Za na Lutile Jesu ka za Mulimu

“Ha ku na ya ziba Mwana kuli ki mañi konji Ndate; mi ha ku na ya ziba Ndate kuli ki mañi, konji Mwana, ni ya lata Mwana ku mu taluseza Yena.”—LUKA 10:22.

PILI a si ka ba kale mutu wa fa lifasi, Mwanaa Mulimu wa mweli na pilile nako ye telele inza swalisana ni Ndatahe. (Makolose 1:15) Kacwalo, Mwana na fitile fa ku ziba mihupulo, maikuto, ni linzila za Ndatahe. Mwanaa yo ili yena Jesu ha sa tile fa lifasi, na tukufalezwi hahulu ku luta niti ka za Ndatahe. Lwa kona ku ituta ze ñata ka za Mulimu ka ku teeleza ku za na bulezi Mwana.

Libizo la Mulimu Libizo la Mulimu, lona la Jehova ne li la butokwa hahulu ku Jesu. Mwana ya latiwa yo na bata kuli batu ba bañwi ni bona ba zibe ni ku itusisa libizo la Ndatahe. Libizo la Jesu ka sibili li talusa kuli “Jehova ki Yena ya Pilisa.” Busihu pili a si ka bulaiwa kale, Jesu na konile ku lapela ku Jehova kuli: “Ni ba zibisize Libizo la hao.” (Joani 17:26) Ha ku komokisi kuli Jesu na itusisize libizo la Mulimu mi na li zibisize batu ba bañwi. Mi mane, bateelezi ba Jesu ne ba ka kona ku utwisisa cwañi niti ka za Jehova ba si ka ziba libizo la Hae ni se li talusa?a

Lilato la Mulimu le lituna Nako ye ñwi Jesu na lapezi ku Mulimu kuli: “Ndate, . . . u ni latile pili lifasi li si ka ezwa.” (Joani 17:24) Bakeñisa kuli na iponezi lilato la Mulimu ka nako ya na li kwa lihalimu, Jesu ha na li fa lifasi na bonisize lilato leo ka linzila ze nde ze ñata.

Jesu na bonisize kuli lilato la Jehova ki le lituna. Jesu na bulezi kuli: “Mulimu u latile lifasi hahulu, mane u li file Mwanaa hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Linzwi la Sigerike le li tolokilwe kuli “lifasi” ha li talusi “lifasi-mubu.” Sina ka mo li itusiselizwe mwa liñolo le, lifasi li ama batu luli—ili batu kaufela. Lilato la Mulimu kwa batu ki le lituna hahulu kuli mane na fanile Mwanaa hae ya latwa hahulu kuli batu ba ba sepahala ba kone ku lukululwa kwa butanga bwa sibi ni lifu ni kuli ba be ni bupilo bo bu sa feli. Ha lu koni ku utwisisa ka ku tala lilato le lituna cwalo.—Maroma 8:38, 39.

Jesu na tiisize taba ya niti ye li: Jehova u lata hahulu balapeli ba hae ka butu. Jesu na lutile kuli Jehova u swana sina mulisana ya nga ye ñwi ni ye ñwi ya lingu za hae ku ba ye ipitezi ni kuli ki ya butokwa ku yena. (Mateu 18:12-14) Jesu na bulezi kuli ha ku na nihaiba taha i liñwi ye kona ku wela fafasi Jehova a sa lemuhi. Jesu na ekelize kuli: “Ni milili ya litoho za mina i balilwe kamukana.” (Mateu 10:29-31) Haiba Jehova u na ni buikoneli bwa ku lemuha kuli taha i liñwi ya tondahala mwa siyaleto, kana ha koni ku lemuha ni ku babalela yo muñwi ni yo muñwi wa balapeli ba hae? Haiba Jehova wa kona ku bala ni ku lemuha milili ye kwa toho ya luna, kana ku na ni lika ze ñwi za mwa bupilo bwa luna, ze lu tokwa, matata a luna, ni lipilaelo za luna za sa koni ku ziba?

Ndate wa kwa lihalimu Sina mo ne lu bonezi mwa taba ye felile, Jesu ki Mwanaa Mulimu wa libanda. Haki nto ye komokisa kuli Mwanaa yo ya latwa hañata na bizanga Jehova ni ku bulela ka za Hae sina “Ndatahe.” Mane, mwa manzwi a Jesu a pili a ñozwi, a na bulezi mwa tempele inge a na ni lilimo ze 12, na amile ku Jehova sina “Ndate.” (Luka 2:49) Linzwi la “Ndate” li fumaneha mwa Litaba za Evangeli ku fitelela 100. Jesu ka linako ze shutana-shutana na bulezi ka za Jehova kuli “Ndataa mina,” “Ndataa luna,” ni “Ndate.” (Mateu 5:16; 6:9; 7:21) Ka ku itusisa libizo le ka ku lukuluha, Jesu na bonisize kuli batu ba sibi ni ba ba si ka petahala ba kona ku ba ni silikani ni swalisano ye tiile ni Jehova.

Ya na ni sishemo ni ya swalela Jesu na ziba kuli batu ba ba si ka petahala ba tokwa sishemo sa Mulimu se situna. Mwa nguli ya hae ya mwana ya latehile, Jesu na bapanyize Jehova ku mushemi ya mufelañeke, ya swalela ni ku amuhela mwanaa hae ya bakile ha kuta. (Luke 15:11-32) Kacwalo manzwi a Jesu a lu kolwisa kuli Jehova u talimanga pilu ya muezalibi kuli u bakile ili nto ye ka tahisa kuli a boniswe sishemo ki Mulimu. Jehova wa tabela ku swalela muezalibi ya bakile. Jesu na talusize kuli, “Na mi bulelela, ni li: Kamukwaocwalo tabo i ka ba teñi kwa lihalimu ka muezalibi a li muñwi ya baka, ye fita ye ka ba teñi ka ba ba lukile ba ba mwanda fo ku tokwahezi a li muñwi, ba ba sa tokwi kuli ba bake.” (Luka 15:7) Ki mañi ya si ke a ikutwa ku ba bukaufi ni Mulimu ya sishemo ya cwalo?

Ya utwa milapelo Jesu ha na li kwa lihalimu a si ka taha kale fa lifasi, na iponezi hande-nde kuli Jehova wa “utwa milapelo” ni kuli wa tabelanga litapelo za balapeli ba hae ba ba sepahala. (Samu 65:2) Kacwalo, mwa bukombwa bwa hae, Jesu na lutile bateelezi ba hae mwa ku lapelela ni ze ne ba tokwa ku lapelela. Na ba elelize ‘ku sa kuta-kutela lika ze swana ha ba lapela.’ Na susuelize bateelezi ba hae ku lapelela se si latwa ki Mulimu kuli “si ezwe mwa lifasi, mo si ezezwa kwa lihalimu.” Hape lwa kona ku lapela kuli a lu fe za ku pila ka zona ka zazi ni zazi, kuli a lu swalele libi za luna, ni kuli lu tiyele miliko. (Mateu 6:5-13) Jesu na lutile kuli Jehova u alabanga litapelo za batanga ba Hae sina mushemi, ili ku alaba likupo za bona ze zwelela kwa pilu ili ze lapelwa ka tumelo.—Mateu 7:7-11.

Kaniti, Jesu na lutile niti luli ka za Jehova ni mwa inezi. Kono ne ku na ni nto ye ñwi hape ka za Jehova ya na tabela hahulu Jesu ku taluseza ba bañwi—ili nzila ya ka itusisa Jehova ku cinca ka yona lifasi kuli a taleleze mulelo wa hae ka za lifasi ni batu ba ba pila ku lona. Mi mane kalulo ye ya lushango lwa Jesu ne li yona taba ye tuna ya ku kutaza kwa hae.

[Litaluso za kwatasi]