“Muhate ka Busepahali Mwanaahatile”

1-2. Kana kwakonahala kuhata mwanaahatile Jesu? Mufe mutala.

LUUNGEÑI kuli mu mwa sikwata sa batu babasweli kuzamaya mwa lihalaupa lelisabisa. Mutu yomuñwi yaziba hande nzila usweli kumietelela. Hanzaa zamaya cwalo, usweli kusiya mutala wahae fafasi. Hamulaho wa nako, hamusa kona kubona mutu yamietelela yo. Kono hamuikalelwi. Mina ni batu bomuzamaya ni bona mulatelela mutala wahae ka tokomelo.

² Ka kuba Bakreste ba niti, luswana sina batu babazamaya mwa lihalaupa lelisabisa, lona lifasi lelimaswe le. Ka litohonolo, Jehova ulufile Mwanaa hae, Jesu Kreste, kuli abe Mueteleli waluna yaswanela luli, mi lwakona kuhata ka busepahali mwanaahatile. (1 Pit. 2:21) Ka kuya ka hatiso yeñwi yetalusa litaba za mwa Bibele, Pitrosi fa naabapanya Jesu ku mutu yaetelela batu babañwi. Sina feela mutu yaetelela batu babañwi hakona kubasiyela mutala, Jesu ni yena ulusiyezi mutala ilikuli lukone kuhata mwanaahatile. Halunyakisiseñi lipuzo zetaalu ze: Kuhata mwanaahatile Jesu kutalusañi? Ki kabakalañi haluswanela kueza cwalo? Mi lukona kuhata cwañi mwanaahatile Jesu?

 3. Kuhata mwahatile mutu kutalusañi?

³ Kuhata mwahatile mutu kutalusañi? Mwa Bibele, linzwi la ‘kuzamaya’ ni la ‘mahutu’ fokuñwi litalusa mupilelo wa mutu. (Gen. 6:9; Liprov. 4:26) Mupilelo wa mutu ukona kubapanywa kwa mutala wasiya fafasi hanzaa zamaya. Kacwalo, kuhata mwahatile mutu kutalusa kumulikanyisa.

 4. Kuhata mwanaahatile Jesu kutalusañi?

⁴ Kono cwale kuhata mwanaahatile Jesu kutalusañi? Kalabo yebunolo kikuli, kutalusa kumulikanyisa. Mwa liñolo fokutomile taba ye, muapositola Pitrosi sihulu naabulela za mutala omunde walutomezi Jesu wa kutiyela nyandiso; kono kunani linzila zeñata zelukona kulikanyisa Jesu ka zona. (1 Pit. 2:18-25) Kaniti luli, Jesu ulutomezi mutala omunde oluswanela kulikanyisa, mwa lika kaufela zanaabulezi ni zanaaezize.

 5. Kana luli kwakonahala kuli batu babasika petahala balikanyise mutala wa Jesu yanaapetahalile? Mutaluse.

⁵ Kana luli kwakonahala kulikanyisa mutala wa Jesu niha lusika petahala? Eni, kwakonahala. Muhupule kuli Pitrosi naalususuelize ‘kuhata ka busepahali mwanaahatile [Jesu],’ isiñi kuli luhate luli ka kukwana mwanaahatile Jesu. Haiba lueza molukonela kaufela kuhata mwanaahatile Jesu niha luli batu babasika petahala, lukamamela manzwi anaañozi muapositola Joani, ali: ‘Muzamaye sina mwanaazamaezi [Jesu].’—1 Joa. 2:6.

6-7. Kuhata mwanaahatile Jesu kukona kulutusa cwañi kusutelela ku Jehova?

⁶ Haiba luhata mwanaahatile Jesu, lukasutelela ku Jehova. Ki kabakalañi halubulela cwalo? Sapili, Jesu ulutomezi mutala omunde hahulu wa mwa kupilela ka nzila yetabisa Mulimu. (Joa. 8:29) Kacwalo, haiba luhata mwanaahatile Jesu lukatabisa Jehova. Mi lwakona kuba ni buikolwiso bwa kuli, Ndataa luna ya kwa lihalimu ukasutelela ku babalika ka taata kusutelela ku yena.—Jak. 4:8.

⁷ Sabubeli, Jesu naalikanyisize Ndatahe ka kutala. Ki lona libaka Jesu hanaabulezi kuli: “Mutu kaufela yaniboni uboni ni Ndate.” (Joa. 14:9) Kacwalo, haiba lulikanyisa tulemeno twanaabonisize Jesu ni mwanaapilisanezi ni batu babañwi, inge cwalo mwanaaboniselize makeke ku muuna yanaakula mbingwa, ku musali yanaakula butuku bobutuna, ni kwa batu bane bashwezwi, lulikanyisa ni Jehova. (Mare. 1:40, 41; 5:25-34; Joa. 11:33-35) Mi haiba luzwelapili kulikanyisa Jehova, lukasutelela hahulu ku yena.

 8. Mutaluse mo kuhata mwanaahatile Jesu kukona kulutuseza “kutula” lifasi.

⁸ Kuhata mwanaahatile Jesu kulutusa kuli lusike lwayembululwa ki lifasi lelimaswe le. Fa busihu bwahae bwa mafelelezo pili asika bulaiwa kale, Jesu naabulezi kuli: “Nituzi lifasi.” (Joa. 16:33) Ka kubulela cwalo, Jesu naatalusa kuli naahanile kukukuezwa ki munahanelo, milelo, ni likezo za lifasi le. Jesu naasika lumeleza nto ifi kamba ifi kumupaleliswa kupeta mulelo wanaatezi fa lifasi, ili kukanyisa libizo la Jehova. Luna bo? Mwa lifasi le, kunani lika zeñata zekona kuluyaulula. Kono haiba lulikanyisa Jesu ka kuzwelapili kueza tato ya Jehova, ni luna ‘lukatula’ lifasi.—1 Joa. 5:5.

 9. Ki lika mañi zeluswanela kueza kuli lube mwa nzila yeisa kwa bupilo bobusa feli?

⁹ Haiba luhata mwanaahatile Jesu lukafumana bupilo bobusa feli. Mutangana yomuñwi wa mufumi hanaabuzize Jesu zanaaswanela kueza kuli afumane bupilo bobusa feli, Jesu naamualabile kuli: “Utahe unilatelele.” (Mat. 19:16-21) Jesu naabulelezi Majuda babañwi bane basalumeli kuli naali Kreste kuli: “Lingu zaka . . . zanilatelela. Nilifa bupilo bobusa feli.” (Joa. 10:24-29) Jesu naabulelezi Nekudema, yomuñwi wa manduna ba mwa kuta ya Sanhedrini yanaatabela kuziba zeñata ka za lituto zanaaluta Jesu kuli “mutu kaufela yabonisa tumelo ku yena” naakafumana “bupilo bobusa feli.” (Joa. 3:16) Lubonisa kuli lunani tumelo ku Jesu ka kumamela lituto zahae ni kulikanyisa mutala wahae. Haiba lueza cwalo, lukaba mwa nzila yeisa kwa bupilo bobusa feli.—Mat. 7:14.

10. Ki lika mañi zeluswanela kueza kuli luzibe Jesu hande? (Joani 17:3)

¹⁰ Lusika hata kale ka busepahali mwanaahatile Jesu, luswanela pili kumuziba. (Mubale Joani 17:3.) Kuli lumuzibe hande, luswanela kuzwelapili kuituta ka za hae. Kueza cwalo kukopanyeleza kuituta tulemeno twanaanani tona, munahanelo wahae, ni kuziba likuka zanaalatelela mwa bupilo. Kusina taba kuli selubile mwa niti ka nako yekuma kai, luswanela kuzwelapili kuziba Jehova ni Mwanaa hae.

11. Ki litaba mañi zefumaneha mwa libuka za Evangeli zeene?

¹¹ Jehova ka lilato naalukisize kuli mwa Linzwi lahae kube ni libuka zeene za Evangeli, ilikuli lilutuse kuziba Mwanaa hae. Mwa Libuka za Evangeli zeo, lufumana litaba zetalusa zeneezahezi mwa bupilo bwa Jesu ni bukombwa bwahae. Libuka zeo litalusa zanaabulezi Jesu, zanaaezize, mi lilutusa kuziba mwanaaikutwela. Libuka zeene zeo lilutusa ‘kunahanisisa’ mutala wa Jesu. (Maheb. 12:3) Ka mubulelelo omuñwi, mwa libuka zeo ki mona molukona kufumana mutala wahae olukona kulatelela. Haiba luituta Libuka za Evangeli zeo lukaziba Jesu hande. Kacwalo, lukakona kuhata ka busepahali mwanaahatile.

12. Ki lika mañi zeluswanela kueza kuli lutusiwe hahulu ki litaba zeñozwi mwa Libuka za Evangeli?

¹² Kuli lutusiwe hahulu ki litaba zeñozwi mwa Libuka za Evangeli, kunani lika zeñwi zeluswanela kueza kwandaa kubala feela libuka zeo. Luswanela kubanga ni nako ya kuituta zona ka tokomelo ni kunahanisisa zelubala. (Mubapanye Joshua 1:8, litaluso ze kwatasi.) Halunyakisiseñi liakalezo zepeli zeka lutusa kuziba molukona kunahanisiseza ni kusebeliseza litaba zelubala mwa Libuka za Evangeli.

13. Ki lika mañi zekona kulutusa kueza inge bababona litaba zelubala mwa Libuka za Evangeli?

¹³ Sapili, mueze inge bababona litaba zeñozwi mwa Libuka za Evangeli. Mueze inge mwabona zeezahala, kuutwa, ni kuikutwa sina mobaikutwela batu bababulezwi mwa taba yemubala. Mi kuli mueze cwalo, mueze lipatisiso mwa lihatiso zelukisizwe ki kopano ya Jehova. Munyakisise litaba zeneezahezi pili kamba hasamulaho wa taba yemubala yeo. Mufumane litaba zeñwi ka za batu ni libaka zebulezwi mwa taba yemubala. Mubapanye taba yemubala kwa taba yeswana yebulezwi mwa buka yeñwi ya Evangeli. Fokuñwi, muñoli yomuñwi wa buka ya Evangeli ukona kuñola litaba zeñwi zasiile muñoli yomuñwi wa Evangeli.

14-15. Ki lika mañi zekona kulutusa kusebelisa litaba zeluitutile mwa Libuka za Evangeli?

¹⁴ Musebelise litaba zemuitutile mwa Libuka za Evangeli. (Joa. 13:17) Hamulaho wa kuituta ka tokomelo taba yeñwi mwa buka ya Evangeli, muipuze kuli: ‘Nikona kusebelisa cwañi tuto yeniitutile mwa taba ye mwa bupilo bwaka? Nikona kuitusisa cwañi likande le kuli nituse mutu yomuñwi?’ Mulike kunahana za mutu yomuñwi yemukona kuambola ni yena, mi ka nako yeswanela, mumutaluseze ka lilato ni ka maseme litaba zemuitutile.

¹⁵ Halunyakisiseñi mutala okona kulutusa kuziba mwakusebeliseza liakalezo zepeli zeo. Lukaitusisa likande la musali wa mbelwa yanaali mubotana yanaaboni Jesu mwa tempele.

16. Mutaluse lika zeezahala zebulezwi kwa Mareka 12:41.

¹⁶ Mueze inge bababona taba yemubala. (Mubale Mareka 12:41.) Mueze inge bababona zeezahala. Ki la Nisani 11, 33 C.E. mi kusiyezi mazazi asikai pili Jesu asika bulaiwa kale. Jesu utandile lizazi mutumbi inzaa luta batu mwa tempele. Kono baeteleli ba bulapeli bazwelapili kumulwanisa. Kwamulaho, babañwi ku bona neba mubuzize yanaa mufile maata a kueza musebezi wanaaeza. Babañwi neba mubuzize lipuzo zetaata kuli bamuswase. (Mare. 11:27-33; 12:13-34) Cwale Jesu uya kwa sibaka sesiñwi mwa tempele. Mwa sibaka se, ili mo mwendi ki mwa Lapa la Basali, Jesu ukona kubona mabulukelo a masheleñi abeilwe kwatuko ni mamota. Uina fafasi mi ukala kubuha batu habanze babeya linubu mwa mabulukelo ao. Ubona bafumi babañata habanze babeya masheleñi amañata a muwayawaya mwateñi. Kubonahala kuli uinzi fakaufi kuli mane uutwa lilata la masheleñi abona hanzaa wela mwa mabulukelo.

17. Ki lika mañi zanaaezize mbelwa wa mubotana yabulezwi kwa Mareka 12:42?

¹⁷ Mubale Mareka 12:42. Hamulaho wa nako, Jesu ubona musali yomuñwi. Musali yo ki “mbelwa wa mubotana.” (Luka 21:2) Bupilo bumutatafalezi; kubonahala kuli haana hande masheleñi a kuli akone kuleka lika zatokwa mwa bupilo. Nihakulicwalo, uya ku yeñwi ya mabulukelo, mi ka kusalemuseha, ubeya mwateñi tusheleñi totubeli totunyinyani twa muwayawaya, ili to mwendi hatupangi lilata hatuwisezwa mwa sibulukelo. Jesu waziba masheleñi abeile musali yo—ki malepta amabeli a muwayawaya, ili masheleñi a muwayawaya amanyinyani hahulu anaaitusiswa ka nako yeo. Masheleñi ao ki amanyinyani hahulu kuli mane haakoni nihaiba kuleka taha iliñwi, ili yeñwi ya linyunywani zecipile hahulu zakona kuleka mutu kuli aeze busunso.

18. Ka kuya ka Mareka 12:43, 44, Jesu naabuleziñi ka za nubu ya mbelwa?

¹⁸ Mubale Mareka 12:43, 44. Jesu utabiswa hahulu ki zaeza mbelwa yo. Kacwalo, ubiza balutiwa bahae, ubasupeza mbelwa yo, mi uli: “Mbelwa yo wa mubotana ubeile hahulu mwa sibulukelo kufita batu kaufela.” Hasamulaho, utalusa kuli: “Kakuli kaufelaa bona [sihulu bafumi] babeile zezwa ku za ñambekelo yabona, kono yena mwa kutokwa kwahae, ubeile sanaasweli kaufela, sanaanani sona kaufela kuli aipilise.” Mbelwa yasepahala yo hanaafile masheleñi ahae a mafelelezo sina nubu fa lizazi leo, naabonisize kuli naasepile kuli Jehova naaka mubabalela.—Samu 26:3.

19. Ki tuto mañi ya butokwa yeluituta kwa manzwi a Jesu anaabulezi ka za mbelwa wa mubotana?

¹⁹ Musebelise zemuitutile mwa likande leo mwa bupilo bwamina. Muipuze kuli: ‘Niitutañi kwa manzwi anaabulezi Jesu ka za mbelwa wa mubotana?’ Munahanisise za mbelwa yo. Kusina kukakanya, naakatabela kufa Jehova masheleñi amañata. Nihakulicwalo, naaezize mwanaakonela kaufela; naafile Jehova sanaanani sona kaufela. Mi Jesu naaziba kuli Ndatahe naaitebuha hahulu nubu ya mbelwa yo. Taba yeo iluluta tuto ya butokwa ye: Jehova ubanga ni tabo halu mufa ka molukonela kaufela, waitebuhanga haiba lumusebeleza ka pilu yaluna kaufela ni ka moyo waluna kaufela. (Mat. 22:37; Makolo. 3:23) Kaniti, Jehova ubanga ni tabo haalubona inze lumusebeleza ka molukonela kaufela! Kacwalo, watabanga kulubona haluitusisa nako yaluna ni maata aluna kumusebeleza, ibe kuli ki mwa bukombwa kamba kwa mikopano ya puteho.

20. Mukona kusebelisa cwañi tuto yemuitutile mwa likande la mbelwa? Mufe mutala.

²⁰ Mukona kusebelisa cwañi tuto yemuitutile mwa likande lelibulela za mbelwa? Mulike kunahana za batu babaka susuezwa hamuka bataluseza kuli Jehova waitebuha buikatazo bobaeza kuli bamusebeleze. Ka mutala, kana kunani kaizeli yomuñwi wa musupali yomuziba yaikutwa bumaswe kamba kuikutwa kuli haki wa butokwa kabakala kuli haasakona kueza zeñata mwa bukombwa bakeñisa mapongo kamba kutokwa hande maata? Kamba kana kunani muzwale yakula hahulu yazwafile kabakala kuli haakoni kuyanga kwa mikopano ya puteho kwa Ndu ya Mubuso kamita? Mutuse batu babacwalo ka kubabulelela “manzwi amande atiisa.” (Maef. 4:29) Mubasusueze ka kubataluseza zemuitutile kwa likande la mbelwa wa mubotana. Manzwi amina asusueza aka batusa kulemuha kuli Jehova waitebuhanga halueza molukonela kaufela kumusebeleza. (Liprov. 15:23; 1 Mates. 5:11) Haiba mubabaza babañwi kabakala kuli baeza mobakonela kaufela kusebeleza Jehova, nihaike kuli zebaeza likona kubonahala kuba zenyinyani, muhata mwanaahatile Jesu ka busepahali.

21. Muikatulezi kuezañi?

²¹ Lwaitumela luli kuli mwa Libuka za Evangeli, kunani litaba zeñata zebulela ka za bupilo bwa Jesu zelutusa kumulikanyisa ilikuli luhate ka busepahali mwanaahatile! Neikaba hande hane mukanyakisisa Libuka za Evangeli ka nako yamina ya tuto ya ka butu kamba ka Nako ya Kulapela Sina Lubasi. Luswanela kuhupula kuli haiba lubata kuli lutusiwe hahulu ki litaba zeo, luswanela kueza inge bababona litaba zeo mwa munahano, ni kusebelisa lituto zeluitutile mwa bupilo bwaluna. Kwandaa kulikanyisa feela zanaaezize Jesu, luswanela kuteeleza ku zanaabulezi. Mwa taba yetatama, lukanyakisisa zelukona kuituta kwa manzwi a mafelelezo anaabulezi Jesu pili asika bulaiwa kale.