Jesu Ulapela Tapelo Ya Mafelelezo Mwa muzuzu Wa Kwahalimu

Jesu utusa baapositola bahae kuitukiseza kufunduka kwahae ko kuatumela, bakeñisa kuli ubalata hahulu. Cwale uinulela meeto kwa lihalimu ni kulapela ku Ndatahe, uli: “Ukanyise mwanaa hao, kuli mwana akukanyise, sina hau mufile maata fahalimwaa batu kaufela, ilikuli akone kufa bupilo bobusa feli ku beu mufile kaufela.”—Joani 17:1, 2.

Kaniti, Jesu ulemuha kuli kukanyisa Mulimu ki kwa butokwa hahulu. Kono taba yabulela Jesu ya bupilo bobusa feli yaomba-omba luli! Jesu hasafilwe “maata fahalimwaa batu kaufela,” ukakona kutusa batu ka sitabelo sahae. Kono haki batu kaufela babaka fuyaulwa. Ki kabakalañi? Kakuli sitabelo sa Jesu sikatusa feela batu babaeza litaba zetatama zabulela Jesu, uli: “Kuli bafumane bupilo bobusa feli, batokwa kuzwelapili kukuziba, wena Mulimu anosi wa niti, ni yene ulumile, yena Jesu Kreste.”—Joani 17:3.

Mutu uswanela kuziba hande Ndate ni Mwana, ni kuba mulikanaa bona yomutuna. Uswanela kuunga lika mobalingela. Hape uswanela kulikanyisa tulemeno twabona mwa kusebelisana ni babañwi. Mi uswanela kuziba kuli sabutokwa hahulu ki kukanyisa Mulimu kufita kufumana bupilo bobusa feli. Jesu cwale uzwelapili ni taba yahae, uli:

“Nikukanyisize mwa lifasi, mi nifelize musebezi ou nifile kueza. Cwale Ndate, unikanyise kwatuko ahao ka kanya yene ninani yona hane nili bukaufi ni wena pili lifasi lisika ba kale teñi.” (Joani 17:4, 5) Ki cwalo, Jesu ukupa kuli akutisezwe kanya ya kwa lihalimu ka kuzusiwa kwa bafu.

Nihakulicwalo, Jesu hasika libala zapetile mwa bukombwa bwahae. Ulapela kuli: “Nibonahalize libizo lahao kwa batu bane unifile mwa lifasi. Neli bahao, mi neu nifile bona, mi bamamezi linzwi lahao.” (Joani 17:6) Jesu upetile zeñata mwa bukombwa bwahae kwandaa kuzibahaza feela libizo la Mulimu, lona la Jehova. Utusize baapositola bahae kuziba Jehova ni tulemeno twahae, ni mwasebelisanela ni batu.

Baapositola bazibile Jehova, zapeta Mwanaa hae, ni lituto za Jesu. Ka buikokobezo, Jesu uli: “Nibafile manzwi ene unifile, mi baaamuhezi mi bazibile luli kuli nenitile sina muyemeli wahao, mi balumezi kuli neu nilumile.”—Joani 17:8.

Jesu cwale ubonisa shutano yemwahalaa balateleli bahae ni batu ba lifasi, uli: “Hanikupeli lifasi, kono nikupela beu nifile, kakuli ki bahao . . . Ndate Yakenile, ubasileleze kabakala libizo lahao leu nifile, ilikuli babe alimuñwi sina luna haluli alimuñwi. . . . Nibasilelelize, mi ku bona hakuna nihaiba alimuñwi yasinyehile kwandaa mwanaa sinyeho,” yena, Judasi Isikariota, yabata kubeteka Jesu.—Joani 17:9-12.

Jesu uzwelapili kulapela, uli: “Lifasi libatoile. . . . Hanikupi kuli ubazwise mwa lifasi, kono kuli ubasileleze kabakala yamaswe. Haki ba lifasi, sina na, hanisi wa lifasi.” (Joani 17:14-16) Baapositola ni balutiwa bapila mwa lifasi lelibusiwa ki Satani, kono baswanela kuikauhanya ku lona ni kwa bumaswe bwalona. Ka mukwa ufi?

Baswanela kuzwelapili kuba babakenile, kusebeleza Mulimu, ni kusebelisa litaba zebaitutile mwa Mañolo a Siheberu ni litaba zabalutile Jesu kasibili. Jesu ulapela kuli: “Ubakenise ka niti; linzwi lahao ki yona niti.” (Joani 17:17) Hamulaho wa nako, babañwi kwa baapositola bahae bakañola libuka ka susumezo ya moya wa Mulimu zekaba kalulo ya “niti,” ili zekona kutusa mutu kuikenisa.

Kono hape hamulaho wa nako kukaba ni babañwi babaka amuhela “niti.” Kabakaleo, Jesu ulapela kuli: “Hanikupeli bona feela, kono nikupela ni babalumela ku na ka linzwi labona.” Ki nto mañi yeo Jesu akupela batu bao kaufela? Jesu uli: “Kuli kaufelaa bona babe alimuñwi, sina wena Ndate hauswalisani ni na, ni na haniswalisani ni wena, kuli ni bona baswalisane ni luna.” (Joani 17:20, 21) Jesu ni Ndatahe haki balibañwi luli. Ki balibañwi kakuli balumelelana mwa lika zebaeza kaufela. Jesu ulapela kuli balutiwa bahae ni bona baikole swalisano yeswana ye.

Nakonyana kwamulaho, Jesu naataluselize Pitrosi ni babañwi kuli uyo balukiseza sibaka, mi fo naatalusa kubalukiseza sibaka mwa lihalimu. (Joani 14:2, 3) Jesu cwale ukutela kubulela taba yeo mwa tapelo, uli: “Ndate, nibata kuli beu nifile babe ni na koniinzi, kuli babone kanya yeu nifile, kakuli unilatile pili lifasi lisika ba kale teñi.” (Joani 17:24) Ka mukwa ocwalo, utalusa kuli kwamulaho, pili Adama ni Eva basika ba kale ni bana, Mulimu naalatile Mwanaa hae wa libanda, yanaatilo ba Jesu Kreste.

Ka kufeza tapelo yahae, Jesu ukutela kukoñomeka libizo la Ndatahe ni lilato leo Mulimu abonisa kwa baapositola ni kwa batu babañwi babaka amuhela niti, uli: “Nizibahalize libizo lahao ku bona mi nika lizibahaza, kuli lilato leu nilatile ka lona libe ku bona mi na niswalisane ni bona.”—Joani 17:26.