Musamaria Ubonisa Kuli Ki Mwanahabo Luli

Jesu inzaa sali mwa Jerusalema, Majuda babañata bamuatumela. Babañwi babata kuituta ku yena kono babañwi babata kumulika. Yomuñwi wabona, ili yaziba hande Mulao, umubuza kuli: “Muluti, ki sifi senitokwa kueza kuli niyole saanda sa bupilo bobusa feli?”—Luka 10:25.

Jesu ulemuha kuli muuna yo habati feela kuziba kalabo. Mwendi ubata kuli Jesu aalabe ka nzila yekatahisa kuli afoseze Majuda. Jesu ulemuha kuli muuna yo unani mubonelo omuñwi. Ka mukwa ocwalo, umualaba ka butali ili ka nzila yetahisa kuli muuna yo apatulule zanahana.

Jesu umubuza kuli: “Kuñozwiñi mwa Mulao? Zeubala mwateñi libonisañi?” Muuna yo uitutile Mulao wa Mulimu, ka mukwa ocwalo, ualaba ka kuya ka zeñozwi mwateñi. Ubulela manzwi añozwi kwa Deuteronoma 6:5 ni Livitike 19:18, uli: “‘Ulukela kulata Jehova Mulimu wahao ka pilu yahao kaufela ni ka moyo wahao kaufela ni ka maata ahao kaufela ni ka munahano wahao kaufela,’ ni ‘kulata wahenu mouitatela.’” (Luka 10:26, 27) Kana ki yona kalabo yeo?

Jesu ubulelela muuna yo kuli: “Unepile; uzwelepili kueza cwalo mi ukafumana bupilo.” Kono kana puisano yeo ifelela fo? Muuna yo habati feela kalabo; ubata “kuiponahaza kuba yalukile,” kuli abonise kuli mubonelo wahae ka za mwangela batu babañwi ulukile. Ka mukwa ocwalo ubuza kuli: “Kanti wahesu luli ki mañi?” (Luka 10:28, 29) Puzo yebonahala kuba yebunolo yeo iama lika zeñata. Ka mukwa ufi?

Majuda balumela kuli mwanahabo bona ki mutu yamamela lizo za Sijuda, mi mwendi kubonahala kuli liñolo la Livitike 19:18 la yemela muhupulo wo. Mane Mujuda ukona kuunga kuli “mulao haulumelezi” kueza siango ni batu babasi Majuda. (Likezo 10:28) Ka mukwa ocwalo, muuna yo mwendi ni babañwi kwa balateleli ba Jesu baikutwa kuli balukile hahulu haiba baeza Majuda babañwi ka sishemo. Kono bakona kusaeza ka sishemo mutu yasi Mujuda; kakuli haki mwanahabo bona luli.

Jesu ukona kusikulula cwañi mubonelo wo, asa nyemisi muuna yo ni Majuda babañwi? Usikulula muuna yo, ka kukandeka likande, uli: “Mutu yomuñwi naashetumuka kuzwa kwa Jerusalema kuya kwa Jeriko mi aipumana mwahalaa masholi bane bamutubuzi liapalo zahae, ni kumunata, mi baikela, kumusiya inze awelezi.” Jesu uzwelapili uli: “Cwale kwaezahala kuli, muprisita yomuñwi naashetumuka mwa nzila yeo, kono hanaaboni mutu yo, amukekuluhela mwabuse bobuñwi bwa nzila. Ka mukwa oswana, Mulivi yomuñwi, hanaatilo fita fo, amubona, mi amukekuluhela mwabuse bobuñwi bwa nzila. Kono Musamaria yomuñwi yanaafita mwa nzila yeo ato mufumana, mi hamubona, amushwela makeke.”—Luka 10:30-33.

Muuna yo yakandekelwa ki Jesu mwendi waziba kuli baprista babañata ni Malivi babatusanga kwa tempele bapila mwa Jeriko. Habazwa kwa tempele kukutela kwa Jeriko, baswanela kuzamaya musipili oeza likilomita ze 23. Nzila yebafita imaswe hahulu kakuli kufumanehanga masholi. Muprisita kamba Mulivi hafumana Mujuda yaziyelehile, kana haswaneli kumutusa? Mwa likande lahae, Jesu ubulela kuli nebasika mutusa. Yanaa mutusize neli Musamaria, ili mutu yazwa mwa sicaba sesikendiwa ki Majuda.—Joani 8:48.

Musamaria naatusize cwañi Mujuda yaholofalizwe? Jesu uzwelapili uli: “Kihaa sutelela ku yena mi atama litombo zahae, asela fateñi oli ni waine. Cwale amubeya fa folofolo yahae mi amuisa kwa hotela ni kumubabalela. Habusa aanga lidinari zepeli, alifa muñaa hotela, mi ali: ‘Babalela mutu yo, mi haiba uitusisa masheleñi amañata kufita a, ni kato kulifa ona hanika kuta.’”—Luka 10:34, 35.

Hasa kandekile likande leo, Muluti Yomutuna, yena Jesu, ubuza muuna yanaabuzize puzo, uli: “Ki ufi ku babalaalu bao yeubona kuli naabonisize kuli ki mwanahabo mutu yo yanaaipumani mwahalaa masholi?” Mwendi muuna yo upalelwa kualaba ka kulukuluha kuli ki “Musamaria,” ka mukwa ocwalo, uli: “Ki yanaa muezize ka sishemo.” Cwale Jesu ubonisa zelitalusa likande lahae. Ulaela muuna yo kuli: “Hakuye, mi uyo eza cwalo ni wena.”—Luka 10:36, 37.

Ye ki nzila yende yakuluta batu ka yona! Kambe Jesu naabulelezi muuna yo kuli batu besi Majuda ni bona ki banabahabo yena, kana muuna yo ni Majuda babañwi bane bateeleza ku yena nebaka lumela taba yeo? Mwendi nebasike balumela. Ka mukwa ocwalo, ka kukandeka likande ka bukuswani, ni kuitusisa litaba zebakona utwisisa hande bateelezi bahae, Jesu naalabile hande puzo ya kuli, “Kanti wahesu luli ki mañi?” Mwanahabo mutu luli ki yabonisa lilato ni sishemo ili zeo Mañolo alulaela kuba ni zona.