Mu Sabe Jehova, M’utwi wa Tapelo

“Wena ya utwa milapelo, batu kaufela ba ka ta ku Wena.”—LISAMU 65:2.

 1. Ki kabakalañi ha lu swanela ku libelela Jehova ku ba ni milao kwa neku la bao ba ba lakaza ku mu atumela mwa tapelo?

JEHOVA MULIMU ki “Mulena wa kamita.” Ki yena hape “Ya utwa milapelo,” ili y’o “batu kaufela ba ka ta ku [yena].” (Sinulo 15:3, NW; Lisamu 65:2) Kono ba swanela ku taha ku yena kamukwaufi? Malena ba fa lifasi ba na ni milao ye zamaisa lika ze cwale ka litino ni mukwa w’o ba ba taha fapil’a bona ba swanela ku ba ni ona. Kaniti, kacwalo he, lu swanela ku libelela Mulena wa Ku Ya Ku Ile ku ba ni milao ye na ni ku talelezwa ki mañi ni mañi ya lakaza ku taha fapil’a hae ka kupo ni buitumelo.—Mafilipi 4:6, 7.

 2. Ki lipuzo mañi ze zuha fa taba ya tapelo?

² Ki sifi seo Mulena wa Ku Ya Ku Ile a tokwa kwa neku la bao ba ba mu atumela mwa tapelo? Ki mañi ya kona ku lapela ni ku utwiwa? Mi ba kona ku lapela ka za nto mañi?

Ku Atumela Mulena wa Ku Ya Ku Ile

 3. Ki mitala ifi ye mu kona ku fa ya litapelo ze ne li filwe ki batanga ba Mulimu ba kwa makalelo, mi kana ne ba mu atumezi ka muyema-mwahali?

³ Pili a si ka fita kale fa ku ba muezalibi, Adama, “mwan’a Mulimu,” ka ku ya ka bupaki n’a bulelisananga ni Mulena wa Ku Ya Ku Ile. (Luka 3:38; Genese 1:26-28) Mwan’a Adama wa mushimani Abele ha n’a tahisize ku Mulimu “ku za maizibulo a mitapi ya hae,” ku si na ku kakanya sona sitabelo seo ne si zamaelela ni lipulelo za kupo ni tumbo. (Genese 4:2-4) Nuwe, Abrahama, Isaka, ni Jakobo ne ba yahile lialetare ni ku atumela Jehova ka tapelo fahalimw’a ze ne ba fa sitabelo. (Genese 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7) Mi litapelo za Salumoni, Ezira, ni bañoli ba lisamu ba ne ba buyelezwi ka bumulimu li bonisa kuli Maisilaele ne ba atumela Mulimu ku si na muyema-mwahali.—1 Malena 8:22-24; Ezira 9:5, 6; Lisamu 6:1, 2; 43:1; 55:1; 61:1; 72:1; 80:1; 143:1.

 4. (a) Ki ufi muatumelelo o munca ku Mulimu mwa tapelo o ne u tomilwe mwa lilimo za mwanda wa pili? (b) Ki kabakalañi ha ku li ko ku swanela hahulu kuli tapelo i fiwe mwa libizo la Jesu?

⁴ Muatumelelo o munca ku Mulimu ne u tomilwe mwa lilimo za mwanda wa pili wa Nako ya Luna ye Zibahala. Ne li ka Mwan’a hae, Jesu Kreste, ya n’a na ni lilato le li ipitezi kwa mufuta wa mutu. Mwa bupilo bwa hae pili a si ka ba kale mutu fa lifasi-mubu, Jesu n’a sebelize ka tabo sina ya na “mu sebeleza,” mi lika za n’a wabelelwa ne li ze ama mufuta wa mutu. (Liproverbia 8:30, 31) Ka ku ba sina mutu fa lifasi-mubu, Jesu ka lilato n’a tusize batu ba ba si ka petahala kwa neku la kwa moya, ku folisa ba ne ba kula, mi mane nihaiba ku zusa bafu. (Mateu 9:35-38; Luka 8:1-3, 49-56) Fahalimw’a seo kaufela, Jesu ‘na file moyo wa hae sina tiululo ya ba bañata.’ (Mateu 20:28) Ki ku swanela hakalo, kacwalo he, kuli bao ba b’a nga muhato fa tukiso ya tiululo ba swanela ku atumela Mulimu ka yena y’o ya lata hahulu mufuta wa mutu! Yeo ki yona nzila fela i nosi ya ku atumela ka yona Mulena wa Ku Ya Ku Ile, kakuli Jesu yena ka sibili n’a bulezi kuli: “Ha ku na mutu ya ka taha ku Ndate, konji ka na” mi, “Se mu ka kupa kaufela ku Ndate, u ka mi fa sona ka Libizo la ka.” (Joani 14:6; 16:23) Ku kupa lika mwa libizo la Jesu ku talusa ku mu ziba sina nzila ya ku atumela ka yona M’utwi wa tapelo.

 5. Ki ufi mubonelo wa Mulimu kwa lifasi la mufuta wa mutu, mi seo si ama cwañi tapelo?

⁵ Sihulu lu swanela ku itebuha lilato la bonisize Mulimu ka ku fa tiululo. Jesu n’a bulezi kuli: “Mulimu u latile lifasi hahulu [la mufuta wa mutu], mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Butungi bwa lilato la Mulimu bu bonisizwe mwa manzwi a walisamu a li: “Kakuli lihalimu sina mo li pahamezi kwahalimw’a lifasi, sishemo sa hae ki se situna cwalo ku ba ba mu saba. Upa sina mo i inezi kwahule ni Wiko, ni lifoso za luna, u li sutiseza kwahule cwalo. Sina ndat’ahe mutu mw’a utwelela bana ba hae butuku, [Jehova, NW] u utwela ba ba mu saba, butuku cwalo. Kakuli u ziba se lu bupilwe ka sona, u nz’a hupula kuli lu liluli fela.” (Lisamu 103:11-14) Ki ko ku tabisa hakalo ku ziba kuli litapelo za Lipaki za Jehova ba ba ineezi li kambamela ku Ndate ya lilato cwalo ka Mwan’a hae!

Tohonolo Ye Si ya Mañi ni Mañi

 6. Ki ka moya ufi w’o ka ona lu lukela ku atumela Jehova mwa tapelo?

⁶ Malena ba butu ha ba lumelezi mutu kaufela ku to kena mwa lapa la bulena a si ka zibahazwa. Ku ba hamoho ni mulena haki tohonolo ya mañi ni mañi. Ku cwalo ni kwa neku la tapelo ku Mulena wa kamita. Ka mo ku inezi fela, bao ba ba mu atumela ka Jesu Kreste ili ka buitebuho bo bu swanela bwa ku kutekeha ko ku kanya kwa Mulimu ba kona ku libelela ku utwiwa. Mulena wa Ku Ya Ku Ile u lukelwa ku atumelwa ka moya wa likute le lituna, ni wa ka tapelo. Mi bao ba ba lakaza ku utwiwa ba lukela ku bonisa “ku saba [Jehova, NW].”—Liproverbia 1:7.

 7. “Ku saba [Jehova, NW]” ki nto mañi?

⁷ “Ku saba [Jehova, NW]” ki nto mañi? Ki likute le lituna ka ku fitisisa ku Mulimu, le li kopanyeleza cwalo ni sabo ye lukile ya ku saba ku sa mu tabisa. Yona sabo ye tuna yeo i zwelela fa buitebuho bo bu tungile fa sishemo sa hae se si lilato ni bunde bwa hae. (Lisamu 106:1) I ama ku mu lumela sina Mulena wa kamita, ya na ni tukelo ni m’ata a ku fa koto, ku kopanyeleza cwalo ni lifu, fahalimw’a mañi ni mañi ya sa mu utwi. Batu ba ba bonisa sabo ya Jehova ne ba kana ba lapela ku yena ka tibelelo ya ku utwiwa.

 8. Ki kabakalañi Mulimu h’a utwa litapelo za bao ba ba mu saba?

⁸ Ka mo ku inezi fela, Mulimu h’a alabi litapelo za batu ba ba maswe, ba ba sa sepahali, ni ba ba ipala kuli ba lukile ka ili bona. (Liproverbia 15:29; Isaya 1:15; Luka 18:9-14) Kono bao ba ba saba Jehova ba utwiwa kakuli ba latelela lipimo za hae ze lukile. Niteñi, se ba ezize ze fitelela seo. Bao ba ba saba Jehova se ba ezize buineelo ku Mulimu mwa tapelo ni ku bonisa seo ka kolobezo ya mwa mezi. Kacwalo ba na ni tohonolo ye sa konwi ku tibelwa ya tapelo.

 9, 10. Kana mutu ya si ka kolobezwa wa kona ku lapela ka ku ba ni sepo ya ku utwiwa?

⁹ Ku utwiwa ki Mulimu, mutu u lukela ku fitisa maikuto a’ zwelela kwa pilu a’ zamaelela ni tato ya bumulimu. Ee, u lukela ku ba y’a buniti, kono ze ñata za tokwahala. “Kwand’a tumelo mutu h’a koni ku tabelwa ki Yena,” ko na mwa n’a ñolezi muapositola Paulusi, “kakuli ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.” (Maheberu 11:6) Kacwalo he, kana batu ba ba si ka kolobezwa ba konwa ku susuezwa ku lapela ili ka sepo ya ku utwiwa?

¹⁰ Ka ku izibela kuli tapelo ki tohonolo ye si ya mañi ni mañi, Mulena Salumoni n’a kupile kuli Jehova a utwe fela bazwahule ba ba lapela kwa neku la tempele mwa Jerusalema. (1 Malena 8:41-43) Hamulaho wa lilimo ze myanda-nda, muzwahule ya n’a li Mulicaba Kornele “n’a sa katali ku lapela Mulimu” sina mutu wa mulapeli. Hamulaho wa ku fumana zibo ye nepahezi, Kornele a ineela ili yena ku Mulimu, ili y’o cwale n’a mu file moya o kenile. Hamulaho wa seo, Kornele ni Balicaba bañwi ne ba kolobelizwe. (Likezo 10:1-44) Ka ku swana sina Kornele, ufi kamba ufi kacenu ya eza zwelopili ye isa kwa buineelo n’a kana a susuezwa ku lapela. Kono mutu ya si na buniti mwa ku ituta Mañolo, h’a zibi milao ya bumulimu ka za tapelo, mi ili ya si ka bonisa kale moya o tabisa ku Mulimu h’a konwi ku bulela kuli wa saba Jehova, ku ba ni tumelo, kamba wa mu bata ka tundamo. Mutu ya cwalo h’a yo mwa mayemo a ku fa litapelo ze amuheleha ku Mulimu.

11. Ki sifi se si ezahezi ku ba bañwi ba ne ba eza zwelopili ye isa kwa buineelo, mi ki sifi se ba swanela ku ipuza ili bona?

¹¹ Ba bañwi ili bao ka nako ye ñwi ne ba eza zwelopili ye isa kwa buineelo hamulaho ne ba kana ba bonahala ku kutela mwamulaho. Haiba ha ba na lilato le li likani ku Mulimu mwa lipilu za bona kuli ba eze buineelo ku yena bo bu si na ñolamenyi, ba na ni ku ipuza isali bona haiba ba sa na ni tohonolo ye makaza ya tapelo. Ka mo ku bonahalela ha ba na yona, kakuli bao ba ba atumela Mulimu ba swanela ku ba ba ba mu bata ka tundamo ni ku bata ku luka ni ku ishuwa. (Zefania 2:3) Mañi ni mañi ya saba luli Jehova ki mulumeli ya eza buineelo ku Mulimu ni ku bonisa seo ka ku kolobezwa. (Likezo 8:13; 18:8) Mi ki balumeli fela ba ba kolobelizwe ba ba na ni tohonolo ye si ka tibelwa ya ku atumela Mulena wa Ku Ya Ku Ile mwa tapelo.

“Mu nze mu Lapela ka Moya o Kenile”

12. Ki l’ili f’o ku konwa ku bulelelwa kuli mutu u “lapela ka [moya o kenile]?”

¹² Mutu ha s’a ezize buineelo ku Mulimu ni ku bonisa seo ka ku kolobezwa, u mwa mayemo a ku ‘lapela ka moya o kenile.’ Ka ku ama ku se, Juda n’a ñozi kuli: “Kono mina balatiwa mu ikahele fa mutomo wa tumelo ya mina ye kenile hahulu, mu nze mu lapela ka [moya o kenile]. Mu tiiseze mwa lilato la Mulimu, inze mu libelezi sishemo sa Mulen’a luna Jesu Kreste, kuli mu bone bupilo bo bu sa feli.” (Juda 20, 21) Mutu u lapela ka moya o kenile muta a lapela ka ku ba mwatas’a susuezo ya moya wa Mulimu, kamba m’ata a sebeza, mi ili ka ku lumelelana ni lika ze bulezwi mwa Linzwi la Hae. Mañolo, a’ ñozwi mwatas’a puyelelo ya moya wa Jehova, a lu bonisa ka mwa ku lapelela ni seo lu swanela ku si kupa mwa tapelo. Sina ka mutala, lwa kona ku lapela ka buikolwiso kuli Mulimu a lu fe moya wa hae o kenile. (Luka. 11:13) Ha lu lapela ka moya o kenile, litapelo za luna li sinula muinelo wa luna wa mwa pilu w’a lata Jehova.

13. Haiba lu lapela ka moya o kenile, ki sifi se lu ka pima, mi ki kelezo ifi ya Jesu ye lu ka sebelisa?

¹³ Ha lu lapela ka moya o kenile, litapelo za luna ha li si ka tala manzwi a buikanyisi. Ha li na mibulelelo ye kuta-kutelwa ili ye ñozwi. Batili, h’a na lipulelo za manzwi a bulapeli a’ si na taluso ni ye kana, manzwi a’ si a’ buniti a tumbo. Litapelo za mufuta o cwalo ki ze ñata mwa Krestendomu ni Babilona yo Mutuna kaufela, puso ya lifasi kamukana ya bulapeli bwa buhata. Kono Bakreste ba niti ba utwa kelezo ya Jesu ye li: “Ha mu lapela ha mu swaneli ku ba sina mo ba inezi baipi; kakuli ba lata ku lapela inze ba yemi mwa masinagoge ni kwa makozwana a mikwakwa ye mituna, ili kuli ba bonwe ki batu . . . Mi mwa ku lapela mu si ke mwa kuta-kutela manzwi sina bahedeni; kakuli [ka mafosisa] ba hupula kuli ba ka utwiwa ka buñata bwa ze ba bulela. Kacwalo mu si ke mwa ba sina bona.”—Mateu 6:5-8, Byington.

14. Ki maikuto a fi a kutwisiso ye tuna ao ba bañwi se ba ezize ka ku ama kwa tapelo?

¹⁴ Kwand’a Jesu ni bañoli ba Bibele, ba bañwi se ba file maikuto a kutwisiso ye tuna ka za tapelo. Sina ka mutala, muñoli wa mwa England John Bunyan (1628-88) na bulezi kuli: “Tapelo ki ku sulula moyo ku Mulimu, ko ku buniti, ko ku utwahala, ni ko ku lilato, ka Kreste, mwa m’ata ni tuso ya Moya, kwa neku la lika zeo Mulimu a sepisize.” Sikombwa mwa tumelo ya Puritan Thomas Brooks (1608-80) n’a lemuhile kuli: “Mulimu h’a talimi kwa mubulelelo o munde wa litapelo za hao, mo ne li kana za bela ze nde; kamba butuna bwa litapelo za hao, mo ne li kana za bela ze telele; kamba kwa ku ata kwa litapelo za hao, mo ne li kana za bela ze ñata; isiñi butali bwa litapelo za hao, mo ne li kana za tahisezwa hande; kono u talima kwa buniti bwa zona.” Kwa maikuto ao ne ku kana kwa kopanywa teñi manzwi a Bunyan a’ li: “Mwa tapelo se sinde ni ku fita ki ku ba ni pilu ye si na manzwi, ku fita ku ba ni manzwi a si na pilu.” Kono haiba lu na ni buniti mi lwa taleleza litokwahalo za bumulimu, lu kona ku ba cwañi ni buikolwiso bwa kuli Mulena wa kamita u ka utwa litapelo za luna?

N’a si ka Fulalela

15. Ka ku nonga fa sisupo, ki sifi seo Jesu n’a si talusa kwa Luka 11:5-8?

¹⁵ Jehova Mulimu ni kamuta h’a fulaleli litapelo za batanga ba hae ba ba ineezi. Se ne si utwahezi ka ku tala mwa manzwi a’ mufutumala a Jesu muta balutiwa ba hae ne ba kupile ketelelo kwa neku la tapelo. Mwa kalulo ye ñwi n’a bulezi kuli: “Mutu ku mina h’a na ni mulikani, mi a ya ku yena fahal’a busihu, a mu kupa a li: Mulikani, u ni kalime linkwa ze talu za buhobe; Kakuli ni fitezwi ki mulikan’a ka ya n’a ile mwa musipili, mi ha ni na se ni ka mu yumbula. Mi yo, ya mwa ndu, kab’a mu alaba, a li: U si ke wa ni kataza; sikwalo si kwalilwe, mi bana ba ka ba banyinyani ba teñi ku na fa bulobalo; ni palelwa ku zuha kuli ni ku fe. Na mi bulelela, ni li: Niha n’a si ke a zuha ku y’o mu fa kabakala kuli ki mulikan’a hae, nihakulicwalo u ka zuha, a mu fe z’a tokwa kaufela, kabakala ku tundamena kwa hae.” (Luka 11:1, 5-8) Ki sifi sisupo sa yona swanisezo yeo?

16. Ka ku ama kwa tapelo, ki sifi seo Jesu n’a tokwa kuli lu si eze?

¹⁶ Jesu ka buniti luli n’a sa talusi kuli Jehova haki ya itatela ku lu tusa. Ka ku fapahana, Kreste u bata kuli lu sepe Mulimu ka ku tala ni ku mu lata hahulu kuli mane ha lu tuheli ku lapela ku yena. Kacwalo, Jesu n’a zwezipili kuli: “Mi na mi bulelela, ni li: Mu kupe, mi mu ka fiwa; mu bate, mi mu ka fumana; mu ngongote, mi mu ka kwalulelwa.” (Luka 11:9, 10) Kacwalo he, kaniti luli, lu swanela ku zwelapili ku lapela ha lu ipumana mwa nyandiso, ku ikutwa maswabi a matuna bakeñisa bufokoli bo butuna bwa ka butu, kamba muliko ufi kamba ufi. Jehova kamita u itukiselize ku tusa batanga ba hae ba ba sepahala. Ni kamuta h’a lu talusezi kuli: “U si ke wa ni kataza.”

17, 18. (a) Jesu n’a lu susuelize cwañi ku kupa moya o kenile, mi ki sifi se si ekeza kwa m’ata a manzwi a hae? (b) Jesu n’a bapanyize cwañi likezo za mushemi wa fa lifasi ni zeo za Mulimu?

¹⁷ Kuli lu ikole silikani se sinde ni Mulimu, lu tokwa moya wa hae o kenile, kamba m’ata a sebeza. Kacwalo, Jesu n’a zwezipili kuli: “Ndat’ahe mutu ki ufi ku mina, [haiba mwan’a hae a kupa tapi, mwendi u ka mu fa noha mwa sibaka sa tapi, NW]? Kamba h’a kupa lii, a ka mu fa kabanze? Mbali mina ba ba na ni lunya, mu ziba ku fa bana ba mina lika ze nde, Ndate ya kwa lihalimu u ka mi fita hahulu mwa ku fa [moya o kenile] ku ba ba u kupa ku yena.” (Luka 11:11-13) Mateu 7:9-11 i bulela ka za ku fa licwe mwa sibaka sa buhobe. M’ata a manzwi a Jesu a ekezeha haiba lu lemuha kuli buhobe bwa mwa manaha a Bibele a kwaikale ne bu likana ni ku swana sina licwe le li patami, le li cica. Mifuta ye miñwi ya linoha i swana ni mifuta ye miñwi ya litapi, mi ku na ni kabanze ka kanyinyani ili ka ka sweu ka ka bat’o swana ni lii. Kono haiba ku kupiwa buhobe, tapi, kamba lii, ki ndate wa mufuta mañi ya n’a ka fa mwan’a hae licwe, noha, kamba kabanze?

¹⁸ Jesu cwale u bapanya likezo za mushemi wa fa lifasi ni mihato ya Mulimu kwa neku la lilama za lubasi lwa Hae lwa balapeli. Haiba luna, ka ku ba ba ba maswe hahulu kamba hanyinyani bakeñisa sibi se si hozizwe, lu fa limpo ze nde kwa bana ba luna, ki ka butuna bo bu fita kai b’o lu swanela ku libelela Ndat’a luna wa kwa lihalimu ku fa mpo ye nde hahulu ya moya wa hae o kenile kwa batanga ba hae ba ba sepahala ba ba u kupa!

19. Ki sifi se si taluswa ki manzwi a Jesu a’ kwa Luka 11:11-13 ni Mateu 7:9-11? (b) Haiba lu zamaiswa ki moya o kenile, lu ka talima cwañi litiko za luna?

¹⁹ Manzwi a Jesu a bonisa kuli lu swanela ku kupa Mulimu kuli a lu fe moya wa Hae o kenile ka buñata. Haiba lu zamaiswa ki ona, ha lu na ku ‘bilaezwa ki butata bwa mwa bupilo’ ni ku bona litiko ni maswabi a taha ka mapalelwi sina lika ze maswe hahulu ku luna. (Juda 16) Ki niti, “mutu ya pepilwe ki musali, bupilo bwa hae ki bo bukuswani, Mi bu tezi maziyezi,” mi ba bañata ha ba si ka pila ili kuli ba bone mafelelezo a manyando a bona ni masitapilu. (Jobo 14:1) Kono ni kamuta lu si ke lwa bona litiko za luna sina macwe, linoha, ni tubanze t’o M’utwi wa tapelo n’a kana a bonahala kuli u lu file tona. Ki yena simuluho ya lilato mi ha liki mutu ufi kamba ufi ka lika ze maswe. Ka ku fapahana, u lu fa ‘mpo kaufela ye nde ni ye petehile.’ Kwa mafelelezo, u ka tisa kuli lika kaufela li be ze lukile ku bao kamukana ba ba mu lata ni ku mu saba. (Jakobo 1:12-17; 1 Joani 4:8) Bao ba se ba zamaile mwa niti ka lilimo ze ñata ba ziba ku zwelela ku ze ipumanwi teñi kuli litiko za bona ze ñwi ze tuna ka ku fitisisa, ka tapelo ni tumelo, se li ba tiselize tuso mi se li ekelize muselo wa moya wa Mulimu mwa bupilo bwa bona. (3 Joani 4) Ka buniti fela, ki ka nzila mañi ye nde yeo lu kona ku ituta ku itinga ku Ndat’a luna wa kwa lihalimu mi ni ku tusiwa ku hulisa muselo wa moya wa lilato, tabo, kozo, pilu-telele, musa, bunde, busepahali, ku ishuwa, ni buiswalo?—Magalata 5:22, 23.

20. Manzwi a Jesu a ñozwi kwa Luka 11:5-13 a swanela ku lu ama kamukwaufi?

²⁰ Manzwi a Jesu a ñozwi kwa Luka 11:5-13 kacwalo a lu fa koñomeko ye fuyozwi ya lilato la Jehova ni pabalelo ye musa. Seo si swanela ku taza lipilu za luna ka buitumelo bo bu tungile ni lilato. Si swanela ku tiisa tumelo ya luna ni ku ekeza takazo ya luna ya ku ya hañata kwa sipula sa buhato bwa mautu a Mulena wa Ku Ya Ku Ile ni ku yongobela fapil’a hae. Fahalimw’a seo, manzwi a Jesu a lu fa buikolwiso bwa kuli ni kamuta ha lu na ku fulalelwa lu si na ni se si kana. Ndat’a luna wa kwa lihalimu ki ya tabile hahulu ha lu beya milwalo ya luna ku yena. (Lisamu 55:22; 121:1-3) Mi luna, ka ku ba sina batanga ba hae ba ba sepahala ili ba ba ineezi, ha lu kupa moya wa hae o kenile, wa lu fa ona ka sishemo. Yo ki yena Mulimu wa luna y’a lilato, mi lwa kona ku ba ni tumelo ye tezi ya kuli ki M’utwi wa litapelo za luna.

Kana Mwa Hupula?

◻ Lu lukela ku atumela Mulimu mwa tapelo ka mañi, mi ki kabakalañi?

◻ Ki mwa nzila mañi m’o tapelo isi tohonolo ya mañi ni mañi?

◻ Ku talusañi ku ‘lapela ka moya o kenile’?

◻ Mu kona ku fa cwañi bupaki ku zwelela mwa Mañolo kuli litapelo za Lipaki za Jehova ba ba sepahala ili ba ba kolobelizwe za utwiwa?

[Maswaniso a fa likepe 25]

Sina bo ndate ba butu ha ba fa limpo ze nde kwa bana ba bona, Jehova u fa moya o kenile ku bao ba ba mu kupa