Ku Pepwa Sinca—Ku Petañi?

KI KABAKALAÑI Jesu ha naa itusisize pulelo ya kuli ku ‘pepwa ka Moya’ ha naa bulela za kolobezo ya moya o kenile? (Joani 3:5) Linzwi la ku “pepwa” ha li itusiswa ka swanisezo li talusa “makalelo.” Kacwalo pulelo ya kuli “ku pepwa sinca” i supa kwa “makalelo a manca.” Mi manzwi a swanisezo a kuli ku “pepwa” ni “ku pepwa sinca” a koñomeka kuli ku ka ba ni makalelo a manca kwa silikani se si mwahalaa Mulimu ni batu ba ba kolobelizwe ka moya o kenile. Ku cinca ka ku tala kwa silikani seo ku ezahala cwañi?

Muapositola Paulusi ha naa talusa ka mo Mulimu a lukisezanga batu kuli ba yo ba babusi kwa lihalimu, naa itusisize swanisezo ya ze ezahalanga mwa lubasi. Naa ñolezi Bakreste ba ne ba pila mwa miteñi ya hae kuli ba ka ‘añulwa sina bana’ ni kuli Mulimu u ka pilisana ni bona “sina bana.” (Magalata 4:5; Maheberu 12:7) Kuli lu bone ka mo swanisezo ya ku añula i kona ku tuseza mutu ku utwisisa cinceho ye banga teñi mutu ha kolobezwa ka moya o kenile, ha lu nyakisiseñi hape swanisezo ya ndiala ya bata ku amuhela kabelo ya sanda sa lubasi lo lu mu hulisize.

Cinceho ye Tiswa ki ku Añulwa

Mwa swanisezo, mucaha yo ha koni ku amuhela kabelo ya sanda kakuli haki mwanaa bona wa ku ipepela. Cwale ha mu nahane feela kuli ka zazi le liñwi ku ezahala cinceho ye tuna. Muuna ya mu hulisize sina mwanaa hae u ngisa liñolo la ku pepwa kwa mucaha yo kwa muuso, mi fa liñolo leo ku na ni libizo la muuna yo ili ku paka kuli mucaha yo se li mwanaa hae luli. Nihaike kuli mucaha yo isali yena mucaha ya swana ye ne ba hulisize, kono bakeñisa kuli ba mu añuzi sina mwana, cwale saa na ni litukelo ze swana ni za bana ba bañwi ba muuna yo.

Swanisezo ye i bonisa nto ya butokwa hahulu ye ezahalanga kwa batu ba ba pepwa sinca. Mucaha wa mwa swanisezo u kona ku fiwa sanda sa lubasi haiba feela a amuhela liñolo la ku pepwa le linca le li na ni libizo la muuna ya naa mu uta ili le li paka kuli muuna yo se li yena ndatahe ka ku ya ka mulao. Kono ka ili yena feela haa koni ku kwanisa ze tokwahala zeo. Ka ku swana, batu ba bañwi ba ka fiwa bubusi mwa Mubuso wa Mulimu, kamba mulonga wa kwa lihalimu, kono ba ka kona ku eza feela cwalo haiba ba kwanisa ze tokwahala, ili ku “pepwa sinca.” Kono ka ili bona feela ha ba koni ku kwanisa ze tokwahala, kakuli ku pepwa sinca ku tahiswa ki Mulimu.

Ki sika mañi se ne si cincize muinelo wa mucaha yo? Ki ku añulwa ka mulao. Kono ku añulwa ka mulao ko, ne ku si ka cinca ponahalo ya mucaha yo. Hamulaho wa ku añulwa naa sali mucaha ya swana. Niteñi, hamulaho wa ku peta ze nee tokwiwa kaufela ki mulao, mucaha a ba mwanaa ba ne ba mu añuzi. Kaniti, naa bile ni makalelo a manca, fo kikuli, naa pepilwe sinca. Naa bile mwana, ili nto ye ne mu fumanisize tukelo ya ku amuhela kabelo ya sanda ni ku ba yo muñwi wa bana ba muuna ya naa mu añuzi.

Ka ku swana, Jehova naa cincize muinelo wa sikwata sa batu ba ba si ka petahala ka ku ba añula ka mulao kuli ba be bana ba hae. Muapositola Paulusi ya naa li yo muñwi wa ba sikwata seo, naa ñolezi balumeli ka yena kuli: ‘Mu amuhezi Moya wa ba ba añulwa, o ka ona lu biza, lu li, Abba, Ndate! Ni ona Moya u pakelana ni moya wa luna kuli lu bana ba Mulimu.’ (Maroma 8:15, 16) Kaniti, ka ku añulwa, Bakreste bao ne ba bile ba bañwi ba lubasi lwa Mulimu kamba “bana ba Mulimu.”—1 Joani 3:1; 2 Makorinte 6:18.

Ki niti kuli ku añulwa koo ne ku si ka cinca mupilelo wa batu ba ne ba añuzwi bao, kakuli ne ba zwezipili ku ba ba ba si ka petahala. (1 Joani 1:8) Kono ku likana ni mwa naa zwezipili ku taluseza Paulusi, ha se ba añuzwi ka mulao, ne ba bile bana ba Mulimu. Ka yona nako ye swana yeo, moya wa Mulimu ne u ba suñile tumelo ye tiile ya kuli ba ka yo ina ni Kreste kwa lihalimu. (1 Joani 3:2) Yona tumelo ye tiile yeo ye sa kakanyehi ye nee tahile ka moya wa Mulimu, ne i tahisize kuli ba nge bupilo ka nzila ye nca. (2 Makorinte 1:21, 22) Kaniti, ne ba bile ni makalelo a manca, ona ku pepwa sinca ka swanisezo.

Bibele ha i bulela ka za bana ba Mulimu ba ba añuzwi, i li,: “Ba ka ba baprisita ba Mulimu ni ba Kreste, mi ba ka busa ni yena myaha ye 1,000.” (Sinulo 20:6) Bana ba Mulimu ba ba añuzwi, ba ka fiwa litulo za ku ba malena hamoho ni Kreste mwa Mubuso wa Mulimu, kamba mulonga wa kwa lihalimu. Muapositola Pitrosi naa bulelezi Bakreste ka yena kuli ba ka amuhela “sanda sa bufumu bo bu sa boli, bo bu sa nyazahali, bo bu sa undi, bo bu bulukezwi” bona “kwa lihalimu.” (1 Pitrosi 1:3, 4) Seo ki sanda sa butokwa luli!

Kono taba ye ya bubusi ni yona i zusa puzo ye ñwi. Haiba batu ba ba pepilwe sinca ba ka busa sina malena kwa lihalimu, ba ka busa bomañi? Puzo yeo i ka nyakisiswa mwa taba ye tatama.

[Siswaniso se si fa likepe 10]

Paulusi naa buleziñi ka za ku añulwa?