“Hamuziba Lika ze, Mukaba ni Tabo Hamu Lieza”

 1. Moya wa lifasi ukona kutahisa cwañi kuli kube taata kuikokobeza?

KI KABAKALAÑI hakuli taata kusebelisa zeluituta mwa Linzwi la Mulimu? Libaka leliñwi kikuli lutokwa kuba ni buikokobezo kuli lukone kueza lika zelukile, mi kuba ni buikokobezo ka nako kaufela haki nto yebunolo. Mwa “mazazi a mafelelezo” a, lupila mwahalaa batu babali “baitati, babalata masheleñi, babaitumbaeta, babaikankabeka” ni “babasina buiswalo.” (2 Tim. 3:1-3) Batanga ba Mulimu habatabeli mikwa yemaswe yeo, kono habasa tokomeli, bakona kukala kulakaza zebaikola batu babamaswe. (Samu 37:1; 73:3) Mutu ukona kuipuza kuli: ‘Kana luli kwatusa kuisa pilu kwa lika zebatokwa babañwi? Esi mwendi batu baka tuhela kunikuteka haiba niikeza “yomunyinyani”?’ (Luka 9:48) Haiba lutuhelela moya wa lifasi kulukukueza, lukasinya swalisano yeluikola mwa puteho ni kutahisa kuli batu babañwi bafumane taata kuziba kuli lu Bakreste. Kono haiba lubala litaba za batu babasepahala bababulezwi mwa Bibele ni kulikanyisa mutala wabona, lukatusiwa.

 2. Kunyakisisa mitala ya batanga ba Mulimu babasepahala kukona kulutusa cwañi?

² Haiba lubata kulikanyisa mitala ya batu bane basepahala, lutokwa kuziba lika zene baezize, ili zenetahisize kuli bafiwe limbuyoti. Ki lika mañi zenetahisize kuli babe balikani ba Mulimu, bazwelepili kumutabisa, ni kuba ni maata a kueza tato yahae? Kunahanisisa litaba zeo ki nzila yeñwi yelukona kutiiswa ka yona kwa moya.

3, 4. (a) Mulimu ulufanga cwañi ketelelo ya kwa moya? (b) Ki kabakalañi halukona kubulela kuli kuca lico za kwa moya hakuami feela kuituta litaba?

³ Mulimu uluelezanga ni kululuta ka kuitusisa Bibele, lihatiso zaluna, mawebusaiti aluna, progilamu ya JW Broadcasting, ni mikopano yaluna ya puteho ni yemituna. Kono ka kuya ka manzwi anaabulezi Jesu afumaneha kwa Joani 4:34, kuca lico za kwa moya hakuami feela kuituta litaba. Ki lika mañi zeñwi zelutokwa kueza? Jesu naabulezi kuli: “Sico saka ki kueza tato ya yena yanilumile ni kufeleleza musebezi wahae.”

⁴ Jesu naabonisize kuli kulatelela ketelelo ya Mulimu nekuswana sina lico ku yena. Ka mukwa ufi? Sina feela mibili yaluna haitiiswangwa ni kuba ni buikangulo bobunde haluca lico zende, lwakatuluhanga mi tumelo yaluna ya kuba ni bupilo bobusa feli yatiiswangwa halueza tato ya Mulimu. Mi hañata luikutwanga kutiiswa ni kukatuluha hamulaho wa kueza musebezi wa kukutaza, nihaike kuli mwendi sapili nelunani kuikapeleza kueza musebezi wo.

 5. Lutusiwa cwañi haluba ni butali?

⁵ Haiba lulatelela litaelo za Mulimu lubonisa kuli lunani butali. (Samu 107:43) Batu babanani butali bakafuyaulwa hahulu. Bibele ibulela cwana ka za butali: “Hakuna seulakaza sesikona kubufita. . . . Ki kota ya bupilo ku baba buswala, mi baba buswalelela bakabizwa babatabile.” (Liprov. 3:13-18) Jesu naabulezi kuli: “Hamuziba lika ze, mukaba ni tabo hamu lieza.” (Joa. 13:17) Balutiwa ba Jesu nebakaba ni tabo hane bakazwelapili kueza zanaa balaezi Jesu. Nebasa swaneli kulatelela lituto ni mutala wa Jesu ka nako yekuswani feela. Kono wo neuswanela kuba ona mupilelo wabona.

 6. Ki kabakalañi haluswanela kuzwelapili kusebelisa litaba zeluituta?

⁶ Ni kacenu, luswanela kuzwelapili kusebelisa litaba za niti zeluituta. Ka mutala, mulukisi wa limota ukona kuba ni lisebeliso ni liseli mwa musebezi wahae. Kono lika zeo halina kumutusa haiba asaitusisi zona. Kusina taba kuli kwamulaho naalukisanga limota mi ubile ni yeloseli, uswanela kuzwelapili kuitusisa zibo yabile ni yona kuli azwelepili kueza hande musebezi wo. Ka nzila yeswana, ni luna mwendi lukondisize mwa bupilo bakeñisa kusebelisa zene luitutile mwa Bibele. Kono kuli luzwelepili kuba ni tabo, luswanela kubonisa buikokobezo ka kumamela litaelo za Jehova zazi ni zazi.

 7. Ki lika mañi zeluswanela kueza kuli mitala ya batu bababulezwi mwa Bibele ilutuse kuba ni butali?

⁷ Halunyakisiseñi miinelo yekona kutahisa kuli kulubele taata kuikokobeza, ni mitala ya batu babasepahala bababulezwi mwa Bibele bane babonisize buikokobezo mwa miinelo yeswana yeo. Kono haiba lubata kuli litaba zeo lilutuse kutiya kwa moya, haluswaneli feela kulibala. Mañi ni mañi waluna uswanela kulinahanisisa ni kulisebelisa mwa bupilo bwahae kusina kuliyeha.

8, 9. Litaba zeñozwi kwa liñolo la Likezo 14:8-15 libonisa cwañi kuli muapositola Paulusi naanani buikokobezo? (Mubone siswaniso sesi fa likepe 3.)

⁸ Mulimu ubata kuli “batu ba mufuta kaufela bapiliswe mi babe ni zibo yenepahezi ya kuziba niti.” (1 Tim. 2:4) Muunga cwañi batu ba mufuta kaufela babasika ituta kale niti? Nihaike kuli muapositola Paulusi naakutalize mwa masinagoge kwa Majuda bane banani zibonyana ka za Mulimu, naasika kutaza feela ku bona. Hanaakutaza kwa batu bane balapela milimu ya buhata, naakopani ni muinelo one ulikile buikokobezo bwahae.

⁹ Ka mutala, mwa musipili wa Paulusi wa bulumiwa wapili, batu bane babulela puo ya Silikaonia nebaangile Paulusi ni Barnabasi kuba milimu, ka kunahana kuli milimu yabona ya buhata yebizwa Zeusi ni Hermesi ki yona yenefetuhile kuba sina batu. Kana bo Paulusi ni Barnabasi nebaikutwile kuli nebaswanela kuungiwa cwalo ki batu bao? Kana nebaikutwile kuli nebaswanela kulumbiwa haubona nebanyandisizwe hahulu mwa mileneñi yemibeli yene basazo potela? Kamba kana nebanahanile kuli hane bakatuma, nebaka tahisa kuli taba yende izibahale hahulu? Kutokwa nihanyinyani! Habautwile cwalo, bapazula liapalo zabona ni kumatela mwahalaa nyangela mi bahuwa, bali: “Kiñi hamueza lika ze? Ni luna lu batu babafokola sina mina.”—Lik. 14:8-15.

10. Bo Paulusi ni Barnabasi nebatalusañi ka kuibapanya kwa batu bane babulela puo ya Silikaonia?

¹⁰ Paulusi ni Barnabasi hane babulezi kuli ni bona nebasika petahala, nebasa talusi kuli bulapeli bwabona nebuswana ni bwa batu bao bane balapela milimu ya buhata. Kono kana bo Paulusi ni Barnabasi nesi balumiwa bane bafilwe musebezi oipitezi? (Lik. 13:2) Kana nebasika toziwa ka moya okenile ni kufiwa sepo ya kuyo pila kwa lihalimu? Ki cwalo, kono bo Paulusi ni Barnabasi nebaziba kuli batu bane babulela puo ya Silikaonia nebakona kufiwa limbuyoti zeswana hane baka amuhela taba yende.

11. Lukona kulikanyisa cwañi mutala wanaatomile Paulusi wa buikokobezo halukutaza?

¹¹ Lukona kulikanyisa cwañi buikokobezo bwanaabonisize Paulusi? Pili, luswanela kutokomela kuli halubi ni moya wa kubata kulumbiwa kamba kuamuhela tumbo yelufiwa kabakala kueza musebezi omuñwi ka tuso ya Jehova. Mañi ni mañi waluna uswanela kuipuza kuli: ‘Niinga cwañi batu bonikutaza ku bona? Esi mwendi niketululanga batu babañwi bakeñisa kuli batu babañata mwa sibaka senipila ku sona babaketululanga?’ Kwatabisa kuziba kuli Lipaki za Jehova mwa lifasi kaufela baikatazanga kubata batu babatabela taba yende mwa sibaka sebakutaleza ku sona. Fokuñwi batokwanga kuituta puo ni sizo sa batu babaketululwa ki batu babañata. Lipaki babakutaza kwa batu babacwalo habanahanangi kuli ki ba butokwa hahulu kubafita. Kono balikanga kuziba mwainezi mutu ni mutu kuli bamutuse kuamuhela lushango lwa Mubuso.

12. Epafrasi naabonisize cwañi kuli naaisa pilu babañwi luli?

¹² Nzila yeñwi yelukona kubonisa ka yona kuli lwalatelela ka buikokobezo ketelelo yalufa Mulimu ki ka kulapelelanga mizwale ni likaizeli baluna “babafumani tumelo ya butokwa sina yaluna.” (2 Pit. 1:1) Epafrasi naaezize cwalo. Bibele ibulela zahae halaalu mwa mañolo anaañozi Paulusi ka kususumezwa ki moya wa Mulimu. Paulusi hanaatamezwi mwa ndu kwa Roma, naañolezi Bakreste ba kwa Kolose ni kubataluseza kuli Epafrasi ‘kamita naaikataza kubalapelela.’ (Makolo. 4:12) Epafrasi naaziba hande mizwale bahae, mi naabaisa pilu luli. Naasika libala lika zene batokwa kwa moya kusina taba kuli naakopana ni miinelo yetaata, kuli mane Paulusi abulela kuli ‘naatamilwe hamoho’ ni yena. (Fil. 23) Naabatile nzila ya kubatusa ka yona. Taba yeo ibonisa kuli naalata babañwi luli. Kulapelela batanga ba Jehova babañwi kwatusa luli, sihulu haiba lubapunda fa mabizo.—2 Makor. 1:11; Jak. 5:16.

13. Mukona kulikanyisa cwañi mutala wa Epafrasi hamulapela?

¹³ Munahane za mizwale ni likaizeli bomukona kulapelela ka kubapunda fa mabizo. Ka kuswana ni Epafrasi, mizwale ni likaizeli babañata balapelelanga batu ba mwa puteho yabona ni mabasi anani buikalabelo bobuñata kamba atalimana ni miinelo yetaata. Babañwi balapelelanga mizwale ni likaizeli, ili bao mabizo abona abonisizwe fa webusaiti ya jw.org mwatasaa toho ya taba yeli, “Lipaki za Jehova Babatamezwi Tumelo Yabona” [“Jehovah’s Witnesses Imprisoned for Their Faith”]. (Mubone mwatasaa NEWSROOM > LEGAL DEVELOPMENTS.) Hape, luswanela kuhupulanga batu babashwezwi ki balatiwa babona, babapunyuhile likozi ni lindwa zesazo ezahala, ni babatalimana ni butata bwa kutokwa hande masheleñi. Kaniti, kunani mizwale ni likaizeli babañata bolutokwa kulapelela, ili babaka tusiwa ki litapelo zeo. Halu balapelela, lubonisa kuli haluisi pilu ku zaluna feela kono ni ku za babañwi. (Mafil. 2:4) Jehova wautwanga litapelo zecwalo.

14. Jehova ulutomezi cwañi mutala wa kuba muteelezi yomunde?

¹⁴ Nzila yeñwi yelukona kubonisa ka yona kuli lunani buikokobezo ki ka kuteeleza kwa maikuto a babañwi. Liñolo la Jakobo 1:19 libonisa kuli luswanela kuba ‘babaakufa kuteeleza.’ Jehova ki yena yalutomezi mutala omunde hahulu mwa taba yeo. (Gen. 18:32; Josh. 10:14) Ka mutala, halunyakisiseñi tuto yelukona kuituta mwa puisano yetalusizwe kwa liñolo la Exoda 32:11-14. (Mubale.) Nihaike kuli Jehova naasatokwi kuli Mushe amufe liakalezo, naafile Mushe kolo ya kutalusa maikuto ahae. Batu bona nebasike bakona kuteeleza ku mutu yacwalo yanaaezanga mafosisa ka linako zeñwi ni kulatelela akalezo yahae. Kono Jehova yena wateelezanga ka pilu-telele kwa batu babalapela ku yena ka tumelo.

15. Lukona kubonisa cwañi kuli lwakuteka babañwi sina mwaezeza Jehova?

¹⁵ Yomuñwi ni yomuñwi waluna uswanela kuipuza kuli: ‘Haiba Jehova akona kuinama kuli asebelisane ni batu ni kuteeleza ku bona sina mwanaaezelize ku Abrahama, Rahele, Mushe, Joshua, Manoa, Elia, ni Ezekiasi, kana ni na haniswaneli kukuteka mizwale baka kaufela ka kubateeleza habatalusa maikuto abona, mane nihaiba kulatelela liakalezo zabona? Kana kunani yomuñwi mwa puteho kamba mwa lubasi lwaka yenitokwa kuiseza hahulu mamelelo? Nikona kueza cwañi cwalo?’—Gen. 30:6; Baat. 13:9; 1 Mal. 17:22; 2 Makol. 30:20.

16. Mulena Davida naaezizeñi hanaafoselizwe ki Shimei?

¹⁶ Buikokobezo hape bulutusa kuba ni buiswalo halufosezwa. (Maef. 4:2) Lukona kufumana mutala omunde mwa taba yeo halubala 2 Samuele 16:5-13. (Mubale.) Davida ni batanga bahae nebasheunuzwi ni kuezwa maswe ki Shimei, wahabo Mulena Saule. Davida naasika eza sesiñwi kusina taba ni kuli naakona kufelisa muinelo wo. Ki sika mañi sene situsize Davida kuba ni buiswalo? Lukona kufumana kalabo kwa puzo yeo halubala Samu 3.

17. Ki sika mañi sene situsize Davida kuba ni buiswalo, mi lukona kumulikanyisa cwañi?

¹⁷ Manzwi a fahalimu a Samu 3 abonisa kuli Davida naañozi Samu ye “hanaasaba ku Abisalomi mwanaa hae.” Litimana 1 ni 2 za Samu yeo libulela litaba zelumelelana ni likezahalo zebulezwi kwa 2 Samuele kauhanyo 16. Mi Samu 3:4 ibonisa buikolwiso bwanaanani bona Davida hanaaize: “Nikahuweleza ku Jehova, mi uka nialaba kuzwelela kwa lilundu lahae lelikenile.” Ni luna luswanela kulapela halunyandiswa. Mi Jehova ukaalaba tapelo yaluna ka kulufa moya wahae okenile kuli ulutuse kuitiisa. Kana kunani muinelo momutokwa kubonisa buiswalo kamba kuswalela babañwi baba mifoselize ka bomu? Kana munani buikolwiso bwa kuli Jehova wakona kubona manyando amina ni kumifuyaula?

18. Lukatusiwa cwañi haiba luzwelapili kusebelisa litaelo za Mulimu mwa bupilo bwaluna?

¹⁸ Haiba lueza lika zelukile, lukafuyaulwa hahulu. Ki lona libaka liñolo la Liproverbia 4:7 halibulela kuli “butali ki bwa butokwa hahulu”! Ki niti kuli lutokwa kuba ni zibo kuli lube ni butali, kono butali buboniswa ka likatulo zelueza isiñi feela kuba ni zibo ya lika. Nihaiba butwa bwabonisanga butali. Buezanga cwalo ka kulukisa lico zabona ka nako ya litabula. (Liprov. 30:24, 25) Kreste, yena “butali bwa Mulimu” kamita uezanga lika zetabisa Ndatahe. (1 Makor. 1:24; Joa. 8:29) Mulimu walemuhanga batu babaziba zelukile kono basaezi sesiñwi ka za teñi. Mi ufuyaulanga babazwelapili kubonisa buikokobezo ni kueza zelukile. (Mubale Mateu 7:21-23.) Kacwalo, muzwelepili kubukeleza moya omunde mwa puteho okatahisa kuli kube bunolo ku babañwi kubonisa buikokobezo. Ki niti kuli lutokwa kuikataza ni kuba ni pilu-telele kuli lusebelise litaba zeluitutile, kono kueza cwalo kubonisa kuli lunani buikokobezo, ili bobuka lutahiseza tabo cwale ni kuya kuile.