Bumai Ki Bwa Lusika Lolusa Lumeli

Jesu ukuteka hahulu Joani Mukolobezi, kono batu babañata baanga cwañi Joani? Jesu uli: “Lusika lo . . . luswana sina banana babanyinyani babainzi fa mapatelo, bababizana ni bababapala ni bona, bali: ‘Lumilizelize kanamutolilo, kono hamusika bina; lumiopelezi lipina za malilo, kono hamusika inata fa lifuba kabakala maswabi.’”—Mateu 11:16, 17.

Jesu utalusañi? Ubonisa zatalusa hali: “Joani naatile asaci kamba kunwa, kono batu bali: ‘Unani mudimona.’ Mwanaa mutu naatile mi aca ni kunwa, kono batu bali: ‘Mumuboni mutu wateñi! Ki wa micomibi mi ki munwi wa waine, ki mulikanaa batelisi ni baezalibi.’” (Mateu 11:18, 19) Joani upilile bupilo bobubunolo sina Munazareni, naasanwi nihaiba waine, kono lusika lo, lubulela kuli unani mudimona. (Numere 6:2, 3:2, 3; Luka 1:15) Jesu yena upila sina batu babañwi. Uca ni kunwa ka kuitikanelela, kono batu bamutameleza kuli uezanga cwalo ka kufiteleza. Kutaata kutabisa batu.

Jesu ubapanya lusika lo kwa banana babanyinyani babainzi fa mapatelo, ili babahana kubina banana babañwi habaliza tunamutolilo, kamba babahana kuswaba babañwi habali mwa maswabi. Jesu uli: “Nihakulicwalo, butali bupakwa kuli bulukile ka misebezi yabona.” (Mateu 11:16, 19) Kaniti, “misebezi”—ili bupaki bobufiwa ki Joani ni Jesu—bubonisa kuli litaba zebatamelezwa ki za buhata.

Jesu hasabulezi za lusika lolusa lumeli lo, unyaza mileneñi ya Korazini, Betsaida, ni Kapernauma, ili mwanaaezelize misebezi yemaata. Jesu ubulela kuli kambe naaezelize misebezi yeo mwa mileneñi ya kwa Fenisia ya Tire ni Sidoni, kambe mileneñi yeo neibakile. Hape ubulela ni za muleneñi wa Kapernauma, ili kwanaainzi nako yetelele. Nihaiba mwa muleneñi wo, batu babañata nebasika lumela. Jesu ubulela za muleneñi wo kuli: “Fa Lizazi la Katulo, kukabela bunolo naha ya Sodoma kufita wena.”—Mateu 11:24.

Cwale Jesu ulumbeka Ndatahe, yapatile litaba za niti “ku bababutali ni babaitutile,” kono ulipatululezi babaishuwa, ili babaswana sina banana babanyinyani. (Mateu 11:25) Umema batu babacwalo, uli: “Hamutahe ku na, mina kaufela babambindana ni babaimezwi, mi nika mikatulusa. Muitwese coko yaka mi muitute ku na, kakuli ninani musa mi niwile pilu, mi mukakatuluha. Kakuli coko yaka ibunolo, mi mulwalo waka ububebe.”—Mateu 11:28-30.

Jesu ukatulusa cwañi batu? Baeteleli ba bulapeli baimelize batu ka lizo zemaswe, zecwale ka milao yabona yetaata yeama Sabata. Kono Jesu ubakatulusa ka kubaluta niti yezwa ku Mulimu, ili kubalukulula kwa lizo zeo. Hape ubonisa nzila yebaka imululwa ka yona batu babanyandiswa ki babusi ba naha ni batu babaimezwi kabakala sibi. Kaniti, Jesu ubataluseza molikona kuswalelwa libi zabona ni mobakona kubela balikani ba Mulimu.

Batu kaufela babaamuhela coko ya Jesu yebunolo bakona kuineela ku Mulimu ni kusebeleza Ndataa luna ya kwa lihalimu yanani sishemo ni mukekecima. Kueza cwalo haki kulwala mulwalo obukiti, kakuli zatokwa Mulimu haliimezi ni hanyinyani.—1 Joani 5:3.