ku etelela balateleli ba hae, mi ku zamaya ka mukwa wa n’a zamaile ka ona ku kopanyelezañi?

¹¹ Kacwalo, Jesu Kreste kacenu u etelela balateleli ba hae ka moya o kenile, ka “mutanga ya sepahala, ya na ni kutwisiso,” ni ka maeluda ba mwa puteho. Kuli lu zamaye ka mukwa wo Kreste n’a zamaile ka ona, lu tokwa ku utwisisa nzila yeo a etelela ka yona puteho ni ku i latelela. Hape lu tokwa ku likanyisa mukwa wa n’a zamaile ka ona. Muapositola Pitrosi n’a ñozi kuli: ‘Ki sona se mu bizelizwe; kakuli Kreste ni yena u utwile butuku bakeñisa mina, a mi siyela mutala, kuli mu hate mw’a n’a hatile.’ (1 Pitrosi 2:21) Ku latelela mutala wa Jesu o petehile ku swanela ku lu ama cwañi?

Mu Be ni Musa Ha Mu Zamaisa Ba Bañwi

12. Ki mutala ufi wa Kreste o ba swanela ku iseza hahulu mamelelo maeluda mwa puteho?

¹² Jesu niha n’a filwe m’ata a matuna ki Ndat’ahe, n’a itusisize ona ka musa. Batu kaufela mwa puteho—sihulu baokameli—ba bone teñi kuli ‘musa wa bona wa zibwa ki batu kamukana.’ (Mafilipi 4:5; 1 Timotea 3:2, 3) Bakeñisa kuli maeluda ba na ni m’ata a mañwi mwa puteho, ki kwa butokwa kuli ba latelele mutala wa Kreste ha ba nze ba itusisa ona.

13, 14. Maeluda ba kona ku likanyisa cwañi Kreste ha ba nze ba susueza ba bañwi ku sebeleza Mulimu?

¹³ Jesu n’a zibile kuli ku na ni ze ne ba sa koni ku eza balutiwa ba hae. N’a si ka ba hapeleza ku eza ze ne ba sa koni. (Joani 16:12) Ka musa, Jesu n’a susuelize balateleli ba hae ku ‘lika ka tata’ kuli ba eze tato ya Mulimu. (Luka 13:24) N’a ezize cwalo ka ku ba tomela mutala ni ka ku fita kwa lipilu za bona. Ka ku swana, maeluda ba Sikreste kacenu ha ba tosangisi ba bañwi ku sebeleza Mulimu. Kono ba ba susueza ku sebeleza Jehova kabakala lilato le ba na ni lona ku yena ni ku Jesu, mane ni ku ba bañwi.—Mateu 22:37-39.

¹⁴ Jesu n’a si ka itusisa maswe m’ata a n’a filwe ka ku lika ku zamaisa bupilo bwa batu. Ni kamuta n’a si ka toma lipimo ze pahami hahulu kamba milao ye miñata ye ne sa konwi ku latelelwa. N’a susuezanga ba bañwi ka ku fita kwa lipilu za bona ka ku itusisa likuka ze n’e li mwa milao ye ne filwe ka Mushe. (Mateu 5:27, 28) Ka ku likanyisa Jesu Kreste, maeluda ba ambuka ku ipangela milao kamba ku koñomeka mihupulo ya bona. Ka za miapalelo ni mitinelo kamba za ku ishumusa ni za ku itabisa, maeluda ba satalala ku fita kwa lipilu za ba bañwi ka ku itusisa likuka ze mwa Linzwi la Mulimu ze cwale ka ze bonisizwe kwa Mika 6:8; 1 Makorinte 10:31-33; ni 1 Timotea 2:9, 10.

Mu Be ni Makeke mi Mu Swalele Ba Bañwi

15. Jesu n’a ngile cwañi mafosisa a balutiwa ba hae?

¹⁵ Kreste n’a lu siyezi mutala o lu swanela ku latelela ka mwa n’a ngezi mafosisa a balutiwa ba hae. Ha mu nyakisise likezahalo ze peli ze ne ezahezi fa busihu bwa hae bwa mafelelezo bwa ku ba fa lifasi sina mutu. Ha se ba fitile mwa Getsemani, Jesu ‘a nga Pitrosi ni Jakobo ni Joani,’ mi a ba bulelela kuli “mu tone.” Mi “ha s’a ile kwapilinyana, a wela fafasi ka pata, mi a lapela.” Ha n’a kutile, s’a to “ba fumana ba lobezi.” Jesu n’a ezize cwañi? N’a bulezi kuli: “Pilu yona ya lata, kono nama ya fokola.” (Mareka 14:32-38) Ku fita ku halifela Pitrosi, Jakobo ni Joani, Jesu n’a ba shwezi makeke! Busihu bo bu swana b’o, Pitrosi n’a latuzi Jesu halalu. (Mareka 14:66-72) Jesu n’a ezizeñi ku Pitrosi hamulaho wa fo? ‘Mulena n’a zuhile luli, mi n’a iponahalisize ku Pitrosi.’ (Luka 24:34) Bibele i bulela kuli “a bonwa ki Kefasi; kih’a bonwa ki ba ba lishumi ka ba babeli.” (1 Makorinte 15:5) Ku fita ku ba ni ndimbelela, Jesu n’a swalezi ni ku tiisa muapositola ya n’a bakile y’o. Mane kwa nalulelule, Jesu n’a file Pitrosi buikalabelo bo butuna.—Likezo 2:14; 8:14-17; 10:44, 45.

16. Lu ka zamaya cwañi ka mukwa wa n’a zamaile Jesu haiba balumeli sina luna ba lu foseza ka nzila ye ñwi?

¹⁶ Haiba balumeli sina luna ba lu swabisa kamba ku lu foseza ka nzila ye ñwi bakeñisa ku sa petahala, kana ha lu swaneli ku ba utwela makeke ni ku ba swalela sina mwa n’a ezelize Jesu? Pitrosi n’a elelize balumeli sina yena kuli: ‘Ka ku feleleza, ni li: Mu be ni maikuto a li mañwi kamukan’a mina, mu be ni mukekecima ni musa. Mu si ke mwa kutisa bumaswe ka bumaswe, nihaiba litapa ka litapa, kono mu fuyaule.’ (1 Pitrosi 3:8, 9) Kono ku cwañi haiba mutu yo muñwi a palelwa ku lu utwela makeke kamba ku lu swalela si na mwa n’a kabe a ezelize Jesu? Niha ku ka ba cwalo, lu sa na ni tamo ya ku likanyisa Jesu ni ku eza mwa n’a kabe a ezelize.—1 Joani 3:16.

Mu Beye za Mubuso mwa Sibaka sa Pili

17. Ki sikamañi se si bonisa kuli Jesu n’a beile tato ya Mulimu mwa sibaka sa pili mwa bupilo bwa hae?

¹⁷ Hape ku na ni nzila ye ñwi mo lu swanela ku zamaya ka mukwa wa n’a zamaile Jesu Kreste. Ku shaela taba ye nde ya Mubuso wa Mulimu ne li nto ya butokwa hahulu mwa bupilo bwa Jesu. Ha sa kutalize ku musali wa Musamaria bukaufi ni muleneñi wa Sikare mwa Samaria, Jesu n’a bulelezi balutiwa ba hae kuli: “Sico sa ka, kikuli ni eze se si latwa ki Ya ni lumile, mi ni feleleze musebezi wa hae.” (Joani 4:34) Ku eza tato ya Ndat’ahe ne ku tiisize Jesu; ne ku mu katelisize, ni ku mu katulusa sina sico. Kaniti ku likanyisa Jesu ka ku isa hahulu pilu kwa ku eza tato ya Mulimu ku ka lu libisa kwa bupilo sakata.

18. Ki limbuyoti mañi ze zwa mwa ku susueza bana ku kena mwa sebelezo ya bupaina?

¹⁸ Bashemi ha ba susueza bana ba bona ku kena mwa sebelezo ya ka nako kaufela, bona ni bana ba bona ba fumana limbuyoti ze ñata. Ndate yo muñwi ya na ni mambile ba bashimani n’a ba susuelize ku itomela sikonkwani sa sebelezo ya bupaina ku zwa kwa bwanana. Mambile bao ha se ba felize sikolo, ne ba bile mapaina. H’a talusa tabo y’a fumani, ndate y’o u ñola kuli: “Ni kamuta bana ba luna ha ba si ka lu swabisa. Lwa itumela luli kuli, ‘bana ki sanda se si zwa ku Muñ’a Bupilo.’” (Samu 127:3) Cwale bana ba fumana lituso mañi ha ba ndongwama sebelezo ya bupaina? Me ya na ni bana baketalizoho u bulela kuli: “Ku eza bupaina ku tusize bana ba ka kaufela ku hulisa silikani se situna ni Jehova, ku ba tusize ku ba ni tomahanyo ye nde ya tuto ya ka butu, ku ba tusize ku ziba mwa ku itusiseza hande nako ya bona, mi ku ba tusize ku ituta ku beya za kwa moya mwa sibaka sa pili mwa bupilo bwa bona. Nihaike kuli kaufela bona ne ba na ni ku eza licinceho ze ñata, ha ku na ni yo mukana ku bona ya inyaza kuli n’a si ka keta nzila ye swanela.”

19. Ba banca ba swanela ku lela ku ezañi kwapili?

¹⁹ Ba banca, mu lela ku ezañi kwapili? Kana mu bata ku cuuka hahulu mwa musebezi o muñwi cwalo? Kamba kana mu bata ku ndongwama musebezi wa sebelezo ya ka nako kaufela? Paulusi n’a elelize kuli: “Mu tokomele mo mu zamaela, mu si ke mwa ba sina likuba . . . mu yolise linako kakuli mazazi s’a li a maswe.” U ekeza kuli: “Kifohe, mu si ke mwa tokwa kutwisiso, kono mu utwiseze se si latwa ki Mulena.”—Maefese 5:15-17.

Mu Sepahale

20, 21. Jesu n’a sepahalile cwañi, mi lu kona ku mu likanyisa cwañi?

²⁰ Kuli lu zamaye ka mukwa wa n’a zamaile Jesu, lu swanela ku likanyisa busepahali bwa hae. Ka za busepahali bwa Jesu, Bibele i bulela kuli: “Niha n’a na ni sibupeho sa Mulimu, Jesu h’a si ka li, ku likana ni Mulimu ki nto y’a ka hanelela, kono a itoboha ku s’a n’a li sona, ka ku nga sibupeho sa mutanga, ni ku ikeza ya swana sina batu; mi h’a fumanwi a li sina mutu, a ikokobeza, a ipeya ku utwa ku isa kwa lifu, mane lifu la [kota ya linyando, NW].” Jesu n’a yemezi ka busepahali bubusi bwa Jehova ka ku ipeya kwatas’a tato ya Mulimu. N’a ipeile ku utwa mane ku fitela lifu fa kota ya linyando. Lu swanela ku “ba ni maikuto” a swana ni ku ipeya kwatasi ka ku eza tato ya Mulimu.—Mafilipi 2:5-8.

²¹ Jesu hape n’a sepahalile kwa baapositola ba hae ba ne ba sepahala. Ku si na taba ni ku sa petahala kwa bona, Jesu n’a ba latile “ku feleleza.” (Joani 13:1) Ni luna ha lu swaneli ku ba ni ndimbelela kwa mizwale ba luna kabakala ku sa petahala kwa bona.

Mu Kumalele kwa Mutala wa N’a Tomile Jesu

22, 23. Ki limbuyoti lifi ze zwa mwa ku kumalela mutala wa n’a tomile Jesu?

²² Kiniti kuli ka ku ba batu ba ba si ka petahala ha lu koni ku hata ka ku petahala mwa n’a hatile Jesu, yena Mutala wa luna o petehile. Nihakulicwalo, lwa kona ku satalala ku hata mwa n’a hatile. Kuli lu eze cwalo lu tokwa ku utwisisa nzila yeo Kreste a lu etelela ka yona ni ku i latelela ni ku kumalela mutala wa n’a tomile.

²³ Ku ba ba ba likanyisa Kreste ku tisa limbuyoti ze ñata. Lu ka ba ni tabo mwa bupilo kakuli lu kumalezi ku eza tato ya Mulimu ku fita ya luna. (Joani 5:30; 6:38) Lu ka ba ni lizwalo le linde. Muzamao wa luna u ka ba mutala o munde ku ba bañwi. Jesu n’a memile ba ne ba katezi ni ba ne ba imezi kaufela kuli ba tahe ku yena ilikuli ba fumanele mioya ya bona pumulo. (Mateu 11:28-30) Haiba lu latelela mutala wa Jesu, siango sa luna si ka katulusa ba bañwi. Kacwalo haike lu zweleñipili ku zamaya ka mukwa wo Jesu n’a zamaile ka ona.

Kana Mwa Hupula?

• Kreste u etelela cwañi balateleli ba hae kacenu?

• Maeluda ba kona ku latelela cwañi mutala wa Kreste wa mwa n’a itusiselize m’ata a n’a filwe ki Mulimu?

• Lu kona ku likanyisa cwañi mutala wa Jesu ha lu talimana ni bufokoli bwa ba bañwi?

• Ba banca ba kona ku beya cwañi Mubuso mwa sibaka sa pili?

[Siswaniso se si fa likepe 23]

Maeluda ba lu tusa ku latelela ketelelo ya Kreste

[Maswaniso a fa likepe 24, 25]

Ba banca, mu sweli ku lela ku ezañi kuli mu be ni bupilo bwa Sikreste bo bu kolwisa?