Ku Bata Ba Ba Swanela

¹ Litaelo za Jesu za ku peta musebezi wa ku kutaza li kona ku ba t’ata. N’a ize: “Ha mu kena mwa munzi, kamba mwa munzinyana, mu buze kana ya swanela mwateñi ki mañi.” (Mat. 10:11) Bakeñisa kuli batu kacenu ha ba inangi hahulu fa mandu a bona, lu kona ku eza cwañi kuli lu ba fumanange?

² Mu Tatube Kalulo ya Mina ya Simu: Mu kale ka ku tatuba kalulo ya mina ya simu. Ki ifi nako yeo batu ba kona ku ba fa mandu a bona? Ba kona ku fumanwa kai mwahal’a lizazi? Kana ku na ni lizazi la mwa viki kamba nako ya lizazi ili f’o ba kona ku tabela ku potelwa? Ku cinca nako ya bukombwa bwa mina ku likana ni misebezi ni miinelo ya batu ba mwa kalulo ya simu ku kona ku mi tusa ku peta ze nde hahulu.—1 Makor. 9:23, 26.

³ Bahasanyi ba bañata ba konile ku fumana batu fa mandu a bona ka nako ya manzibwana. Bañi ba mandu ba bañwi ba banga ba ba lukuluhile ili ba ba tabela ku teeleza ka nako yeo. Ku kutaleza mwa libaka za lipisinisi ni za nyangela ki ze ñwi za linzila zeo ka zona lu kona ku fitisa taba ye nde kwa batu.

⁴ Mwa kweli ye ñwi ya musebezi o ipitezi, puteho ye ñwi ne i lukisize za ku ezanga bupaki lizazi ha se li sikuluhile la Mukibelo ni la Sunda mi hape ni manzibwana la Bulalu ni la Butanu. Hape ne ba lukisize za bupaki bwa ka luwaile hamoho ni za ku sebeleza mwa libaka za lipisinisi. Litukiso zeo ne li ba susuelize ku cisehela hahulu bukombwa kuli mane puteho yeo ya ikatulela ku zwelapili ni litukiso zeo.

⁵ Mu Y’o Pota Luli: Haiba mwa kalulo ya mina ya simu ku t’ata ku fumana batu fa mandu a bona ha mu y’o pota, mu like ku tomahanya nako ye mu ka y’o pota hape kwa mafelelezo a musipili ni musipili wa makutisezo, hamoho ni ona wa pili. Mi mu bone teñi kuli mwa eza ona cwalo. (Mat. 5:37) Haiba ku swanela, mwa kona ku kupa nombolo ya luwaile lwa muñ’a ndu. Ku eza cwalo ni kona kwa kona ku mi tusa ku ambola hape ni yena mutu y’o.

⁶ Jehova kaniti u ka fuyaula buikatazo bwa luna bwa ku bata ba ba swanela ni ku tiiseza cisehelo ya bona.—Liprov. 21:5.