Lu Kona Ku Zwelapili Cwañi Ku Ba Ni Moya Wa Ku ‘Libelela’?

‘Ni ka libelela.’—MIKA 7:7.

MU KONA KU ALABA CWAÑI?

Mutala wa Mika u lu lutañi?

Ki likezahalo mañi ze lu libelela?

Ki mwa linzila mañi mo lu kona ku bonisa Jehova kuli lwa itumela kwa pilu-telele ya hae?

 1. Ki nto mañi ye kona ku tahisa kuli lu palelwe ku ba ni pilu-telele?

MAZAZI a maungulelo a lifasi la Satani naa kalile ka silimo sa 1914 muta Kreste naa kalile ku busa sina Mulena mwa lihalimu. Ka silimo seo, kwa tumbuka ndwa mwa lihalimu, mi ka nako ye ñwi hasamulaho, Jesu a nepela Diabulosi ni madimona a hae fa lifasi. (Mu bale Sinulo 12:7-9.) Satani wa ziba “kuli u siyalezwi ki nako ye nyinyani” feela. (Sin. 12:12) Kono “nako ye nyinyani” yeo i bonahalile ku ba ye telele ku ba bañwi. Kana pilu-telele ya luna ya ku libelela Jehova kuli a yundise lifasi la Satani ki kale i fela?

 2. Lu ka nyakisisa lipuzo mañi mwa taba ye?

² Ku palelwa ku ba ni pilu-telele kwa kona ku lu kenya mwa butata. Libaka? Kakuli haiba ha lu na pilu-telele, lwa kona ku eza lika lu sa nahani ka tokomelo. Ki nto mañi ye kona ku lu tusa ku ba ni pilu-telele kamba moya wa ku ‘libelela’? Mwa taba mo, lu ka fumana likalabo za lipuzo ze latelela. (1) Lu kona ku itutañi ka za pilu-telele kwa mutala wa mupolofita Mika? (2) Ki likezahalo mañi ze ka bonisa kuli mafelelezo a fakaufi? (3) Lu kona ku bonisa cwañi kuli lwa itebuha pilu-telele ya Jehova?

LU KONA KU ITUTAÑI KU MUPOLOFITA MIKA?

 3. Miinelo ne li ye cwañi mwa linako za naa pila ku zona Mika?

³ Mu bale Mika 7:2-6. Mika, mupolofita wa Jehova, naa iponezi Maisilaele inze ba zwelapili ku sa sepahala ku Jehova, mi ka nako ya naa busa Mulena Akazi, Maisilaele ne ba si ka sepahala luli ku Jehova. Mika naa bapanyize Maisilaele ba ne ba sa sepahali bao kwa kota ya miutwa ye kona ku holofaza mutu. Maisilaele bao ne ba swana sina kota ya miutwa bakeñisa kuli ne ba ezanga ba bañwi maswe, ili ku ba utwisa butuku. Muinelo wa Maisilaele bao ne u li o maswe hahulu kuli mane nihaiba batu ba mwa lubasi lu lu luñwi ne ba tuhezi ku bonisana lilato. Mika naa ziba kuli naa sa koni ku cinca muinelo wo, kacwalo, a lapela ku Jehova ka pilu ya hae kaufela, mi kihona a libelela kuli Mulimu a eze se siñwi ka za butata bo. Mika naa na ni buikolwiso bwa kuli Jehova naa ka tatulula butata bo ka nako ya Hae.

 4. Ki matata mañi e lu kopana ni ona?

⁴ Ka ku swana ni Mika, ni luna lu pila ni batu ba ba na ni buitati. Batu ba bañata ha ba na “buitumelo,” ha ba “sepahali,” mi ha ba na “lilato la taho.” (2 Tim. 3:2, 3) Batu be lu beleka ni bona, be lu kena ni bona sikolo, ni be lu pila ni bona mabapa ha ba bonisa moya wa buitati, lu ikutwanga ku zwafa hahulu. Nihakulicwalo, batanga ba bañwi ba Mulimu ba kopana ni butata bo butuna hahulu ni ku fita. Jesu naa bulezi kuli balateleli ba hae ne ba ka lwaniswa ki batu ba mwa lubasi lwa bona. Za naa bulezi Jesu za swana ni ze lu bala kwa Mika 7:6. Jesu naa ize: “Ni tisize fapahano mwahalaa mwana wa mushimani ni ndatahe ni mwahalaa mwana wa musizana ni mahe ni mwahalaa musalaa mutu ni mukwenyanaa hae wa musali. Kaniti, lila za mutu i ka ba ba ndu ya hae tota.” (Mat. 10:35, 36) Ku kona ku ba taata hahulu muta lu nenaunwa ni ku lwaniswa ki batu ba mwa lubasi lwa luna ba ba sa sebelezi Jehova. Haiba kuli lu mwa muinelo o cwalo, ha lu swaneli ku lumela ku kukuezwa. Kono lu swanela ku zwelapili ku sepahala ku Jehova ni ku libelela kuli yena u ka tatulula butata bo lu kopana ni bona. Haiba lu zwelapili ku lapela ku yena kuli a lu tuse, u ka lu fa maata ni butali bo lu tokwa kuli lu zwelepili ku sepahala ku yena.

5, 6. Jehova naa fuyauzi cwañi Mika, mi ki lika mañi za naa si ka bona Mika?

⁵ Bakeñisa kuli Mika naa bonisize pilu-telele, Jehova naa mu fuyauzi. Mika naa iponezi mafelelezo a Mulena Akazi ni puso ya hae. Naa iponezi Ezekiasi, mwanaa Akazi, ha yola ndatahe fa bulena ni ku kutisa sinca bulapeli bwa niti. Mika hape naa iponezi mo bupolofita bwa naa ñozi ka za batu ba ne ba pila mwa Samaria ne bu talelelizwe muta Maasirya ne ba taselize mubuso wa Isilaele wa kwa mutulo.—Mika 1:6.

⁶ Kono Mika naa shwile pili a si ka bona kale ku talelezwa kwa bupolofita kaufela bwa naa ñozi ka ku susumezwa ki Jehova. Ka mutala, Mika naa ñozi kuli: “Kwa mazazi a kwapili lilundu la Muñaa Bupilo li ka tomwa fa ngo ya malundu, li ka umbuka tulundu; mi macaba kaufela a ka ya kwateñi. Macaba a mañata a ka ya, inzaa li: ‘A mu te, lu kambamele fa lilundu la Muñaa Bupilo.’” (Mika 4:1, 2) Ku si na taba ni ze ne ba eza batu ba naa pila ni bona, Mika naa ikatulezi ku zwelapili ku sepahala ku Jehova ku isa lifu. Naa ñozi kuli: “Macaba a zamaya, se siñwi ni se siñwi, ka libizo la mulimu wa sona; haili luna, lu ka zamaya ka libizo la Muñaa Bupilo Mulimu wa luna, kamita ni ku ya ku ile.” (Mika 4:5) Mika naa bile ni pilu-telele mwa nako ya matata kakuli naa ikolwisize kuli Jehova naa ka taleleza bupolofita bwa Hae kaufela. Mupolofita ya sepahala yo naa sepile Jehova.

7, 8. (a) Ki kabakalañi ha lu swanela ku sepa Jehova? (b) Ki nto mañi ye kona ku tahisa kuli lu bone kuli nako i mata hahulu?

⁷ Kana ni luna lu sepile Jehova sina mwa naa ezelize Mika? Lu na ni libaka le linde le li lu tusa ku sepa Jehova. Lu iponezi bupolofita bwa naa ñozi Mika ha bu talelezwa. Mwa mazazi a maungulelo a, batu ba bañata ba ba zwa mwa macaba kaufela ni ba mishobo ni batu ba malimi kaufela ba sweli ku taha kwa “lilundu la Muñaa Bupilo.” Nihaike kuli ba zwa mwa macaba a itwanisanga hañata, balapeli bao ‘ka mikwale ya bona ba tulile mihuma,’ mi ba hana ku “ituta ndwa.” (Mika 4:3) Ku ba yo muñwi wa batu ba Jehova ba ba pila mwa kozo ki tohonolo ye tuna luli!

⁸ Kaufelaa luna lu bata kuli Jehova a yundise lifasi le li maswe le kapili-pili. Kono kuli lu libelele ka pilu-telele, lu tokwa ku nga lika mwa li ngela Jehova. Mulimu u ketile Jesu Kreste kuli a atule batu, mi u tomile kale lizazi la ka eza cwalo. (Lik. 17:31) Kono pili lizazi leo li si ka fita kale, Mulimu u fa batu kaufela kolo ya ku fita “fa zibo ye nepahezi ya ku ziba niti,” ya ku sebelisa ze ba ituta, ni ya ku to punyuswa. Lu tokwa ku hupula kuli bupilo bwa batu bu mwa lubeta. (Mu bale 1 Timotea 2:3, 4.) Mafelelezo se a li fakaufi. Haiba kuli lu patehile ku tusa batu kuli ba zibe Jehova, nako ye siyezi i ka bonahala kuli i mata hahulu. Mi mafelelezo ha ka taha, lu ka ba ni tabo kabakala kuli ne lu patehile mwa musebezi wa ku kutaza!

KI LIKEZAHALO MAÑI ZE KA BONISA KULI MAFELELEZO A FAKAUFI?

9-11. Kana bupolofita bo bu kwa liñolo la 1 Matesalonika 5:3 bu talelelizwe? Mu taluse.

⁹ Mu bale 1 Matesalonika 5:1-3. Macaba a tuha a huwa kuli, “Kozo ni buiketo!” Haiba kuli ha lu tabeli ku lyanganiswa ki muhuwo wo wa buhata, lu tokwa ku ‘tona ni ku iswala.’ (1 Mates. 5:6) Lu ka nyakisisa likezahalo ze ñwi ze tahisize kuli muhuwo wo nge u be teñi.

¹⁰ Hasamulaho wa ndwa ya pili ya lifasi ni hasamulaho wa ndwa ya bubeli ya lifasi, macaba naa bata hahulu ku ba ni kozo. Hasamulaho wa ndwa ya pili ya lifasi, katengo ka League of Nations ne ka tomilwe kuli ka tise kozo. Ku zwa fo, hasamulaho wa ndwa ya lifasi ya pili, batu ne ba nahanile kuli katengo ka silikani sa linaha za lifasi (UN) ne ka ka tisa kozo mwa lifasi. Mibuso ni baeteleli ba bulapeli ba sepile kuli tutengo to tubeli to, tu ka tahisa kozo. Ka mutala, katengo ka silikani sa linaha za lifasi ne ka bulezi kuli silimo sa 1986 ne si ka ba Silimo sa Kozo Lifasi Kaufela. Ka silimo seo, babusi ni baeteleli ba bulapeli ne ba kopani ni yo muhulu wa Keleke ya Katolika kuli ba lapele kuli ku be ni kozo.

¹¹ Nihakulicwalo, taba yeo ni litaba ze ñwi ze swana ni yona ne li si ka taleleza bupolofita bo bu ñozwi kwa 1 Matesalonika 5:3 bo bu bulela za muhuwo wa “Kozo ni buiketo.” Libaka? Bakeñisa kuli “sinyeho ya ka sipundumukela” ne i si ka ezahala.

12. Lu zibañi ka za muhuwo wa “Kozo ni buiketo”?

¹² Ki bo mañi ba ba ka bulela muhuwo wo wa “Kozo ni buiketo”? Baeteleli ba bulapeli bo bu twi ki bwa Sikreste ni baeteleli ba bulapeli bo buñwi ba ka peta nto mañi kwa neku la muhuwo wo? Babusi ba linaha ba ka amiwa cwañi mwa muhuwo wo? Bibele ha i buleli se siñwi fa taba yeo. Se lu ziba kikuli ku si na taba ni mo u ka bulelelwa muhuwo wo ni mo u ka utwahalela ku kolwisa, muhuwo wa “Kozo ni buiketo” ha u na ku ba wa niti. Satani u ka zwelapili ku busa lifasi le li maswe le. Lifasi le, li sinyehile hahulu mi mwa nako ya ka zwelapili ku busa Satani lifasi le, miinelo ha i na ku cinca. Ne i ka ba bumai bo butuna hahulu ha ne lu ka swalisana ni lifasi le ni ku lumela kuli muhuwo wo wa buhata ili wa Satani ki wa niti!

13. Ki kabakalañi mangeloi ha sweli ku tibela mioya ya sinyeho?

¹³ Mu bale Sinulo 7:1-4. Ha lu nze lu libelela bupolofita bo bu kwa liñolo la 1 Matesalonika 5:3 kuli bu talelezwe, mangeloi a maata a sweli ku tibela mioya ye sinya ya ñalelwa ye tuna. Mangeloi ao a libelelañi? Muapositola Joani naa ñozi kuli “batanga ba Mulimu wa luna” ba ba tozizwe ba swanela ku swaiwa lwa mafelelezo.a Ku swaiwa ko kwa butokwa ha se ku felile, mangeloi a ka tuhela mioya yeo ya sinyeho. Ku ka ezahalañi hamulaho wa fo?

14. Ki lika mañi ze lu bonisa kuli Babilona yo Mutuna u tuha a sinyiwa?

¹⁴ Sina mo ku tokwahalela, Babilona yo Mutuna ili ku talusa bulapeli kaufela bwa buhata mwa lifasi, u ka yundiswa. Babilona yo Mutuna ha ka yundiswa, ha ku na ya ka mu tusa. Lwa iponela lika ze bonisa kuli mafelelezo a Babilona yo Mutuna a fakaufi. (Sin. 16:12; 17:15-18; 18:7, 8, 21) Mane ki kale lu kala ku iponela mo bu nyazezwa bulapeli ni baeteleli ba bona mwa lipiho za makande. Ku si na taba ni kuli ba nyaziwa, baeteleli ba bulapeli ha ba ikutwi kuli ba mwa kozi ye tuna. Mubonelo wa bona ha u si ka luka! Mibuso i ka lwanisa bulapeli bwa buhata ni ku bu yundisa hasamulaho wa muhuwo wa “Kozo ni buiketo!” Babilona yo Mutuna u ka yundiswa ku ya ku ile! Kaniti, ku na ni libaka le linde le li lu tusa ku ba ni pilu-telele kwa likezahalo za butokwa zeo.—Sin. 18:8, 10.

LU KONA KU BONISA CWAÑI KULI LWA ITEBUHA PILU-TELELE YA JEHOVA?

15. Ki kabakalañi Jehova ha bonisize pilu-telele?

¹⁵ Nihaike kuli batu ba shwauzi libizo la Jehova, Mulimu u bonisize pilu-telele ka ku libelela nako ye swanela ya ka nga muhato. Jehova ha tabeli ku bona batu ba ba sepahala inze ba yundiswa. (2 Pit. 3:9, 10) Kana ni luna lu ikutwa cwalo? Pili mafelelezo a si ka taha kale, ku na ni linzila ze ñata ze lu kona ku bonisa ka zona kuli lwa itebuha pilu-telele ya hae.

16, 17. (a) Ki kabakalañi ha lu swanela ku tabela ku tusa batu ba ba tuhezi ku sebeleza Jehova? (b) Ki kabakalañi batu ba ba tuhezi ku sebeleza Jehova ha ba swanela ku kutela ku yena kapili-pili?

¹⁶ Mu tuse ba ba fokozi. Jesu naa bulezi kuli ku banga ni tabo mwa lihalimu muta ngu i liñwi ye ne latehile i fumanwa. (Mat. 18:14; Luka 15:3-7) Jehova u tokomela hahulu batu ba ba mu lata, nihaikaba kuli ha ba mu sebelezi ka nako ya cwale. Jehova ni mangeloi ba tabanga hahulu ha lu tusa batu ku kutela ku Jehova.

¹⁷ Kana ni mina mu ba bañwi ba batu ba ba sa sebelezi Mulimu ka nako ya cwale? Mwendi mu tuhezi ku yanga kwa mikopano ya puteho bakeñisa kuli mutu yo muñwi mwa puteho naa mi sitatalisize. Mwendi ki kale ku fita nako ye telele ku zwa fo. Mu ipuze kuli: ‘Kana bupilo bwa ka ki bo bunde cwale, mi kana se ni na ni tabo ye tuna ka nako ya cwale? Kana Jehova ki yena ya naa ni foselize, kamba ne ni foselizwe ki mutu feela ya si ka petahala? Kana Jehova Mulimu a kile a eza nto ye ñwi ye ne i ni utwisize pilu butuku?’ Jehova kamita wa lu shemubanga. Nihaike kuli ka nako ya cwale mwendi ha lu sebelezi Jehova, Mulimu u sa lu tuhelela kuli lu ikole lika ze nde za lu fa. (Jak. 1:16, 17) Nihakulicwalo, lizazi la Jehova li fakaufi. Ye ki yona nako ya ku kutela ku Jehova, ndataa luna ya lilato, ni ku kutela kwa puteho. Ki kona ko lu kona ku fumana silelezo mwa mazazi a maungulelo a.—Deut. 33:27; Maheb. 10:24, 25.

18. Ki kabakalañi ha lu swanela ku swalisana ni ba ba etelela mwahalaa luna?

¹⁸ Mu swalisane ka busepahali ni ba ba etelela mwahalaa mina. Ka ku ba Mulisana ya lilato, Jehova wa lu etelela ni ku lu sileleza. U ketile Mwanaa hae kuli a be Mulisana yo Mutuna wa mutapi. (1 Pit. 5:4) Baana-bahulu ba ba mwa liputeho ze fitelela 100,000 ba tandanga nako ku lisa ye ñwi ni ye ñwi ya lingu za Mulimu. (Lik. 20:28) Ha lu swalisana ka busepahali ni ba ba etelela mwahalaa luna, lu bonisa Jehova ni Jesu kuli lwa itebuha ku ze ba lu ezelize kaufela.

19. Lu kona ku swalisana kamukwaufi?

¹⁹ Mu be bukaufi ni mizwale ni likaizeli za mina. Taba yeo i talusañi? Sikwata sa masole se si lutilwe hande ha si tasezwa ki lila, masole ba mwa sikwata seo ba swalisananga, ili ku ba hahulu bukaufi ku yo muñwi ni yo muñwi wa ku bona. Ka ku eza cwalo, ku ka ba hahulu taata kuli lila li tule masole bao. Satani u zwelapili ku lwanisa hahulu batu ba Mulimu. Ye haki yona nako ya ku lwanisa mizwale ba luna. Ye ki nako ya ku ba bukaufi ni mizwale ba luna, ku sa isa pilu kwa ku sa petahala kwa bona, ni ku sepa Jehova.

20. Lu swanela ku ezañi cwale?

²⁰ Kacwalo, haike lu zweleñipili ku tiisa bulikani bwa luna ni Jehova ni ku bonisa pilu-telele. Haike lu libelele muhuwo wa “Kozo ni buiketo!” ni ku swaiwa kwa mafelelezo kwa ba ba tozizwe. Hasamulaho, mangeloi a mane a ka tuhela mioya ya sinyeho, mi Babilona yo Mutuna u ka yundiswa. Ha lu nze lu libelela fo li ka ezahalela likezahalo ze tuna zeo, haike lu latelele ketelelo ye lu fiwa ki ba ba etelela mwa kopano ya Jehova. Mu swalisane kuli Diabulosi ni madimona a hae ba si ke ba mi swasa! Ye ki nako ya kuli lu latelele kelezo ya naa file walisamu ye li: “Mu itiise, mi lipilu za mina li tiye, mina kaufela ba ba sepile Muñaa Bupilo.”—Samu 31:24.

[Litaluso za kwatasi]

[Maswaniso a fa likepe 12]

Batu ba Jehova ba sebeza ka taata ku tusa batu ba ba fokozi kuli ba kutele ku Jehova (Mu bone maparagilafu 16 ni 17)

[Siswaniso se si fa likepe 14]

Mu swalisane kuli Diabulosi ni madimona a hae ba si ke ba mi swasa (Mu bone paragilafu 19)