Jesu, Pitrosi, Jakobo, ni Joani habashetumuka kuzwa fa lilundu bakatana buñata bobutuna. Kunani butata. Bañoli bainzi hamoho ni balutiwa, inze bakananisana. Batu batabezi kubona Jesu mi bamumatela kuyo mulumelisa. Jesu ubabuza kuli: “Mukananañi ni bona?”—Mareka 9:16.

Kubonahala kuli bañoli basweli kunyaza balutiwa kakuli bapalezwi kufolisa mushimani yo. Ka mukwa ocwalo, kufita kualaba ndate yaziyelehile yo, Jesu ubulelela buñata kuli: “Mina lusika lolusina tumelo ni lolukopami, nikaina ni mina ni kuitiisa ni mina kuisa lili?” Manzwi ao a kalimelo uabulelela bañoli babakatazanga balutiwa bahae ka nako yasiyo. Jesu ufetuhela ku ndate yaziyelehile yo, mi uli: “Tisa mwanaa hao kwanu.”—Luka 9:41.