“Mutanga Ya Sepahala” U Pasa Tatubo!

“Se li nako ya Katulo ya Mulimu ye na ni ku kala ka ba Ndu ya Mulimu.” —1 Pitrosi 4:17.

 1. Jesu n’a fumaniñi ha n’a tatubile “mutanga”?

FA Penteconta ya 33 C.E., Jesu n’a ketile “mutanga” kuli a fe “batanga” ba hae sico ka nako ye lukela. Ka 1914, Jesu n’a beilwe fa bulena, mi nakonyana fela ku zwa f’o, nako ne i fitile ya ku tatuba “mutanga” y’o. N’a fumani kuli buñata mwa sitopa sa “mutanga” ne ba ‘sepahalile mi ne ba bile ni kutwisiso.’ Kacwalo, a ba beya “fa bukombwa bwa z’a luwile kaufela.” (Mateu 24:45-47) Kono hape ne ku na ni mutanga ya maswe, ya n’a si ka sepahala ni ku ba ni kutwisiso.

‘Mutanga Yo Ya Maswe’

2, 3. ‘Mutanga y’o ya maswe’ n’a zwelela kakai, mi n’a tahile cwañi?

² Jesu n’a bulezi za mutanga ya maswe h’a feza fela ku bulela za “mutanga ya sepahala, ya na ni kutwisiso.” N’a ize: “Mutanga yo, haiba ki ya maswe, mi a ipulelela mwa pilu, a li: Mulen’a ka u liyehile; mi s’a kala ku nata ba ba luwilwe ni yena; a ca, a nwa ni matahwa; Mulena wa mutanga yo u ka fita mwa lizazi l’a sa mu libeleli, ni nako y’a sa zibi; u ka mu nata likoto, a mu abele sa hae ni baipi; ki mo ku na ni lililo, ni likwecameno.” (Mateu 24:48-51) Pulelo ya kuli ‘mutanga y’o ya maswe’ i lu hupuza manzwi a n’a bulezi Jesu pili ka za mutanga ya sepahala, ya na ni kutwisiso. Kaniti, ‘mutanga ya maswe’ y’o n’a zwile mwahal’a mutanga ya sepahala.a Ka nzila ifi?

³ Pili 1914 i si ka fita kale, buñata mwa sitopa sa mutanga ya sepahala ne ba na ni sepo ye tiile ya ku kopana ni Munyali mwa lihalimu ka sona silimo seo, kono sepo ya bona ne i si ka talelezwa. Kabakala nto yeo ni miinelo ye miñwi cwalo, ba bañata ne ba zwafile mi ba sikai ku bona ne ba nyemile. Ba bañwi ku bona ba kala ku “nata” ka lipulelo mizwale ba bona ni ku swalisana ni “matahwa,” zona likwata za bulapeli bwa Krestendomu.—Isaya 28:1-3; 32:6.

 4. Jesu n’a ezizeñi ku ‘mutanga ya maswe’ ni ku bote ba ba bonisize moya o swana?

⁴ Batu bao be ne ba li Bakreste kwamulaho ki bona be ne ba til’o fumaneha ku ba ‘mutanga ya maswe,’ mi Jesu n’a ba ‘natile likoto.’ Ka nzila ifi? N’a ba hanile, mi ne ba latehezwi ki sepo ya bona ya ku ya kwa lihalimu. Kono ne ba si ka timezwa honafo. Ne ba keni pili mwa nako ya ku lila ni likwecameno mwa “lififi la kwande” a puteho ya Sikreste. (Mateu 8:12) Mi ku zwa yona nako yeo ya makalelo, ba bañwi ba sikai ba ba tozizwe ba bonisize moya o maswe o swana, ili ku iponahaza kuli ki ‘mutanga ya maswe.’ Ba bañwi kwa “lingu ze ñwi” ba likanyisize ku sa sepahala kwa bona. (Joani 10:16) Lila za Kreste bao kaufela ba kena mwa ‘lififi la kwande’ la kwa moya le li swana.

 5. Ka ku fapana ni ‘mutanga ya maswe,’ mutanga ya sepahala, ya na ni kutwisiso n’a ezizeñi?

⁵ Nihakulicwalo, mutanga ya sepahala, ya na ni kutwisiso ni ‘mutanga ya maswe’ ne ba keni mwa litiko ze swana. Kono ku fita ku nyema, mutanga ya sepahala yena n’a sikuluzwi. (2 Makorinte 13:11) Lilato la bona la ku lata Jehova ni mizwale ba bona ne li tiisizwe. Mi kabakaleo, ba bile “musumo ni sehezo ye seheza niti” mwahal’a “mazazi a maungulelo” a t’ata a.—1 Timotea 3:15; 2 Timotea 3:1.

Basizana Ba Ba Butali ni Ba Likuba

 6. (a) Jesu n’a bonisize cwañi kutwisiso ya sitopa sa mutanga wa hae ya sepahala? (b) Silimo sa 1914 si si ka fita kale, Bakreste ba bañata ba ba tozizwe ne ba shaezi taba mañi?

⁶ Ha s’a bulezi za ‘mutanga y’o ya maswe,’ Jesu n’a bulezi linguli ze peli kuli a bonise libaka Bakreste ba bañwi ba ba tozizwe ha ne ba ka bonisa ku sepahala ni ku ba ni kutwisiso ku fita ba bañwi.b Kuli a bonise kutwisiso kamba butali bwa bona, n’a ize: “Mubuso wa kwa lihalimu u ka swana sina basizana ba ba lishumi ba ba ngile malambi a bona, mi ba zwile ku y’o katanyeza munyali. Baketalizoho ku bona ne li ba ba butali, baketalizoho ne li likuba. Ba likuba ha ba nga malambi a bona ne ba si ka a ngela mafula. Kono ba ba butali ne ba ngile mafula mwa lipiza za bona, hamoho ni malambi a bona.” (Mateu 25:1-4) Basizana b’a lishumi bao ba lu hupuza Bakreste ba ba tozizwe be ne ba li teñi 1914 i si ka fita kale. Ne ba ezize lipalo ni ku lemuha kuli Munyali, yena Jesu Kreste, n’a ka tuha a fita. Kacwalo, ba ‘zwa’ ku y’o mu katanyeza, inze ba kutaza ka bundume kuli “linako za bamacaba” ne li ka fela ka 1914.—Luka 21:24.

 7. Bakreste ba ba tozizwe ‘ne ba lobezi’ lili ka swanisezo mi ki kabakalañi?

⁷ Ne ba nepile luli. Linako za bamacaba ne li felile luli ka 1914, mi Mubuso wa Mulimu ka Kreste Jesu n’o tomilwe. Kono zeo ne li ezahezi mwa lihalimu ka ku sa bonahala. Fa lifasi, batu ne ba tahezwi ki “bumai” bo ne bu bulezwi cimo. (Sinulo 12:10, 12) Ne ku tile nako ya litiko. Ka ku sa utwisisa hande lika, Bakreste ba ba tozizwe ne ba nahanile kuli ‘munyali u liyehile.’ Kabakala ku lyangana ni ku toiwa ki lifasi, ba kutela mwamulaho mi mane ba bata ku tuhela musebezi wa ku kutaza. Ba ‘ozela ni ku lobala’ kwa moya, sina basizana bani ba mwa nguli, ni sina mo ne ba ezelize be ne ba ipiza Bakreste hamulaho wa lifu la baapositola ba Jesu.—Mateu 25:5; Sinulo 11:7, 8; 12:17.

 8. Ki nto mañi ye n’e tahisize muhuwo wa kuli: “Munyali ki yo!” mi yeo ne li nako ya kuli Bakreste ba ba tozizwe ba ezeñi?

⁸ Cwale ka 1919, kwa ezahala nto ye ñwi ye ne si ka libelelwa. Lu bala kuli: “Fahal’a busihu muhuwo wa utwahala: Munyali ki yo! A mu zwe mu mu katanyeze! Cwale basizana bao ba zuha kaufela, mi ba lukisa malambi a bona.” (Mateu 25:6, 7) Ka nako ye ne ku bonahala kuli ha ku sa na sepo, kwa utwahala muhuwo wa kuli ba tone! Ka 1918, Jesu, yena ‘lingeloi la bulikani’ n’a tile kwa tempele ya Jehova ya kwa moya ku to tatuba ni ku kenisa puteho ya Mulimu. (Malaki 3:1) Ka nako yeo, Bakreste ba ba tozizwe ne ba tokwa ku zwa ku yo mu katanyeza mwa malapa a fa lifasi-mubu a tempele yeo. Ne li nako cwale ya ku ‘benyisa liseli.’—Isaya 60:1; Mafilipi 2:14, 15.

9, 10. Ka 1919, ki kabakalañi Bakreste ba bañwi ha ne ba na ni “butali” hailif’o ba bañwi ne li “likuba”?

⁹ Kono eshe! Ba bañwi kwa basizana mwa nguli ne ba na ni butata. Jesu n’a zwezipili ku bulela kuli: “Ba likuba ba li ku ba ba butali: A mu lu fe kwa mafula a mina, kakuli malambi a luna a tima.” (Mateu 25:8) Ha ku si na mafula, lambi ha i koni ku tuka. Kacwalo mafula a mwa lambi a lu hupuza Linzwi la Mulimu la niti ni moya wa hae o kenile, ze tiisa balapeli ba niti kuli ba benyise liseli. (Samu 119:130; Daniele 5:14) Silimo sa 1919 si si ka fita kale, Bakreste ba ba tozizwe ba ba butali ne ba tukufalezwi ku lemuha za n’a bata Mulimu ku bona, ku si na taba ni ku fokola kwa bona kwa ka nakonyana. Kacwalo, muhuwo ha ne u utwahezi wa kuli ba benyise liseli, ne ba itukiselize ku eza cwalo.—2 Timotea 4:2; Maheberu 10:24, 25.

¹⁰ Kono ba bañwi ku ba ba tozizwe ne ba si ka itukiseza ku itombola za bona kamba ku sebeza ka t’ata—nihaike ne ba lakaza hahulu ku ba ni Munyali. Kacwalo nako ha ne i tile ya kuli ba tiye ku kutaza taba ye nde, ne ba si ka itukiseza. (Mateu 24:14) Mane ne ba likile ku fokolisa balikani ba bona be ne ba sebeza ka t’ata, ka ku eza inge ba ba kupa kwa mafula a bona. Mwa nguli ya Jesu, basizana ba ba butali ne ba alabile cwañi? Ne ba ize: “Ha ku konahali, h’a na ku likana ni luna ni mina; mu ye ku ba ba a lekisa, mu y’o itekela.” (Mateu 25:9) Ka ku swana, ka 1919, Bakreste ba ba tozizwe ba ba sepahala ne ba hanile ku eza nto ifi kamba ifi ye n’e ka ba palelwisa ku benyisa liseli. Kacwalo, ne ba pasize tatubo.

11. Ne ku ezaheziñi kwa basizana ba likuba?

¹¹ Jesu u feza ka ku bulela kuli: “[Basizana ba likuba] ba li ba sa y’o itekela, munyali kih’a fita, mi ba ba ne ba itukisize, ba kena ni yena mwa mukiti wa linyalo; mi kwa kwalwa sikwalo. Ha ku fela zeo, basizana ba bañwi ba taha ni bona, mi ba li: Mulena, Mulena, u lu kwalulele. Kono a alaba, a li: Ha ni mi zibi.” (Mateu 25:10-12) Kaniti, ba bañwi ne ba si ka itukiseza ku taha kwa Munyali. Kacwalo ne ba siyezi tatubo mi ne ba latehezwi ki kolo ya ku kena mwa mukiti wa linyalo wa kwa lihalimu. Ki bumai luli!

Nguli ya Litalenta

12. (a) Jesu n’a itusisizeñi mwa ku bonisa busepahali bwa batanga? (b) Ki mañi mutu ya n’a ‘zamaile musipili’?

¹² Ha sa bulezi za kutwisiso ya bona, Jesu a bonisa za ku sepahala kwa bona. A li: “Mubuso wa kwa lihalimu u swana sina mutu ya zamaya musipili; a biza batanga ba hae, a ba beya mwa pabalelo ya bufumu bwa hae. A fa yo muñwi litalenta liketalizoho; yo muñwi a mu fa ze peli; yo muñwi i liñwi; a fa yo muñwi ni yo muñwi ka ku likanyeza mata a hae. Kih’a zamaya.” (Mateu 25:14, 15) Munna wa mwa nguli yeo ki yena Jesu ka sibili, ya n’a ‘zamaile musipili’ ha n’a ile kwa lihalimu ka 33 C.E. Kono a si ka funduka kale, Jesu n’a beile “bufumu bwa hae” mwa pabalelo ya balutiwa ba hae ba ba sepahala. Ka nzila ifi?

13. Jesu n’a lukisize cwañi simu ye tuna ya ku sebeleza teñi ni ku laela “batanga” ba hae ku eza pisinisi?

¹³ Mwa bukombwa bwa hae bwa fa lifasi-mubu, Jesu n’a kalile ku lukisa simu ye tuna ka ku kutaza taba ye nde ya Mubuso mwa naha kaufela ya Isilaele. (Mateu 9:35-38) Pili a si ka tama kale “musipili,” n’a beile simu yeo mwa pabalelo ya balutiwa ba hae ba ba sepahala, a li: “Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; mu ba lute ku mamela ze ni mi laezi kaufela.” (Mateu 28:18-20) Ka manzwi ao, Jesu n’a laezi “batanga” ba hae ku eza pisinisi ku fitela a kuta, mi ‘yo muñwi ni yo muñwi n’a mu file ka ku likanyeza mata a hae.’

14. Ki kabakalañi bote ha ne ba si ka libelelwa ku eza pisinisi ka ku likanelela?

¹⁴ Pulelo yeo i bonisa kuli Bakreste ba kwa makalelo ne ba si na miinelo ye swana. Ba bañwi, ba ba cwale ka Paulusi ni Timotea ne ba na ni miinelo ye n’e ba konisa ku kutaza ni ku luta ka ku tala. Mwendi miinelo ya ba bañwi ne i ba palelwisa ku eza ze ñata. Ka mutala, Bakreste ba bañwi ne li batanga, ba bañwi ne ba na ni mapongo, ba bañwi ne li basupali, mi ba bañwi ne ba na ni mabasi. Ki niti kuli buikalabelo bo buñwi bwa mwa puteho ne bu si ka fiwa kwa balutiwa kaufela. Basali ba ba tozizwe ni banna ba bañwi ba ba tozizwe ne ba sa luti mwa puteho. (1 Makorinte 14:34; 1 Timotea 3:1; Jakobo 3:1) Kono ku si na taba ni miinelo ya bona ya ka butu, balutiwa kaufela ba Kreste ba ba tozizwe—banna ni basali—ne ba laezwi ku eza pisinisi, ka ku itusisa hande miinelo ya bona kuli ba eze bukombwa bwa Sikreste. Mizwale ba bona ba mwa miteñi ye ba eza cwalo ni bona.

Nako ya ku Tatuba Ya Kalisa!

15, 16. (a) Ki ifi ye ne li nako ya ku tatuba litaba? (b) Ki ifi kolo ye nca ya ku ‘eza pisinisi’ ye ne filwe kwa basepahali?

¹⁵ Nguli i zwelapili kuli: “Ha ku fitile mazazi a mañata mulena wa batanga bao a kuta, mi a tatuba litaba ni bona.” (Mateu 25:19) Ka 1914—ili mazazi a mañata ku zwa ka 33 C.E.—Kreste Jesu n’a kalile ku ba teñi sina Mulena. Hamulaho wa lilimo ze talu ni licika, ili ka 1918, a taha kwa tempele ya Mulimu ya kwa moya mi a taleleza manzwi a Pitrosi a li: “Se li nako ya Katulo ya Mulimu ye na ni ku kala ka ba Ndu ya Mulimu.” (1 Pitrosi 4:17; Malaki 3:1) Ne li nako ya ku tatuba litaba.

¹⁶ Batanga, bona banyani ba Jesu ba ba tozizwe, ne ba ezizeñi kwa “litalenta” za Mulena? Ku zwa ka 33 C.E. ku to fita cwalo ka 1914, buñata bwa bona ne ba sebelize ka t’ata ku eza “pisinisi” ya Jesu. (Mateu 25:16) Nihaiba ka nako ya ndwa ya lifasi ya pili, ne ba bonisize takazo ye tuna ya ku sebeleza Mulena. Cwale ne li swanelo ku fa basepahali kolo ye nca ya ku ‘eza pisinisi.’ Nako ya ku fela kwa muinelo wa cwale ne se i fitile. Taba ye nde ne i na ni ku kutazwa mwa lifasi kaufela. “Lukau lwa lifasi” ne lu na ni ku kutulwa. (Sinulo 14:6, 7, 14-16) Ba mafelelezo kwa sitopa sa buloto ne ba na ni ku fumanwa mi “buñata bo butuna” bwa lingu ze ñwi ne bu na ni ku kubukanywa.—Sinulo 7:9; Mateu 13:24-30.

17. Bakreste ba ba tozizwe ba ba sepahala ne ba ‘keni cwañi mwa tabo ya mulen’a bona’?

¹⁷ Nako ya kutulo ki nako ya tabo. (Samu 126:6) Kacwalo kwa swanela kuli ka 1919 Jesu ha n’a file banyani ba hae ba ba tozizwe ba ba sepahala buikalabelo bo buñwi, n’a ize: ‘U konile ku sepahala mwa linto ze nyinyani, ni ka ku beya ku busa ze ñata; kena mwa tabo ya mulen’a hao.’ (Mateu 25:21, 23) Mi hape ha lu koni ku ziba hande tabo ya Mulena y’o ya sa zo beiwa fa lubona lwa Mubuso wa Mulimu. (Samu 45:1, 2, 6, 7) Sitopa sa mutanga ya sepahala si keni mwa tabo yeo ka ku yemela Mulena y’o ni ku ekeza kwa lika za hae za fa lifasi-mubu. (2 Makorinte 5:20) Tabo ya bona i bonahala mwa manzwi a bupolofita a’ kwa Isaya 61:10 a’ li: ‘Ni ka wabelelwa hahulu Muñ’a Bupilo, pilu ya ka i tabele Mulimu wa ka; kakuli u ni apesize liapalo za bupilo.’

18. Ki kabakalañi ba bañwi ha ne ba si ka pasa tatubo, mi ne ku ezaheziñi ku bona?

¹⁸ Ka bumai, ba bañwi ne ba si ka pasa tatubo. Lu bala kuli: “Ya n’a ngile talenta i liñwi, a sutelela, a li: Mulena, ne ni ziba kuli u mutu ya tata, ya kutula mo u si ka cala, mi u kubukanya mo u si ka hasa peu. Ne ni sabile, mi na y’o pumbeka talenta ya hao mwa mubu. Bona, sika sa hao ki se!” (Mateu 25:24, 25) Ka ku swana, Bakreste ba bañwi ba ba tozizwe ne ba si ka eza “pisinisi.” Silimo sa 1914 si si ka fita kale, ne ba si ka tukufalelwa ku bulelela ba bañwi sepo ya bona, mi ne ba sa lati ku kalisa ka 1919. Jesu n’a ezizeñi kabakala kashwau ka bona? N’a ba amuhile matohonolo a bona kaufela. Ne ba ‘latezwi mwa lififi la kwande, mo ku na ni lililo ni likwecameno.’—Mateu 25:28, 30.

Tatubo I Sa Zwelapili

19. Tatubo i sa zwelapili ka nzila ifi, mi ki sifi se ba tukufalezwi ku eza Bakreste kaufela ba ba tozizwe?

¹⁹ Buñata bwa be ne ba ka ba batanga ba Kreste ba ba tozizwe mwa nako ya maungulo ne ba si ka kalisa kale ku sebeleza Jehova ka 1918 Jesu ha n’a kalile tatubo ya hae. Kana ne ba yawile tatubo? Batili. Tatubo ne i kalile ka 1918 ni ka 1919, yona nako yeo mutanga ya sepahala, ya na ni kutwisiso ka sitopa n’a pasize tatubo yeo. Mukreste ni Mukreste ya tozizwe u sa tatubiwa ku fitela a fiwa liswayo la ku ya ku ile. (Sinulo 7:1-3) Ka ku itemuhela nto yeo, banyani ba Kreste ba ba tozizwe ba tukufalezwi ‘ku eza pisinisi’ ka busepahali. Ba tukufalezwi ku ba ni kutwisiso, ba ipulukezi mafula a mañata ilikuli liseli li benye hahulu. Ba ziba kuli mañi ni mañi wa bona ha ka shwa inz’a sepahala, Jesu u ka mu amuhela mwa sibaka sa maino sa kwa lihalimu.—Mateu 24:13; Joani 14:2-4; 1 Makorinte 15:50, 51.

20. (a) Ki sifi se ba tukufalezwi ku eza lingu ze ñwi kacenu? (b) Bakreste ba ba tozizwe ba ziba nto mañi?

²⁰ Buñata bo butuna bwa lingu ze ñwi bu likanyisa mizwale ba bona ba ba tozizwe. Ba ziba kuli zibo ya bona ya za milelo ya Mulimu i ba tahiseza buikalabelo bo butuna. (Ezekiele 3:17-21) Kacwalo, ka tuso ya Linzwi la Jehova ni ka moya o kenile, ni bona ba buluka mafula a mañata ka ku ituta ni ka ku fumaneha kwa mikopano. Mi ba benyisa liseli la bona, ka ku eza musebezi wa ku kutaza ni ku luta kuli ba ‘eze pisinisi’ hamoho ni mizwale ba bona ba ba tozizwe. Kono Bakreste ba ba tozizwe ba ziba hande-nde kuli litalenta ne li beilwe mwa mazoho a bona. Ba ka buziwa ka za mo li babalelelwa liluwo la Mulena. Nihaike kuli ki ba banyinyani, ha ba koni ku shimbululela buikalabelo bwa bona kwa buñata bo butuna. Ka ku hupula nto yeo, mutanga ya sepahala, ya na ni kutwisiso u zwelapili ku etelela pisinisi ya Mulena, inz’a itebuha tuso ya buñata bo butuna bo bu sebeza ka t’ata. Mi ba buñata bo butuna ba lemuha buikalabelo bwa mizwale ba bona ba ba tozizwe mi ba ikutwa ku ba ni tohonolo ku sebeza mwatas’a bona.

21. Ki ifi kelezo ye sebeza kwa Bakreste kaufela ku zwa nako pili 1919 i si ka fita kale ku to fita ni kacenu le?

²¹ Kacwalo, nihaike kuli linguli ze peli zeo li lu tusa ku utwisisa ze n’e ezahezi ka 1919 ni hamulaho wa teñi, lituto za zona za sebeza kwa Bakreste ba niti kaufela mwa mazazi kaufela a maungulelo. Kacwalo, nihaike kuli kelezo ya Jesu ya n’a file kwa mafelelezo a nguli ya basizana b’a lishumi i ama pili kwa Bakreste ba ba tozizwe be ne ba li teñi pili 1919 i si ka fita, tuto ya yona i sa sebeza ku Mukreste kaufela. Kacwalo haike kaufel’a luna lu utwe manzwi a Jesu a li: “Mu libelele he, kakuli ha mu zibi lizazi, nihaiba nako.”—Mateu 25:13.

[Litaluso za kwatasi]

JESU U TAHA LILI?

Mwa Mateu kauhanyo 24 ni 25, Jesu u bulelwa ku “taha” mwa linzila ze shutana-shutana. Ha tokwi ku zamaya kuli a ‘tahe.’ Kono u “taha” ka ku isa mamelelo ya hae kwa batu kamba kwa balateleli ba hae, hañata ilikuli a fitise katulo. Kacwalo ka 1914, n’a ‘tile’ ku to kalisa ku ba teñi sina Mulena. (Mateu 16:28; 17:1; Likezo 1:11) Ka 1918, n’a ‘tile’ sina lingeloi la bulikani ku t’o kalisa ku atula be ne ba ipiza batanga ba Jehova. (Malaki 3:1-3; 1 Pitrosi 4:17) Fa Armagedoni, u ka “taha” ku to fitisa katulo fahalimw’a lila za Jehova.—Sinulo 19:11-16.

Ku taha (kamba ku fita) ko ku bulezwi ha sikai mwa Mateu 24:29-44 ni 25:31-46 ki kwa fa nako ya “ñalelwa ye tuna.” (Sinulo 7:14) Kono ku taha ko ku bulezwi hañata mwa Mateu 24:45 ku isa 25:30 ki kwa ku to atula ba ba ipiza kuli ki balutiwa ba hae ku kala ka 1918. Ka mutala, ne ku si ke kwa utwahala ku bulela kuli ku fiwa mupuzo kwa mutanga ya sepahala, ku atulwa kwa basizana ba likuba, ni ku atulwa kwa mutanga ya na ni buzwa, ya n’a patile talenta ya Mulena, ku ka ezahala ka nako y’a ka “taha” Jesu fa ñalelwa ye tuna. Seo ne si ka talusa kuli buñata bwa ba ba tozizwe ba ka fumanwa kuli ha ba sepahali ka nako yeo mi kacwalo ba ka tokwa ku yoliwa ki ba bañwi. Kono Sinulo 7:3 i bonisa kuli nako yeo ha i ka to fita, batanga kaufela ba Kreste ba ba tozizwe ba kabe ba ‘swailwe.’

[Siswaniso se si fa likepe 14]

‘Mutanga ya maswe’ n’a si ka amuhela limbuyoti ka 1919

[Siswaniso se si fa likepe 15]

Basizana ba ba butali ne ba itukisize munyali ha n’a fitile

[Siswaniso se si fa likepe 17]

Batanga ba ba sepahala ne ba ezize “pisinisi”

Mutanga ya buzwa n’a si ka eza cwalo

[Maswaniso a fa likepe 18]

Ba ba tozizwe ni “buñata bo butuna” ba zwelapili ku benyisa liseli la bona