Jesu Uluta Batu Mwa Perea Inze Aya Kwa Judea

Jesu saainzi nakonyana “mwabuse bwa Jordani,” mwa sibaka sesibizwa Perea. (Joani 10:40) Cwale utuha atama musipili wa kuya kwa mboela, kwa Jerusalema.

Jesu hazamai anosi. Uzamaya ni balutiwa bahae ni “batu babañata,” kukopanyeleza cwalo ni batelisi ni baezalibi. (Luka 14:25; 15:1) Bafalisi ni bañoli, bona babanyaza Jesu bakeñisa zaeza ni zabulela, ni bona bateñi mwahalaa buñata. Banani litaba zeñata zebasweli kunahana hamulaho wakuutwa liswanisezo za Jesu ka za ngu yelatehile, mwana yalatehile, ni ya muuna wa mufumi ni Lazaro.—Luka 15:2; 16:14.

Mwendi inze asahupula litamelikezo ni linyefulo za balwanisi bahae, Jesu ukala kubulela kwa balutiwa bahae. Ukutela kubulela litaba zeñwi zanaabulezi kwamulaho hanaaluta batu mwa Galilea.

Ka mutala, Jesu uli: “Zesitatalisa likataha luli. Nihakulicwalo, bumai ki bwa mutu yo lisitataliso litaha ka yena! . . . Mutokomele. Haiba mwanahenu akufoseza, umukalimele, mi haiba abaka, umuswalele. Niha ka kufoseza ha 7 ka zazi mi akutela ku wena ha 7, ali: ‘Nibakile,’ ulukela kumuswalela.” (Luka 17:1-4) Taba yabulela kwa mafelelezo yeo mwendi ihupulisa Pitrosi za puzo yanaabuzize ka za kuswalela ha 7.—Mateu 18:21.

Kana balutiwa bakakona kulatelela zababulelela Jesu? Balutiwa hababulelela Jesu kuli, “Luekeleze kwa tumelo,” ubabulelela kuli: “Kambe munani tumelo yelikana feela ni peu ya masitete, nemuka bulelela kota ya mulubeni ye kuli: ‘Kumuha, uyo icala mwa liwate!’ Mi neika miutwa.” (Luka 17:5, 6) Kaniti, nihaiba feela kuba ni tumelo yenyinyani kukona kupeta lika zetuna.

Jesu uzwelapili kuluta za bunde bwa kuikokobeza ni kuba ni mubonelo oitikanelezi. Ubulelela baapositola kuli: “Ki mañi ku mina yanani mutanga yaizo kekela kamba kuyo lisa mutapi yakabulelela mutanga yo asakuta feela kuzwa mwa simu, ali: ‘Taha kwanu kapili uto ca kwa tafule’? Kana haana kumubulelela kuli: ‘Nilukiseze mulalelo, mi uitame lisila, unisebeleze, kufitela nifeza kuca ni kunwa, kihona cwale ni wena ukaca ni kunwa’? Kana ukaitumela ku mutanga yo kabakala kuli uezize lika zamulaezi? Ka mukwa oswana, hamuezize lika kaufela zemulaezwi kueza, mubulele muli: ‘Luna lu batanga feela. Seluezize ki sona sene luswanela kueza.’”—Luka 17:7-10.

Mutangaa Mulimu kaufela uswanela kuutwisisa kuli ki kwa butokwa kubeya za Mulimu mwa sibaka sapili. Hape mañi ni mañi mwa lubasi uswanela kuhupula kuli unani tohonolo ya kulapela Mulimu.

Mwendi hamulaho feela wa fo, kwafita mutu yanaalumilwe ki Maria ni Mareta. Maria ni Mareta ki likaizeli za Lazaro, mi bapila mwa Betania wa Judea. Mutu yanaalumilwe yo, ubulelela Jesu kuli: “Mulena, mulatiwa wahao wakula.”—Joani 11:1-3.

Nihaike uzibisizwe kuli mulikanaa hae Lazaro ki mukuli yomutuna hahulu, Jesu hakenelwi ki masitapilu. Kono uli: “Butuku bo habuisi kwa lifu, kono ki bwa kukanyisa Mulimu ka bona, kuli Mwanaa Mulimu akone kukanyiswa ka bona.” Uzwelapili kuina mo ka mazazi amabeli kihona abulelela balutiwa bahae kuli: “Haluyeñi hape mwa Judea.” Bamuhanela bali: “Rabbi, hona cwanoñu fa Majuda nebabata kukupobaula ka macwe, kana ubata kuya kwateñi hape?”—Joani 11:4, 7, 8.

Jesu ualaba kuli: “Kana musihali hauna lihora ze 12? Haiba mutu azamaya mwa liseli, hasitatali fa nto ifi kamba ifi, kakuli ubona liseli la lifasi le. Kono haiba mutu azamaya busihu, wasitatala, kakuli haana liseli.” (Joani 11:9, 10) Mwendi zatalusa kikuli nako yatomile Mulimu ya kuli Jesu afeleleze bukombwa bwahae haisika kwana kale. Kufitela nako ikwana, Jesu uswanela kuitusisa ka kutala nako yesiyezi yenyinyani.

Jesu uekeza kubulela kuli: “Lazaro mulikanaa luna ulobezi, kono naya kwateñi niyo muzusa.” Ka kunahana kuli Jesu utalusa kuli Lazaro ulobezi feela, balutiwa bahae bamubulelela kuli: “Mulena, haiba ulobezi, ukaiketa.” Jesu ubabulela ka kusapata, uli: “Lazaro ushwile . . . Kono cwale haluyeñi ku yena.”—Joani 11:11-15.

Ka kuziba kuli Jesu ukayo bulaiwa mwa Judea, kono inze batabela ku mutusa, Tomasi ususueza balutiwa babañwi kuli: “Haluyeñi ni luna, kuli luyo shwa ni yena.”—Joani 11:16.