Kana Majuda Bakabonisa Tumelo Ku Mulimu?

Hali kwa tempele la Mubulo, la Nisani 10, Jesu ubulela za lifu lahae leliatumezi. Bakeñisa kuli uiyakatwa libizo la Mulimu, Jesu uli: “Ndate, kanyisa libizo lahao.” Linzwi lelituna lelizwa kwa mahalimu laalaba, lili: “Nilikanyisize mi nika likanyisa hape.”—Joani 12:27, 28.

Batu babali bukaufi ni yena balyanganiswa ki taba yeo. Babañwi banahana kuli bautwile mushika wa pula. Babañwi bali: “Lingeloi libulezi ni yena.” (Joani 12:29) Kono ki Jehova yebautwile habulela! Mi lo haki lwapili batu inze bautwa Mulimu habulela ka za Jesu.

Lilimo zetaalu ni likweli ze 6 kwamulaho, Jesu hanaakolobezwa, Joani Mukolobezi naautwile Mulimu habulela Jesu kuli: “Yo ki Mwanaka, yalatwa, yanitabisa.” Kutuha fo, hamulaho wa Paseka ya silimo sa 32 C.E., Jesu naafetuhile fapilaa Jakobo, Joani, ni Pitrosi. Baana babalaalu bao nebautwile Mulimu habulela kuli: “Yo ki Mwanaka, yalatwa, yanitabisa. Mumuteeleze.” (Mateu 3:17; 17:5) Kono ka nako ye, lwabulaalu, Jehova ubulela ka nzila yetahisa kuli batu babañata bautwe!

Jesu uli: “Linzwi leo liutwahezi kabakala mina, isiñi kabakala ka.” (Joani 12:30) Bo ki bupaki bobubonisa kuli Jesu ki Mwanaa Mulimu luli, yena Mesia yanaapolofitilwe.

Ka mukwa ocwalo, ka kupila ka busepahali, Jesu ubonisize mobaswanela kupilela batu ni kuli Satani Diabulosi, yena mubusi wa lifasi, uswanela kuyundiswa. Jesu uli: “Cwale lifasi le laatulwa; mubusi wa lifasi le ukalundulwa.” Cwale ubulela kuli: “Kono na, hanikapahekwa, nikahohela batu ba mifuta kaufela ku na.” (Joani 12:31, 32) Taba ye ibonisa kuli batu baka tusiwa ki lifu la Jesu leliatumezi. Ka lifu lahae la kupahekiwa fa kota, Jesu uka hohela batu babañwi ku yena ili kubafa kolo ya kufumana bupilo bobusa feli.

Sicaba hasiutwa taba yabulela Jesu ya kuli ‘ukapahekwa,’ sili: “Luutwile mwa Mulao kuli Kreste uina kuya kuile. Ukona kubulela cwañi kuli Mwanaa mutu ulukela kupahekwa? Ki mañi yena Mwanaa mutu yo.” (Joani 12:34) Kusina taba ni bupaki bobaiponezi, kukopanyeleza cwalo ni linzwi la Mulimu lebautwile, buñata bwabona bahana kuamuhela Jesu sina Mwanaa Mulimu luli, yena Mesia yanaasepisizwe.

Sina mwanabulelezi kwamulaho, Jesu uipulela kuli ki “liseli.” (Joani 8:12; 9:5) Ubulelela buñata kuli: “Liseli likaba mwahalaa mina nakonyana feela. Muzamaye hamusanani liseli, kuli lififi lisike lamikoma . . . Hamusanani liseli, mubonise tumelo mwa liseli, kuli mube bana ba liseli.” (Joani 12:35, 36) Cwale Jesu wapicuka bakeñisa kuli lizazi la Nisani 10 haki lona lizazi laswanela kushwa. Fa Paseka ya la Nisani 14 Jesu ‘ukapahekiwa’ ni kukokotelwa fa kota.—Magalata 3:13.

Zeezahalile mwa bukombwa bwa Jesu, libonisa kuli Majuda hane basika lumela ku yena nebataleleza bupolofita. Isaya naapolofitile kuli meeto a batu haana kubona ni kuli lipilu zabona lika tatafala ilikuli basike basikuluha ni kufoliswa. (Isaya 6:10; Joani 12:40) Kaniti, buñata bwa Majuda bahanile bupaki bobubonisa kuli Jesu ki yena Mupilisi wabona, ili nzila ya bupilo.

Nekudema, Josefa wa kwa Arimatea, ni babusi babañwi babañata, “baba ni tumelo” ku Jesu. Kono kana baka bonisa kuli banani tumelo, kamba kana habana kubonisa kuli banani tumelo kabakala kusaba kulelekwa mwa sinagoge kamba kabakala kuli ‘balata hahulu kanya yezwa kwa batu’?—Joani 12:42, 43.

Jesu ubulela sesitalusa kuba ni tumelo ku yena, uli: “Mutu kaufela yalumela ku na, halumeli ku na feela, kono ulumela ni ku yena yanilumile; mi mutu kaufela yanibona ubona ni Yena yanilumile.” Niti yanaalaezi Mulimu kuli Jesu akutaze ili yasweli kukutaza ki ya butokwa hahulu, kuli mane Jesu uli: “Mutu kaufela yanihana mi haamuheli manzwi aka, unani yamuatula. Linzwi lenibulezi ki lona lelika muatula mwa lizazi la mafelelezo.”—Joani 12:44, 45, 48.

Jesu cwale ufeza ka kubulela kuli: “Hanisika ipulelela ka ili na feela, kono yena Ndate yanilumile unifile taelo ya seniswanela kubulela ni kuluta. Hape naziba kuli taelo yahae ifumanisa bupilo bobusa feli.” (Joani 12:49, 50) Jesu waziba kuli mali ahae atuha asululwa sina sitabelo sa batu kaufela babalumela ku yena.—Maroma 5:8, 9.