Bupilo ni Bukombwa bwa Jesu

Balutiwa Ba Kananisana Lifu La Jesu Ha Li Nze Li Atumela

JESU ni balutiwa ba hae ba fakaufi ni Nuka ya Jordani, fo ba ka silela ku zwa mwa sikiliti sa Perea ni ku kena mwa Judea. Ne ba zamaya ni batu ba bañwi ba bañata ba ne ba ya kwa Paseka ya 33 C.E., ili yeo ne ku siyezi fela viki kamba ku fitelela hanyinyani kuli i ezwe.

Jesu n’a zamaya fapil’a balutiwa, mi ne ba makalisizwe ki tukufalelo ya bundume bwa hae. Mu hupule kuli liviki li sikai ze felile Lazaro ha n’a shwile mi Jesu n’a li fakaufi ni ku zwa mwa Perea ku ya mwa Judea, Tomasi n’a susuelize ba bañwi kuli: “A lu yeñi ni luna, lu y’o shwa ni yena.” Mu hupule hape kuli Jesu ha s’a zusize Lazaro, Kuta ya Sijuda ne i tomile milelo ya ku mu bulaya. Kacwalo ha ku komokisi kuli balutiwa ba fita fa ku ba ni sabo ka ku kena mwa Judea hape.

Ka ku ba ezisa ku ba ba ba itukiselize se ne si ka ezahala kwapili, Jesu u memela ba 12 kwa mukunda ni ku ba taluseza kuli: “A mu bone, lu kambamela kwa Jerusalema; mi Mwan’a mutu u ka fiwa mwa mata a baprisita ba bahulu, ni bañoli; mi ba ka mu atulela lifu. Ba ka mu fa mwa mazoho a bamacaba kuli ba mu shubule, ba mu nate ka pafa, ba mu kokotele fa [kota ya linyando, NW]; mi u ka zuha ka lizazi la bulalu.”

Lo ki lwa bulalu mwa likwelinyana Jesu ha taluseza balutiwa ba hae ka za lifu ni zuho ya hae. Mi nihaike ba teelelize ku yena, ba palelwa ku utwisisa. Mwendi ki ka libaka la kuli ba lumela ka za ku kutiswa sinca kwa mubuso wa Isilaele fa lifasi-mubu, mi ba talimela kwapili mwa ku ikola kanya ni likute mwa mubuso wa fa lifasi-mubu ni Kreste.

Mwahal’a bazamai ba ne ba ya kwa Paseka ku na ni Salome, mahe baapositola Jakobo ni Joani. Jesu u biza bona banna bao kuli ki “Bana ba pula,” ku si na ku kakanya ki bakeñisa mayemo a bona a swana sina mulilo. Mwahal’a nako bona ba babeli bao ne ba na ni maikuto a tiile hahulu a ku ba ba batuna mwa Mubuso wa Kreste, mi ba se ba zibisize m’a bona ka za takazo ya bona. Cwale m’a bona wa atumela Jesu kwa neku la bona, wa inama fapil’a hae, ni ku kupa shemubo.

“U batañi?” Jesu wa buza.

“U bulele kuli bana ba ka ba babeli, ba ku ine yo muñwi ku la bulyo, yo muñwi ku la nzohoto, mwa mubuso wa hao.”

Ka ku lemuha kupo ko i zwelela, Jesu u bulela ku Jakobo ni Joani kuli: “Ha mu zibi se mu kupa. Kikuli mu kona ku nwela mwa sinwiso se ni na ni ku nwela ku sona?”

“Lwa kona,” ba alaba. Nihaike Jesu kihona ha sa z’o ba taluseza kuli u talimani ni nyandiso ye maswe mi kwa mafelelezo ni ku bulaiwa, ka mo ku bonahalela ha ba utwisisi kuli seo ki sona sa na talusa luli ka za “sinwiso” sa n’a na ni ku nwela ku sona.

Nihakulicwalo, Jesu wa ba taluseza kuli: “Luli mu ka nwela mwa sinwiso sa ka, . . . kono haili ku ni ina ku la bulyo, kamba ku la nzohoto, hasi na, ni ka fa mutu; ku ka fiwa ba ba lukiselizwe cwalo ki Ndate.”

Hañihañi baapositola ba bañwi ba lishumi ba fita fa ku utwa ka za seo Jakobo ni Joani ne ba si kupile, mi ba ba ni bunyemi. Mwendi Jakobo ni Joani ne ba zwile mubano mwa kananisano ya pili ka za kuli ki mañi ya n’a li yo mutuna ka ku fitisisa. Kupo ya bona ya cwale i bonisa kuli ne ba si ka sebelisa kelezo yeo Jesu n’a ba file yona fa taba ye. Ka maswabi, takazo ya bona ya ku ba ba batuna i sa li ye tiile.

Kacwalo mwa ku tatulula yona kananisano ye ya cwale hamoho cwalo ni maikuto a bunyemi a i tisize, Jesu u kopanya ba 12 hamoho. U ba fa kelezo ka lilato, u talusa kuli: “Mwa ziba kuli ba ba shalimwa kuli ki bona malen’a macaba, ba a eza batanga ba bona; mi ba bahulu ba a zamaisa ka mata a bona. Kono ku mina ha ku cwalo. Ya lata ku ba yo mutuna ku mina, ibe yena mutang’a mina. Mi mutu ni mutu ku mina ya lata ku ba wa pili, ibe yena muzike wa mina kaufela.”

Jesu u file mutala o ba swanela ku latelela, sina ha talusa kuli: “Kakuli Mwan’a mutu, s’a tezi, hasi kuli a sebelezwe, kono kikuli a sebeleze batu, mi a fe bupilo bwa hae, ku liulula ba bañata.” Jesu ha si ka sebeleza fela ba bañwi kono mane u ka eza cwalo ka ku fita fa sipimo sa ku shwela mufuta wa mutu! Balutiwa ba tokwa ona maikuto ao a swana sina a Kreste a ku lakaza ku sebeleza mwa sibaka sa ku sebelezwa ni ku ba yo munyinyani mwa sibaka sa ku ba mwa situlo se situna. Mateu 20:17-28; Mareka 3:17; 9:33-37; 10:32-45; Luka 18:31-34; Joani 11:16.

◆ Ki kabakalañi balutiwa ha ba fita fa ku ba ni sabo?

◆ Jesu u ezisa cwañi balutiwa ba hae ku ba ba ba itukiselize se si taha kwapili?

◆ Ki kupo ifi ye tisizwe ku Jesu, mi baapositola ba bañwi ba amiwa cwañi?

◆ Jesu u tatulula cwañi butata mwahal’a baapositola ba hae?