Taba yetuna yebulezwi hahulu mwa Bibele ki ya Mubuso wa Mulimu. Jehova ukaitusisa Mubuso wo kuli apete mulelo wahae fa lifasi. Mubuso wa Mulimu ki nto mañi? Luziba cwañi kuli Mubuso wo usweli wabusa? Ki lika mañi zese upetile? Mi ki lika mañi zeuka eza kwapili? Mwa tuto ye ni mwa lituto zepeli zetatama, lukaalaba lipuzo zeo.

1. Mubuso wa Mulimu ki nto mañi, mi ki mañi Mulena wa Mubuso wo?

Mubuso wa Mulimu ki mulonga otomilwe ki Jehova Mulimu. Mulena wa Mubuso wo, yena Jesu Kreste, wabusa kwa lihalimu. (Mateu 4:17; Joani 18:36) Bibele ibulela cwana ka za Jesu: “Ukabusa sina Mulena . . . kuya kuile.” (Luka 1:32, 33) Ka kuba Mulena wa Mubuso wa Mulimu, Jesu ukabusa batu kaufela fa lifasi.

2. Ki bo mañi babaka busa ni Jesu?

Jesu haana kubusa anosi. Batu babazwa “mwa mishobo kaufela ni malimi ni batu ni sicaba. . . bakabusa sina malena fahalimwaa lifasi.” (Sinulo 5:9, 10) Ki batu babakai babaka busa ni Kreste? Kuzwa feela fanaatezi Jesu fa lifasi, Bakreste babañata-ñata babile balateleli bahae. Kono kwa batu bao, ki ba 144,000 feela babakaya kwa lihalimu kuyo busa ni Jesu. (Mubale Sinulo 14:1-4.) Bakreste babañwi kaufelaa bona bakabusiwa ki Mubuso wo inze bali fa lifasi.—Samu 37:29.

3. Ki kabakalañi Mubuso wa Mulimu hauli omunde hahulu kufita mibuso ya batu?

Babusi ba linaha niha balikanga kueza lika zende, habana maata a kueza lika kaufela zebabata. Hañata bayoliwanga ki babusi babañwi ili babasina milelo ya kutusa batu bebabusa. Kono Mulena wa Mubuso wa Mulimu, yena Jesu, haana kuyoliwa ki mutu ufi kamba ufi. Mulimu ‘utomile mubuso osike wasinyiwa nikamuta.’ (Daniele 2:44) Jesu ukabusa lifasi kaufela mi haana kubonisa saluluti. Jesu unani lilato, musa, mi uatula ka kuluka, kacwalo, ukaluta batu kupilisana hande ni babañwi ka lilato, ka musa, ni ka kuluka.—Mubale Isaya 11:9.

4. Mubuso omaata ka kufitisisa ukabusa lifasi kaufela

Jesu Kreste unani maata a kubusa kufita babusi ba lifasi. Mubale Mateu 28:18, mi kihona mukanyakisisa puzo yelatelela:

• Maata a Jesu a kubusa ashutana cwañi ni a babusi ba lifasi?

Babusi ba lifasi bayoliwanga, mi yomuñwi ni yomuñwi wabona ubusanga feela sibaka sesiñwi sa lifasi. Mubuso wa Mulimu ona bo? Mubale Daniele 7:14, mi kihona mukanyakisisa lipuzo zelatelela:

• Ki kabakalañi hakutabisa kuziba kuli Mubuso wa Mulimu “hauna kusinyiwa”?

• Ki kabakalañi hakutabisa kuziba kuli Mubuso wo ukabusa lifasi kaufela?

5. Mibuso ya batu itokwa kuyoliswa

Ki kabakalañi Mubuso wa Mulimu hauswanela kuyola mibuso ya batu? Mubuhe VIDIO, mi kihona mukanyakisisa puzo yelatelela.

VIDIO: Mubuso wa Mulimu ki Nto Mañi?—Kalulonyana ya vidio (1:41)

• Mibuso ya batu itahisize lika mañi?

Mubale Muekelesia 8:9, mi kihona mukanyakisisa lipuzo zelatelela:

• Mubona cwañi, kana Mubuso wa Mulimu waswanela kuyola mibuso ya batu? Libaka?

6. Mubuso wa Mulimu unani babusi baba luutwisisa

Bakeñisa kuli Mulenaa luna, Jesu, naapilile fa lifasi sina mutu, wakona “kuluutwela butuku mwa bufokoli bwaluna.” (Maheberu 4:15) Ba 144,000, ili baana ni basali babasepahala babaka busa ni Jesu, baketilwe ki Jehova kuzwelela “mwa mishobo kaufela ni malimi ni batu ni sicaba.”—Sinulo 5:9.

• Kana kuziba kuli Jesu ni bakabusa ni bona kaufela bakile bafita mwa miinelo yemukopana ni yona kwamiomba-omba? Libaka?

7. Mubuso wa Mulimu unani milao yeminde hahulu kufita milao ya mibuso ya batu

Mibuso ya batu itomanga milao yetusa batu ni kubasileleza. Mubuso wa Mulimu ni ona unani milao yebaswanela kulatelela batu bababusiwa ki ona. Mubale 1 Makorinte 6:9-11, mi kihona mukanyakisisa lipuzo zelatelela:

• Munahana kuli bupilo bukaba cwañi batu kaufela habaka latelela milao ya Mulimu?a

• Kana mwautwisisa libaka Jehova hatokwa kuli babaka busiwa ki Mubuso wahae balatelele milao yeo? Libaka?

• Ki lika mañi zebonisa kuli batu babasa lateleli milao ya Mulimu bakona kucinca?—Mubone timana 11.

LITABA KA BUKUSWANI

Mubuso wa Mulimu ki mulonga otomilwe kwa lihalimu mi ukabusa lifasi kaufela.

Mulundulule

• Ki bo mañi babaka busa mwa Mubuso wa Mulimu?

• Ki kabakalañi Mubuso wa Mulimu hauli omunde hahulu kufita mibuso ya batu?

• Jehova ubata kuli batu babaka busiwa ki Mubuso wahae baezeñi?

MUBONE LITABA ZEÑWI

Munyakisise litaba zanaalutile Jesu ka za koufumaneha Mubuso wa Mulimu.

“Kana Mubuso wa Mulimu U Mwa Pilu Yamina?” (Taba ya fa webusaiti)

Ki kabakalañi Lipaki za Jehova habaketanga kusepahala kwa Mubuso wa Mulimu kufita kusepahala kwa mibuso ya batu?

Kuyemela Mubuso wa Mulimu 1:43

Munyakisise zeibulela Bibele ka za ba 144,000 babaketilwe ki Jehova kuli bayo busa ni Jesu.

“Ki bo Mañi Babakaya Kwa Lihalimu?” (Taba ya fa webusaiti)

Kuziba kuli Mubuso wa Mulimu ki ona feela okona kufelisa matata a lifasi nekutusize cwañi musali yanaali mwa tolongo?

“Mone Nizibezi Yakafelisa Bumaswe fa Lifasi” (Muzuhe!, November 2011)

Jesu naalutile balateleli bahae kuli habaswaneli kuba “ba lifasi.” (Joani 15:19) Taba yeo italusa kuli habaswaneli kuikenya mwa litaba za lipuso za naha kamba mwa lindwa. Kubulela feela niti, kuikauhanya kwa lifasi haki nto yebunolo. Batu bakona kubulela litaba zemaswe ka za luna bakeñisa kuikauhanya kwa lifasi. Ki lika mañi zekona kulutusa kusatuhela kuikauhanya kwa lifasi ni kuzwelapili kusepahala ku Jehova Mulimu?

1. Bakreste ba niti baanga cwañi mibuso ya batu?

Bakreste bakuteka mibuso ya batu. Lulatelela taelo ya Jesu ka ‘kukutiseza Sesare zeli za Sesare,’ ili kutalusa kuli, lwamamela milao yetomilwe ki mibuso ya batu inge cwalo mulao wa kuli lulife mitelo. (Mareka 12:17) Bibele iluta kuli mibuso ya batu yabusa bakeñisa kuli Jehova uituhelezi kueza cwalo. (Maroma 13:1) Kacwalo, lwaziba kuli maata ebanani ona babusi ba mibuso ye, anani maciñekelo. Lwaziba kuli ki Mulimu ni Mubuso wahae feela yakona kufelisa miinelo yetaata yebakopana ni yona batu fa lifasi.

2. Lukona kuikauhanya cwañi kwa lifasi?

Ka kuswana ni Jesu, haluikenyangi mwa litaba za lipuso za naha. Nako yeñwi batu hane baboni makazo yanaaezize Jesu ni kulika kumukukueza kuli abe mulena fa lifasi, Jesu naahanile. (Joani 6:15) Ki kabakalañi hanaahanile? Libaka lifumaneha mwa manzwi anaatilo bulela hasamulaho, hanaaize: “Mubuso waka haki wa lifasi le.” (Joani 18:36) Ka kuba balutiwa ba Jesu, luikauhanya kwa lifasi mwa linzila zeshutana-shutana. Ka mutala, haluikenyangi mwa lindwa. (Mubale Mika 4:3.) Lwakuteka lisupo za naha zecwale ka lindembela, kono halulapelangi lindembela zeo. (1 Joani 5:21) Mi haluyemelangi mutu yabata kuvotelwa kamba likopano za lipuso za naha. Ka kuikauhanya mwa linzila zeo ni zeñwi, lubonisa kuli lwasepahala ka kutala kwa Mubuso wa Mulimu.

MUBATISISE

3. Bakreste ba niti baikauhanyize kwa lifasi

Jesu ni balateleli bahae neba lutomezi mutala oluswanela kulatelela. Mubale Maroma 13:1, 5-7 ni 1 Pitrosi 2:13, 14. Mi hasamulaho, mubuhe VIDIO ni kunyakisisa lipuzo zelatelela.

VIDIO: Bakreste ba Niti Baikauhanyize Kwa Lifasi—Kalulo 1 (4:28)

• Ki kabakalañi haluswanela kukuteka mibuso ya batu?

• Ki mwa linzila mañi molukona kubonisa kuli lwautwa mibuso ya batu?

Ka nako ya lindwa, linaha zeñwi zakona kubulela kuli haliikenyi mwa lindwa mo, kono hape zakona kutusa batu babalwana mwa lindwa mo. Kuikauhanya kwa lifasi kutalusañi luli? Mubale Joani 17:16. Hasamulaho, mubuhe VIDIO ni kunyakisisa puzo yelatelela.

VIDIO: Bakreste ba Niti Baikauhanyize Kwa Lifasi—Kalulo 2 (3:11)

•  Kuikauhanya kwa lifasi kutalusañi?

Lukona kuezañi haiba mibuso ya lifasi ibata kuli lueze nto yesalumelelani ni mulao wa Mulimu? Mubale Likezo 5:28, 29. Hasamulaho, mubuhe VIDIO ni kunyakisisa lipuzo zelatelela.

VIDIO: Bakreste ba Niti Baikauhanyize Kwa Lifasi—Kalulo 3 (1:18)

• Haiba kuli mibuso ya batu iluhapeleza kulatelela mulao osalumelelani ni mulao wa Mulimu, ki mulao wa mañi oluswanela kulatelela?

• Ki mwa miinelo mañi mo Bakreste bakona kuatula kusalatelela milao yetomilwe ki mibuso ya batu?

4. Muikauhanye kwa lifasi mwa lika zemunahana ni zemueza

Mubale 1 Joani 5:21. Hasamulaho, mubuhe VIDIO ni kunyakisisa lipuzo zelatelela.

VIDIO: Libaka Bakreste ba Niti Habatokwa Bundume—Kuli Baikambuse Kwa Lifasi (2:49)

• Mwa vidio yelubuhile, ki kabakalañi bo Ayenge hane basika swalisana ni kopano ya lipuso za naha kamba kueza mikiti ya naha ka kucaela ndembela silutu?

• Kana katulo yabona neli yende?

Ki miinelo mañi yemiñwi yekona kulupalelwisa kuikauhanya kwa lifasi? Mubuhe VIDIO, mi kihona mukanyakisisa lipuzo zelatelela.

VIDIO: Lituto Zezwa Mwa Tawala ya Mulibeleli—Muzwelepili Kuikambusa Kwa Lifasi Lelialuhani (5:16)

• Lukona kuikauhanya cwañi kwa lipapali za kukangisana mwahalaa linaha?

• Lukona kuikauhanya cwañi kwa lifasi nihaikaba kuli likatulo zebaeza batu baba mwa likopano za lipuso za naha zaluama ni luna?

• Litaba zebulelwa ki mitai ya makande ni tutengo twa mwa naha likona kutahisa kuli lube ni mubonelo ocwañi ka za kuikauhanya kwa lifasi?

LITABA KA BUKUSWANI

Bakreste balika mobakonela kaufela kuikauhanya kwa lifasi mwa lika zebanahana, mwa lika zebabulela, ni mwa lika zebaeza.

Mulundulule

•  Luswanela kuezañi kwa mibuso ya batu?

•  Ki kabakalañi haluzwelapili kuikauhanya kwa litaba za lipuso za naha?

•  Ki miinelo mañi yekona kulupalelwisa kuikauhanya kwa lifasi?

MUBONE LITABA ZEÑWI

Ki buitomboli mañi bolukona kueza kuli luzwelepili kuikauhanya kwa lifasi?

Jehova Hasika Luyubeka (3:14)

Mabasi akona kuezañi kuli aitukiseze kuzwelapili kuikauhanya kwa lifasi?

Muzwelepili Kuikambusa kwa Lifasi ka Nako ya Lipapali (4:25)

Ki kabakalañi kuyemela naha yahabo mutu haisi yona nto yeswanela kukutekehisa hahulu mutu?

“Ku Mulimu Lika Kaufela Zakonahala” (5:19)

Munyakisise momukona kuikauhanyeza kwa lifasi hamuketa mufuta wa mubeleko omuka eza.

“Mañi ni Mañi Ukalwala Mushimbo Wahae” (Tawala ya Mulibeleli, March 15, 2006)