Jesu Ulapela Inze Ali Mwa Maswabi amatuna Hahulu

Jesu ufeza kulapela ni baapositola bahae babasepahala. Mi “habafeza kuopela milumbeko, bazwa ni kuya kwa Lilundu la Likota za Olive.” (Mareka 14:26) Baliba kwa upa mwa simu yebizwa Getsemani kwalata hahulu kuya Jesu.

Habafita fa sibaka sesinde hahulu se, ili mwahalaa likota za Olive, Jesu usiya baapositola ba 8. Mwendi basiyala bukaufi ni makenelo a simu, kakuli Jesu ubabulelela kuli: “Hamuine fa, na hanisaya fale kuyo lapela.” Jesu uzwelapili kuliba mwa simu ni baapositiola babalaalu, ili Pitrosi, Jakobo, ni Joani. Uziyeleha hahulu mi ubataluseza kuli: “Ni mwa maswabi amatuna hahulu, inge nikashwa. Hamuine fa mi muzwelepili kutona ni na.”—Mateu 26:36-38.

Hasaile kwahulenyana ni bona, ‘uwela fafasi mi ukala kulapela.’ Ki lika mañi zalapela ku Mulimu ka nako ye yetaata hahulu? Uli: “Ndate, lika kaufela zakonahala ku wena; zwisa komoki ye, ku na. Niteñi kusike kwaba monilatela, kono kube moulatela wena.” (Mareka 14:35, 36) Utalusañi? Kana ubata kupicuka buikalabelo bwahae bwa kuba Muliululi? Batili!

Jesu hanaali kwa lihalimu naaiponezi mone banyandela hahulu batu bane babulaiwanga ki Maroma. Cwale hasaali fa lifasi, sina mutu yanani maikuto ni yakona kuutwa butuku, Jesu haatabeli kuli anyandiswe cwalo. Kono u mwa maswabi amatuna hahulu bakeñisa kuli kubulaiwa kwahae sina sikebenga kukona kunyefulisa libizo la Ndatahe. Utuha abulaelwa fa kota sina mutu ya nyefuzi Mulimu.

Hasalapezi ka nako yetelele, Jesu ukuta kwa baapositola babalaalu mi ufumana kuli balobezi. Ubulelela Pitrosi kuli: “Kana nemusike mwazwelapili kutona ni na nihaiba hora iliñwi feela? Muzwelepili kutona mi muzwelepili kulapela, kuli musike mwakena mwa muliko.” Jesu waziba kuli baapositola ni bona bakatezi mi seli busihu hahulu. Uzwelapili uli: “Ki niti, moya ona walata, kono nama yafokola.”—Mateu 26:40, 41.

Jesu uya hape lwabubeli mi ukupa kuli Mulimu azwise “komoki ye,” ku yena. Hakuta, ufumana kuli baapositola babalaalu balobezi hape, haili fo baswanela kuzwelapili kulapela kuli basike bakena mwa muliko. Jesu haambola ni bona, ‘habazibi sa kumualaba.’ (Mareka 14:40) Jesu uya hape lwabulaalu, mi uwa ka mañwele ni kulapela.

Jesu ubilaezwa ki taba ya kuli kubulaiwa kwahae sina sikebenga kukanyefulisa libizo la Ndatahe. Nihakulicwalo, Jehova wateeleza kwa tapelo ya Mwanaa hae, mi ka nako ye, Mulimu uluma lingeloi kuto mutiisa. Niteñi, Jesu haatuheli kukupa Ndatahe, kono uzwelapili “kulapela ka taata.” Jesu u mwa maswabi amatuna. Jesu unani buikalabelo bobutuna hahulu! Bupilo bwahae ni bwa batu babalumela ku yena bu mwa lubeta. Mane ‘mifufuzo yahae iba sina mali alotela fafasi.’—Luka 22:44.

Jesu hakutela lwabulaalu kwa baapositola bahae, ubafumana kuli balobezi hape. Ubabulelela kuli: “Mwalobala ni kupumula ka nako ye! Hamubone! Nako ya kuli Mwanaa mutu abetekwe, afiwe mwa mazoho a baezalibi isutelezi. Hamuyeme, luzamaye. Hamubone! Yanibeteka u fakaufi.”—Mateu 26:45, 46.