Linzwi la Mubuso—Ku Fita fa ku Li Utwiseza

¹ Mwa swanisezo ya hae ya mucali, Jesu n’a bulezi kuli peu ye wela mwa “mubu o munde” ne i yemela mutu “ya utwa Linzwi, a li utwiseza.” (Mat. 13:23) Hamulaho wa ku utwa ka za Mubuso, kana lu fitile fa ku “li utwiseza”? Ki ku fita fa sipimo sifi seo li susueza bupilo bwa luna? Kana lu beile licisehelo za Mubuso mwa sibaka sa pili, kacwalo ili ku bonisa kuli ne lu utwiselize lushango?

² Kutwisiso ye lukile kwa lushango lwa Mubuso i tokwa ku ba ni tuto ya ka butu. Lu tokwa ku ba ni nako ya ku nahanisisa ka butuna fa sico sa kwa moya se lu filwe. Ku bala ka katuyuyu Tora ya ku Libelela ku swana fela inge ku funjaela sico se si tabusa ni se si fepa mubili. Kana mwa b’a nga ni nako ya ku fa nahanisiso ye tezi kwa sico sa kwa moya? Kuli lu fumane tuso ye tuna ka ku fitisisa, lu lukela ku ba ni ku nyolelwa ko ku mulelo ni takazo ye tiile ya kwa moya. Haiba miinelo ye i tondahala, misebezi ye miñwi i kona ku nyinyafaza lituso za tuto ya ka butu kamba k’u nga nako ye lu tokwa kwa neku la yona. Ku kumalela kwa tomahanyo ye nde ya ku ituta hasi ko ku bunolo. Nihaili kuli ku tokwa tokomelo ye tuna mwa ku tomahanya lika z’e li za butokwa, niteñi maluwo a kwa moya a’ na ni ku fumanwa h’a na teko.—Liprov. 3:13-18; Makolo. 1:27.

³ Kabukanyana ka Ku Tatuba Mañolo k’a lu tusa ka zazi ni zazi mwa ku ba ni mihupulo y’e buniti, y’e susueza ka za Mubuso. “Ba ba ikutwa bubotana mwa pilu” ba lukis’anga ku ba ni mizuzunyana ka zazi ni zazi ya ku bala liñolo ni litaluso. (Mat. 5:3 ) Mañolo a mañata a talusa za likalulo ze fapahana-fapahana za Mubuso. Sina ka mutala, ka la November 22, 1994, liñolo le ne li itusisizwe n’e li la Mateu 13:4. Litaba za taluso ne li nyakisisize za sepo ya Mubuso mi ne li lu hupulisize ka za lubeta lo lu mwa swalisano ye si ye nde ni bahabo luna ni bomuyahwa ni luna. Taba ya kuli fa mandu a Betele ku potoloha lifasi kaufela, ku na ni puhisano ya mizuzu ye 15 ya liñolo la zazi kakusasana wa lizazi le liñwi ni le liñwi la musebezi i koñomeka lituso ni butuna bwa ku nyakisisa hamoho liñolo la zazi. Kana lubasi lwa mina lu kopanyeleza nyakisiso ye swana mwa likezo za mina za ka zazi ni zazi?

⁴ Ha mu nze mu hula mwa buitebuho bwa mina kwa neku la Mubuso, ku ka ba ni susuezo ye tuna ya ku abana lushango lwa Mubuso ni ba bañwi. Tora ya ku Libelela ni Awake! li tahisa nto yeo ne i kana ya bapanyezwa kwa mafula a mwa maikuto ili a’ fepa munahano wa luna ka litaba ze nca, ze zamaelela ni nako ya zona. Li lu tusa ku ba ni temuho ye tuna ka za sipimo seo lifasi li tokwa Mubuso wa Mulimu. Li lu tusa ku ba batu ba kwa moya, ba ba “zibile muhupulo wa Kreste.” (1 Makor. 2:15, 16) Zeo kaufela li kona ku tiisa sepo ya luna ni ku ekeza cisehelo ya luna mwa ku abana lushango lwa Mubuso ni ba bañwi.—1 Pit. 3:15.

⁵ Ki kwa butokwa hahulu kuli luna ka butu lu utwiseze lushango lwa Mubuso. Mubuso ki siitusiso seo Mulimu a ka sebelisa mwa ku bonahaza bubusi bwa hae, ku felisa bumaswe, ni ku tisa lifasi le linca—yona paradaisi. Jesu n’a lu laelezi ku u beya mwa sibaka sa pili mwa bupilo bwa luna. Lu lukela ku ba babusiwa ba ba swana sina lingu kona lu ka kona ku pila mwatas’a ona. (Mat. 6:10, 33) Mu itusise nako ye tuna ka ku fitisisa kuli mu kone ku ikola limbuyoti za ona.