Jesu Uluta Batu Inze Aya Kwa Jerusalema

Jesu saezelize hahulu musebezi wahae mwa Galilea, ili mwanaafumani batu babatabela kufita ba mwa Judea. Hape Jesu hanaali mwa Jerusalema ni hanaafolisize muuna ka la Sabata, “Majuda . . . babata hahulu kumubulaya.”—Joani 5:18; 7:1.

Seli kwa makalelo a maliha a silimo sa 32 C.E., mi Mukiti wa Majuda wa Litabernakele (kamba wa Minganda) usutelezi. Mukiti wo ueziwangwa ka mazazi a 7, mi utatamiwanga ki mukopano oeziwangwa fa lizazi labu 8. Mukiti wo ubanga kwa mafelelezo a kutulo ya silimo mi ibanga nako ya tabo yetuna hahulu ni yakufa linubu za buitumelo.

Banyani ba Jesu—ili Jakobo, Simoni, Josefa, ni Judasi—bamubulelela kuli: “Uzwe mwa sibaka se, mi uye mwa Judea.” Jerusalema ki ona mutomo wa bulapeli. Ka nako yekueziwanga mikiti yemilaalu ya ka silimo mwa muleneñi wo kutalanga batu. Banyani ba Jesu bali: “Hakuna mutu yaeza lika kwa mukunda inze abata kuzibahala kwa nyangela. Haiba ueza lika ze, iponahaze kwa lifasi.”—Joani 7:3, 4.

Niti kikuli, banyani ba Jesu babane ba, ‘hababonisi tumelo ku yena,’ sina Mesia. Kono babata kuli batu babakubukani kwa mukiti ba mubone haeza limakazo. Ka kuziba butata bwakueza cwalo, Jesu ubabulelela kuli: “Lifasi halina libaka la kumitoya, kono linitoile, kakuli nipaka kuli misebezi yalona imaswe. Mina muye kwa mukiti; na haniyi kwa mukiti wo pili, kakuli nako yaka haisika kwanelela kale.”—Joani 7:5-8.

Hamulaho wa mazazi, banyani ba Jesu baya ni sikwata sa bazamai. Jesu ni balutiwa bahae baya ka nzila isili kusina yababona. Bafita nzila yepuma mwa Samaria, kufita kuya ka nzila yezibahala yeli bukaufi ni Nuka ya Jordani. Jesu ni balutiwa bahae bakatokwa kwa kuyo fitela mwa Samaria, ka mukwa ocwalo, uluma batu kuyo lukisa mafitelo. Batu ba mwa sibaka sesiñwi bahana kubaamuhela kamba kubabonisa moya wa kamuhelo bakeñisa kuli Jesu uya kwa Jerusalema kwa mukiti wa Majuda. Jakobo ni Joani ka bunyemi babuza kuli: “Mulena, kana walata kuli lubize mulilo kuzwa kwa lihalimu uto bayundisa?” (Luka 9:54) Jesu wabakalimela bakeñisa kuakaleza nto yecwalo mi bazwelapili mwa musipili.

Habanze bali mwa nzila, muñoli yomuñwi ali ku Jesu: “Muluti, nika kulatelela kouka ya kaufela.” Jesu ualaba kuli: “Mawawa anani misima, ni linyunywani za lihalimu linani liyaleto, kono Mwanaa mutu haana fakusamela toho yahae.” (Mateu 8:19, 20) Utalusa kuli muñoli yo uka kopana ni miinelo yetaata haiba aba mulateleli wa Jesu. Mi kubonahala kuli muñoli yo haana buikokobezo kuli apile bupilo bobucwalo. Lwakona kuipuza kuli: ‘Kana luli natabela kulatelela Jesu?’

Jesu ubulelela muuna yomuñwi kuli: “Nilatelele.” Muuna yo ualaba kuli: “Mulena, nilumeleze niye pili, niyo pumbeka bo ndate.” Ka kuziba muinelo wa muuna yo, Jesu uli: “Utuhele bafu bapumbeke bafu babona, kono wena uye uyo shaela Mubuso wa Mulimu kai ni kai.” (Luka 9:59, 60) Kubonahala kuli ndatahe muuna yo usapila. Kambe ushwile, mwendi muuna yo naasike ataha kuto ambola ni Jesu. Muuna yo hasika itukiseza kubeya za Mubuso wa Mulimu mwa sibaka sapili mwa bupilo bwahae.

Habanze bali mwa nzila yeliba kwa Jerusalema, muuna yomuñwi uli ku Jesu: “Nika kulatelela Mulena, kono nilumeleze pili, niyo laeza ba ndu yaka.” Jesu ualaba kuli: “Hakuna mutu yasweli sikekele ni kutalima lika ze kwamulaho yaswanela mwa Mubuso wa Mulimu.”—Luka 9:61, 62.

Bababata kuba balutiwa ba Jesu ba niti baswanela kutalima feela za sebelezo ya Mubuso. Haiba mutu yakekela haatalimeli kwapili, sikekele sikakeluha mwa mufolo. Mi haiba atuhela sikekele ni kuitemuna kwamulaho, simu yahae haina kufela kapili. Ka nzila yeswana, mutu kaufela yatalima lika za kwamulaho za mwa lifasi la kale le, wakona kusitatala ni kupalelwa kuzamaya mwa nzila yeisa kwa bupilo bobusa feli.