Manzwi A Jesu Akomokisa Batu Babañata

Mwa sinagoge ya mwa Kapernauma, Jesu uluta kuli ki yena sinkwa sa niti sesizwa kwa lihalimu. Kaniti, litaba zabulela liekeza kwa litaba zanaabulezi kwa batu bane bakutile kuzwa kwaneku la kwa upa wa Liwate la Galilea, ili bane bacile kwa linkwa ni litapi zanaabafile.

Jesu uzwelapili, uli: “Bo kuku wamina nebacile maana mwa lihalaupa kono nebashwile.” Ka kubonisa shutano, utalusa kuli: “Ki na sinkwa sesipila sesizwile kwa lihalimu. Haiba mutu aca kwa sinkwa se, ukapila kuya kuile; mi mane, sinkwa senika fa ki nama yaka yenifa kuli lifasi lipile.”—Joani 6:48-51.

Kwa makalelo a mbumbi ya silimo sa 30 C.E., Jesu naabulelezi Nekudema kuli Mulimu ulatile hahulu lifasi kuli mane ulifile Mwanaa hae sina Mupulusi. Jesu cwale utalusa butokwa bwa kuca nama yahae, ili kubonisa tumelo mwa sitabelo sakaeza. Yeo kona nzila ya mwa kufumanela bupilo bobusa feli.

Nihakulicwalo, batu habalumeli manzwi a Jesu. Babuza kuli: “Mutu yo ukona kulufa cwañi nama yahae kuli luce?” (Joani 6:52) Jesu ubata kuli bautwisise kuli nama yatalusa haki nama yahae tota. Zabulela kuzwa fo libonisa zatalusa.

Jesu uli: “Hamusa ci nama ya Mwanaa mutu ni kunwa mali ahae, hamuna bupilo ku mina. Mutu kaufela yaca nama yaka ni kunwa mali aka unani bupilo bobusa feli, . . . kakuli nama yaka ki sico luli, mi mali aka ki sino luli. Mutu kaufela yaca nama yaka ni kunwa mali aka uzwelapili kuswalisana ni na.”—Joani 6:53-56.

Munahane feela taba yeo moifilikanyeza Majuda babamuteeleza! Mwendi banahana kuli Jesu utalusa kuli batu bacange batu babañwi kamba kuli balobe mulao wa Mulimu wohanisa kuca mali. (Genese 9:4; Livitike 17:10, 11) Kono Jesu hatalusi zakuca nama kamba mali luli. Utalusa kuli batu kaufela bababata bupilo bobusa feli baswanela kubonisa tumelo mwa sitabelo satuha aeza hakafa mubili wahae opetahalile ni kusulula mali ahae a bupilo. Kono mane nihaiba balutiwa bahae babañata habautwisisi tuto ye. Babañwi bali: “Taba ye yakomokisa; ki mañi yakona kuiteeleza?”—Joani 6:60.

Bakeñisa kuli Jesu ulemuhile kuli babañwi kwa balutiwa bahae bañuñuna, ubuza kuli: “Kana taba ye yamisitatalisa? Kukaba cwañi he hamuka bona Mwanaa mutu inze akambamela kwanaali sapili? . . . Manzwi eni mibulelezi ki moya mi ki bupilo. Kono kunani babañwi ku mina babasa lumeli.” Kabakaleo, buñata bwa balutiwa bahae bamusiya mi batuhela kumulatelela.—Joani 6:61-64.

Ka mukwa ocwalo, Jesu ubuza baapositola bahae ba 12, uli: “Kana ni mina mubata kuya?” Pitrosi ualaba kuli: “Mulena, lukaya ku mañi? Unani manzwi a bupilo bobusa feli. Lulumezi mi luzibile kuli ki wena Yakenile wa Mulimu.” (Joani 6:67-69) Bo ki busepahali luli, nihaike kuli ka nako ye Pitrosi ni baapositola babañwi habautwisisi luli zaluta Jesu ka za taba ye!

Jesu niha tabisizwe hahulu ki kalabo ya Pitrosi, ubulela kuli: “Kana nenisika miketa mina ba 12? Niteñi yomuñwi ku mina ki lisawana.” (Joani 6:70) Jesu ubulela ka za Judasi Isikariota. Kubonahala kuli ka nako ye Jesu ulemuha kuli Judasi ukalisa kuya ka litakazo zahae zemaswe.

Niteñi, Jesu utabiswa ki kuziba kuli Pitrosi ni baapositola babañwi habasika tuhela kumulatelela mi basaabana mwa musebezi wopilisa wasweli kupeta.