Mu Utwe Ba Ba mi Zamaisa

“Mu utwe bazamaisi ba mina, mi mu ipeye kwatas’a bona; kakuli ba tonela [mioyo, “NW”] ya mina, hailifo ba ka buzwa za yona.”—MAHEBERU 13:17.

 1. Lu fumana cwañi tuso ku zwelela mwa musebezi wa baokameli ba Sikreste?

JEHOVA u se a tahisize baokameli mwa kopano ya hae mwa “nako ya maungulo” ye. (Daniele 12:4) Ba nga ketelelo mwa ku babalela bao ba ba swana sina lingu, mi tamaiso ya bona ki ye wetulusa. (Isaya 32:1, 2) Fahalimw’a seo, okamelo ye lilato ka maeluda ba ba utwela mutapi wa Mulimu butuku i sebeza sina silelezo ku Satani ni muinelo wa hae o maswe wa linto.—Likezo 20:28-30; 1 Pitrosi 5:8; 1 Joani 5:19.

 2. Ba bañwi ne ba bona cwañi muapositola Paulusi, kono ki mubonelo mañi kwa neku la maeluda o swanela?

² Kono mu bona cwañi maeluda? Kana mwa pilu ya mina, mwa bulela kuli: ‘Ha ni sa na ku ya ku eluda ni yo mukana mwa puteho mo haiba ni na ni butata, kakuli ha ni sa na sepo ni ye kana ku ufi kamba ufi wa ku bona’? Haiba ko na mo mu ikutwela cwalo, kana kikuli mu koñomeka mifokolo ya bona ka nzila ye fitelezi tikanyo? Mwa Korinte wa kwaikale, ba bañwi ne ba bulezi ka za muapositola Paulusi kuli: “Mañolo a hae a na ni buima ni mata; kono yena h’a li teñi ka mubili, ki mutu ya fokozi, mi ku bulela kwa hae ki nto ye nyazahala.” Niteñi, Mulimu n’a file Paulusi bukombwa mi n’a itusisize yena sina “muapositola wa bamacaba.” (2 Makorinte 10:10; Maroma 11:13; 1 Timotea 1:12) Kwa sepiwa, kacwalohe, kuli mu ikutwa ni ku fita sina kaizeli ya na bulezi kuli: “Lu na ni sitopa sa maeluda se si nde ka ku fitisisa mwa lifasi. Ne ba li teñi fa ku to lu tusa ha ne ku tokwahala.”

Libaka ha lu Swanela ku ba Utwa?

 3. Kuli Mulena a be ni moya o lu bonisa, lu swanela ku talima cwañi balisana ba banyinyani ba Sikreste?

³ Bakeñisa kuli balisana ba banyinyani ba Sikreste ba tahisizwe ki Mulisana yo Mutuna, Jehova Mulimu, mu hupula kuli u tokwa kuli lu ba talime kamukwaufi? Kaniti, Mulimu u lu libelela ku latelela ketelelo ye tomile fa Bibele ye amuhelwa ku zwelela kwa baokameli ba ba lilato mwatas’a tamaiso ya Sitopa se si Busa sa Lipaki za Jehova. Kacwalo, ‘Mulena u ka ba ni moya o lu bonisa,’ lu ka ikola kozo, mi lu ka yahiwa kwa neku la kwa moya.—2 Timotea 4:22; mu bapanye Likezo 9:31; 15:23-32.

 4. Luna ka butu lu kona ku sebelisa cwañi Maheberu 13:7?

⁴ Paulusi n’a susuelize kuli: “Mu hupule ba ba mi zamaisa, ba ba mi bulelezi Linzwi la Mulimu; mu likanyise tumelo ya bona, mi mu lemuhe mafelelezo a bupilo bwa bona.” (Maheberu 13:7) Mwahal’a Bakreste ba pili, baapositola ne li bona ba ne ba ngile ketelelo ye tuna. Kacenu, lwa kona ku iponela bao ba ba bupa Sitopa se si Busa sa Lipaki za Jehova, baokameli ba bañwi ba ba tozizwe, ni banna ba “buñata bo butuna” ba ba zamaisa mwahal’a luna. (Sinulo 7:9) Nihaike ha lu susuezwi ku likanyisa mulumo wa linzwi la bona, muyemelo, kamba mikwa ye miñwi ya butu, lu swanela ku ezisa muzamao wa luna ku ba o munde ka ku likanyisa tumelo ya bona.

 5. Fa lifasi-mubu kacenu, buikalabelo bo butuna bwa ku babalela puteho ya Sikreste bu filwe ku mañi, mi ki sifi se si ba swanela?

⁵ Fa lifasi-mubu kacenu, buikalabelo bo butuna bwa ku babalela butokwi bwa luna bwa kwa moya bu filwe ku “mutanga ya sepahala, ya na ni kutwisiso.” Muyemeli wa hae ili Sitopa se si Busa s’i nga ketelelo ni ku zamaisa musebezi wa ku kutaza Mubuso lifasi kamukana. (Mateu 24:14, 45-47) Sihulu bona maeluda bao ba ba tozizwe ka moya ba swanela ku bonwa sina babusisi bwa kwa moya, kakuli Maheberu 13:7 i konwa ku tolokwa sina: “Mu beye mwa munahano bao ba ba mi . . . busa.” (Kingdom Interlinear) Ka ku ba ni liputeho ze fitelela 60,000 ni bazibahazi ba Mubuso ba ba fitelela 3,500,000, maeluda ba 12 ba ba bupa Sitopa se si Busa ba na ni ‘ze ñata za ku eza mwa musebezi wa Mulena.’ (1 Makorinte 15:58) Ka ku beya mwa munahano musebezi wa bona wa ba file Mulimu, ba lukela ku fiwa swalisano ya luna ye tezi, sina mane sitopa se si busa sa mwa lilimo za mwanda wa pili ha ne si fumani swalisano ku zwelela kwa Bakreste ba kwa makalelo.—Likezo 15:1, 2.

 6. Ki lifi lika ze ñwi ze ezwa ki maeluda ili ku tusa batu ba Jehova?

⁶ Baokameli ba ketilwe ka moya mwa ku babalela butokwi bwa puteho. (Likezo 20:28) Ba bona teñi kuli taba ya Mubuso ya kutaziwa mwa kalulo ya puteho ya fa silalanda. Bona banna bao ba ba fitile ku ze konisa za mwa Mañolo hape ba fa ketelelo ya kwa moya ka mukwa o lilato. Ba fa kelezo, ku omba-omba, ni ku fa bupaki kwa mizwale ni likaizeli ba bona ba kwa moya, ili kuli bona bao ba zwelepili ku zamaya ka mukwa o swanela Mulimu. (1 Matesalonika 2:7, 8, 11, 12) Mutu h’a nga muhato o fosahezi pili a si ka lemuha seo, bona banna bao ba lika ku mu kutisa “ka moya o musa.”—Magalata 6:1.

 7. Ki kelezo mañi ya n’a file Paulusi kwa Maheberu 13:17?

⁷ Lipilu za luna li susuezwa ku swalisana hamoho ni baokameli ba ba cwalo ba ba lilato. Seo ki se si swanela, sina Paulusi ha n’a ñozi kuli: “Mu utwe bazamaisi ba mina, mi mu ipeye kwatas’a bona; kakuli ba tonela [mioyo, NW] ya mina, hailifo ba ka buzwa za yona.” (Maheberu 13:17) Lu swanela ku utwisisa cwañi kelezo ye?

 8, 9. (a) Ka ku beya mwa munahano Maheberu 13:17, ki kabakalani ha lu swanela ku utwa ba ba lu zamaisa? (b) Ku utwa kwa luna ni ku ipeya kwatasi ku kona ku tisa lika lifi ze nde?

⁸ Paulusi u lu susueza ku utwa bao ba ba lu busa kwa moya. Lu na ni ku “ipeya kwatas’a” bona, ku teeleza ku bona balisana ba banyinyani bao. Libaka? Bakeñisa kuli ‘ba tonela mioyo ya luna,’ kamba bupilo bo bu neezwi ku Mulimu. Mi “ba tonela” kamukwaufi? Fa linzwi la Sigerike le li bonisa ku eza sika mwahal’a nako la a·gru·pneʹo li talusa ka sibili kuli maeluda “ha ba lobali.” Seo si lu hupuza ka za mulisana ya mwa-kamutwa ya sa lobali ka libaka la ku bukeleza lingu za hae mwahal’a nako ya libatana za busihu. Maeluda ka linako ze ñwi ha ba lobali bakeñisa mamelelo ya ka tapelo kwa neku la mutapi wa Mulimu kamba mwa ku fa tuso ya kwa moya kwa balumeli sina bona. Lu swanela ku itebuha hakalo sebelezo ya bona ya ka busepahali! Kaniti, ha lu bati ku ba sina “batu ba ba si na bulapeli” ba mwa lizazi la Juda ba ne ba ‘shwaula bulena ni ku nyefula ba ba kanya,’ maeluda ba Sikreste ba ba tozizwe ba ne ba na ni kanya ye zwelela ku Mulimu, kamba likute, le ne li beilwe fahalimw’a bona.—Juda 3,4, 8.

⁹ Jehova h’a na ku taba haiba ne lu ka palelwa ku utwa ni ku ipeya kwatas’a baokameli ba Sikreste. Seo hape ne si ka fumaneha ku ba se si buima ku bona mi ne si ka lu holofaza kwa neku la kwa moya. Haiba ne lu si ke lwa ba ni moya wa swalisano, maeluda ne ba kana ba babalela misebezi ya bona ka pilaelo, mwendi ka moya wa ku zwafa ili o kona ku tisa ku latehelwa ki tabo mwa misebezi ya luna ya Sikreste. Kono ku utwa kwa luna ni ku ipeya kwatasi ku hulisa muzamao wa bumulimu ni ku tiisa tumelo ya luna. ‘Mulena u ba ni moya o lu bonisa,’ mi tabo ya ekezeha mwa muinelo o cwalo wa swalisano, kozo, ni buñwi.—2 Timotea 4:22; Lisamu 133:1.

10. Ka ku ya ka 1 Timotea 5:17, ki kabakalañi bao ba ba lisa ka nzila ye nde ha ba tokwa ku kutekiwa?

¹⁰ Ku utwa kwa luna ni ku ipeya kwatas’a maeluda ba mwa puteho ha ku talusi kuli lu bata ku tabisa batu. Seo haki sa mwa mañolo, kakuli batanga ba Sikreste ba mwa lilimo za mwanda wa pili ne ba taluselizwe kuli ba utwe malen’a bona, “mu si ke mwa sebeleza ha ba mi talimile fela, inge mu bata ku tabisa batu, kono mu eze ka pilu ye kenile, inze mu saba [Jehova, NW].” (Makolose 3:22; Maefese 6:5, 6) Baokameli ba ba ‘lisa ka nzila ye nde ni ku sebeza ka tata mwa ku bulela ni ku luta’ ba swanelwa ki likute sihulu bakeñisa kuli tuto ya bona i tomile fa Linzwi la Mulimu. Sina ka mwa n’a ñolezi Paulusi kuli: “Ba bahulu ba ba lisa hande, u ba talime kuli ba lukela ku kutekiwa mane ku fita, sihulu ba ba sebeza ka ku talusa ni ka ku luta Linzwi. Kakuli Liñolo li li: U si ke wa tiba mulomo wa pulu ha i pula mabele. Hape li li: Ya sebeza u swanelwa ki mupuzo wa hae.”—1 Timotea 5:17, 18.

11. “Ku kutekiwa mane ku fita” ne ku kana kwa taha ku eluda kamukwaufi, kono ki sifi sa lukela ku pima?

¹¹ Manzwi a Paulusi a sa z’o taluswa a bonisa kuli tuso ya kwa mubili ya kona ku fiwa ka nzila ye lukile ku bao ba ba babalela licisehelo za kwa moya za ba bañwi. Niteñi, seo ha si talusi kuli maeluda ba swanela ku amuhela tuwelo, mi “ku kutekiwa mane ku fita” kaniti haki nto ye sineneketwa ki eluda. Ne ku kana kwa taha ku zwelela kwa lilama za puteho ka taho, kono h’a lukeli ni kamuta ku itusisa kalulo ya hae mwa ku ba ni m’ata kamba lika za kwa mubili. Ha swaneli ku bata kanya ya hae kamba ku swalisana fela ni ba ba fumile ili kuli a fumane tuso ya kwa mubili ni ku keshebisa ba bañwi. (Liproverbia 25:27; 29:23; Juda 16) Ka ku fapahana, muokameli u swanela ku lisa mutapi wa Mulimu ‘ka ku itatela, isi kabakala bufumu bo bu maswe, kono ka pilu ye lata.’—1 Pitrosi 5:2.

12. Ki ka ku beya nto mañi mwa munahano ha lu kona ku tusiwa ku utwa bao ba ba zamaisa mwahal’a luna?

¹² Lu ka tusiwa mwa ku utwa ni ku kuteka bao ba ba zamaisa haiba lu hupula kuli Mulimu ka sibili ki yena ya tahisize maeluda. (Maefese 4:7-13) Bakeñisa kuli bona banna bao ba ketilwe ka moya ni kuli kopano ya Mulimu i na ni kalulo ye butokwa hahulu mwa bupilo bwa Lipaki za Jehova, kaniti lu bata ku bonisa buitebuho bwa luna ni likute kwa litukiso za teokratiki. Fahalimw’a seo, lwa kona ku tusa ba banca mwa ku hulisa ona mubonelo wo haiba lu beya mutala wa ku utwa ni ku ipeya kwatas’a bao ba ba zamaisa mwahal’a luna.

Ki Kabakalañi ha lu Swanela ku Itebuha Sebelezo ya Bona?

13. (a) Ki ifi mibonelo ye fapahana ya tamaiso ye fumaneha mwa lifasi ni mwa kopano ya Mulimu? (b) Ki afi mabaka a utwahala a lu na ni ona a ku ba ni buikolwiso kwa neku la banna ba ba zamaisa mwahal’a luna? (c) Mwa sibaka sa ku ezisa mifokolo ya maeluda ba ba sebeza ka tata ku ba nto ye tuna, ki sifi se lu swanela ku eza?

¹³ Mwa lifasi, ku na ni tengamo ya ku hana tamaiso. Sina muluti yo muñwi wa kwa yunivesiti ha n’a bulezi kuli: “Ku hula kwa sipimo sa tuto ku se ku zwezipili hahulu kuli mane sikuka sa buikoneli se si fitile fa kuli balateleli ba be ba batisisi ba milatu ili ku tahisa kuli ku bat’o ba ko ku sa konahali ku ba zamaisa.” Kono moya wa buipanguli ha u fumanehi mwa kopano ya Mulimu, mi lu na ni mabaka a utwahala a ku ba ni buikolwiso kwa neku la banna ba ba zamaisa mwahal’a luna. Sina ka mutala, ki bao fela ba ba fita ku ze tokwahala za mwa Mañolo ba ba ketiwa sina maeluda. (1 Timotea 3:1-7) Ba lutilwe ku ba ni sishemo, lilato, ni ku ba ni tuso, niteñi inze ba li ba ba tiile mwa ku kumalela fa lipimo ze lukile za Jehova. Maeluda ba ipeya kwatas’a niti ya mwa Mañolo, ‘ku swala ka tata fa linzwi le li sepahala, ili kuli ba kone ku fa kelezo ka tuto ye yahisa.’ (Tite 1:5-9) Ka mo ku inezi fela, ha lu swaneli ku ezisa bufokoli bwa bona sina nto ye tuna, kakuli kaufel’a luna ha lu si ka petahala. (1 Malena 8:46; Maroma 5:12) Mwa sibaka sa ku ikutwa ku zwafa bakeñisa mapalelwi a bona ni ku nga kelezo ya bona ka likesha, ha lu itebuheñi ni ku amuhela ketelelo ye tomile fa Bibele ya maeluda sina ye zwelela ku Mulimu.

14. Ka ku beya mwa munahano 1 Timotea 1:12, eluda u swanela ku talima bukombwa bwa filwe kamukwaufi?

¹⁴ Paulusi, mutu ya n’a na ni buitebuho, na bulezi kuli: “Ni isa buitumelo ku Jesu Kreste Mulen’a luna ya ni file mata, kakuli u ni boni ku sepahala, mi u ni kenyize mwa musebezi wa Evangeli.” (1 Timotea 1:12) Ona musebezi wa bukombwa wo, kamba sebelezo, ne u kopanyeleza cwalo ni musebezi wa ku kutaza ni ku sebeleza balumeli sina yena. Nihaike muokameli u filwe musebezi ka moya o kenile wa ku sebeza sina mulisana, seo ha si swaneli ku mu ezisa ku ikutwa ku ba yo mutuna ku fita ba bañwi, kakuli yena ka sibili ki kalulo ya mutapi wa Mulimu wa batu ba ba swana sina lingu. (1 Pitrosi 5:4) Ka ku fapahana, u swanela ku ba ni buitebuho kuli Toho ya puteho, Jesu Kreste, u mu fumani sina ya swanela ku kombwekela lilama za mutapi ni kuli Mulimu u mu fitisize ku ze konisa ka ku mu fa sipimo sa zibo, butali, ni kutwisiso. (2 Makorinte 3:5) Bakeñisa kuli eluda u na ni libaka la ku ba ni buitebuho fa matohonolo a hae a’ filwe ki Mulimu, lilama ze ñwi za puteho ba swanela ku bonisa buitebuho fa bukombwa bo, kamba sebelezo.

15. Ki sifi sisupo sa kelezo ya Paulusi kwa 1 Matesalonika 5:12, 13?

¹⁵ Lipaki za Jehova ba itumela kwa kopano yeo Mulimu u se a tomile mwa mazazi a a maungulo, mi bona buitebuho b’o bu lu susueza ku kuteka maeluda. Lu swanela ku ba ba ba tabile mwa ku swalisana ka ku tala ni litukiso ze ba eza mwa ku lu tusa. Paulusi n’a bulezi kuli: “Lwa mi lapela banabahesu, lu li: Mu zibe ba ba sebeza ku mina, ba ba mi zamaisa ku Mulena ni ku mi eleza. Mu ba kuteke hahulu, ka lilato, kabakala musebezi wa bona.” (1 Matesalonika 5:12, 13) Ku sebelisa yona kelezo ye ku tahisa tabo ni mbuyoti ya Jehova.

Mu Sebelelise Kelezo Ka Bubebe

16, 17. Ki kelezo mañi ye ne ba kana ba fa maeluda ka ku ama fa linyalo, mi ki sifi se ne si kana sa zwelela mwa ku i latelela?

¹⁶ Paulusi n’a susuelize Tite ku ‘luta ni ku siulula batu ka m’ata kaufela.’ (Tite 2:15) Ka ku swana, bayemeli ba Mulimu kacenu ba lu etelela mwa likuka ni milao ya Bibele. Ku na ni mabaka a utwahala mwa ku amuhela kelezo ye kuta-kutezwi mwa ku sebelisa kelezo ni ketelelo ya kopano ya Jehova ni maeluda ba ba ketilwe.

¹⁷ Ka ku fa mutala: Maeluda ne ba kana ba susueza Mukreste ku latelela kelezo ya Bibele ya ku kena mwa linyalo fela “ku Mulena.” (1 Makorinte 7:39; Deuteronoma 7:3, 4) Ne ba kana ba supa kuli ku kena mwa linyalo ni mutu ya si ka kolobezwa ku kona ku tisa butata bo butuna, sina mane Mulena Salumoni ha n’a fitile fa ku eza mafosisa a matuna ka ku ikungela basali ba macaba a sili, ili ba ne ba sikululezi pilu ya hae kwa milimu ya buhata ni ku zwa ku Jehova. (1 Malena 11:1-6) Maeluda hape ne ba kana ba talusa kuli Ezira n’a boni teñi kuli banna ba Sijuda b’a leleka basali ba bona ba sihedeni, mi Nehemia n’a bulezi kuli bao ba ne ba nyala batu ba ba si balumeli ne ba ‘eza bufosi bo butuna ka ku nga muhato wa ku tokwa busepahali ku Mulimu.’ (Nehemia 13:23-27; Ezira 10:10-14; mu bone The Watchtower, March 15, 1982, likepe 31; November 15, 1986, makepe 26-30.) Limbuyoti ni buikolwiso bwa ku tabisa Jehova li tahiswa ki ku sebelisa kelezo ye cwalo ya mwa Mañolo ye filwe ki Maeluda ba ba lilato.

18. Ka ku beya mwa munahano seo Paulusi n’a si ñozwi kwa 1 Makorinte 5:9-13, ki ufi muhato o lu swanela ku nga haiba silama sa lubasi lwa luna u zwisizwe mwa puteho?

¹⁸ Ki nto ye lukile hape ku kuteka likatulo za buatuli za maeluda. Paulusi n’a taluselize Bakreste mwa Korinte kuli “mu si ke mwa kopana ni ya ipiza mwanahabo mina, bo ki lihule, kamba ya lakaza bufumu, kamba ya lapela milimu, kamba lihata, kamba litahwa, kamba lisholi; ya cwalo, mu si ke mwa ca lico ni yena.” Ne ba na ni ku ‘zwisa mutu ya maswe mwahal’a bona.’ (1 Makorinte 5:9-13) Kono ki ufi muhato o mu ka nga haiba yo muñwi wa banabahabo mina u zwisizwe mwa puteho? Hailifo ne ku kana kwa ba ni tokwahalo ya swalisano ya makutela-kaufi ya ku talima litaba za lubasi, swalisano kamukana ya kwa neku la kwa moya ni mutu ya zwisizwe mwa puteho i na ku ka kaulwa. (Mu bone Tora ya ku Libelela October 1, 1988, makepe 16-20.) Kaniti, busepahali ku Mulimu ni kwa kopano ya hae bu swanela ku lu susueza ku kuteka likatulo za buatuli za baokameli.

19. Ki sifi se lu swanela ku eza haiba maeluda ba lu bonisa kuli lu tengamezi mwa nzila ye fosahezi kwa neku la kwa moya?

¹⁹ Haki nto ye bunolo ku siyala inze lu inzi mwa nzila ye kumbani ye isa kwa bupilo. Ku eza cwalo, lu lukela ku latelela ketelelo ye filwe mwa Linzwi la Mulimu mi ni bao ba ba filwe buikalabelo bwa bulisana mwa kopano ya hae. (Mateu 7:13, 14) Haiba ne lu zamaya ka motikala ku zwa mwa muleneñi o muñwi ku ya ku o muñwi mi haiba ne lu kwenuhezi mwa nzila ye fosahalile, muhato ne u ka tokwahala mwa ku lukisa nzila ya luna. Hakusicwalo, ne lu si ke lwa fita ko lu lelile kuli lu fite teñi. Ka ku swana, haiba maeluda ba lu bonisa kuli lu tengamezi mwa nzila ye fosahezi kwa neku la kwa moya, mwendi ka ku eza libato ni mutu ye si mulumeli, lu swanela ku sebelisa ka bubebe kelezo ya bona ya mwa Mañolo. Yeo ne i ka ba nzila ye ñwi ya ku bonisa kuli luli lu ‘sepile Jehova.’—Liproverbia 3:5, 6.

Likute Nihaiba mwa Lika ze Nyinyani

20. Ki ka ku ipuza lipuzo lifi ze ka lu tusa mwa ku bonisa likute kwa ketelelo ya maeluda nihaiba mwa lika ze nyinyani?

²⁰ Lu tokwa ku bonisa likute kwa ketelelo ya maeluda nihaiba mwa lika ze nyinyani. Kacwalo ne lu kana lwa ipuza ili luna kuli: ‘Kana ni na ni moya wa swalisano muta maeluda ba lu kupa ku potela ba ba kula kamba ku twaeza ba banca mwa bukombwa bwa mwa simu? Kana luli na amuhela likalulo za fa mikopano ni ku itukiseza zona hande? Kana ni ya ipeya ku utwa muta maeluda ba ni fa ketelelo kwa neku la ku buluka lipula kwa mikopano ye mituna, mutinelo wa luna, ni ze ñwi cwalo? Kana ni na ni moya wa swalisano mu ta ba lu kupa ku tusa mwa ku kenisa Ndu ya Mubuso, ku biha sebelezo ya luna ya mwa simu ka bubebe, kamba ku fita kwa mikopano ka bunako?’

21. Ku bonisa kwa luna likute kwa maeluda ne ku kana kwa lu hupulisa manzwi afi a Jesu?

²¹ Baokameli ba puteho ba itebuha swalisano ya luna, mi seo si tahisa bunde bo butuna. Ka buniti fela, ku ba kwa luna ba ba na ni likute ni swalisano nihaiba mwa lika ze nyinyani ne ku kana kwa lu hupulisa manzwi a Jesu a li: “Ya sepahala ku ze nyinyani, u ka sepahala ni ku ze tuna.” (Luka 16:10) Kaniti, lu bata ku bonwa sina ba ba sepahala.

Mu Zwelepili Ku Nga Muhato fa Buokameli bo bu Lilato

22. Ki lifi lituso ze ñwi ze zwelela mwa buokameli bo bu lilato bwa mutanga ya sepahala ni maeluda ba mwa puteho?

²² Lituso ze zwelela mwa buokameli bo bu lilato bwa mutanga ya sepahala ni maeluda ba mwa puteho li bonisa kuli limbuyoti ze tuna za Jehova li fahalimw’a kopano ya hae ya fa lifasi-mubu. Fahalimw’a seo, ketelelo ya ka bucaziba ya maeluda i kopanya hamoho buikoneli bwa bona ni ku hulisa buñwi mwahal’a luna. Hape ku tahisa buikatazo bo bu mutomo ni ku kondisa lika mwa ku zwisezapili milelo ya Mubuso. Kaniti luli, se si nde se si zwelela mwa muhato wa luna o buniti wa buitebuho kwa buokameli bwa bao ba ba zamaisa ki sa kuli Mulimu u fuy’ola musebezi wa luna wa ku kutaza ni ku tahisa balutiwa. (Mateu 28:19, 20) Swalisano ya luna ni maeluda hape i lu ezisa ku ba ba ba itukiselize bupilo bwa kamita mwa muinelo o munca wa linto.

23. Mwa liseli la 1 Joani 5:3, ki sifi se lu swanela ku susuezwa ku eza?

²³ Bakeñisa kuli lu lata Jehova, ku mu utwa haki nto ye sa tabisi. Muapositola Joani n’a ñozwi kuli: “Kakuli ku lata Mulimu, kiha lu mamela litaelo za hae; mi litaelo za hae ha li na bukiti.” (1 Joani 5:3) Bakreste ba ba sepahala ba utwa litaelo za Jehova mi ba susuezwa ku swalisana ni bao a file buokameli mwa puteho. Lu ba ba itumela hakalo kuli lu mwa kopano ya Mulimu ni ku ba ni “batu [ba ba li, NW] limpo”! (Maefese 4:8) Ka buikolwiso bo bu tezi kuli Mulimu u etelela batu ba hae, kacwalohe, haike kamita lu be ba ba utwa bao ba ba filwe matohonolo a ku zamaisa mwahal’a Lipaki za Jehova.

Ki Afi Maikuto A Mina?

◻ Ki kabakalañi ha lu swanela ku utwa bao ba ba zamaisa mwahal’a luna?

◻ Ki ufi mubonelo o lu swanela ku ba ni ona ka ku ama kwa sebelezo ye fiwa ki maeluda ba ba sebeza ka tata?

◻ Ki kabakalañi ha lu swanela ku nga muhato wa ka bubebe mwa ku sebelisa kelezo ye filwe ki maeluda?

◻ Ki lifi lituso ze zwelela mwa ku nga kwa luna muhato wa buitebuho kwa buokameli bo bu lilato?

[Manzwi a fa likepe 31]

Kana mwa swalisana ni maeluda ka ku amuhela lingambolo za fa mikopano, ka ku tusa mwa ku kenisa Ndu ya Mubuso, ka ku biha musebezi wa mina wa sebelezo ya mwa simu ka bubebe, ni mwa linzila ze ñwi?

[Siswaniso se si fa likepe 30]

Paulusi n’a na ni tabo mwa ku kutaza taba ye nde ni ku sebeleza balumeli sina yena. Ka ku ba eluda, kana mwa itebuha matohonolo a mina a sebelezo a’ mi file Mulimu?