Jesu H’a Ka Taha ka Kanya ya Mubuso

“Ku ba ba yemi mo, ku na ni ba bañwi ba ba si na ku shwa, konji ba bone pili Mwan’a mutu a taha mwa mubuso wa hae.”—MATEU 16:28.

 1, 2. Ki sifi se ne si ezahezi hamulahonyana wa Pentekonta ya 32 C.E., mi ki ufi o ne u li mulelo wa kezahalo yeo?

HAMULAHONYANA wa Pentekonta ya 32 C.E., ba balalu kwa baapositola ba Jesu ne ba boni pono ye sa konwi ku libalwa. Ka ku ya ka ze ñozwi ze buyelezwi, “Jesu a nga Pitrosi ni Jakobo, ni Joani munyan’a hae, mi a ba isa kwatuko, fa lilundu le li lumbile. Kih’a fetuha fapil’a bona.”—Mateu 17:1, 2.

² Pono ya ku fetuha ne i ezahalile ka nako ya kaulakanyi. Jesu n’a s’a kalisize ku bulelela balateleli ba hae kuli n’a ka nyanda ni ku shwa mwa Jerusalema, kono ne ba fumani butata mwa ku utwisisa manzwi a hae. (Mateu 16:21-23) Pono yeo ne i tiisize tumelo ya baapositola ba Jesu ba balalu ka ku ba bakanya kwa neku la lifu la hae le ne li sa taha mi hape ni kwa neku la lilimo ze ne li ka latelela za ku sebeza ka t’ata ni ku likiwa kwa puteho ya Sikreste. Kana luna kacenu lwa kona ku ituta se siñwi kwa pono yeo? Ee, kakuli se ne i yemela si ezahala luli mwa nako ya luna.

 3, 4. (a) Jesu n’a buleziñi ku nze ku sa siyezi mazazi a’ silezi kuli ku fetuha ku ezahale? (b) Mu taluse se ne si ezahezi fa ku fetuha.

³ Ku nze ku sa siyezi mazazi a’ silezi kuli ku fetuha k’o ku ezahale, Jesu n’a bulelezi balateleli ba hae kuli: “Mwan’a mutu u swanezi ku taha mwa kanya ya Ndat’ahe, ni mangeloi a hae; mi kih’a ka fa mutu ni mutu mupuzo wa z’a ezize.” Manzwi ao ne a ka talelezwa fa “ku fela kwa lifasi.” Jesu n’a ekelize kuli: “Kaniti na mi bulelela, ni li: ku ba ba yemi mo, ku na ni ba bañwi ba ba si na ku shwa, konji ba bone pili Mwan’a mutu a taha mwa mubuso wa hae.” (Mateu 16:27, 28; 24:3; 25:31-34, 41; Daniele 12:4) Ku fetuha ne ku ezahezi ka ku taleleza manzwi ao a mafelelezo.

⁴ Ki sifi luli se ne ba boni baapositola ba balalu bani? Luka u talusa kezahalo yeo cwana: “A li a sa lapela, pata ya hae ya bonahala ku fetuha, mi siapalo sa hae, sa ba ni busweu bo bu benya. Mi, a mu bone, banna ba babeli ki ba, ba ambola ni yena, ili Mushe ni Elia; Ba tahile ka kanya; ba bulela za ku funduka kwa Jesu, ko ku ka ezahala mwa Jerusalema.” Cwale, “lilu kiha li taha, mi la ba kwahela [baapositola]. Ba saba bao ha ba kena mwa lilu. Mi linzwi la zwa mwa lilu, la li: Yo ki Mwan’a ka ye ni ketile; mu mu utwe.”—Luka 9:29-31, 34, 35.

Tumelo ya Tiiswa

 5. Ku fetuha ne ku amile cwañi muapositola Pitrosi?

⁵ Muapositola Pitrosi n’a s’a bulezi kuli Jesu ki “Kreste, Mwan’a Mulimu Ya-Pila.” (Mateu 16:16) Manzwi a Jehova a’ zwelela kwa lihalimu n’a tiisize buniti bwa zibahazo yeo, mi pono ya Jesu ha nze a fetuhile ne li mbengenge ya ku taha kwa Kreste ka m’ata ni kanya ya Mubuso, ili ku t’o atula mufuta wa mutu kwa nalulelule. Hamulaho wa lilimo ze fitelela 30 ku zwa fa ku fetuha k’o, Pitrosi n’a ñozi kuli: “Ha lu si ka ya ka matangu a’ ezizwe ka butali, ha lu mi zibisize mata a mulen’a luna Jesu Kreste ni ku taha kwa hae; kono ne lu iponezi butuna bwa hae ka meto a luna; Kakuli n’a filwe ki Mulimu Ndate likute ni kanya, nako y’a fitelwa ki linzwi le li zwa kwa kanya ye pahami, le li li: Yo ki Mwan’a ka ya latwa, ye ni katelwa. Ni luna lu utwile linzwi leo ha li zwa kwa lihalimu, lu nze lu inzi ni yena fa lilundu le li kenile.”—2 Pitrosi 1:16-18; 1 Pitrosi 4:17.

 6. Hamulaho wa ku fetuha ne ku bile ni likezahalo lifi?

⁶ Kacenu, tumelo ya luna ni yona ya tiiswa ki se ne ba boni baapositola ba balalu. Ka mo ku inezi fela, se ku ezahezi ze ñata haisali ku zwiwa ka 32 C.E. Silimo se ne si tatami, Jesu n’a shwile mi n’a zusizwe, ili ku nyuluhela kwa lizoho la silyo la Ndat’ahe. (Likezo 2:29-36) Ka la Pentekonta ya silimo seo, “Isilaele [yo munca] wa Mulimu” n’a tahisizwe, mi mungendenge wa ku kutaza ne u kalisize, ili ku kaliseza mwa Jerusalema mi hamulaho ni ku yandulukela kwa mafelelezo a lifasi-mubu. (Magalata 6:16; Likezo 1:8) Ibata iba onaf’o fela tumelo ya balateleli ba Jesu ne i likilwe. Baapositola ne ba lengilwe mwa tolongo ni ku natiwa hahulu ka libaka la kuli ne ba hanile ku tuhela ku kutaza. Hañihañi Setefani a bulaiwa. Ku zwa f’o Jakobo, ya n’a iponezi ku fetuha, n’a bulailwe. (Likezo 5:17-40; 6:8–7:60; 12:1, 2) Nihakulicwalo, Pitrosi ni Joani ne ba pilile lilimo ze ñwi ze ñata ba nze ba sebeleza Jehova ka busepahali. Mane, mafelelezo a lilimo za mwanda wa pili C.E. ha n’a nze a atumela, Joani n’a ñozi lipono ze ñwi za Jesu a nze a li mwa kanya ya kwa lihalimu.—Sinulo 1:12-20; 14:14; 19:11-16.

 7. (a) Pono ya ku fetuha ne i kalisize ku talelezwa lili? (b) Ki lili f’o Jesu n’a fezi ba bañwi mipuzo ka ze ba ezize?

⁷ “Lizazi la Mulena” la sa li ku kaliseza ka 1914, buñata bwa lipono ze ne bonwi ki Joani se li talelelizwe. (Sinulo 1:10) Ku cwañi ka za ‘ku taha kwa Jesu mwa kanya ya Ndat’ahe,’ ka mo ku swaniselizwe ki ku fetuha? Pono yeo ne i kalisize ku talelezwa fa ku pepwa kwa Mubuso wa Mulimu wa kwa lihalimu ka 1914. Muta Jesu, ka ku swana sina naleli ya lilungwe, n’a tahile fapil’a pupo kamukana sina Mulena ya sa z’o yoliswa, ao, ka mubulelelo o muñwi, ne li ona makalelo a lizazi le linca. (2 Pitrosi 1:19; Sinulo 11:15; 22:16) Kana Jesu ka nako yeo n’a file batu mipuzo ka ze ba ezize? Ee. Ku na ni bupaki bo bu tiile bwa kuli hamulahonyana wa nako yeo, zuho ya kwa lihalimu ya Bakreste ba ba tozizwe ne i kalisize.—2 Timotea 4:8; Sinulo 14:13.

 8. Ki likezahalo lifi ze ka ba masetela a talelezo ya pono ya ku fetuha?

⁸ Niteñi, ona cwale-cwale fa, Jesu u ka esha “mwa kanya ya hae, a na ni mangeloi a hae kaufela” kuli a atule mufuta wa mutu kamukana. (Mateu 25:31) Ka nako yeo, u ka i patulula ka kanya ya hae kaufela ye komokisa ni ku fa ‘mutu ni mutu’ mupuzo o mu swanela ka z’a ezize. Ba ba swana sina lingu ba ka ca sanda sa bupilo bo bu sa feli mwa Mubuso o ba lukiselizwe, mi ba ba swana sina lipuli ba ka ‘feliswa ku ya ku ile.’ (NW) Ao a ka ba mafelelezo a kanya hakalo a talelezo ya pono ya ku fetuha!—Mateu 25:34, 41, 46; Mareka 8:38; 2 Matesalonika 1:6-10.

Balikani ba Jesu Ba Ba Filwe Kanya

 9. Kana lwa swanela ku libelela kuli Mushe ni Elia ba ka ba ni Jesu mwa talelezo ya pono ya ku fetuha? Mu taluse.

⁹ Jesu n’a si a nosi mwa ku fetuha. Mushe ni Elia ne ba bonwi ni yena. (Mateu 17:2, 3) Kana ne ba li teñi luli ka butu? Kutokwa, kakuli bubeli bwa banna bao ne se ba shwile kale-kale mi ne ba lobezi mwa liluli ba nze ba libelezi zuho. (Muekelesia 9:5, 10; Maheberu 11:35) Kana ba ka bonahala ni Jesu h’a ka taha ka kanya ya kwa lihalimu? Kutokwa, kakuli Mushe ni Elia ne ba pilile pili batu ba si ka kwalulelwa kale sepo ya kwa lihalimu. Ba ka ba mwa “ku zuha kwa bafu . . . ba ba lukile” kwa fa lifasi-mubu. (Likezo 24:15) Kacwalo ku bonahala kwa bona mwa pono ya ku fetuha ki kwa ka swanisezo. Ku swanisezañi?

10, 11. Elia ni Mushe ba yemela bomañi mwa miinelo ye fapahana?

¹⁰ Mwa miinelo ye miñwi, Mushe ni Elia ba yemela lika ze ñwi za bupolofita. Ka ku ba yena muyemeli wa bulikani bwa Mulao, Mushe n’a yemela Jesu, yena Muyemeli wa bulikani bo bunca. (Deuteronoma 18:18; Magalata 3:19; Maheberu 8:6) Elia n’a yemela Joani Mukolobezi, mutwaleti wa Mesiya. (Mateu 17:11-13) Ku zwa f’o, mwa kutwisiso ya Sinulo kauhanyo 11, Mushe ni Elia ba yemela bomasialeti ba ba tozizwe mwa nako ya maungulelo. Lu ziba cwañi seo?

¹¹ Kihona, ha mu apule kwa Sinulo 11:1-6. Mwa timana 3 lu bala kuli: “Ni ka fa lipaki za ka ze peli taelo, mi li ka polofita mazazi a’ eza 1,260 li nze li apezi masila a saka.” Bupolofita b’o ne bu talelelizwe ku bomasialeti ba Bakreste ba ba tozizwe mwahal’a Ndwa ya Lifasi ya I.a Ki kabakalañi ha ne ba li lipaki ze peli? Kakuli bomasialeti ba ba tozizwe ba eza misebezi ili yeo, ka nzila ya kwa moya, i swana ni ya Mushe ni ya Elia. Litimana 5 ni 6 li zwelapili ku bulela kuli: “Mutu h’a lata ku li eza maswe [lipaki ze peli zeo], mulilo u ka zwa mwa milomo ya zona, mi u ka cisa lila za zona; mutu ya lata ku li eza maswe u swanezi ku shwa cwalo. Li na ni mata a ku kwala lihalimu, kuli pula i si ke ya nela mwa mazazi e li ka polofita; hape li na ni mata a ku fetula mezi mali, ni ku nata lifasi likozi ze cwalo, mo li latela.” Kacwalo, lu hupuliswa ka za limakazo ze ne ezizwe ki Elia ni Mushe.—Numere 16:31-34; 1 Malena 17:1; 2 Malena 1:9-12.

12. Mwa muinelo wa ku fetuha, ki bomañi ba ba yemelwa ki Mushe ni Elia?

¹² Kacwalo, Mushe ni Elia ba yemela bomañi mwa kutwisiso ya ku fetuha? Luka u bulela kuli ne ba bonahezi ni Jesu “ka kanya.” (Luka 9:31) Ka ku iponelwa fela, ba yemela Bakreste ba ba tozizwe ka moya o kenile kuli ba “ce sanda” ni Jesu mi ili bao ka muinelo o cwalo ba amuhezi sepo ye nde hahulu ya kuli ba “fumane kanya ni yena.” (Maroma 8:17) Batoziwa ba ba zusizwe ba ka ba ni Jesu ha ka taha mwa kanya ya Ndat’ahe ku t’o “fa mutu ni mutu mupuzo wa z’a ezize.”—Mateu 16:27.

Lipaki Sina Mushe ni Elia

13. Ki miinelo ifi ye bonisa kuli Mushe ni Elia ba swanela ku yemela ka bupolofita batoziwa ba ba ca sanda ni Jesu ili ba ba fumana kanya ni yena?

¹³ Ku na ni miinelo ye lemuseha ye bonisa Mushe ni Elia ku ba ba ba swanela ku yemela ka bupolofita batoziwa ba Jesu bao ba ca sanda ni yena. Mushe hamohocwalo ni Elia ne ba sebelize sina babuleli ba Jehova ka lilimo ze ñata. Bubeli bwa bona ne ba talimani ni buhali bwa mubusi. Mwa nako ya butokwi, yo muñwi ni yo muñwi wa bona n’a babalezwi ki lubasi lo lu si lwa mushobo wahabo yena. Bubeli bwa bona ne ba polofitile ka bundume kwa malena mi ne ba tiyezi bapolofita ba buhata. Mushe hamohocwalo ni Elia ne ba boni liponiso za m’ata a Jehova fa lilundu la Sinai (leo hape li bizwa Horebe). Bubeli bwa bona ne ba ketile bayoli ba nze ba li kwa neku la upa wa Jordani. Mi linako za Mushe (ni Joshua) hamohocwalo ni Elia (ni Elisha) ne li bile ni limakazo ze ñata ka ku fitisisa, kwand’a ze ne li ezahezi mwahal’a nako ya bupilo bwa Jesu.b

14. Batoziwa se ba sebelize cwañi sina babuleli ba Jehova, inge Mushe ni Elia?

¹⁴ Kana zeo kaufela ha li lu hupulisi ka za Isilaele wa Mulimu. Ee, luli. Jesu n’a bulelezi balateleli ba hae ba ba sepahala kuli: “Mu ye cwale, mu lute macaba kaufela, mu ba kolobeze ka Libizo la Ndate, ni la Mwana, ni la Moya o Kenile; Mu ba lute ku mamela ze ni mi laezi kaufela, Mi a mu bone, na, ni inzi ni mina ka mazazi kaufela, ku isa kwa mafelelezo a lifasi.” (Mateu 28:19, 20) Ka ku ipeya ku utwa ona manzwi ao, Bakreste ba ba tozizwe se ba sebelize sina babuleli ba Jehova haisali ku zwiwa ka Pentekonta 33 C.E. ku t’o fita cwale. Ka ku swana sina Mushe ni Elia, se ba talimani ni buhali bwa babusi mi se ba file bupaki ku bona. Jesu n’a bulelezi baapositola ba hae ba 12 kuli: “Mu ka isiwa kwa babusisi ni kwa malena, kabakala ka, kuli ibe bupaki ku bona ni kwa macaba.” (Mateu 10:18) Manzwi a hae se a talelelizwe ka ku kuta-kutela mwahal’a ku ba teñi kwa puteho ya Sikreste.—Likezo 25:6, 11, 12, 24-27; 26:3.

15, 16. Ki ku swana kufi ko ku li teñi mwahal’a batoziwa kwa lineku le liñwi ni Mushe ni Elia ku le liñwi mwa taba ya (a) ku yemela niti kwa bona ka ku tokwa sabo? (b) ku tusiwa kwa bona ki ba ba si Maisilaele?

¹⁵ Fahalimu a zeo, Bakreste ba ba tozizwe se ba bile ba ba si na sabo sina Mushe ni Elia mwa ku yemela niti ha i lwanisana ni lishano la bulapeli. Mu hupule ka m’o Paulusi n’a zwapaulezi Bar-Jesu mupolofita wa buhata wa Mujuda ni mwa n’a tompololezi buhata bwa milimu ya ba mwa Atene ka maseme kono ili ka ku tiya. (Likezo 13:6-12; 17:16, 22-31) Hape, mu hupule kuli mwa linako za cwale bomasialeti ba ba tozizwe se ba tompolozi Krestendomu ka bundume mi ku fa bupaki ko ku cwalo se ku mu ziyelize.—Sinulo 8:7-12.c

¹⁶ Mushe ha n’a balehile buhali bwa Faro, n’a iz’o kundama mwa ndu ya Reuele ya n’a si Muisilaele, ili y’o hape a bizwa Jetero. Ka nako ye ñwi hamulaho, Mushe n’a amuhezi kelezo ya butokwa hahulu ya tamaiso ili kelezo ye ne i filwe ki Reuele, ili y’o mwan’a hae Hobabi n’a sebelize sina meto a Isilaele mwa lihalaupa.d (Exoda 2:15-22; 18:5-27; Numere 10:29) Kana lilama za Isilaele wa Mulimu se ba tusizwe ka nzila ye swana ki batu ba ba si lilama ba ba tozizwe ba Isilaele wa Mulimu? Ee, se ba yemezwi ki “buñata bo butuna” bwa “lingu ze ñwi,” ba ba se ba bonahezi mwahal’a mazazi a maungulelo a. (Sinulo 7:9; Joani 10:16; Isaya 61:5) Ka ku bulela cimo ka za kemelo ye mufutumala, ye lilato yeo “lingu” bao ne ba ka fa kwa banyani ba hae ba ba tozizwe, Jesu n’a ba bulelezi ka bupolofita kuli: “Ne ni lapile, mi mwa ni fa, na ca; ne ni shwile linyolwa, mi mwa ni fa, na nwa; ne ni li muenyi, mi mwa ni nopa; Ne ni inzi mapunu, mi mwa ni apesa; ne ni kula, mi mwa ni lekula; ne ni li mwa tolongo, mi mwa taha ku na. . . . Kaniti na mi bulelela, ni li: Kamita ha mu ezize yo muñwi wa banyani ba ka bao cwalo, nihaiba yo munyinyani ku bona, ki na ye mu ezize cwalo.”—Mateu 25:35-40.

17. Batoziwa ne ba ipumani cwañi mwa muinelo o swana ni wa Elia fa lilundu la Horebe?

¹⁷ Ku zwa f’o, Isilaele wa Mulimu n’a ipumani mwa muinelo o konwa ku bapanyiwa ku wa Elia fa lilundu la Horebe.e Ka ku swana sina Elia ka nako ya n’a baleha ku Muoli Jezebele, bomasialeti ba ba tozizwe ba ne ba li mwa sabo ye tuna ne ba nahanile kuli musebezi wa bona ne se u felile kwa mafelelezo a Ndwa ya Lifasi ya I. Ku zwa f’o, hape ka ku swana sina Elia, ne ba talimani ni Jehova, ya n’a tile kwa ku atula likopano ze ne li ipapata ku ba “ba Ndu ya Mulimu.” (1 Pitrosi 4:17; Malaki 3:1-3) Hailif’o Krestendomu n’a si ka kwanisa ze tokwahala, bomasialeti ba ba tozizwe ne ba lumezwi kuli ki bona “mutanga ya sepahala, ya na ni kutwisiso” mi ne ba beilwe ku zamaisa z’a luwile Jesu kaufela fa lifasi-mubu. (Mateu 24:45-47) Kwa Horebe, Elia n’a utwile “linzwi le li shobota, le lisisani” le ne li fumanehile ku ba la Jehova, le ne li mu fa musebezi o muñwi wa ku eza. Mwa lilimo ze ne kuzize za hamulaho wa ndwa, batanga ba Jehova ba ba tozizwe ili ba ba sepahala ne ba utwile linzwi la hae ku zwelela mwa makepe a Bibele. Ni bona ne ba lemuhile kuli ne ba na ni musebezi o ne ba na ni ku peta.—1 Malena 19:4, 9-18; Sinulo 11:7-13.

18. Liponahazo ze zwile mubano za m’ata a Jehova se li bonahalizwe cwañi ka Isilaele wa Mulimu?

¹⁸ Ka ku feleleza, kana ku bile ni liponahazo ze ipitezi za m’ata a Jehova ze ezizwe ka Isilaele wa Mulimu? Hamulaho wa lifu la Jesu, baapositola ne ba ezize limakazo ze ñata, kono zona zeo ne li felile hanyinyani-hanyinyani. (1 Makorinte 13:8-13) Mazazi a, ha lu boni limakazo ka nzila ya kwa mubili. Niteñi, Jesu n’a bulelezi balateleli ba hae kuli: “Kaniti-niti na mi bulelela, ni li, Ya lumela ku na, ni yena u ka eza misebezi ye ni eza; mane u ka eza ye mituna ku fita.” (Joani 14:12) Seo ne si bile ni talelezo ya pili balutiwa ba Jesu ha ne ba nze ba kutaza taba ye nde mwahal’a Mubuso wa Roma kamukana mwa lilimo za mwanda wa pili. (Maroma 10:18) Misebezi ye mituna ni ku fita i ezizwe kacenu bomasialeti ba ba tozizwe ha ba nze ba etelela ku kutazwa kwa taba ye nde “mwa lifasi kaufela, ibe bupaki mwa macaba kamukana.” (Mateu 24:14) Ki sifi se si zwile mwateñi? Lilimo za mwanda wa bu-20 se li ipumani mwa ku kubukanyiwa kwa palo ye tuna ka ku fitisisa ya batanga ba Jehova ba ba ineezi, ba ba sepahala haisali. (Sinulo 5:9, 10; 7:9, 10) Ki bupaki kwa butuna bwa m’ata a Jehova!—Isaya 60:22.

Banyani ba Jesu Ba Taha ka Kanya

19. Ki lili f’o banyani ba Jesu ba ba tozizwe ba bonwa ni yena mwa kanya?

¹⁹ Bomasialeti ba banyani ba Jesu ba ba tozizwe ha ba nze ba feza bupilo bwa bona bwa fa lifasi-mubu, ba fita fa ku fumana kanya hamoho ni yena. (Maroma 2:6, 7; 1 Makorinte 15:53; 1 Matesalonika 4:14, 17) Kacwalo ba fita fa ku ba malena ba ba li baprisita ba ba sa shwi mwa Mubuso wa kwa lihalimu. Hamoho ni Jesu, kiha ba ka “lisa [macaba] ka mulamu wa sipi, a ka tubiwa sina lipizana za lizupa.” (Sinulo 2:27; 20:4-6; Samu 110:2, 5, 6) Hamoho ni Jesu, ba ka ina fa mabona ili ku atula “masika a Isilaele a lishumi ka a mabeli.” (Mateu 19:28) Pupo ye sweli ku tonga se i libelezi zona likezahalo zeo ka ku shukelwa hahulu, ili ze li kalulo ya “ku patululwa kwa bana ba Mulimu.”—Maroma 8:19-21; 2 Matesalonika 1:6-8.

20. (a) Ku fetuha ne ku tiisize tumelo ya Pitrosi ku za tibelelo ifi? (b) Ku fetuha ku tiisa cwañi Bakreste kacenu?

²⁰ Paulusi n’a bulezi ka za ku patululwa kwa Jesu mwahal’a “ñalelwa ye tuna” ha n’a ñozi kuli: “[U] ka taha, mwa lizazi lani, ku t’o fiwa kanya [ni, NW] ba hae ba ba kenile, ni ku ezwa ya komokisa ka ba ba lumezi kaufela.” (Mateu 24:21; 2 Matesalonika 1:10) Yeo ki tibelelo ye makalisa hakalo ya Pitrosi, Jakobo, Joani, ni Bakreste kamukana ba ba tozizwe ka moya! Ku fetuha ne ku tiisize tumelo ya Pitrosi. Ka buniti fela, ku bala ka za kona ku tiisa hape tumelo ya luna mi ku tiisa buikolwiso bwa luna bwa kuli Jesu u ka tuha a “fa mutu ni mutu mupuzo wa z’a ezize.” Bakreste ba ba tozizwe ba ba sepahala ba ba pilile ku t’o fita kacenu ba bona buikolwiso bwa bona bu nze bu tiiswa bwa kuli ba ka fumana kanya ni Jesu. Lingu ze ñwi ba tiiswa tumelo ka zibo ya kuli u ka ba punyusa kwa mafelelezo a muinelo wa linto o maswe wo ni ku ba kenya mwa lifasi le linca la kanya. (Sinulo 7:14) Yeo ki susuezo hakalo kwa neku la ku yema ka ku tiya ku isa kwa mafelelezo! Hape yona pono ye i kona ku lu luta ze ñwi ze ñata, sina ha lu ka bona mwa taba ye latelela.

[Litaluso za kwatasi]

Kana Mwa Hupula?

◻ Ki bomañi ba ne ba bonahezi ni Jesu mwa ku fetuha?

◻ Tumelo ya baapositola ne i tiisizwe cwañi ki ku fetuha?

◻ Mushe ni Elia ha ne ba bonahezi “ka kanya” hamoho ni Jesu mwa ku fetuha, ne ba yemela bomañi?

◻ Ki ku swana kufi ko ku li teñi mwahal’a Mushe ni Elia kwa lineku le liñwi ni Isilaele wa Mulimu ku le liñwi?

[Siswaniso se si fa likepe 8]

Ku fetuha ne ku tiisize tumelo ya Bakreste kwamulaho ni mwa nako ya cwale