Jehova ki Yena Mubusi wa Luna!

“Ki swanelo kuli lu utwe Mulimu ku fita batu.”—LIKEZO 5:29.

 1, 2. Ki mayemo afi a baapositola ao Lipaki za Jehova b’a nga muta litaelo za butu li lwanisana ni tato ya bumulimu?

JEHOVA MULIMU n’a tuhelezi banna ba 12 kuli ba tiswe fapil’a kuta ye tuna. Silimo ne li sa 33 C.E., mi kuta ne li Kuta ye Tuna ya Sijuda. Ba ne ba zekiswa ne li baapositola ba Jesu Kreste. A mu teeleze! ‘Ne lu mi laelezi kuli mu si ke mwa luta ka ku toma fa libizo le,’ ko na mwa taluseza muprisita yo mutuna, ‘kono se mu talize Jerusalema ka tuto ya mina.’ Ka seo, Pitrosi ni baapositola ba bañwi ba alaba kuli: “Ki swanelo kuli lu utwe Mulimu ku fita batu.” (Likezo 5:27-29) Ka mubulelelo, ne ba ize: “Jehova ki yena Mubusi wa Luna!”

² Ee, Jehova ki yena Mubusi wa balateleli ba Jesu ba niti. Seo si bonisizwe ka ku utwahala mwa buka ya Bibele ya Likezo za Baapositola, ye ne i ñozwi mwa Roma ibata i ba ka 61 C.E. ki “Luka, ñaka ya latwa.” (Makolose 4:14) Ka ku swana ni baapositola, batu ba Jehova kacenu ba utwa Mubusi wa bona wa kwa lihalimu muta litaelo za butu li lwanisana ni tato ya hae. Kono ki sifi hape se lu kona ku ituta ku zwelela kwa Likezo? (Mwa ku ituta kwa mina kwa ka butu, lu akaleza kuli mu bale likalulo za buka ze bonisizwe ka muñolo o tibile.)

Jesu U Fa Lipaki Musebezi

 3. Balateleli ba Jesu ha ne ba ‘kolobelizwe ka moya o kenile,’ ki ifi ye ne ili mamelelo ya bona ye tuna?

³ Baapositola ne ba kona ku nga mayemo a tiile kwa lineku la Mulimu bakeñisa kuli ne ba matafalizwe kwa moya. Kreste n’a shwezi fa kota ya linyando, kono ne ba zibile kuli n’a zusizwe. (1:1-5) Jesu a ‘iponahaza’ kuli wa pila mi a luta liniti za Mubuso inze a ikapesize mibili ya butu mwa mazazi a 40 kaufela. Hape n’a taluselize balutiwa ba hae ku libelela mwa Jerusalema kuli ba kolobezwe ka ‘moya o kenile.’ Ku kutaza cwale ne ku ka ba yona mamelelo ya bona ye tuna, sina mo ku inezi kwa Lipaki za Jehova kacenu.—Luka 24:27, 49; Joani 20:19–21:24.

 4. Ki sifi se ne si ka ezahala moya o kenile ha se u fitile fahalimw’a balateleli ba Jesu?

⁴ Ba si ka kolobezwa kale ka moya o kenile, baapositola ka mafosisa ne ba nahana ka za puso ya fa lifasi luli ye ne i ka zwisa bubusi bwa Siroma ha ne ba buzize kuli: “Mulena, kikuli se li cwale u ka zusa mubuso wa Isilaele?” (1:6-8) Ka ku alaba, Jesu n’a bulezi kuli batili, kakuli ‘ne ba si ka fiwa ku ziba linako kamba myaha.’ ‘Moya o kenile ha se u fitile fahalimw’a bona,’ u ka ba tiisa kuli ba fe bupaki ka za Mubuso wa kwa lihalimu wa Mulimu, isiñi wa fa lifasi fa. Ne ba ka kutaza mwa Jerusalema, Judea, ni Samaria, “ni ku isa kwa mafelelezo a lifasi.” Ka tuso ya moya, Lipaki za Jehova ba eza musebezi o cwalo ku potoloha lifasi kamukana mwa mazazi a mafelelezo a.

 5. Jesu n’a ka kuta cwañi ka nzila ye swana ni ya ile ka yona?

⁵ Jesu kihona a sa z’o fa musebezi wa ku kutaza lifasi kamukana ha na kalisize ku kambamela kwa lihalimu. Ona ku kambama k’o ne ku kalisize ka muhato wa ku ya mwahalimu ku zwa kwa balutiwa ba hae, mi hamulaho Jesu n’a keni mwa sibaka mo ku inzi Mubusi wa hae wa kwa lihalimu ni mwa musebezi ili mwa liluko la kwa moya. (1:9-11) Lilu ha se li patile Jesu kwa baapositola, n’a cincize ka ku tubula mubili wa hae wa nama. Mangeloi a mabeli na bonahezi mi a bulela kuli u ‘ka kuta ka mukwa o swana.’ Mi se ku bile cwalo. Ki balutiwa ba Jesu fela ba ne ba mu boni h’a ya, sina mane haili Lipaki za Jehova fela ba ba lemuha ku kuta kwa hae kwa ka ku sa bonahala.

Jehova U Eza Keto

 6. Muyoli wa Judasi Isikariota n’a ketilwe kamukwaufi?

⁶ Hañihañi baapositola ki kale ba kutela kwa Jerusalema. (1:12-26) Kwa ndu ya kwahalimu (mwendi kwa sibaka sa mahe Mareka, ili Maria), baapositola ba 11 ba ba sepahala ba zwelapili mwa tapelo ni banyani ba Jesu ba ku mahe, ni balutiwa ba hae ba bañwi, ni mahe, ili Maria. (Mareka 6:3; Jakobo 1:1) Kono ki mañi ya n’a ka amuhela “bukombwa” bwa Judasi? (Lisamu 109:8) Balutiwa ba ba bato ba ba 120 ne ba li teñi Mulimu ha n’a ketile munna ya na ka yola mubeteki wa Jesu, Judasi, ku kutiseza palo ya baapositola fa 12. Keto ne i na ni ku ba mutu ya n’a li mulutiwa mwahal’a nako ya bukombwa bwa Jesu ni paki ya zuho ya hae. Ka mo ku inezi fela, mutu yo hape n’a na ni ku lumela kuli Jehova ki yena Mubusi wa hae. Hamulaho wa tapelo, litaula za poswa kwa neku la Matiasi ni Josefa Barsabasi. Mulimu n’a tahisize kuli litaula li wele ku Matiasi.—Liproverbia 16:33.

 7. (a) Ne ku tile cwañi kuli Judasi n’a ‘itekezi simu ka mupuzo wa bumaswe’? (b) Judasi n’a shwile kamukwaufi?

⁷ Judasi Isikariota kaniti luli n’a si ka lumela Jehova sina yena Mubusi wa hae. Ee, n’a betekile Mwan’a Mulimu ka masheleñi a silivera a 30! Judasi na kutiselize ona mali ao kwa baprisita ba bahulu, kono Pitrosi n’a bulezi kuli mubeteki a “itekela simu ka mupuzo wa bumaswe.” Ku taha cwañi cwalo? Ku cwalo, ki yena ya na tisize mali ni libaka la ku leka “Simu ya mali,” ka ku ya ka mo ne i bizezwa. Se i lemuhilwe sina kalulo ye patami ye kwa lineku la mbowela la Musindi wa Hinomu. Ka ku sinyeha ko ku tezi kwa swalisano ya hae ni Mubusi wa hae wa kwa lihalimu, Judasi a “iponda.” (Mateu 27:3-10) Mwendi muhala kamba mutai wa kota ne u lobehile, mi a ‘wela fafasi ka toho, ni ku pazuha fahali’ ha na wezi fa mishengela ya macwe. Haike ku tokwe ni yo mukana wa ku luna ya ka ba muzwale wa buhata!

Ku Tala Moya o Kenile!

 8. Ki l’ili fo ne ba kolobelizwe balutiwa ba Jesu ka moya o kenile, mi ki sifi se ne si zwile mwateñi?

⁸ Ku cwañi ka za kolobezo ye ne i sepisizwe ya moya o kenile? Ne i ezahalile fa Pentekonta ya 33 C.E., ha se ku fitile mazazi a lishumi ku zwa fa na kambamezi Jesu kwa lihalimu. (2:1-4) Ne li kezahalo ye makaza hakalo yona kolobezo yeo! A mu nahane ka za pono. Balutiwa ba ba bat’o ba 120 ne ba li kwa ndu ya kwahalimu ‘ka sipundumukela ku zwelela kwa lihalimu kwa utwahala mulumo sina wa moya o m’ata mi wa tala ndu.’ Ne si moya, kono ne u utwahala sina moya. Malimi, “a’ swana sina malimi a mulilo” a to ina fahalimw’a mulutiwa ni muapositola yo muñwi ni yo muñwi. “Kamukan’a bona ba tala [moya o kenile], mi ba kala ku bulela lipuo li sili.” Yona kolobezo yeo ha ne i ezahalile, kaufel’a bona ne ba pepilwe ka moya o kenile, ku toziwa, ni ku swaiwa ili koñomeko ya sanda sa kwa moya.—Joani 3:3, 5; 2 Makorinte 1:21, 22; 1 Joani 2:20.

 9. Balutiwa ba ne ba tezi moya o kenile ne ba bulela ka za nto mañi?

⁹ Yona kezahalo yeo ne i hohile mamelelo ya Majuda ni maproselite mwa Jerusalema ba ne ba zwelela ‘kwa macaba kamukana a mwatas’a lihalimu.’ (2:5-13) Ka ku komoka, ba buza kuli: ‘Ku taha cwañi kuli mañi ni mañi wa ku luna wa ikutwela mwa puo ya hae ya ka sipepo?’ Ne i kana ya ba puo ya mwa libaka ze cwale ka Media (kwa upa wa Judea), Frigia (mwa Asia Minor), ni Roma (mwa Yurope). Balutiwa ha ne ba nze ba bulela mwa lipuo ze fitana-fitana “ze tuna za Mulimu,” bateelezi ba bañata ne ba komokile hahulu, kono basheununi ba akaleza kuli ne ba kozwi bucwala.

Pitrosi U Fa Bupaki bo bu Nyangumuna

10. Kezahalo ya fa Pentekonta ya 33 C.E. ne i talelelize bupolofita bufi, kana seo si na ni nto ye swana ni sona mwa lizazi la cwale?

¹⁰ Pitrosi a kalisa ku fa bupaki ka ku bonisa kuli hora ya buketalizoho ka z’ene ne li kakusasana hahulu kuli batu ba kolwe. (2:14-21) Ka ku fapahana, yona kezahalo yeo ne li talelezo ya sepiso ya Mulimu ya ku sululela moya o kenile fahalimw’a batu ba hae. Mulimu a buyelela Pitrosi ku supa kwa nako ya luna ka ku ekeza manzwi a kuli “mwa linako za maungulo” mi “ba ka polofita.” (Joele 2:28-32) Jehova na ka tahisa ze komokisa mwa lihalimu ni lisupo fa lifasi-mubu pili lizazi la hae le lituna li si ka fita kale, mi ki bao fela ba ba biza fa libizo la hae ka tumelo ba ba ka punyuha. Ku sululwa kwa moya o kenile ko ku swana fahalimw’a ba ba tozizwe se ku ba konisize ku “polofita” ka m’ata a matuna ni buikoneli kacenu.

11. Ka ku ama ku Jesu, ki sifi se ne si ezizwe ki Majuda ni Mulimu?

¹¹ Pitrosi cwale a zibahaza Mesia. (2:22-28) Mulimu n’a file bupaki ka za Bumesia bwa Jesu ka ku mu konisa ku eza misebezi ye m’ata, lisupo, ni ze komokisa. (Maheberu 2:3, 4) Kono Majuda ba mu paheka fa kota “ka mazoho a ba ba maswe,” Maroma ba ne ba sa buluki mulao wa Mulimu. Jesu a “betekwa, ka mulelo o tiile wa Mulimu, ni ka ku izibela kwa Hae pili” kakuli seo ne li tato ya bumulimu. Niteñi, Mulimu a zusa Jesu, ni ku pata mubili wa hae ka nzila yeo ne u si ke wa bola.—Lisamu 16:8-11.

12. Ki sifi seo Davida n’a bonezi cimo, mi puluso i itingile fa nto mañi?

¹² Bupolofita bwa Bumesia ne bu koñomekilwe hape Pitrosi ha nze a zwelapili mwa bupaki bwa hae. (2:29-36) Na bulezi kuli Davida n’a bonezi cimo zuho ya mwan’a hae yo mutuna ka ku fitisisa, Jesu ya li Mesia. Ku zwelela kwa sibaka se si pahami kwa lizoho la bulyo la Mulimu mwa lihalimu, Jesu na suluzi moya o kenile wa n’a amuhezi ku zwelela ku Ndat’ahe. (Lisamu 110:1) Bateelezi ba Pitrosi ne ba ‘boni ni ku utwa’ ku sebeza kwa ona ka ku iponela malimi a swana sina malimi a mulilo fahalimw’a litoho za balutiwa ni ku utwa lipuo za ku sili ze ne ba bulela. Hape na bonisize kuli puluso i itingile fa ku lumela Jesu sina Mulena ni Mesia.—Maroma 10:9; Mafilipi 2:9-11.

Jehova U Fa Kekezeho

13. (a) Kuli mutu a kolobezwe ka nzila ye nepahezi, ki sifi seo Majuda ni maproselite ne ba na ni ku si lumela? (b) Ki ba ba kai ba ne ba kolobelizwe, mi ki sifi se ne si ezahezi mwa Jerusalema?

¹³ Manzwi a Pitrosi na li a buanyu hakalo! (2:37-42) Bateelezi ba hae ne ba tabehile kwa pilu ka ku abana mwa ku bulaiwa kwa Mesia. Kacwalo a susueza kuli: “Mu bake, mi mutu ni mutu wa mina a kolobezwe ka Libizo la Jesu Kreste, kuli a fiwe swalelo ya libi; mi mu ka amuhela mpo ya [moya o kenile].” Majuda ni maproselite ne ba lumezi kale kuli Jehova ki Mulimu ni kuli ba tokwa moya wa hae. Cwale ne ba tokwa ku baka ni ku amuhela Jesu sina Mesia ili kuli ba kolobezwe mwa libizo (ili ku lemuha situlo kamba musebezi) la Ndate, Mwana, ni moya o kenile. (Mateu 28:19, 20) Ka ku fa bupaki ku bona Majuda bao ni maproselite, Pitrosi n’a itusisize sinotolo sa pili sa kwa moya sa na mu file Jesu mwa ku kwalula munyako wa zibo ni sibaka kwa Majuda ba ba lumela kuli ba kene mwa Mubuso wa kwa lihalimu. (Mateu 16:19) Ku lona lizazi li li liñwi leo, ba 3,000 ne ba kolobelizwe! A mu nahane ka za teñi, lipaki za Jehova ba bañata cwalo ku kutaza mwa kalulo ye nyinyani ya Jerusalema!

14. Ki kabakalañi mi ki ka nzila mañi yeo balumeli ne ba “kopanya linto za bona kamukana”?

¹⁴ Ba bañata ku zwelela kwa libaka za kwahule ne ba si na mifaho ye ne i ka ba konisa ku ekeza ku ina kwa bona kono ne ba lakaza ku ituta ze ñata ka za tumelo ya bona ye nca ni ku kutaza ku ba bañwi. Kacwalo balateleli ba Jesu ba kwa makalelo ka lilato ba tusana yo muñwi ku yo muñwi, sina mo ba ezeza Lipaki za Jehova kacenu. (2:43-47) Balumeli, ka swalelele ba “kopanya linto za bona kamukana.” Ba bañwi ne ba lekisize liluwo, mi mali n’a abezwi ku be ne ba li mwa butokwi. Seo ne si tahisize kuli puteho i be ni makalelo a mande sina ‘Jehova ha n’a kopanya ku bona ba ne ba piliswa ka zazi ni zazi.’

Ku Foliswa ni se ne si Zwile Mwateñi

15. Ki sifi se ne si ezahalile Pitrosi ni Joani ha ne ba nze ba kena mwa tempele, mi batu ne ba ikutwile cwañi?

¹⁵ Jehova n’a yemela balateleli ba Jesu ka “limakazo.” (3:1-10) Kacwalo, Pitrosi ni Joani ha ne ba nze ba kena mwa tempele ka 3.00 p.m. fa hora ya milapelo ye zamaelela ni sitabelo sa manzibuana, mutu y’a li sihole ku zwa fa ku pepwa n’a li bukaufi ni Munyako o Munde inze a kupa “tuso.” ‘Ha ni na silivera ni gauda,’ ko na mwa na bulelezi Pitrosi, ‘kono ni ka ku fa se ni na ni sona: Mwa libizo la Jesu Kreste wa Nazareta, a ku zamaye!’ Mutu yo n’a folisizwe onaf’o fela! H’a nze a kena mwa tempele “a zamaya; a tula-tula mi a lumbeka Mulimu,” batu ne ba ‘bile ni tabo ye tuna.’ (NW) Mwendi ba bañwi ne ba hupuzi manzwi a li: “Ya toza u ka tula sina lizwii.”—Isaya 35:6.

16. Baapositola ne ba konile cwañi ku folisa mutu y’a li sihole?

¹⁶ Batu ba ne ba komokile ba kubukana kwa kozwana ye bizwa ya Salumoni, kalulo ye na ni situwa kwa lineku la upa la tempele. Teñi k’o Pitrosi a fa bupaki. (3:11-18) Na bonisize kuli Mulimu u file m’ata kwa baapositola a ku folisa mutu ya li sihole ka Mutang’a Hae ya filwe kanya, Jesu. (Isaya 52:13–53:12) Majuda ne ba hanile “Ya-Kenile, Ya-Lukile”; nihakulicwalo, Jehova n’a mu zusize. Nihaike kuli batu ni babusi ba bona ne ba sa zibi kuli ne ba bulaya Mesia, Mulimu kacwalo n’a taleleza manzwi a bupolofita a kuli “Kreste [wa hae, NW] u ka utwiswa butuku.”—Daniele 9:26.

17. (a) Ki muhato mañi o ne ba tokwa ku nga Majuda? (b) Ki sifi se se si ezahalile haisali ku zwiwa fa ku ‘lumwa kwa Kreste’ mwa lizazi la luna?

¹⁷ Bakeñisa muhato o ne ba ngile kwa neku la Mesia, Pitrosi a bonisa seo Majuda ne ba swanela ku si eza. (3:19-26) Ne ba tokwa kuli ba “bake,” kamba ku ikutwa bumaswe fa libi za bona, ni kuli ba “sikuluhe,” kamba ku fetuha, ku nga nzila ye fapahana. Haiba ne ba ka bonisa tumelo ku Jesu sina Mesia, ku amuhela tiululo, ku imululwa ne ku ka taha ku bona ku zwelela ku Jehova sina ba ba swalezwi libi. (Maroma 5:6-11) Majuda ne ba hupulisizwe kuli ne ba li bana ba bulikani bwa Mulimu b’o n’a ezize ni bokuku a bona, ha n’a bulelezi Abrahama kuli: “Macaba kaufela a lifasi a ka fumana mbuyoti ka lusika lwa hao.” Kacwalo Mulimu pili n’a lumile Mutanga wa hae wa Bumesia ku to lukulula Majuda ba ba bakile. Kwa tabisa kuli, haisali ku zwiwa fa ku ‘lumwa kwa Kreste’ mwa m’ata a Mubuso wa lihalimu ka 1914, se ku bile ni ku kutiswa sinca kwa liniti ze imulula ni kopano ya teokratiki mwahal’a Lipaki za Jehova.—Genese 12:3; 18:18; 22:18.

Ne ba si ka Tuhela!

18. Ki mañi y’a li “licwe” le ne li hanilwe ki “bayahi” ba Sijuda, mi puluso i taha ka mañi fela?

¹⁸ Ka ku nyemiswa ki libaka la kuli Pitrosi ni Joani ne ba zibahalize zuho ya Jesu, baprisita ba bahulu, nduna wa tempele, ni Basaduki ba ba kenya mwa tolongo. (4:1-12) Basaduki ne ba sa lumeli mwa zuho, kono ba bañwi ne ba fitile fa ku ba balumeli, banna fela ne ba fitile bukaufi ni 5,000. Ha ne ba buzizwe fapil’a kuta ye tuna ya Jerusalema, Pitrosi n’a bulezi kuli mutu wa sihole n’a folisizwe “ka Libizo la Jesu Kreste wa Nazareta,” ya na kokotezwi ki bona kono n’a zusizwe ki Mulimu. Yena y’o ya li “licwe” le ne li hanilwe ki “bayahi” ba Sijuda s’a fitile fa ku ba “muñ’a lilulu.” (Lisamu 118:22) “Mi,” Pitrosi u zwelapili, “ku piliswa, ha ku yo ku yo muñwi.”

19. Ha ne ba laelezwi kuli ba tuhele ku kutaza, baapositola ne ba alabile cwañi?

¹⁹ Muhato wa ku tibela taba ya mufuta o cwalo ne u likilwe ku ezwa. (4:13-22) Bakeñisa kuli mutu ya na folisizwe n’a li teñi, ne ku sa konahali ku hana yona “makazo ye zibahala” yeo, niteñi Pitrosi ni Joani ne ba laelezwi kuli ‘ba si ke ba bulela kamba ku luta ka libizo la Jesu kai ni kai.’ Kalabo ya bona? ‘Ha lu koni ku tuhela ku bulela ka ze lu boni ni ze lu utwile.’ Ne ba utwile Jehova sina yena Mubusi wa bona!

Litapelo za Alabiwa!

20. Ki sifi se ne ba lapelezi balutiwa, mi ki sifi se ne si zwile mwateñi?

²⁰ Sina Lipaki za Jehova ha ba lapela kwa mikopano, kacwalo balutiwa ne ba lapezi muta baapositola ba ne ba lukuluzwi ha ne ba bihile se ne si ezahezi ku bona. (4:23-31) Ne ku lemuhilwe kuli babusi Heroda Antipasi ni Ponse Pilato, hamohocwalo ni Maroma Balicaba ni batu ba Isilaele, ne ba kopani hamoho ka ku lwanisa Mesia. (Lisamu 2:1, 2; Luka 23:1-12) Ka ku alaba tapelo, Jehova n’a talize balutiwa ka moya o kenile, kuli mane ne ba bulezi linzwi la Mulimu ka bundume. Mubusi wa bona n’a si ka kupiwa kuli a felise nyandiso kono kuli a ba konise ku kutaza ka bundume ku si na taba ni nyandiso.

21. Barnabasi ne li mañi, mi ki tulemeno tufi twa n’a na ni tona?

²¹ Balumeli ne ba zwezipili ku kopanya linto za bona kamukana, mi ne ku si na ni yo mukana ya n’a li mwa butokwi. (4:32-37) Yo muñwi ya n’a zwisize linubu ne li Josefa wa kwa Sipera. Baapositola ne ba mu beile libizo la Barnabasi, ili ku talusa “Mwan’a-likutazo,” ka mo ku bonahalela ki ka libaka la kuli n’a lata ku tusa mi n’a li y’a sishemo. Kaniti luli, kaufel’a luna lu tokwa ku ba batu ba mufuta o cwalo.—Likezo 11:22-24.

Mahata ba Beiwa fa Ngandaleza

22, 23. Ki sifi sibi sa Ananiasi ni Safira, mi lu kona ku fumana cwañi tuso ku zwelela ku se ne si ezahalile ku bona?

²² Niteñi, Ananiasi ni musal’a hae Safira, ne ba tuhezi ku lumela kuli Jehova ki yena Mubusi wa bona. (5:1-11) Ne ba lekisize simu ni ku buluka kalulo ye ñwi ya mali ni ku ipumisa kuli kaufel’a ona ne ba a file kwa baapositola. Zibo ye ne i filwe ka moya wa Mulimu ne i konisize Pitrosi ku lemuha lishano la bona, ili nto ye ne i tahisize lifu la bona. Ki temuso kwa butuna ku bao ba ba fita mwa ku likiwa ki Satani ku sa bulela niti!—Liproverbia 3:32; 6:16-19.

²³ Hamulaho wa yona kezahalo ye, ha ku na mutu wa mano a maswe ya n’a bile ni bundume bwa ku to kena kwa balutiwa. Ba bañwi ne ba fitile fa ku ba balumeli. (5:12-16) Fahalimw’a seo, ba ne ba kula ni bao ba ne ba katazwa ki mioya ye maswe ha ne ba nze ba bonisa tumelo mwa m’ata a Mulimu, ‘kamukan’a bona ne ba folisizwe.’

Ku Utwa Mulimu ku Fita Batu

24, 25. Ki kabakalañi baeteleli ba Sijuda ha ne ba nyandisa baapositola, kono ki sikuka mañi bona bao ba ba sepahala se ba tomezi batanga ba Jehova kamukana?

²⁴ Muprisita yo muhulu ni Basaduki cwale ba lika ku tibela kekezeho ye makaza ka ku beya baapositola kaufela mwa tolongo. (5:17-25) Kono ka bona busihu b’o lingeloi la Mulimu la to ba lukulula. Mi ha li yo pazula ne ba luta mwa tempele! Nyandiso ha i koni ku paleliswa batanga ba Jehova.

²⁵ Nihakulicwalo, sineneketo ne i bile teñi muta baapositola ne ba tisizwe fapila Kuta ye Tuna. (5:26-42) Niteñi, ka ku laelelwa kuli ba tuhele ku luta, ne ba bulezi kuli: “Ki swanelo kuli lu utwe Mulimu ku fita batu.” Seo ne si tomile sikuka kwa neku la balutiwa ba Jesu, ili se si latelelwa ki Lipaki za Jehova kacenu. Hamulaho wa temuso ku zwelela ku muluti wa Mulao Gamaliele, baeteleli ba nata baapositola, ni ku ba laelela kuli ba tuhele ku kutaza, mi ba ba lukulula.

26. Bukombwa bwa baapositola bu bapanywa cwañi ni bwa Lipaki za Jehova kacenu?

²⁶ Baapositola ne ba tabile bakeñisa kuli ne ba fumanwi ku ba ba ba shwauzwi bakeñisa libizo la Jesu. “Ha ba si ka lisela, ka mazazi kaufela, ku luta batu, ni ku bulela mwa Tempele ni mwa mandu.” Ee, ne li likombwa za fa ndu ni ndu. Mi Lipaki za Mulimu ba mwa lizazi la cwale ni bona ba cwalo, ba ba amuhezi moya wa hae bakeñisa kuli ba mu utwa ni ku bulela kuli, “Jehova ki yena Mubusi wa luna!”

Ne Mu Ka Alaba Cwañi?

◻ Ki musebezi mañi o lukela ku talelezwa ki balateleli ba Jesu, ba kwaikale ni ba mwa lizazi la cwale?

◻ Ki sifi se ne si ezahezi fa lizazi la Pentekonta ya 33 C.E.?

◻ Ki l’ili mi ki kamukwaufi w’o Pitrosi n’a itusisize sinotolo sa pili sa kwa moya sa na mu file Jesu?

◻ Ki sifi se lu kona ku ituta ku zwelela ku se ne si ezahezi ku Ananiasi ni Safira?

◻ Ha ne ba laelezwi kuli ba tuhele ku kutaza, ki sikuka mañi seo baapositola ne ba si tomezi Lipaki za Jehova kamukana?