Zeluituta Kwa Swanisezo Ya Basizana Baalishumi

Jesu naasweli kualaba lipuzo za baapositola bahae ka za sisupo sa kubateñi kwahae ni kufela kwa lifasi. Kabakaleo, Jesu cwale ubafa kelezo yende ka kuitusisa swanisezo yeñwi hape. Babapila ka nako ya kubateñi kwahae bakaiponela zebulezwi mwa swanisezo yeo inze litalelezwa.

Ukalisa swanisezo yahae ka kubulela kuli: “Mubuso wa mahalimu ukona kubapiswa kwa basizana baalishumi bane baangile lilambi zabona ni kuya kuli bayo katanyeza munyali. Baketalizoho ku bona neli likuba, mi baketalizoho nebanani kutwisiso.”—Mateu 25:1, 2.

Jesu hatalusi kuli babañwi kwa balutiwa bahae babaka kena mwa Mubuso wa mahalimu ki likuba ni kuli babañwi banani kutwisiso. Kono utalusa kuli mañi ni mañi wa balutiwa bahae yabata za Mubuso unani kolo ya kuiketela kutona kamba kuhakanyehiswa. Nihakulicwalo, Jesu waziba kuli mañi ni mañi wa batanga bahae wakona kusepahala ni kufuyaulwa ki Ndatahe.

Mwa swanisezo ye, basizana baalishumi kaufelaa bona baya kuyo amuhela munyali ni kuitukiseza mukiti wa linyalo. Munyali hafita, basizana baka monyeha mwa nzila ka lilambi zabona, ili kumubonisa likute hanze atisa munyaliwa wahae mwa ndu yalukiselizwe. Kono ki lika mañi zeezahala?

Jesu uli: “Ba likuba nebalwezi lilambi kono nebasika lwala mafula, haili babanani kutwisiso bona nebalwezi mafula mwa lipiza zabona hamoho ni lilambi. Mi bakeñisa kuli munyali naaliyehile kutaha, kaufelaa bona baozela mi balobala.” (Mateu 25:3-5) Munyali hafiti ka nako yebamulibelela. Kubonahala inge kuli waliyeha hahulu, mi ka nako yeo basizana balobala. Baapositola mwendi basahupula zanaabulezi Jesu ka za muuna wa lusika lwa bulena yanaaile kwa naha ya kwahule mi ‘akuta hamulaho wa kuyo amuhela maata a bulena.’—Luka 19:11-15.

Mwa swanisezo ya basizana baalishumi, Jesu ubulela zeezahala munyali hafita, uli: “Fahalaa busihu, kwautwahala muhuwo, oli: ‘Munyali ki yo ufitile! Hamuye muyo mukatanyeza.’” (Mateu 25:6) Kana basizana baitukisize mi batona?

Jesu uzwelapili uli: “Cwale basizana bao kaufela bazuha mi balukisa lilambi zabona. Ba likuba babulelela babanani kutwisiso, bali: ‘Hamu lufe kwa mafula amina, kakuli lilambi zaluna lituha litima.’ Babanani kutwisiso baalaba, bali: ‘Mwendi haana kululikana kuli luikabele ona ni mina. Hamuye kwa balekisi, mi muyo itekela.’”—Mateu 25:7-9.

Ka mukwa ocwalo, basizana balikuba baketalizoho habatoni mi habasika itukiseza kutaha kwa munyali. Habana mafula alikani a mwa lilambi zabona mi babata kufumana amañwi. Jesu uli: “Hane basaile kwa kuleka mafula, munyali apunya. Basizana bane baitukiselize bakena ni yena mwa mukiti wa linyalo, mi sikwalo sakwaliwa. Hasamulaho, basizana babañwi ni bona bafita, mi bali: ‘Muñaaka, Muñaaka, haku lukwalulele!’ Abaalaba, ali: ‘Kumibulelela feela niti, hani mizibi.’” (Mateu 25:10-12) Bo ki bumai luli bakeñisa kuli nebasika itukiseza mi nebasika tona!

Baapositola bakona kulemuha kuli munyali yabulelwa ki yena Jesu kasibili. Kwamulaho, naabulezi kuli uswana sina munyali. (Luka 5:34, 35) Basizana bababutali ki bo mañi? Hanaabulela ka za “mutapinyana” okafiwa Mubuso, Jesu naabulezi kuli: “Muapale mi muitukiseze ni lilambi zamina lituke.” (Luka 12:32, 35) Ka mukwa ocwalo, mwa swanisezo ye ya basizana, baapositola bakona kulemuha kuli Jesu utalusa bona ni balutiwa babañwi baba mwa mutapinyana. Kono ki tuto ifi yaluta Jesu mwa swanisezo ye?

Jesu ubatusa kuutwisisa taba yeo. Ufeleleza swanisezo yahae ka kubulela kuli: “Hakulicwalo, muzwelepili kutona kakuli hamuzibi lizazi kamba nako.”—Mateu 25:13.

Kaniti, Jesu ueleza balateleli bahae babasepahala kuli ka nako ya kubateñi kwahae, bakatokwa ‘kuzwelapili kutona.’ Ukataha, mi bakatokwa kuitukiseza ni kutona, sina basizana baketalizoho babanani kutwisiso, ilikuli basike balatehelwa ki sepo yabona yende ni kupalelwa kuamuhela mupuzo obasepisizwe.