Kuezahalangañi ku Mutu Haashwa?

Kana mukile mwashwelwa ki mutu yemulata? Ka nako yecwalo, mwakona kuipuza kuli: ‘Kuezahalangañi ku mutu haashwa? Kana kunani sepo ya kuli nako yeñwi lukabona balatiwa baluna babashwile?’ Mwa tuto ye ni yetatama, lukanyakisisa likalabo za mwa Bibele kwa lipuzo zeo.

1. Kuezahalangañi ku mutu haashwa?

Jesu naabapanyize mutu yashwile ku mutu ya mwa buloko bobutuna. Mutu ya mwa buloko bobutuna hazibangi zeezahala. Mutu yashwile uswana cwañi ni mutu ya mwa buloko bobutuna? Mutu hasaashwile, hautwangi butuku ni bobukana. Haikutwangi buinosi kusina taba kuli naalata hahulu balikani ni ba lubasi lwahae. Bibele ibulela kuli: “Babashwile hakuna sebaziba.”—Mubale Muekelesia 9:5.

2. Kuziba zeezahalanga ku mutu haashwa kulutusa cwañi?

Batu babañata basaba kushwa, mi mane basaba nihaiba batu babashwile! Kono zeibulela Bibele ka za lifu, zakona kumiomba-omba. Jesu naabulezi kuli: “Niti ika milukulula.” (Joani 8:32) Ka kushutana ni zebuluta bulapeli bobuñwi, Bibele hailuti kuli mutu unani moyo osashwi ili ozwelangapili kupila mutu hasaashwile. Kacwalo, hakuna mutu yanyandanga hasaashwile. Mi bakeñisa kuli batu babashwile hakuna sebaziba, habakoni kulutahiseza butata. Kacwalo, halutokwi kulapela kamba kulapelela babashwile.

Batu babañwi babulelanga kuli bakona kuambolisana ni babashwile. Kono taba yeo haikonahali. Sina moluitutezi, batu babashwile “hakuna sebaziba.” Batu babanahananga kuli baambolanga ni balatiwa babona babashwile, mwendi mane baambolanga ni madimona aipumisanga kuba batu babashwile bao. Kacwalo, kuziba niti ka za taba yeo kwalusileleza kwa madimona. Jehova ululemusa kuli lusike lwalika kuambolisana ni batu babashwile, kakuli waziba kuli kuswalisana ni madimona kuka lutahiseza butata.—Mubale Deuteronoma 18:10-12.

3. Muzibe niti ka za batu babashwile

Batu banani mibonelo yeshutana-shutana ka za sesiezahalanga ku mutu haashwa. Niti kikuli haki mibonelo yeo kaufela yeli ya niti.

• Batu ba mwa silalanda samina balumela kuli ki lika mañi zeezahalanga kwa batu babashwile?

VIDIO: Babashwile ba Mwa Muinelo Mañi?—Kalulonyana ya vidio (1:19)

Mubale Muekelesia 3:20, mi kihona mukanyakisisa lipuzo zelatelela:

• Ka kuya ka timana ye, kuezahalangañi ku mutu haashwa?

• Kana kunani nto yezwelangapili kupila mutu haashwa?

Bibele ilutaluseza za lifu la Lazaro yanaali mulikanaa Jesu yomutuna. Hamunze mubala Joani 11:11-14, munyakisise zanaabulezi Jesu ka za muinelo wanaali ku ona Lazaro. Mi kihona mukanyakisisa lipuzo zelatelela:

• Jesu naabapanyize lifu kwa nto mañi?

• Taba yeo ilulutañi ka za batu babashwile?

• Kana mwautwisisa zeibulela Bibele ka za batu babashwile?

4. Kuziba niti ka za batu babashwile kwalutusa

Kuziba niti ka za lifu kulutusa kusasaba bafu. Mubale Muekelesia 9:10, mi kihona mukanyakisisa puzo yelatelela:

• Kana babashwile bakona kulutahiseza butata?

Niti ya mwa Bibele ilutusa kuutwisisa kuli halutokwi kulapela babashwile. Mubale Isaya 8:19 ni Sinulo 4:11, mi kihona mukanyakisisa puzo yelatelela:

• Munahana kuli Jehova uikutwa cwañi ka za mutu yalapela mutu yashwile kamba yakupa tuso ku mutu yacwalo?

5. Kuziba niti ka za lifu kwaluomba-omba

Batu babañata balutilwe kuli habaka shwa, bakayo nyandiswa bakeñisa lika zene bakile baezanga kwamulaho. Kono kwaomba-omba kuziba kuli mutu yashwile hanyandiswangi kwa sibaka sesiñwi, nihaiba mutu yanaaezanga lika zemaswe hahulu. Mubale Maroma 6:7, mi kihona mukanyakisisa puzo yelatelela:

• Sina moiboniseza Bibele kuli lifu lilukulula mutu kwa sibi sahae, kana munahana kuli mutu yashwile wakona kuyo nyandiswa bakeñisa lika zanaaezize kwamulaho?

Halunze luziba zeñata ka za Jehova, lukalemuha kuli Mulimu haakoni kunyandisa babashwile. Mubale Deuteronoma 32:4 ni 1 Joani 4:8, mi kihona mukanyakisisa lipuzo zelatelela:

• Kana Mulimu yanani tulemeno totubulezwi mwa litimana ze, wakona kunyandisa batu babashwile?

• Kana kuziba niti ka za lifu kwamiomba-omba? Libaka?

LITABA KA BUKUSWANI

Mutu haashwa, utuhela kupila. Babashwile habanyandi, mi habakoni kutahiseza babapila butata.

Mulundulule

• Kuezahalangañi ku mutu haashwa?

• Kuziba niti ka za lifu kulutusa cwañi?

• Kuziba niti ka za lifu kuluomba-omba cwañi?

MUBONE LITABA ZEÑWI

Mubone zelitalusa linzwi la “moyo” mwa Bibele.

“Moyo ki Nto Mañi?” (Taba ya fa webusaiti)

Muitute ka za haiba Mulimu wanyandisanga batu mwa lihele

Kana Lihele ki Sibaka Kobacisezwanga Batu? (3:07)

Kana lwaswanela kusaba batu babashwile?

Mioya ya Babashwile—Kana Yakona Kumitusa Kamba Kumiholofaza? Kana Iteñi Luli? (broshuwa)

Munyakisise mwanaaomba-ombezwi muuna yomuñwi hanaaitutile zeezahalanga ku mutu haashwa.

“Nenitabisizwe Hahulu ki Likalabo Zeutwahala za Bibele” (Tawala ya Mulibeleli, February 1, 2015)