Kreste Wabetekiwa Ni Kutamiwa

Seli fahalaa busihu. Baprisita balumelelani kulifa Judasi masheleñi a silivera a 30 kuli abeteke Jesu. Ka mukwa ocwalo, Judasi uetelela sikwata sa baprisita babahulu ni Bafalisi bababata Jesu. Bazamaya ni sikwata sa masole ba Roma sesietelezwi ki muzamaisi wa masole.

Kubonahala kuli Jesu hasalelekile Judasi hamulaho wa kuca Paseka, Judasi naaile kwa baprisita babahulu. (Joani 13:27) Baprisita bakopanya manduna babona ni sikwata sa masole. Judasi mwendi naabaisize pili kwa muzuzu kwa naacela Jesu Paseka ni baapositola bahae. Kono cwale sikwata se ki kale sisila Musindi wa Kidroni mi siliba kwa simu. Bashimbile lilwaniso, lilambi, ni mamonyi, mi babata kuswala Jesu.

Judasi hanze akambama ni sikwata se fa Lilundu la Likota za Olive, uikutwa kuli waziba kwa ka fumana Jesu. Mwa lisunda zefelile, Jesu ni baapositola bahae hane bazwanga kwa Betania kuya kwa Jerusalema, nebapumulelanga mwa simu ya Getsemani. Kono cwale ki busihu, mi Jesu mwendi u mwa simu mwatasaa likota za olive. Ka mukwa ocwalo, masole ili bao mwendi habasika bona kale Jesu, baka muziba cwañi? Judasi ubafa sisupo sesika batusa kumuziba. Uli: “Yena yenika tubeta, ki yena; mumuswale, mi mumuise kuli asike amata.”—Mareka 14:44.

Hanze aetelela sikwata se kukena mwa simu, Judasi ubona Jesu inze ali ni baapositola bahae mi uya ku yena. Judasi uli: “Lumela Rabbi!” mi wamutubeta. Jesu umualaba kuli: “Mulikani, utilo batañi kwanu?” (Mateu 26:49, 50) Jesu uikalaba iliyena, uli: “Judasi, kana ubeteka Mwanaa mutu ka kumutubeta?” (Luka 22:48) Kutuha fo, Jesu hasana taba ni Judasi!

Jesu cwale uya mwa liseli la mamonyi ni lilambi mi ubuza kuli: “Mubata mañi?” Bamualaba bali: “Jesu wa Munazareta.” Jesu ka bundume, uli: “Ki na.” (Joani 18:4, 5) Ka kusaziba zekaezahala, baana bao bawela fafasi.

Mwa sibaka sa kubalehela mwa lififi ka nako yeo, Jesu hape ubabuza mutu yebabata. Habamubulelela hape kuli, “Jesu wa Munazareta,” ubabulelela kuli: “Nimibulelezi kuli ki na. Cwale haiba ki na yemubata, mutuhele batu ba, baikele.” Nihaiba ka nako yetaata ye, Jesu usahupula zanaabulezi kale kuli haana kulatehelwa ki alimuñwi ku bona. (Joani 6:39; 17:12) Jesu uzwezipili kubabalela baapositola bahae babasepahala, mi hakuna ni haiba alimuñwi ku bona yalatehile “kwandaa mwanaa sinyeho,” yena Judasi. (Joani 18:7-9) Ka mukwa ocwalo, ukupa kuli balateleli bahae balukululwe.

Masole habayema ni kusutelela ku Jesu, baapositola balemuha zeezahala. Bamubuza kuli: “Mulena, lubaleme ka mukwale?” (Luka 22:49) Jesu asika alaba kale, Pitrosi upamula ulimuñwi fa mikwale yemibeli yebanani yona baapositola. Upuma zebe ya Malko, mutangaa muprisita yapahami.

Jesu uswala zebe ya Malko ni kumufolisa. Kihona aluta tuto ya butokwa, ka kulaela Pitrosi kuli: “Kutisa mukwale wahao mwa sipusu saona, kakuli kaufela babaitusisa mukwale bakabulaiwa ka mukwale.” Jesu uitatela kutamiwa, kakuli uli: “Mañolo anaabulezi cimo kuli kulukela kuba cwana naakatalelezwa cwañi?” (Mateu 26:52, 54) Uekeza kuli: “Kana haniswaneli kunwa mwa komoki yanifile Ndate?” (Joani 18:11) Jesu ubata kueza tato ya Mulimu nihaiba kuisa lifu.

Jesu ubuza kuli: “Kana mutile ni mikwale ni milamu kuto niswala inge babatilo tama lisholi? Zazi ni zazi neniinanga mwa tempele inze niluta, kono nemusika to niswala. Kono ze kaufela liezahalile kuli zeñozwi ki bapolofita litalelezwe.”—Mateu 26:55, 56.

Sikwata sa masole, muzamaisi wa masole, ni manduna ba Majuda baswala Jesu ni kumutama. Baapositola hababona cwalo, babaleha. Kono “mutangana yomuñwi”—mwendi mulutiwa Mareka—usiyala mwahalaa buñata kuli alatelele Jesu. (Mareka 14:51) Mutangana yo bamulemuha, mi buñata bubata kumuswala, ka mukwa ocwalo, usiya siapalo sahae sa line habaleha.