Bupilo ni Bukombwa bwa Jesu

Paseka ya Jesu ya Mafelelezo i Fakaufi

LA BUBELI, Nisani 11, ha ne li nze li atumela, Jesu u feza ku luta baapositola fa Lilundu la likota za Olive. Ne li bile lizazi la mipateho, ni le li katalisa cwañi! Cwale, mwendi ha nze a kutela kwa Betania ku yo lobala teñi, u taluseza baapositola ba hae kuli: “Mwa ziba kuli ku sa na ni mazazi a mabeli mi ikaba Paseka; mi Mwan’a mutu u ka betekwa, kuli a kokotelwe fa [kota ya linyando, NW].”

Lizazi le ne li tatama, la Bulalu, Nisani 12, Jesu ka mo ku bonahalela u ba ni nako ya ku pumula ni baapositola ba hae ku si na mipateho. Lizazi leo li si ka fita kale, n’a nyazize bahulu ba bulapeli fa nyangela, mi u lemuha kuli ba bata ku mu bulaya. Kacwalo la Bulalu h’a ipeyi ili yena fa ngandaleza, bakeñisa kuli h’a bati nto ifi kamba ifi kuli i filikanye ku eza kwa hae mukiti wa Paseka ni baapositola ba hae manzibuana a’ tatama.

Mwahal’a yona nako yeo, baprisita ba batuna ni ba bahulu ba sicaba ne ba kopani mwa lapa la muprisita yo muhulu, Kayafa. Bakeñisa kuli ba sa utwa butuku ku zwelela fa ku kayaulwa ki Jesu mwa lizazi le ne li bile teñi pili, ba eza litukiso za ku mu swala ka ku itusisa mukwa o muñwi wa ku mu kweceka a sa zibi ni ku mu bulaya. Niteñi ba zwelapili ku bulela kuli: “Ku si ke kwa ezwa mwa lizazi la mukiti, mwendi mufilifili u ka taha mwa sicaba.” Ba saba batu, ili bao Jesu a ikola kemelelo ya bona.

Ba bahulu ba bulapeli ha ba nze ba eza mulelo o maswe wa ku bulaya Jesu, ba amuhela muenyi. Ba fita fa ku komoka, ka ku bona kuli ki yo muñwi wa baapositola ba Jesu ka sibili, Judasi Isikariota, ili y’o ku yena Satani n’a cezi muhupulo o maswe wa ku beteka Mulen’a hae! Ki tabo kwa butuna ye ba na ni yona Judasi ha ba buza kuli: “Mu lata ku ni fa bukai, mi ni ka mu swalisa mina?” Ka tabo ba lumela ku mu lifa masheleñi a silivera a 30, ili teko ya mutanga ka ku ya ka bulikani bwa Mulao wa Mushe. Ku zwa onafo, Judasi cwale u bata nako ye nde ya ku beteka Jesu ku bona ku si na undi-wa-nyangela fakaufi.

Nisani 13 i kalisa fa ku likela kwa lizazi la Bulalu. Jesu n’a til’o esha ili ku zwelela kwa Jeriko la Butanu, kacwalo b’o ki busihu bwa busilela mi ki bwa mafelelezo bw’a ba ni bona mwa Betania. Lizazi le li tatama, la Bune, litukiso za mafelelezo li ka tokwahala ku ezwa kwa neku la Paseka, ili ye kalisa fa ku likela kwa lizazi, yona nako yeo ngunyana ya Paseka i lukela ku bulaiwa mi cwale ni ku besiwa kamukan’a yona. Ba ka ezeza kai mukiti wo, mi ki bomañi ba ba ka eza litukiso?

Jesu h’a si ka fa litaba ze tungile ze cwalo, mwendi ka libaka la ku paleliswa Judasi ku taluseza baprisita ba bahulu kuli ba tame Jesu mwahal’a mukiti wa Paseka. Kono cwale, mwendi la Bune lizazi ha se li sikuluhile hanyinyani, Jesu wa luma Pitrosi ni Joani ku zwa kwa Betania, ni ku bulela kuli: “Mu y’o lu lukiseza Paseka kuli lu i ce.”

“U lata kuli lu i lukise kakai?” ba buza.

“Ha mu li mu kena mwa munzi,” Jesu wa talusa, “mu ka katana mutu ya lwezi nkwana ya mezi. Mu mu latelele ku y’o fita kwa ndu y’a ka kena ku yona. Mi mu ka bulelela muñ’a ndu, mu li: Muluti u li ku wena: Ndu i kai mo ni ka t’o cela Paseka ni balutiwa ba ka? U ka mi bonisa ndu ye kwahalimu, ye tuna, ye lukisizwe. Mu lukise Paseka mwateñi.”

Ku si na ku kakanya muñ’a muyaho w’o ki mulutiwa wa Jesu ili y’o mwendi a libelela kupo ya Jesu ya ku itusisa ndu ya hae fa nako yeo ye ipitezi. Ku be cwañi kamba cwañi, Pitrosi ni Joani ha ba fita mwa Jerusalema, ba fumana lika kaufela sina mwa n’a taluselize cimo Jesu. Kacwalo bubeli bwa bona ba bona teñi kuli ngunyana i lukisizwe ni kuli litukiso ze ñwi kaufela li ezizwe ili ku babalela butokwi bwa ba ba ka fumaneha fa mukiti wa Paseka ba 13, ili Jesu ni baapositola ba hae ba 12. Mateu 26:1-5, 14-19; Mareka 14:1, 2, 10-16; Luka 22:1-13; Exoda 21:32.

◆ Ki sifi seo Jesu a bonahala ku si eza la Bulalu, mi ki kabakalañi?

◆ Ki mukopano mañi o eziwa kwa ndu ya muprisita yo muhulu, mi Judasi u potela ba bahulu ba bulapeli ka mulelo mañi?

◆ Jesu u luma bomañi kwa Jerusalema la Bune, mi ki ka mulelo mañi?

◆ Bona bao ba ne ba lumilwe ki sifi se ne ba fumani ili se si sinula hape m’ata a Jesu a limakazo?