‘Salumoni N’a Si Ka Apala Hande Sina Le Liñwi la Ona’

LIPALISA za naheñi ze cwale ka ze fa likepe le, li atile hahulu mwa mboela wa Africa kwa matuko a mikwakwa. Lipalisa zeo li bizwa cosmos mi li simuluha kwa libaka ze futumala za America. Lipalisa ze kateleha cwalo zeo li kona ku lu hupulisa tuto ya n’a lutile Jesu. Buñata bwa batu be ne ba teeleza ku yena n’e li linjebwe, mi ne ba iyakatitwe hahulu za kwa mubili, lico ni liapalo.

‘Ka za liapalo,’ Jesu n’a buzize kuli: “Kiñi se mu bilaela? Mu lemuhe mayangayanga a mwa naheñi mw’a melela; kakuli h’a sebezi, h’a oti bwanda; kono na mi bulelela, ni li: Mane ni Salumoni, mwa kanya ya hae kaufela, n’a si ka apala hande sina le liñwi la ona.”—Mateu 6:28, 29.

Ku filwe liakalezo ze ñata ka za mufuta tota wa lipalisa za naheñi za n’a talusa Jesu. Niteñi, Jesu n’a zwezipili ku swaniseza lipalisa zeo kwa lipalisa-palisa fela, a li: “Mulimu h’a apesa cwalo bucwañi bwa naha, bo bu li teñi kacenu, mi kamuso bu se bu ka nepelwa mwa mulilo, ha ni li, u ka mi apesa cwalo, mane ku fita, mina ba tumelo ye nyinyani?”—Mateu 6:30.

Nihaike lipalisa za cosmos ha li simuluhi kwa Isilaele, li yemela luli tuto ya n’a luta Jesu. Ibe kuli li buhelwa kwahule kamba fakaufi, lipalisa za Cosmos za kateleha luli mi baswanisi ba likamera ni baswanisi ba ka mazoho ba tabela hahulu ku li swanisa. Kaniti Jesu n’a sa shangeli ka ku bulela kuli, “mane ni Salumoni, mwa kanya ya hae kaufela, n’a si ka apala hande sina le liñwi la ona.”

Ki ifi tuto ye lu ituta kacenu? Ba ba sebeleza Mulimu ba kona ku ikolwisa kuli u ka ba tusa ku fumana ze ba tokwa nihaiba mwa linako ze t’ata. Jesu n’a talusize kuli: “Mu bate mubuso wa Mulimu pili; mi linto zeo kamukana [ze cwale ka lico ni liapalo ze tokwahala] mu ka li ekelezwa kwateñi.” (Luka 12:31) Ee, lituso sakata li fumanwa ka ku bata pili Mubuso wa Mulimu. Kono kana mwa ziba kuli Mubuso wa Mulimu ki nto mañi ni kuli u ka ezezañi batu? Lipaki za Jehova ba ka tabela ku mi tusa ku fumana likalabo mwa Bibele.