Lingu ni Lipuli Li ka Ba ni Nako ya Kwapili ye Cwañi?

“U ka keta ba bañwi ku ba bañwi, sina mulisana h’a keta lingu mwa lipuli.”—MATEU 25:32.

 1, 2. Ki kabakalañi ha lu swanela ku ba ni cisehelo mwa nguli ya lingu ni lipuli?

JESU KRESTE ka buniti fela n’a li yena Muluti yo mutuna ka ku fitisisa fa lifasi-mubu. (Joani 7:46) O muñwi wa milutelo ya hae ne li wa ku itusisa linguli, kamba liswanisezo. (Mateu 13:34, 35) Zona zeo ne li ze bunolo kono ili ze m’ata mwa ku fitisa liniti ze tungile za kwa moya ni za bupolofita.

² Mwa nguli ya lingu ni lipuli, Jesu n’a supile kwa nako yeo n’a ka nga muhato mwa mayemo a ipitezi: “Mwan’a mutu nako y’a ka taha mwa kanya ya hae, a . . .” (Mateu 25:31) Seo si swanela ku lu tahiseza cisehelo kakuli ki yona swanisezo yeo Jesu a feza ka yona kalabo ya hae kwa kupo ye li: “U lu bulelele . . . se si ka supa ku taha kwa hao, ni ku fela kwa lifasi.” (Mateu 24:3) Kono seo si talusañi ku luna?

 3. Kwa makalelo mwa ngambolo ya hae, ki sifi seo Jesu n’a bulezi kuli ne si ka ezahala ñalelwa ye tuna i man’o kalisa?

³ Jesu n’a bulezi cimo likezahalo ze lemuseha ze ne li ka taha ñalelwa ye tuna “i mano” kalisa, ili likezahalo zeo lu libelezi. N’a bulezi kuli ka nako yeo “sisupo sa Mwan’a mutu” ne si ka bonahala. Seo si ka ama ka butuna “macaba kaufela a lifasi” ili bao ba ka “bona Mwan’a mutu a taha ka malu a lihalimu, ka mata a matuna ni ka kanya ye tuna.” Mwan’a mutu u ka ba ni “mangeloi a hae.” (Mateu 24:21, 29-31)a Ku cwañi ka za nguli ya lingu ni lipuli? Libibele za miteñi ye li i beya mwa kauhanyo 25, kono ki kalulo ya kalabo ya Jesu, ili ye fa litaba ze ekelizwe ka za ku taha kwa hae mwa kanya mi ki ye toma mamelelo fa ku atula kwa hae “macaba kaufela.”—Mateu 25:32.

Ba Ba Taluswa mwa Nguli Yeo

 4. Ki ku bulelwa kwa makalelo kufi ka za Jesu ko ku mwa nguli ya lingu ni lipuli, mi ki bomañi ba bañwi ba ba bulelwa?

⁴ Jesu u kalisa nguli yeo ka ku bulela kuli: “Mwan’a mutu nako y’a ka taha.” Mu kana mu ziba y’o “Mwan’a mutu” a li yena. Bañoli ba litaba za evangeli hañata ne ba itusisize pulelo yeo ku Jesu. Nihaiba Jesu yena ka sibili n’a ezize cwalo, ku si na kakanyo ili ka ku ba ni pono ya Daniele mwa munahano ka za “yo muñwi ya swana sina mwan’a mutu” ya n’a atumela Yo Muhulu wa Mazazi kuli a amuhele “bulena, kanya, ni mubuso.” (Daniele 7:13, 14; Mateu 26:63, 64; Mareka 14:61, 62) Hailif’o Jesu ki yena yo mutuna mwa nguli ye, ha yo a nosi. Kwa makalelo mwa ngambolo ye, sina ha ku amilwe kwa Mateu 24:30, 31, n’a bulezi kuli Mwan’a mutu ha ka ‘taha ka mata ni kanya ye tuna,’ mangeloi a hae a ka peta kalulo ye butokwa hahulu. Ka ku swana, nguli ya lingu ni lipuli i bonisa mangeloi a li ni Jesu muta a ‘ina fa lubona lwa hae lwa kanya’ kuli a atule. (Mu bapanye Mateu 16:27.) Kono Muatuli ni mangeloi a hae ba kwa lihalimu, kacwalo kana batu ba buhisaniwa mwa nguli yeo?

 5. Lu kona ku ziba cwañi “banyani” ba Jesu?

⁵ Ku talima fa nguli yeo ku patulula likwata ze talu ze lu tokwa ku ziba. Fahalimu a lingu ni lipuli, Mwan’a mutu u ekeza teñi sikwata sa bulalu ili seo ku zibwa kwa sona ki kwa butokwa hahulu kwa ku ziba lingu ni lipuli. Jesu u biza sikwata sa bulalu seo kuli ki banyani ba hae. (Mateu 25:40, 45) Ba lukela ku ba balapeli ba niti, kakuli Jesu n’a bulezi kuli: “Mutu ni mutu ya eza se si latwa ki Ndate . . . , ki yena munyan’a ka, ni kaizel’a ka, ni me.” (Mateu 12:50; Joani 20:17) Ka ku swanela hahulu kwa sisupo, Paulusi n’a ñozi ka za Bakreste ba ba li kalulo ya “lusika lwa Abrahama” ili ba ba li bana ba Mulimu. N’a bizize bona bao kuli ki “banyani” ba Jesu ni “ba ba abezwi kwa pizo ya lihalimu.”—Maheberu 2:9–3:1; Magalata 3:26, 29.

 6. Ki bomañi ba ba li “yo munyinyani” kwa banyani ba Jesu?

⁶ Ki kabakalañi Jesu ha n’a bulezi ka za “yo munyinyani” kwa banyani ba hae? Manzwi ao a kutela seo baapositola ne ba mu utwile a si bulela kwamulaho. Ha n’a bonisa fapahano ye ku Joani Mukolobezi, ya n’a shwile pili Jesu a si ka shwa kale mi kacwalo ili ya n’a na ni sepo ya fa lifasi-mubu, ni bao ba ba fita fa ku ba ni bupilo bwa kwa lihalimu, Jesu n’a ize: “Ha ku na yo mutuna ku Joani Mukolobezi; nihakulicwalo, yo munyinyani ku ba ba mwa mubuso wa kwa lihalimu ki yo mutuna ku yena.” (Mateu 11:11) Ba bañwi ba ba ya kwa lihalimu ne ba kana ba bile ba ba lemuseha hahulu mwa puteho, inge baapositola, mi ba bañwi ne si hahulu, kono kaufel’a bona ki banyani ba Jesu ba kwa moya. (Luka 16:10; 1 Makorinte 15:9; Maefese 3:8; Maheberu 8:11) Kacwalo, nihaiba kuli ba bañwi ne ba bonahezi ku ba be si ba butokwa hahulu fa lifasi-mubu, ne ba li banyani ba hae mi ne ba swanezwi k’u ngiwa ka mayemo ao.

Lingu ni Lipuli ki Bomañi?

 7, 8. Ki sifi sa n’a bulezi Jesu ka za lingu, kacwalo ki sifi se lu kona ku utwisisa ka za bona?

⁷ Lu bala ka ku ama ku za ku atulwa kwa lingu kuli: “[Jesu] kih’a ka bulelela ba ba inzi ku la hae la bulyo, a li: A mu tahe, mina ba ba fuyozwi ki Ndate, mu yole mubuso o n’o lukiselizwe mina haisamba lifasi li tomwa; Kakuli ne ni lapile, mi mwa ni fa, na ca; ne ni shwile linyolwa, mi mwa ni fa, na nwa; ne ni li muenyi, mi mwa ni nopa; Ne ni inzi mapunu, mi mwa ni apesa; ne ni kula, mi mwa ni lekula; ne ni li mwa tolongo, mi mwa taha ku na. Ba ba lukile kih’a ba ka mu alaba, ba li: Mulena, lu ku boni lili u lapile, mi lwa ku fa, wa ca? kamba u shwile linyolwa mi lwa ku fa, wa nwa? Ki lili lu ku boni u li muenyi, mi lwa ku nopa? kamba u inzi mapunu, mi lwa ku apesa? Lu ku boni lili unz’o kula, kamba u li mwa tolongo, mi lwa taha ku wena? Mulena u ka ba alaba, a li: Kaniti na mi bulelela, ni li: Kamita ha mu ezize yo muñwi wa banyani ba ka bao cwalo, nihaiba yo munyinyani ku bona, ki na ye mu ezize cwalo.”—Mateu 25:34-40.

⁸ Ka mo ku bonahalela fela, lingu ba ba atulezwi ku ba ku la bulyo la Jesu la tompo ni sishemo ba yemela sitopa sa batu. (Maefese 1:20; Maheberu 1:3) Kiñi se ne ba ezize mi ne li lili? Jesu u bulela kuli ne ba mu file lico, lino, ni liapalo ka sishemo, ka likute, ni ka bufani bo butuna, ni ku mu tusa ha n’a kula kamba ku ba mwa tolongo. Lingu ha ba bulela kuli ne ba si ka eza seo ku Jesu yena ka butu, u ba taluseza kuli ne ba file kemelo kwa banyani ba hae ba kwa moya, ili bomasiyaleti ba Bakreste ba ba tozizwe, kacwalo ka kutwisiso yeo ne ba ezize seo ku yena.

 9. Ki kabakalañi nguli yeo ha i sa sebezi mwahal’a Lilimo ze Sikiti?

⁹ Nguli yeo ha i sebezi mwahal’a Lilimo ze Sikiti, kakuli batoziwa ka nako yeo ha ba na ku ba batu ba ba ipumana mwa tala, linyolwa, makulanu, kamba ku beiwa mwa tolongo. Nihakulicwalo, ba bañata ba bona se ba ipumani ku zeo mwahal’a mafelelezo a muinelo wo wa linto. Haisali Satani a lundulelwa fa lifasi-mubu, s’a tahisize kuli bomasiyaleti ba be bona bao a ndanyunena buhali bwa hae, ili ku ba tahiseza sheununo, tukufazo, ni lifu.—Sinulo 12:17.

10, 11. (a) Ki kabakalañi ha ku si ko ku utwahala ku nahana kuli lingu li kopanyeleza mañi ni mañi ya eza kezo ye nde kwa banyani ba Jesu? (b) Lingu ka swanelo li yemela bomañi?

¹⁰ Kana Jesu u bulela kuli mañi ni mañi ya ba ni sishemo-nyana ku yo muñwi wa banyani ba hae, se si cwale ka ku mu fa kaemba ka sinkwa kamba komoki ya mezi, u fita fa ku ba yo muñwi wa lingu zeo? Ka buniti fela, ku eza za sishemo ze cwalo ne ku kana kwa bonisa sishemo sa butu, kono luli, ku bonahala kuli ze amiwa kwa lingu za mwa nguli yeo ki ze ñata ku fita seo. Sina ka mutala, Jesu n’a sa ami ni hanyinyani ku bosilatula Mulimu kamba ba bahulu ba bulapeli bao ne ba ka eza kezo ye ñwi ye sishemo ku yo muñwi wa banyani ba hae. Ka ku fapahana, Jesu n’a bizize lingu zeo habeli kuli ki “ba ba lukile.” (Mateu 25:37, 46) Kacwalo lingu li lukela ku ba batu bao mwahal’a nako se ba tile mwa ku tusa—ili ku fa kemelo ya ka cisehelo—kwa banyani ba Kreste mi ba bonisize tumelo ku fita fa sipimo sa ku fumana mayemo a ku luka fapil’a Mulimu.

¹¹ Mwahal’a lilimo ze myanda-nda, ba bañata ba ba cwale ka Abrahama se ba bile ni mayemo a ku luka. (Jakobo 2:21-23) Nuwe, Abrahama, ni ba bañwi ba ba sepahala ba mwahal’a “lingu ze ñwi” ze ka fumana bupilo mwa Paradaisi mwatas’a Mubuso wa Mulimu. Mwa linako za cwanoñu fa bolule-lule ba bañwi se ba ikungezi bulapeli bwa niti sina lingu ze ñwi mi se ba fitile fa ku ba “mutapi u li muñwi” ni batoziwa. (Joani 10:16; Sinulo 7:9) Bona bao ba ba na ni sepo ya fa lifasi-mubu ba lemuha banyani ba Jesu sina lindumeleti za Mubuso mi kacwalo ba ba tusize—ka muinelo tenyene ni kwa moya. Jesu u’ nga seo lingu ze ñwi ba ezeza banyani ba hae kuli si eziwa ku yena fa lifasi-mubu. Ba ba cwalo ba ba pila muta a taha ku t’o atula macaba ba ka atulwa sina lingu.

12. Ki kabakalañi lingu ha ne li kana za buza ka mo li ezelize sishemo ku Jesu?

¹² Haiba lingu ze ñwi cwale ba sweli ku kutaza taba ye nde ni batoziwa ni ku ba tusa, ki kabakalañi ha ne ba ka buza kuli: “Mulena, lu ku boni lili u lapile, mi lwa ku fa, wa ca? kamba u shwile linyolwa mi lwa ku fa, wa nwa?” (Mateu 25:37) Ku kona ku ba ni mabaka a mañata. Ye ki nguli. Ka yona, Jesu u bonisa ku iyakatwa kwa hae ko ku tungile kwa neku la banyani ba hae ba kwa moya; u utwa maikuto a bona, u nyanda hamoho ni bona. Jesu kwa makalelo n’a bulezi kuli: “Ya mi amuhela, wa ni amuhela; mi ya ni amuhela, u amuhela Ya ni lumile.” (Mateu 10:40) Mwa swanisezo ye, Jesu u yandulula sikuka seo, ili ku bonisa kuli se si ezezwa banyani ba hae (se sinde kamba se si maswe) mane si fita ni kwa lihalimu; ku swana inge kuli si ezizwe ku yena mwa lihalimu. Hape, Jesu fa u koñomeka sipimo sa Jehova sa ku atula, ili ku utwahaza hande kuli katulo ya Mulimu, ibe ya ku shemuba kamba ku nyaza, ki ye swanela ili ye lukile. Lipuli ha li koni ku itatula ka ku bulela kuli, ‘Kihona, ki ka libaka fela la kuli ne lu si ka ku bona tenyene.’

13. Ki kabakalañi ba ba swana sina lipuli ha ne ba kana ba biza Jesu kuli “Mulena”?

¹³ Ha se lu utwisisize kuli ki lili f’o katulo ye bonisizwe mwa nguli yeo i eziwa, lu fita fa ku bonisisa hande ba ba li lipuli. Talelezo ki muta “ku ka taha kwa lihalimu sisupo sa Mwan’a mutu; mi macaba kaufela a lifasi a ka ikalelwa, mi a ka bona Mwan’a mutu a taha . . . ka mata a matuna ni ka kanya ye tuna.” (Mateu 24:29, 30) Bapunyuhi ba ñalelwa ya Babilona yo Mutuna ba ba ngile banyani ba Mulena ka kashwau cwale ka ku kalelwa ne ba kana ba biza Muatuli kuli “Mulena,” ili ku sepa kuli ba ka punyusa bupilo bwa bona.—Mateu 7:22, 23; mu bapanye Sinulo 6:15-17.

14. Jesu u ka atula lingu ni lipuli ka mutomo ufi?

¹⁴ Nihakulicwalo, katulo ya Jesu ha i na ku toma fa buipapato bwa ka ku kalelwa bo bu zwa ku ba ne ba li ba likeleke, bosilatula Mulimu, kamba ba bañwi. (2 Matesalonika 1:8) Mwa sibaka sa seo, muatuli u ka lundulula muinelo wa mwa pilu ni likezo za kwamulaho za batu nihaiba ku “yo munyinyani [kwa banyani ba hae].” Ka mo ku inezi fela, palo ya Bakreste ba ba tozizwe ba ba siyezi fa lifasi-mubu i sweli ku fukuzeha. Nihakulicwalo, ka nako kaufela yeo batoziwa, ba ba li “mutanga ya sepahala, ya na ni kutwisiso,” ba zwelapili ku fa sico ni ketelelo ya kwa moya, ba ba kona ku ba lingu ba na ni sibaka sa ku eza hande sitopa sa mutanga, sina mo ba ezelize ba ‘buñata bo butuna ba ba zwa mwa macaba kaufela ni mwa mishobo ni mwa masika.’—Sinulo 7:9, 14.

15. (a) Ba bañata se ba iponahalize cwañi ku ba inge lipuli? (b) Ki kabakalañi ha lu swanela ku pima ku bulela ka za haiba mutu yo muñwi ki ngu kamba ki puli?

¹⁵ Banyani ba Kreste ni bolule-lule ba lingu ze ñwi ba ba swalisani ni bona sina mutapi u li muñwi se b’a ngilwe cwañi? Batu ba bañata ne ba kana ba si ka lwanisa ka butu bayemeli ba Kreste kono hape ha ba si k’a nga batu ba hae ka lilato. Ka ku lata lifasi le li maswe, ba ba swana sina lipuli ba hana lushango lwa Mubuso, niha ba lu utwa ka ku nonga kamba ka ku sa nonga. (1 Joani 2:15-17) Ka buniti fela, kwa nalulelule, Jesu ki yena ya ketilwe kuli a fe katulo. Musebezi wa ku atula kuli lingu ki bomañi mi lipuli ki bomañi haki wa luna.—Mareka 2:8; Luka 5:22; Joani 2:24, 25; Maroma 14:10-12; 1 Makorinte 4:5.

Sikwata se Siñwi ni se Siñwi Si ka Ba ni Nako ya Kwapili ye Cwañi?

16, 17. Lingu li ka ba ni nako ya kwapili ye cwañi?

¹⁶ Jesu n’a file katulo ya hae kwa lingu kuli: “A mu tahe, mina ba ba fuyozwi ki Ndate, mu yole mubuso o n’o lukiselizwe mina haisamba lifasi li tomwa.” Ki memo ye mufutumala hakalo—“A mu tahe”! Kwa nto mañi? Kwa bupilo bo bu sa feli, sina ka mwa n’a bulelezi ka ku puma taba kuli: “Ba ba lukile ba [ka ya] kwa bupilo bo bu sa feli.”—Mateu 25:34, 46.

¹⁷ Mwa nguli ya litalenta, Jesu n’a bonisize se si tokwahala kwa neku la bao ba ba ka busa ni yena mwa lihalimu, kono mwa nguli ye u bonisa se si libelelwa kwa babusiwa ba Mubuso. (Mateu 25:14-23) Ka ku nonga fa taba, bakeñisa kemelo ya bona ye si ka aluhana kwa neku la banyani ba Jesu, lingu ba yola sibaka mwa liluko la fa lifasi-mubu la Mubuso wa hae. Ba ka ikola bupilo fa lifasi-mubu le li li paradaisi—ili tibelelo yeo Mulimu n’a ba lukiselize “haisamba lifasi [la mufuta wa mutu o konwa ku yangwelwa] li tomwa.”—Luka 11:50, 51.

18, 19. (a) Jesu u ka fa katulo ifi kwa lipuli? (b) Lu kona ku ikolwisa cwañi kuli lipuli ha li na ku talimana ni manyando a ku ya ku ile?

¹⁸ Ki ye fapahana cwañi katulo ye petwa fa lipuli! “Cwale u ka li ku ba ba inzi ku la nzohoto: A mu zwe ku na, mina ba ba kutilwe, mu ye mwa mulilo o sa feli, o lukiselizwe Diabulosi ni mangeloi a hae. Kakuli ne ni lapile, mi ha mu si ka ni fa sa ku ca; ne ni shwile linyolwa mi ha mu si ka ni fa sa ku nwa; Ne ni li muenyi, mi ha mu si ka ni nopa; ne ni inzi mapunu, mi ha mu si ka ni apesa; ne ni kula, ni li mwa tolongo, mi ha mu si ka t’o ni lekula. Kiha ba ka mu alaba ni bona, ba li: Mulena, lu ku boni lili u lapile, kamba u shwile linyolwa, kamba u li muenyi, kamba u inzi mapunu, kamba u kula, kamba u li mwa tolongo, mi lwa tokwa ni ku ku tusa? Kih’a ka ba alaba, a li: Kaniti na mi bulelela, ni li: Ha mu tokwile ni ku eza yo muñwi wa ba banyinyani bao cwalo, ki na ye mu si ka eza cwalo.”—Mateu 25:41-45.

¹⁹ Baituti ba Bibele ba ziba kuli seo hasi koni ku talusa kuli mioyo ye sa shwi ya ba ba swana sina lipuli i ka nyandiswa mwa mulilo o sa timi. Batili, kakuli batu ki mioyo; Ha ba na mioyo ye sa shwi. (Genese 2:7; Muekelesia 9:5, 10; Ezekiele 18:4, NW) Ka ku atulela lipuli “mulilo o sa feli,” Muatuli u talusa sinyeho ye si na sepo ya kwapili, ili yeo hape ikaba mafelelezo a ku ya ku ile a Diabulosi ni badimona ba hae. (Sinulo 20:10, 14) Kacwalo, Muatuli wa Jehova u fa likatulo ze fapahana. U bulelela lingu kuli, “A mu tahe”; lipuli u li bulelela kuli, “A mu zwe ku na.” Lingu li ka ca sanda sa “bupilo bo bu sa feli.” Lipuli li ka fumana “lifu le li sa feli.”—Mateu 25:46, NW.b

I Talusañi ku Luna?

20, 21. (a) Bakreste ba na ni musebezi ufi wa butokwa wa ku eza? (b) Ki ku ketahanya kufi ko ku sweli ku ezahala cwale? (c) Muinelo wa batu u ka ba o cwañi muta nguli ya lingu ni lipuli i ka kalisa ku talelezwa?

²⁰ Baapositola ba bane ba ne ba utwile kalabo ya Jesu ka za sisupo sa ku ba teñi kwa hae ni mafelelezo a muinelo ne ba na ni ze ñata za ku nyakisisa. Ne ba ka tokwa ku tona ni ku libelela. (Mateu 24:42) Hape ne ba ka tokwa ku eza musebezi wa ku fa bupaki o bulezwi kwa Mareka 13:10. Lipaki za Jehova ba ikenyize ka ku tiya mwa musebezi w’o kacenu.

²¹ Kacwalo he, kutwisiso ye ekelizwe yeo ya nguli ya lingu ni lipuli i talusañi kwa neku la luna? Kihona, batu se b’a nga mayemo kwa lineku le liñwi. Ba bañwi ba mwa ‘nzila ye atami ye isa kwa sinyeho,’ hailif’o ba bañwi ba lika ku siyala mwa ‘nzila ye sisani ye isa kwa bupilo.’ (Mateu 7:13, 14) Kono nako yeo Jesu a ka fa katulo ya mafelelezo fa lingu ni lipuli ze bonisizwe mwa nguli isali kwapili. Mwan’a mutu ha ka taha mwa kalulo ya ku ba Muatuli, u ka bona kuli Bakreste ba niti ba bañata—bao luli ili “buñata bo butuna” bwa lingu ze ineezi—ba ka fita ku ze konisa ku pululeza mwa kalulo ya mafelelezo ya “ñalelwa ye tuna” ni ku kena mwa lifasi le linca. Tibelelo yeo i swanela ku ba simbule sa tabo cwale. (Sinulo 7:9, 14) Kwa lineku le liñwi, lipalo ze tuna za ba ba zwa mwa “macaba kaufela” ba ka be ba iponahalize ku ba sina lipuli ze sinundwe. Ba ka ya mwa “lifu le li sa feli.” Yeo i ka ba kimuluho hakalo kwa neku la lifasi-mubu!

22, 23. Bakeñisa kuli ku talelezwa kwa nguli ku sa li kwapili, ki kabakalañi musebezi wa luna wa ku kutaza ha u li wa butokwa hahulu kacenu?

²² Hailif’o ku atulwa sina ka mo ku taluselizwe mwa nguli ku mwa nako ye kwapili-nyana, nihaiba mwa nako ya cwale nto ye ñwi ya butokwa hahulu i sweli ya ezahala. Luna Bakreste lu sweli ku eza musebezi o’ pilisa bupilo ili wa ku shaela lushango lo lu tisa ku kauhana mwahal’a batu. (Mateu 10:32-39) Paulusi n’a ñozi kuli: “Kakuli mutu ni mutu ya biza Libizo la Mulena u ka piliswa. Kono ba ka biza cwañi ye ba si na tumelo ku yena? Mi ba ka lumela ku yena cwañi, ba si ka utwa za hae? Mi ba ka utwa cwañi, mubuleli h’a li siyo?” (Maroma 10:13, 14) Bukombwa bwa luna bwa fa nyangela bu sweli ku fita kwa batu mwa linaha ze fitelela 230 ka libizo la Mulimu ni lushango lwa hae lwa punyuho. Banyani ba Kreste ba ba tozizwe ba sa etelela musebezi wo. Ba ba bat’o ba bolule baketalizoho ba lingu ze ñwi se ba swalisani ni bona. Mi ku potoloha lifasi-mubu kamukana batu ba sweli k’u nga muhato kwa lushango lo lu shaelwa ki banyani ba Jesu.

²³ Ba bañata ba utwa lushango lwa luna ha lu nze lu kutaza fa ndu ni ndu kamba ka ku tandalelwa. Ba bañwi ne ba kana ba ituta ka za Lipaki za Jehova ni se lu yemela ka linzila ze sa zibwi ki luna. Nako ya katulo ha i ka fita, Jesu u ka nyakisisa ka sipimo sifi buikalabelo bwa mwa mipilelo ya nyangela ni tamaiso ya lubasi? Ha lu zibi, mi ha ku na tuso ya ku nuhelela ka za seo. (Mu bapanye 1 Makorinte 7:14.) Ba bañata cwale ba itatela ku sa teeleza, ba sheununa, kamba ba abana mwa ku tahisa nyandiso tota kwa batu ba Mulimu. Kacwalo, ye ki nako ya kaulakañi; ba ba cwalo ne ba kana ba itahiseza ku ba bao Jesu a ka atula sina lipuli.—Mateu 10:22; Joani 15:20; 16:2, 3; Maroma 2:5, 6. 

24. (a) Ki kabakalañi ha ku li kwa butokwa kwa batu ka buñwi k’u nga muhato o munde kwa ku kutaza kwa luna? (b) Tuto ye i tusize mina ka butu ku ba ni mubonelo ufi kwa bukombwa bwa mina?

²⁴ Ka tabo, nihakulicwalo, ba bañata b’a nga muhato o munde, ba ituta Linzwi la Mulimu, ni ku ba Lipaki za Jehova. Ba bañwi bao mwa nako ya cwale ba bonahala ku swana inge lipuli ba kana ba cinca ni ku fita fa ku ba sina lingu. Sisupo ki sa kuli bao ba ba nga muhato ni ku fa kemelo ka cisehelo ku bomasiyaleti ba banyani ba Kreste kacwalo ba sweli ku bonisa cwale kuli ba ka fa mutomo wa kuli ba beiwe ku la bulyo la Jesu muta, mwa nako ye li bukaufi kwapili, a ka ina fa lubona lwa hae kuli a fe katulo. Bona bao ba swelwi ku fuyaulwa mi ba ka zwelapili ku fuyaulwa. Kacwalo, nguli yeo i swanela ku lu nyangumuna kuli lu be ni misebezi ya ka cisehelo ni ku fita mwa bukombwa bwa Sikreste. Pili ku si ka liyeha hahulu, lu bata ku eza se lu kona kaufela mwa ku shaela taba ye nde ya Mubuso mi ka nzila ye cwalo lu fe ba bañwi sibaka sa k’u nga muhato. Kihona ku ka siyalela ku Jesu ku fa katulo, ya ku nyaza kamba ku shemuba.—Mateu 25:46.

Kana Mwa Hupula?

◻ Ki ku swana kufi ko ku mwahal’a Mateu 24:29-31 ni Mateu 25:31-33 ko ku bonisa kuli nguli ya lingu ni lipuli i sebeza mwa nako ya kwapili, mi ikaba lili f’o?

◻ Ki bomañi ba ba li “yo munyinyani” kwa banyani ba Jesu?

◻ Ku itusisa pulelo ya “ba ba lukile” kwa Jesu ku lu tusa cwañi ku ziba ba ba yemelwa ki bao ni ba ba sa yemelwi ki bona?

◻ Nihaike kuli nguli yeo i ka talelezwa mwa nako ya kwapili, ki kabakalañi ku kutaza kwa luna ha ku li kwa butokwa cwale ni kwa ka putako?

[Mbokisi/Siswaniso se si fa likepe 26]

MU LEMUHE MIINELO YE SWANA

Mateu 24:29-31 Mateu 25:31-33

Hamulaho wa ku kala kwa ñalelwa ye tuna, Mwan’a mutu wa taha

Mwan’a mutu wa taha

U taha ka kanya ye tuna U taha mwa kanya mi u ina fa

lubona lwa hae lwa kanya

Hamoho ni yena ku na ni mangeloi Mangeloi a taha ni yena

Macaba kaufela a lifasi a mu bona Macaba kaufela a kopana;

lipuli kwa nalulelule za atulwa

(ñalelwa ye tuna ya fela)

[Litaluso za kwatasi]

[Manzwi a bañi ba siswaniso]

Garo Nalbandian