Mwanaa Mutu Ki Mañi?

Jesu ni balutiwa bahae bafita mwa Betsaida. Cwale batu batisa muuna wa sibofu ni kukupa Jesu kuli aswale muuna yo kuli amufolise.

Jesu uswala muuna yo kwa lizoho ni kumuisa kwande a munzi. Mi ukwela muuna yo mati fa meeto, kihona amubuza kuli: “Kana kunani seubona?” Muuna ualaba kuli: “Nibona batu, kono babonahala inge likota zesweli kuzamaya.” (Mareka 8:23, 24) Jesu ufolisa muuna yo ka kumuswala fa meeto. Cwale kihona amubulelela kuli aye kwandu, mi umulaela kuli asike akena mwa munzi.

Hamulaho, Jesu ni balutiwa bahae baya kwa mutulo, mwa sibaka sa Sesarea wa Filipi. Ki musipili omutelele wa kukambama ka likilomita zebato ba 40. Munzi wo ufumaneha fa lilundu, mi bukaufi ni ona kubonahala lilundu lelitelele hahulu la Hermoni lelinani litwa fahalimu alona. Mwendi musipili wo ukona kutanda mazazi amañata-nyana.

Habanze bazamaya cwalo, Jesu wafapuha ni kuyo lapela. Kusiyezi feela likweli ze 9 kamba ze 10 kuli Jesu abulaiwe, mi ubilaezwa ki zekaezahala kwa balutiwa bahae. Batu babañata kihona basazo tuhela kumulatelela, mwendi babañwi balyangani ni kusitatala. Mwendi babilaezwa ki libaka hanaahanile kuli batu bamueze mulena kamba hanasabafi sisupo sesibonisa kuli ki yena mañi luli.

Balutiwa habataha kwanaalapelela, Jesu ubabuza kuli: “Kanti batu bali Mwanaa mutu ki mañi?” Baalaba kuli: “Babañwi bali ki Joani Mukolobezi, babañwi bali ki Elia, mi babañwi bali ki Jeremia kamba yomuñwi wa bapolofita.” Kaniti, batu banahana kuli mwendi Jesu ki yomuñwi wa baana bao yazusizwe kwa bafu. Kuli azibe zebanahana balutiwa bahae, Jesu ubabuza kuli: “Kono mina bo, muli ki na mañi?” Pitrosi kapili-pili ualaba kuli: “Ki wena Kreste, Mwanaa Mulimu yapila.”—Mateu 16:13-16.

Jesu ubulela kuli Pitrosi ulukela kuba yatabile bakeñisa kuli Mulimu umupatululezi taba ye, mi uekeza kuli: “Nili ku wena: Ki wena Pitrosi, mi fa licwe le, nikayaha fateñi puteho yaka, mi minyako ya Libita haina kuikoma.” Jesu utalusa kuli yena kasibili ukayaha puteho mi nihaiba libita halina kuhapa batu ba mwa puteho yeo haiba bazwelapili kupila ka busepahali fa lifasi. U sepisa Pitrosi kuli: “Nika kufa linotolo za Mubuso wa mahalimu.”—Mateu 16:18, 19.

Jesu haabonisi kuli Pitrosi ufita baapositola babañwi kamba kuli Jesu ueza Pitrosi mutomo wa puteho. Jesu ki yena Licwe foikayahelwa puteho. (1 Makorinte 3:11; Maefese 2:20) Kono Pitrosi ukaamuhela linotolo zeetalu. Ukaba ni tohonolo ya kukwalululela likwata za batu kolo yakukena mwa Mubuso wa mahalimu.

Pitrosi naakaitusisa sinotolo sapili fa Pentekota ya 33 C.E., ka kubonisa Majuda ni baproselite zebaswanela kueza kuli bapiliswe. Naakaitusisa sinotolo sa bubeli kukwalululela Masamaria kolo ya kukena mwa Mubuso wa Mulimu. Mi mwa silimo sa 36 C.E., Pitrosi naakaitusisa sinotolo sa bulaalu kufa kolo ya kukena mwa Mubuso wa Mulimu ku Balicaba babasika kena mwa mupato, ili Kornele ni babañwi.—Likezo 2:37, 38; 8:14-17; 10:44-48.

Habanze baambola, balutiwa ba Jesu babilaezwa ki taba yapolofita yakuli utuha ayonyandiswa ni kubulaiwa mwa Jerusalema. Ka kusautwisisa kuli Jesu ukazusezwa kwa lihalimu, Pitrosi umuisa kwatuko ni kuyo mukalimela kuli: “Mulena, hakuikutwele butuku; taba yeo haina kuezahala ku wena.” Kono Jesu ufetuha ni kumualaba kuli: “Zwa ku na, Satani! U sisitataliso ku na, kakuli mihupulo yeunahana haki mihupulo ya Mulimu, kono ki ya batu.”—Mateu 16:22, 23.

Jesu cwale ubiza batu babañwi ni kubataluseza kuli hakuna kuba kokubunolo kuba mulateleli wahae. Uli: “Haiba mutu ubata kunilatelela, aitobohe mi alwale kota yahae ya linyando mi azwelepili kunilatelela. Kakuli mutu kaufela yabata kupilisa bupilo bwahae ukasinyehelwa ki bona, kono mutu kaufela yasinyehelwa ki bupilo bwahae kabakala ka ni kabakala taba yende uka bupilisa.”—Mareka 8:34, 35.

Kaniti, balateleli ba Jesu baswanela kuba ni bundume ni buitomboli kuli bashemubiwe ki yena. Jesu uli: “Mutu kaufela yaniswabela ni kuswabela manzwi aka mwa lusika lo lwa bubuki ni lwa sibi, Mwanaa mutu ni yena uka muswabela hakataha mwa kanya ya Ndatahe ni mangeloi akenile.” (Mareka 8:38) Ka mukwa ocwalo, Jesu hakataha, “ukakutiseza mutu ni mutu kulikana ni mikwa yahae.”—Mateu 16:27.