Paradaisi ye Kutisizwe Sinca I Lumbeka Mulimu

“Ni ka bubanisa sibaka sa mautu a ka.”—ISAYA 60:13.

 1, 2. (a) Ka mupolofita wa hae Isaya, ki sifi seo Mulimu n’a si talusize cimo ka za lifasi-mubu? (b) Ka ku talimela kwapili mwahal’a lilimo ze sikiti, ki sifi se lu bona?

JEHOVA na bupile lifasi-mubu sina sibaka sa mwatas’a mautu a hae, sina sipula sa swanisezo sa fa hatela mautu a hae. Ka mupolofita wa hae Isaya, Mulimu n’a talusize cimo kuli n’a ka ‘bubanisa sibaka sa mautu a hae.’ (Isaya 60:13) Ka tuso ya Bibele ye buyelezwi, lwa kona ku talima, sina inge ka ku itusisa sihoho se si m’ata, mwa lilimo za kwapili ze sikiti za bupilo bwa mufuta wa mutu. Ki pono ye wabelisa hakalo ye nopana ni meto a luna! Lifasi-mubu kamukan’a lona li benya ka bunde bo bu si na katowati bo bu tisizwe ki Mulimi yo mutuna ka ku fitisisa mwa pupo kamukana. Paradaisi i ka be i bile ye kutisizwe sinca kwa mufuta wa mutu lifasi-mubu kamukana!

² Ee, Mutu wa bumulimu Yo Mutuna ka ku fitisisa ya n’a kalisize ku ba teñi kwa mutu mwa simu ya paradaisi u lelile ku tahisa tabo ye tuna ka ku fitisisa ku mutu. Ki Mubupi ya lilato hakalo luli y’o mufuta wa mutu u na ni yena, ili y’o haki ku ekeza litaba ku bulela kuli, “Mulimu u lilato”! (1 Joani 4:8, 16) Mwa Paradaisi ye kutisizwe sinca, banna ni basali ba ba fitile fa buhulu bo bu tiile bwa bupetehi bwa butu bo bu si na nto ni ye kana ye fosahezi ba ka pila hamoho sina mizwale ni likaizeli ba ba latana. (Isaya 9:6) Ka ku susuezwa ki lilato, ba ipeya kwatasi ka nzila ye petehile ku Mubupi ya makaza wa lihalimu ni lifasi-mubu, Jehova Mulimu.

 3, 4. (a) Lihalimu ni lifasi-mubu li ka zamaelela kamukwaufi? (b) Mangeloi a ka nga muhato mañi Paradaisi ha se i kutisizwe sinca fa lifasi-mubu?

³ Lilimo ze likiti-kiti kwamulaho, mwa taluso ye buyelezwi ya bumulimu ya sibaka sa hae, Mulimu n’a bulezi manzwi a komokisa kwa batu ba hae ba ne ba ketilwe a li: “Lihalimu ki lona lubona lwa ka, mi lifasi ki sipula sa buhato bwa mautu a ka.” (Isaya 66:1) Kanya ka sibili ya “sipula sa buhato bwa mautu” a hae, Paradaisi ya lifasi-mubu, i swanela ku zamaelela ni kanya ya lubona lwa hae mwa mahalimu a’ sa bonahali.

⁴ Fa nako ya ku bupiwa kwa lifasi, bao ba ne ba li bababaleli fahalimw’a lubona lwa Mulimu mwa sibaka sa mwa mahalimu ba kengela ka za pono ya lifasi-mubu kwatasi. Ne ba ikutwile ku ba ni tabo hakalo meto a bona ha n’a nze a tatubisisa ku benya kwa lona ko ku makaza! Ne ba ka palelwa kamukwaufi ku sholoka ka pina? (Mu bapanye Zefania 3:17, Revised Standard Version; Lisamu 100:2, The Jerusalem Bible.) Mubupi ya tabile ni ya na ni nyakalalo n’a buyelezi muñoli wa hae wa fa lifasi-mubu ku bonisa muinelo o nepahezi wa pono ya mwa lihalimu, ka ku bulela kuli: “Linaleli za malungasiku ha ne li nze li opela hamoho, mi bana ba Mulimu kaufela ne ba luluweziswa ki tabo.” (Jobo 38:7) Bana ba Mulimu ba singeloi ba ka luluweza ka tabo hakalo ni ku fita, ka tumbo ku Mulimu, muta Paradaisi i ka kutiswa sinca!

 5. Lu swanela ku ikutwa cwañi ka za ku talelezwa kwa mulelo wa Mulimu wa kwa makalelo ka ku ama kwa lifasi-mubu?

⁵ Kaniti ku tabisa lipilu za luna ku fiwa koñomeko ki Mañolo a Kenile kuli ku talelezwa ko ku tezi kwa paradaisi ya lifasi-mubu ne li ona mulelo wa n’a na ni ona Jehova Mulimu ku zwa fela kwa makalelo. Ona ku petahala k’o kwa mulelo wa Mulimu ko ku tahisa tabo ni tumbo, kwa neku la lifasi-mubu le ki yona luli nto ye lukile ye lukela ku libelelwa ku Mulimu ya zwa mwa kanya ni ku ya mwa kanya ku si na ku palelwa mwa ku bonisa butuna bwa hae. Tumbo kaufela i ye ku yena!—Lisamu 150:1, 2; Isaya 45:18; Sinulo 21:3-5.

Ba Ba Zuhile Ba Tusa mwa ku Kutisa Sinca Paradaisi

 6. Hamulaho a Armagedoni, lifasi-mubu li ka ba le li tezi batu kamukwaufi?

⁶ Nihaike bapunyuhi ba Armagedoni ba ka ba ba palo ye nyinyani, lifasi ha li na ku tazwa ka ku tala ka ku pepa bana kwa neku la bona fela. Jehova hape u ka ‘bubanisa sibaka sa mautu a hae’ ka ku kutiseza kwa bupilo bao ba inzi mwa mabita a kupuzo ili ba ba taha mwatas’a tuso ya sitabelo sa tiululo sa Kreste. Bona bao, hape, ba ka ba ni tohonolo ya ku abana mwa musebezi o tabisa wa ku fetula lifasi-mubu la luna ku ba paradaisi ye buheha ni ku fita.—Likezo 24:15.

 7. Ki manzwi afi a Jesu ao bapunyuhi ba Armagedoni ba ka buluka mwa munahano?

⁷ Bapunyuhi ba Armagedoni kamita ba ka beya mwa munahano manzwi a nyangumuna moyo a Mulena Jesu Kreste muta o muñwi ha n’a bulezi kuli: “Mu si ke mwa komoka ka taba yeo; kakuli nako ya ta, mo ba ba li mwa mabita [a kupuzo, NW] kaufela, ba ka utwa linzwi la hae, mi ba zwe.” (Joani 5:28, 29) Ki hora ye nde hakalo yeo muta bafu ba mufuta wa mutu mwa mabita a bona a kupuzo ba ka kalisa ku utwa linzwi la Mwan’a Mulimu inze li bulela manzwi a swana ni a n’a itusisize ku Lazaro, ili y’o situpu sa hae ne si inzi mwa libita kwa Betania: “Lazaro, zwa mo!”—Joani 11:43.

 8, 9. Ki bomañi ba ba bonahala kuli ba ka ba ba pili mwa ku zusezwa kwa bupilo bo bunca fa lifasi-mubu, ili ku tisa tabo mañi kwa bapunyuhi ba Armagedoni?

⁸ Ki bomañi ba ba bonahala ku ba ba pili mwa ku zusezwa kwa bupilo bo bunca fa lifasi-mubu mwatas’a Puso ya Lilimo ze Sikiti ya Jesu Kreste ni ka ku alaba kwa taelo ya hae? Ka mo ku inezi fela i lukela ku ba “lingu ze ñwi” ba ba timezi mwahal’a mazazi a maungulelo pili mafelelezo a muinelo wo wa linto a si ka fita kale. Ba ka ba ni zuho ya ka bunako. (Joani 10:16) Ka mo ku inezi fela ha ba na ku fumana butata hahulu mwa ku itwaeza ili bona muinelo wa mwa lifasi le linca.—Mu bapanye Mateu 25:34; Joani 6:53, 54.

⁹ Ku ka ba ko ku tabisa hakalo kwa bapunyuhi ba Armagedoni ha ba ka bona ku zusiwa kwa bao ba ba li “lingu ze ñwi” ba ba timezi mwahal’a lusika lo lu li teñi pili “ñalelwa ye tuna” i si ka fita kale! (Mateu 24:21) Ka ku ba ni m’ata a tezi a temuho, bapunyuhi ba Armagedoni ba ka ba ziba, ku ba amuhela, mi ni ku zwelapili hamoho ni bona mwa ku uncafaza sebelezo ya bona ye tamani ku Mulimu Ya Pahami Ka Ku Fitisisa!

10. Ka ku punyuha Armagedoni, ki sifi se ne mu kana mwa iponela?

¹⁰ Ka ku ba yo muñwi wa bapunyuhi ba Armagedoni, ne mu kana mwa iponela zuho ya wa pili ku bahabo mina ka sibili ba fa lifasi. Maikuto a mina n’a ka ba afi kwand’a ku ba fela a swana ni ao bashemi ba musizana wa lilimo ze 12 ne ba bile ni ona Mulena Jesu ha n’a mu kutiselize mwa mazoho a bona a n’a nyolezwi seo? “Ka nako ye swana ba fita fa ku ba ni tabo ye tuna hahulu.” (Mareka 5:42, NW) Ee, luli, tabo ye sa konwi ku taluswa i ka ba ya mina fa zuho ya bafu ku zwa mwa Hades ni mwa liwate. (Sinulo 20:13) Oh, ki nako ye benya hakalo ya kamuso, nako ya kamuso ye ka tuha i ba teñi!

“Manduna mwa [Lifasi] Kaufela”

11, 12. (a) Lisamu 45:16 i koñomeka sikamañi? (b) Ki ku zwelela mwahal’a bomañi m’o Mulena, Jesu Kreste, a ka keta “manduna mwa [lifasi] kaufela”?

¹¹ Ka ku itusisa m’ata a hae a ku zusa batu ba ba shwile ili bao a lobalelize bupilo bwa hae bo bu petehile bwa butu sina sitabelo sa tiululo, Jesu u ka tahisa ku talelezwa kwa Lisamu 45:16. Samu ye i ama ku Jesu Kreste ka bupolofita sina Mulena ya beilwe fa bulena: “Mwa litulo za bokuku a hao [ba fa lifasi] ku ka ina bana ba hao, u ka ba beya manduna mwa [lifasi] kaufela.” Samu ye i koñomeka kuli Jesu Kreste u ka ba ni bana fa lifasi fa ni kuli ku zwelela ku bona bana bao u ka yolisa ba bañwi sina “manduna mwa [lifasi] kaufela.” Ka ku ba “mwan’a Davida” ni kuli ki mweli wa mushimani wa mwalyanjo Maria wa Mujuda, Jesu n’a na ni bokuku a hae ba fa lifasi ba butu mane ku yo fita ku ndate wa pili, Adama.—Luka 3:23-38.

¹² Kana Lisamu 45:16 i talusa kuli bao ba ne ba li bokuku a hae Jesu ba kwa nama ba ka ba bana ba hae ka ku ba zusa kwa hae ku zwa kwa bafu? Ee. Kana Lisamu 45:16 hape i talusa kuli bakeñisa kuli u simuluha mwa mubamba wa bona, Jesu u ka ba shemuba ka nzila ye ipitezi ni ku ba keta ku ba “manduna mwa [lifasi] kaufela” mwa muinelo wa lona wa Paradaisi? Batili. Ku talelezwa kwa bupolofita ka nzila yeo ne ku ka lumeleza fela palo ye nyinyani ya “manduna” mwa lifasi kamukana. Fahalimw’a sisupo seo, bao kaufela ba ne ba li bokuku a hae kaufel’a bona ne si batu ba ne ba zwile mubano kuli mane ba swanela ku fiwa kalulo ye ipitezi fa lifasi-mubu mwahal’a Puso ya hae ya Lilimo ze Sikiti. Mulena, Jesu Kreste, u ka ba ni batu ba bañata ku fita bokuku a hae ba fa lifasi-mubu ili bao a ka keta sina “manduna”—bapunyuhi ba Armagedoni ba ba fitile ku ze konisa, ba “lingu ze ñwi” ba ba zusizwe kwa bafu, ku kopanyeleza cwalo ni banna ba tumelo ba ne ba li teñi pili Kreste a si ka taha kale. Ku zwelela mwahal’a bona bao kaufela, wa kona ku keta ba ba swanela ba ba fitile ku ze konisa kuli ba be mwa buikalabelo bwa bunduna sina bayemeli ba hae ba fa lifasi-mubu.

13, 14. Ki bomañi ba ba ka zusiwa ili bao bapunyuhi ba Armagedoni ba ka ba ni tohonolo ya ku ba bona ka meto a bona ka sibili?

¹³ A mu nahane ka za ba bañwi ba ba cwalo ba ba libelezi zuho mwatas’a Mubuso wa Bumesiya. A mu bone! Kana lwa kona ku lumela seo lu si bona? Abele ki y’o, mutu wa pili mwa ku shwela tumelo, ni Enoke, ya n’a zwezipili ku zamaya ni Mulimu wa niti. Nuwe, ni yena hape, ki y’o, muyahi wa aleka. Abrahama, Isaka, ni Jakobo ni bona ki bao, liñulukundi za sicaba sa Isilaele. Mushe ki y’o (wa mwa lusika lwa buprisita lwa Livi) ni Davida ili y’o bulikani bwa ku ya ku ile bwa Mubuso ne bu ezizwe ni yena. Ki bao, bo Isaya, Jeremia, Ezekiele, Daniele, ni bapolofita kaufela ba Maheberu ba ne ba itusisizwe mwa ku ñola Bibele ku to fita ni ku wa mafelelezo wa bona, Malaki, mi, ka mo ku inezi fela, ni Joani Mukolobezi ni Josefa, ndat’ahe Jesu ya na mu añuzi.

¹⁴ Ka nako ye ñwi Jesu na bulezi kwa Majuda kuli ne ba ka “bona Abrahama, ni Isaka, ni Jakobo, ni bapolofita kaufela mwa mubuso wa Mulimu [kono bona ba ka nepelwa] kwande.” (Luka 13:28) “Buñata bo butuna” bwa bapunyuhi ba fa lifasi-mubu ba “ndwa ya lizazi le lituna la Mulimu Ya-Mata-Kaufela” ba ka shemubwa ka tohonolo ya ku iponela ka meto “Abrahama, ni Isaka, ni Jakobo, ni bapolofita kaufela” ba ba zusizwe onafa fa Paradaisi ya lifasi-mubu ni ku ba mwa sebelezo ya silena mwatas’a Mubuso wa Mulimu ka “Ndate wa kamita,” Jesu Kreste.—Sinulo 7:9, 14; 16:14; Isaya 9:6.

15. Ki tohonolo mañi ye si na ye likana ni yona ye libelezi bao ba ba punyuha Armagedoni?

¹⁵ I ka ba nto ye nyangumuna moyo hakalo ku mina ba ba ka punyuha mafelelezo a lifasi le la cwale le li maswe ku ambola ze bonwi ni Nuwe ni bana ba lubasi lwa hae ka sibili, “ba ba 8,” ba ne ba punyuhile mafelelezo a lifasi la pili fa Munda wa lifasi kamukana mwa 2370 B.C.E.! Ha ku na mutu ni yo mukana ku ya ku ile ya ka ba ni ze bonwi sina ze mu ka ba ni zona mi kacwalo ili ku kona ku sebeza sina Paki ya Jehova Mulimu fa nto yeo ye zwile mubano, ye si ke ya kutelwa.—1 Pitrosi 3:20; Mareka 13:19; 2 Pitrosi 3:5-7.

Sisinyi se si na ni Makeke sa Hupulwa

16, 17. (a) Jesu ha ka hupula sisinyi ya na ni makeke, ki tohonolo mañi yeo bapunyuhi ba Armagedoni ni ba bañwi ba ba ka ba teñi ka nako yeo ba ka ba ni yona? (b) Ki sepo mañi ye li teñi ka ku ama ku sisinyi ya zusizwe?

¹⁶ Ku si na ku kakanya, ka nako yeo ku kutiswa sinca kwa Paradaisi fa lifasi-mubu ku se ku kalisizwe kale. Sisinyi ya n’a kokotezwi mabapa ni Jesu fa Calvary ili y’o ka ku lemuha temuso ye ne i li fahalimw’a toho ya Hae na bulezi kuli, “[Jesu], u ni hupule ha u kena mwa mubuso wa hao,” u ka zusezwa kwa bupilo bwa fa lifasi mwa Paradaisi ye kutisizwe sinca. (Luka 23:42) I ka ba tohonolo ya bapunyuhi ba Armagedoni ni ba bañwi ba ba ka pila ka nako yeo ku mu amuhela ku zwa kwa bafu. Ba ka mu luta ka ku tala ka za Mulena ya busa cwale, Jesu Kreste, ili y’o n’a mu utwezi makeke ka butuna ka Nisani 14 ya silimo sa 33 C.E.

¹⁷ Mulena Jesu Kreste ha na ku palelwa ku mu hupula mwahal’a puso ya Hae ya lilimo ze sikiti. Ku si na ku kakanya yena sisinyi y’o y’a makeke, ili ya zusizwe u ka bonisa buitebuho bwa hae ku Mulena ya busa, Jesu Kreste, ili y’o ka yena u fumani zuho, ka ku bonahaza busepahali bwa hae ku Mubusi wa Pupo kaufela, Jehova Mulimu. Cwale u ka balwa sina ya swanela ku ikola bupilo mwa Paradaisi ya lifasi le linca ku ya ku ile hamoho ni mufuta wa mutu o kutisizwe sinca, o ipeya ku utwa.

Bupilo mwa Simu ya Edeni, ya Lifasi Kamukana ye Kutisizwe Sinca

18. Bupilo bu ka ba cwañi mwa Paradaisi ye kutisizwe sinca?

¹⁸ Mwa Paradaisi ye kutisizwe sinca, mañi ni mañi ki mulikan’a mutu kaufela. Swalisano ye tamani ya lubasi lwa lifasi kamukana ya utwahala ka butungi mwa moyo wa mutu ni mutu. Kaufela ba utwana. Ba bulela puo i liñwi lifasi kamukana. Ka mo ku bonahalela ki puo ya kwa makalelo ya mufuta wa mutu, ili ye ne i bulelwa ki mañi ni mañi fa lifasi-mubu mwahal’a lilimo za pili ze 1,800 za ku ba teñi kwa mutu—ku zwa fa ku bupwa kwa Adama ka 4026 B.C.E. ku fita mwa lizazi la Pelegi (2269 ku isa 2030 B.C.E.), “kakuli lifasi [fo kikuli, undi-wa-nyangela fa lifasi-mubu] li kile la kauhanywa.” (Genese 10:25; 11:1) Mañi ni mañi wa ikola tohonolo ya ku pila, mi lizazi ni lizazi le linca li amuhelwa ka buitebuho bakeñisa ku ekelezwa lizazi la bupilo. Buyanga bwa kwa mubili ha bu ekezehi nako ha inze i zwelapili. M’ata a kwa mubili a hula, mi mibili ha i fokoli.—Mu bapanye Jobo 33:25.

19. Ki sifi se si ka lemuhiwa ka za bao ba ne ba li liyanga kwa makalelo?

¹⁹ Mi a mu bone! Ba ne ba li liyanga ba zamaya, ee, ba tulakiswa ki tabo. Mazoho ni mautu a n’a pumehile a kutisizwe ka makazo. Ba ne ba li libofu ba bona, bosusu ba utwa, bosatambi ba bulela ni ku opeliswa ki tabo. (Mu bapanye Isaya 35:5, 6.) Ku sa bonahala hande kwa muinelo ni mubupehelo wa mutu kwa fela. Mayemo a ku ba munna a talelezwa hande hahulu ki mayemo a ku ba musali wa butu. (Genese 2:18) Bupetehi bwa butu bu lumbeka Jehova Mulimu, Mubupi wa mubili wa butu o petehile.

20. Ki sifi se si ka lemuhiwa ka za m’ata kamukana a taho a muinelo wa lika, ku fumaneha kwa lico, pupo ya lifolofolo, ni ka m’o lifasi li ka itusisezwa?

²⁰ Lifasi-mubu kamukan’a lona li fita fa ku ba kalulo ye buheha. Ha ku na lineku la lifasi-mubu ko ku ka zwelela piho ya linanga kamba pula ya milupi ye tahisa sinyehelo kamba mioya ye mituna, mañungwa, simbwewewe, ni tukundukundu ili ze tisa sinyehelo ye tuna. (Mu bapanye Mareka 4:37-41.) M’ata kamukana a ka taho a muinelo wa lika a tahiswa fa ku sebeza ka buitikaneleli bo bu petehile ili ku ezisa lifasi-mubu kamukana ku ba sibaka se si nde ka ku fitisisa ku pila ku sona. Ha ku na ku tokwa lico kai ni kai, kakuli lifasi-mubu li ka beya ze ciwa ka ku fita fa sipimo se si tezi. (Lisamu 72:16) Kozo ni buiketo li teñi lifasi kamukana kwa neku la mutu ni folofolo, sina Jehova ha bulela kuli: “Ha ku sa na ya ka holofaza kamba ku sinya fa lilundu la ka le li kenile.” (Isaya 11:9; mu bone hape litimana 6-8.) Ka yona nzila ye lifasi-mubu li ka eziwa sibaka se si tabisa ku pila ku sona ni ku zwelapili mwa ku lapela ni mwa sebelezo ya Jehova Mulimu, Mubupi ni Muñ’a lifasi-mubu. Bakeñisa kuli ki sipawana sa hae ka tukelo ya hae ya pupo, li swanela ku itusiswa ka nzila ye mu tabisa ni ye mu lumbeka—Mu bapanye Isaya 35:1, 2, 6, 7.

21. Mufuta wa mutu o liuluzwi u ka bona lika kaufela fa lifasi-mubu ka mukwa o cwañi, mi ki lipina mañi ze ka utwiwa?

²¹ Ye wabelisa ye nca—ko na mo i inezi nto ya fa lifasi-mubu kamukana kwa neku la batu ba ba kutisizwe sinca ba ne ba si ka ba ni kamuta mwa Paradaisi ya simu ya Edeni m’o bupilo bwa butu ne bu kalile ka bupetehi bo bu buheha! (Sinulo 21:5) Ki lipina kwa bunde, za ka libapaliso ni za ka mulomo, ze ka utwiwa ka nako yeo—kaufela li lumbeka Jehova!—1 Makolonika 23:4, 5; Lisamu 150:3-6.

22. Ku ka utwahala cwañi ku pila mwa Paradaisi ya lifasi le linca?

²² I ka ba ko ku nde hakalo ku pila mwa lifasi ili m’o bupilo bwa butu bu fumaneha ka nzila ye tezi ni m’o likalulo kamukana ze isa kwa muinelo wa ku shwa bakeñisa sibi sa makalelo sa Adama li ka be li felisizwe! (Mu bapanye Joani 10:10.) Ee, i ka ba lifasi-mubu m’o sibupiwa kamukana se si amuheleha sa butu si bonisa siswaniso ni ku swana kwa Jehova Mulimu ili zeo mutu wa pili Adama n’a bupilwe ni zona! (Genese 1:26, 27) Lifasi-mubu cwale ha li sa na ku ba nto ye bilaeza kwa liserafimi, likerubimi, ni kwa mangeloi a kanya mwa lihalimu. Ha ka talimisa lipata za ona ze lilato kwa lifasi-mubu, ku li lubukela ha li buheha ka paradaisi, s’a ka eza fela ki ku fa tumbo ni buitumelo ku Yena y’o ba na ni tohonolo ya ku bona pata ya hae ka sibili—Jehova, Mubusi wa Pupo kamukana.—Mateu 18:10.

Nako Ya Kwapili Ya Tabo, Ya Ku Ya Ku Ile

23. Ki sifi se si konahala kwa neku la Bakreste ba ba tozizwe, mi ki sifi se si zwa mwateñi kwa neku la bayahi ba Paradaisi ya fa lifasi-mubu?

²³ Ki taba ye kona ku ezahala ni ye swanela ku ezahala, kuli muta o muñwi kwapili, mabizo a Bakreste ba ba tozizwe kamukana ba ba ezize “ku bizwa ni ku ketwa” kwa bona mwa Mubuso wa lihalimu ku ba nto ye buniti ni ba ba fuy’ozwi ka zuho ye pahami a ka hatiswa ka ku tala ili ku lemusa lubasi lwa mufuta wa mutu mwa Paradaisi ya bona ya fa lifasi-mubu. (2 Pitrosi 1:10; Lisamu 87:5, 6) Kacwalo, ku sa ba teñi mwa Paradaisi ya fa lifasi-mubu kwa balutiwa ba Jesu Kreste ba ba pepilwe ka moya ba 144,000 ku ka utwisiswa ka ku tala ka buikolwiso bwa mañi ni mañi ni ka tabo ya ka pilu kaufela kwa neku la bona hamoho ni bona.

24. (a) Ki sifi seo Jehova u ka be a si petile ka ku ama “sipula sa buhato bwa mautu” a hae? (b) Lu ziba kamukwaufi kuli lifasi le linca ha li na ku fela, mi ki pina ifi ya bupolofita ye ka talelezwa?

²⁴ Nako ya kwapili ye si na maciñekelo ya tabo i ka ba ya bao kaufela ba ba siyala mwa buineelo bo bu sa kauhi ku Jehova, Mubusi ya swanela wa pupo kamukana. Paradaisi ya lifasi-mubu ye tezi batu ka mukwa o munde i ka ba sibaka se si swanela, sibaka se si tompeha, sina “sipula sa buhato bwa mautu” ili f’o mautu a Mulimu ka swanisezo n’a kana a pumula teñi. Ee, ku ya ku ile Jehova u ka be a bubanisize ‘sibaka sa mautu a hae,’ mi mufuta wa mutu kaufela u ka be u ipeile kwatas’a hae ku si na ku shekesha! (Mateu 5:34, 35; Likezo 7:49) Lifasi le linca li ka ba lifasi le li si na maciñekelo kakuli “u ka hulisa mubuso, ni ku tiisa kozo ye sa feli.” (Isaya 9:7) Cwale, pina ya bupolofita ya mangeloi a lihalimu fa ku pepwa kwa Jesu mwa Betelehema wa Judea ka 2 B.C.E. i ka talelezwa: “Kanya i be ku Mulimu, kwa mahalimu a kwahalimu; kozo i be teñi mwa lifasi; batu ba shemubwe.”—Luka 2:13, 14.

25. (a) Ki sifi seo bao ba ba li ba “buñata bo butuna” bwa “lingu ze ñwi” cwale ba itebuha sona? (b) Ki ifi ye swanela ku ba yona takazo ya luna ye zwelela kwa pilu?

²⁵ Bao ba ba li ba “buñata bo butuna” ba “lingu ze ñwi” za Mulisana yo Munde ba itebuha manzwi a nyangumuna moyo a sepiso ya Paradaisi ye kutisizwe sinca. Ki tohonolo ya bona ku swalisana ni kopano ya Mulimu cwale ni ku abana ka cisehelo mwa musebezi o ne u talusizwe cimo ki Mulena Jesu Kreste, ku kutaziwa kwa taba ye nde ya Mubuso mwa lifasi kamukana le li yahilwe ili ku fa bupaki bwa mafelelezo. (Mateu 24:14; Mareka 13:10) Takazo ya luna ye buniti, ni ye zwelela kwa pilu sina Lipaki za Jehova ki ku buluka busepahali bwa luna bu sa kuyuki ku ya ku ile, ili ku tisa kanya ni tumbo ya ku ya ku ile ku Mubusi wa Pupo kamukana, Jehova Mulimu, ni mwatas’a bubusi bwa silena bwa Mwan’a hae wa libanda, Jesu Kreste. “Hallelujah!”—Sinulo 19:1, 3, 4, 6, RSV, New International Version; Liproverbia 10:9.

Ne Mu Ka Alaba Cwañi?

◻ Ki sepiso mañi ya ezize Jehova ka ku ama fa sipula sa buhato bwa mautu a hae sa swanisezo, lona lifasi-mubu?

◻ Ki bomañi ba ba ka tusa mwa ku kutisa sinca Paradaisi?

◻ Ki ku zwelela mwahal’a bomañi Mulena, Jesu Kreste, a ka keta “manduna mwa [lifasi] kaufela”?

◻ Ki sifi se si nyangumuna moyo seo ne mu ka ipumana ku sona muta zuho i ezahala?

◻ Ki nako ye cwañi ya kwapili ye libelezi bao ba ba siyala mwa buineelo bo bu sa kauhi ku Jehova?