Mu Sebeleze Jehova ka Pilu ye Munati

“Likuto zeo kaufela li ka ku tahela . . . Kakuli fo, ikaba kuli ha u si ka sebeleza Muñ’a Bupilo Mulimu wa hao, ka tabo ni ka pilu ye munati.”—DEUTERONOMA 28:45-47.

 1. Ki bupaki mañi bo bu li teñi bwa kuli ba ba sebeleza Jehova ba na ni tabo, ba mu sebeleze kai kamba kai?

BATANGA ba Jehova ba tezi tabo, niha ba eza tato ya hae mwa lihalimu kamba fa lifasi-mubu. “Linaleli za malungasiku” za mangeloi ne li opezi ka tabo lifasi ha li tomwa, mi ku si na kakanyo mangeloi a kwa lihalimu a’ likiti-kiti ka tabo a ‘eza litaelo za Mulimu.’ (Jobo 38:4-7; Samu 103:20) Mwan’a Jehova wa libanda n’a “mu sebeleza” a tabile mwa lihalimu mi n’a tabezi ku eza tato ya bumulimu sina mutu wa fa lifasi-mubu Jesu Kreste. Fahalimu a seo, “kabakala tabo y’a n’a beezwi kwapili, Jesu a itiisa kwa [kota ya linyando, NW ], a sa tokomeli lishwau la [yona]; mane a y’o ina ku la bulyo la lubona lwa Mulimu.”—Liproverbia 8:30, 31; Maheberu 10:5-10; 12:2.

 2. Ki sifi se ne si atula ka za haiba Maisilaele ne ba ka ipumana mwa limbuyoti kamba mwa likuto?

² Maisilaele ne ba bile ni tabo ha ne ba tabisize Mulimu. Kono ku cwañi ha ne ba si ke ba mu utwa? Ne ba lemusizwe kuli: “[Likuto] li ka ina fahalimu a hao, ni fahalimu a baikulu ba hao ku ya ku ile, ibe poniso ni nto ye komokisa; Kakuli fo, ikaba kuli ha u si ka sebeleza Muñ’a Bupilo Mulimu wa hao, ka tabo ni ka pilu ye munati, kabakala ku atelwa ki linto kaufela. U ka sebeleza lila za hao, z’a ka luma Muñ’a Bupilo ku t’o ku lwanisa, u ba sebeleze nz’o lapile, nz’o nyolilwe, u inzi mapunu, nz’o tokwa linto kaufela; mi ba ka beya coko ya sipi mwa mulala wa hao, konji ba ku yundiseleze.” (Deuteronoma 28:45-48) Limbuyoti ni likuto ne li bonisa hande-nde ba ne ba li ni ba ne ba si batanga ba Jehova. Likuto ze cwalo hape ne li fa bupaki bwa kuli likuka ni milelo ya Mulimu ha li konwi ku keshebiswa, mi hape ha li konwi ku shwaulwa. Bakeñisa kuli Maisilaele ne ba hanile ku utwa litemuso za Jehova za ku shandaulwa ni ku iswa mwa butanga, Jerusalema ne u fitile fa ku ba “sikuto kwa macaba kaufela a lifasi.” (Jeremia 26:6) Kacwalo haike lu ipeye ku utwa Mulimu ni ku ikola sishemo sa hae. Tabo ki ye ñwi ya limbuyoti ze ñata za bumulimu ze ipumanwa ku zona ki ba mayemo a bumulimu.

Ka Mwa ku Sebeleza ka “Pilu ye Munati”

 3. Pilu ya ka swanisezo ki nto mañi?

³ Maisilaele ne ba na ni ku sebeleza Jehova “ka tabo ni ka pilu ye munati.” Batanga ba Mulimu ba mwa mazazi a cwale ni bona ba lukela ku eza cwalo. Ku ba ni tabo ki “ku nyakalala; ku tala tabo.” Nihaike kuli pilu tota i bulezwi mwa Mañolo, yona luli ha i nahani kamba ku kengeyela. (Exoda 28:30) Musebezi wa yona o mutuna ki ku pompa mali a’ fepa liselusi za mubili. Nihakulicwalo, mwa miinelo ye miñata hahulu, Bibele i ama kwa pilu ya ka swanisezo, ili ye fita fela sibaka mo ku tomile lilato, susuezo, ni ngana. I bulelwa ku yemela “sibaka sa fahali ka nañungelele, sa mwahali, mi kacwalo ili mutu wa mwahali ka mwa iponahaleza mwa likezo za hae kaufela ze fitana-fitana, mwa litakazo za hae, litato, maikuto, litengamo, milelo, mihupulo ya hae, likutwisiso, ze nahanwa, butali bwa hae, zibo, buc’aziba, litumelo za hae ni ku kengeyela kwa hae, likupulo za hae ni ku ikutwa kwa hae.” (Journal of the Society of Biblical Literature and Exegesis, 1882, likepe 67) Pilu ya luna ya swanisezo i ama ze lu ikutwa ni maikuto a luna, ku kopanyeleza cwalo ni tabo.—Joani 16:22.

 4. Ki sifi se si kona ku lu tusa ku sebeleza Jehova Mulimu ka pilu ye munati?

⁴ Ki sifi se si kona ku lu tusa ku sebeleza Jehova ka pilu ye munati? Mubonelo o’ tiile ni wa ka ku itebuha limbuyoti za luna ni matohonolo ao lu filwe ki Mulimu u kona ku tusa. Sina ka mutala, lwa kona ku nahana ka tabo fa tohonolo ya luna ya ku ‘sebeleza’ Mulimu wa niti. (Luka 1:74) Ku na ni tohonolo ye swalisani ni yeo ya ku lwala libizo la Jehova sina Lipaki za hae. (Isaya 43:10-12) Ku seo lu kona ku ekeza teñi tabo ya ku ziba kuli ka ku latelela Linzwi la Jehova lw’a mu tabisa. Mi ki tabo hakalo ye mwa ku bonisa liseli la kwa moya mi kacwalo ili ku tusa ba bañata ku zwa mwa lififi!—Mateu 5:14-16; mu bapanye 1 Pitrosi 2:9.

 5. Ki sifi simbule sa tabo ya bumulimu?

⁵ Niteñi, ku sebeleza Jehova ka pilu ye munati haki taba fela ya ku nahana ko ku tiile. Kw’a tusa ku ba ni mubonelo o’ tiile. Kono tabo ya bumulimu haki nto ye lu tahisa ka ku hulisa muinelo wa luna. Ki muselo wa moya wa Jehova. (Magalata 5:22, 23) Haiba lu si na tabo ye cwalo, ne lu kana lwa tokwa ku eza licinceho kuli lu pime ku nahana kamba k’u nga muhato ka mukwa o muñwi o’ si wa mwa mañolo ili o’ kona ku swabisa moya wa Mulimu. (Maefese 4:30) Nihakulicwalo, sina ba ba ipeile ku Jehova, lu si ke lwa saba kuli ku tokwa tabo ya ka maikuto a matuna ka nako ye ñwi ki bupaki bwa ku s’a lumelelwa kwa bumulimu. Ha lu si k’a petahala mi lu ipumana mwa ku utwa butuku, maswabi, mane ni ku swaba ko kutuna ka linako ze ñwi, kono Jehova wa lu utwisisa. (Samu 103:10-14) Kacwalo he haike lu lapelele moya wa hae o kenile, lu nze lu hupula kuli muselo wa ona wa tabo u fiwa ki Mulimu. Ndat’a luna ya kwa lihalimu ya lilato u k’a alaba litapelo ze cwalo mi u ka lu konisa ku mu sebeleza ka pilu ye munati.—Luka 11:13.

Tabo Ha I Siyo

 6. Haiba tabo i siyo mwa sebelezo ya luna ku Mulimu, ki sifi se lu swanela ku eza?

⁶ Haiba tabo i siyo mwa sebelezo ya luna, kwa nalulelule ne lu kana lwa fokola mwa ku sebeleza Jehova kamba nihaiba ku fita fa ku s’a sepahala ku yena. Kacwalo, ne ku k’a ba ko ku butali ku nyakisisa ka buikokobezo ni ka tapelo milelo ya luna ni ku eza licinceho ze tokwahala. Kuli lu be ni tabo ye fiwa ki Mulimu, lu lukela ku sebeleza Jehova ka lilato ni ka pilu, moyo, ni munahano wa luna kaufela. (Mateu 22:37) Ha lu lukeli ku sebeza ka mubonelo wa ku kangisana, kakuli Paulusi n’a ñozi kuli: “Ha lu pila ka Moya, hape lu zamaye ka Moya. Lu si ke lwa bata ku bubekwa ko ku si na tuso, ka ku ishemaeta ni ku shwelana muna.” (Magalata 5:25, 26) Ha lu na ku ba ni tabo ya niti haiba lu sebeza ka libaka la kuli lu bata ku fita ba bañwi kamba lu bata tumbo.

 7. Lu kona ku zusulusa cwañi pilu ya luna ye munati?

⁷ Ku na ni tabo mwa ku taleleza buineelo bwa luna ku Jehova. Ha ne lu sa z’o ineela ku Mulimu, ne lu kalisize mupilelo wa Sikreste ka tukufalelo. Ne lu itutile Mañolo ni ku abana kamita mwa mikopano. (Maheberu 10:24, 25) Seo ne si lu file tabo ya ku abana mwa bukombwa. Niteñi, ku cwañi haiba tabo ya luna i fukuzehile? Tuto ya Bibele, ku fumaneha kwa mikopano, ku abana mwa bukombwa—ka buniti fela, ku amiwa ka ku tala mwa maneku kaufela a Sikreste—ku swanela ku fa bupilo bwa luna mayemo a ku tomela kwa moya ni ku zusulusa lilato le ne lu na ni lona kwa makalelo hamohocwalo ni pilu ye munati ye ne lu kile lwa ba ni yona. (Sinulo 2:4) Hakulicwalo ha lu na ku ba sina ba bañwi bao ka mukwa o muñwi ba si na tabo mi hañata ba mwa butokwi bwa tuso ya kwa moya. Maeluda ba tabile ku tusa, kono luna ka buñwi lu lukela ku taleleza buineelo bwa luna ku Mulimu. Ha ku na yo muñwi ya kona ku lu ezeza seo. Kacwalo ha lu beñi ni mulelo wa ku latelela muezezo wa kamita wa Sikreste ilikuli lu taleleze buineelo bwa luna ku Jehova ni ku ba ni tabo ya niti.

 8. Ki kabakalañi lizwalo le li twekile ha li li la butokwa haiba lu bata ku ba ni tabo?

⁸ Kuli lu be ni tabo ye li muselo wa moya wa Mulimu, lu tokwa lizwalo le li twekile. Ka nako kaufela yeo Mulena Davida wa Isilaele n’a likile ku pata sibi sa hae, n’a bile ni maswabi a matuna. Ka buniti mane, mukamo wa bupilo bwa hae ne u bonahala ku oma, mi ne ku kana kwa ba kuli n’a fitile fa ku kula kwa mubili. N’a bile ni kimululo hakalo ku baka ni ku ipulela ha ne ku ezahezi! (Samu 32:1-5) Ha lu koni ku ba ni tabo haiba lu sweli ku pata sibi se siñwi se situna. Seo ne si kana sa lu tahiseza fela ku pila bupilo bwa ka maswenyeho. Ka buniti fela, yeo haki nzila ya ku fumana tabo ka yona. Kono ku ipulela ni ku baka ku tisa kimululo ni ku kutiswa kwa moya wa tabo.—Liproverbia 28:13.

Ku Libelela ka Tabo

 9, 10. (a) Ki sepiso mañi ya n’a amuhezi Abrahama, kono tumelo ni tabo ya hae ne li kana za likiwa cwañi? (b) Lu kona ku fumana cwañi tuso kwa mitala ya bo Abrahama, Isaka, ni Jakobo?

⁹ Ku ba ni tabo ha lu ituta pili ka za milelo ya bumulimu haki nto ye likana ni ku siyala lu na ni tabo lilimo ha li nze li ya. Seo si konwa ku swanisezwa mwa taba ya Abrahama. Hamulaho wa ku lika ku fana mwan’a hae Isaka ka taelo ya Mulimu, lingeloi la fitisa lushango lo: “Ni konkile ka Na, kuli kakuli u ezize taba yeo, u sa ni haneli mwan’a hao wa libanda, Kwa ku fuyola, ni ka ku fuyola, mi kwa ku atisa, ni ka atisa lusika lwa hao, lu be sina linaleli za lihalimu, ni sina lishabati le li fa likamba la liwate; mi bana ba hao ba ka luwa minyako ya lila za bona. Macaba kamukana a lifasi a ka fiwa mbuyoti ka [peu ya, NW] hao, kakuli u utwile linzwi la ka.” (Genese 22:15-18) Ku si na kakanyo, Abrahama n’a tabisizwe hahulu ki sepiso yeo.

¹⁰ Ne ku kana kwa ba kuli Abrahama n’a libelezi kuli Isaka n’a ka ba yena “peu” yeo ka yona limbuyoti ze sepisizwe ne li ka taha. Kono ku fita kwa lilimo ku si na se si ipitezi se ne si petiwa ka Isaka ne ku kana ku likile tumelo ni tabo ya Abrahama ni lubasi lwa hae. Ku tiisa sepiso yeo kwa Mulimu ku Isaka mi hamulaho ku mwan’a hae Jakobo ne ku ba kolwisize kuli ku taha kwa Peu ne ku sa li kwapili, mi seo ne si ba tusize ku buluka tumelo ni tabo ya bona. Nihakulicwalo, Abrahama, Isaka, ni Jakobo ne ba shwile ba si k’a bona talelezo ya lisepiso za Mulimu ku bona, kono ne ba si batanga ba Jehova ba ba si na tabo. (Maheberu 11:13) Ni luna lwa kona ku zwelapili ku sebeleza Jehova ka tumelo ni tabo ha lu nze lu libelela talelezo ya lisepiso za hae.

Tabo ku Si Na Taba ni Nyandiso

11. Ki kabakalañi ha lu kona ku ba ni tabo ku si na taba ni nyandiso?

¹¹ Ka ku ba batanga ba Jehova, lwa kona ku sebeleza Jehova ka pilu ye munati, niha lu nyandiswa. Jesu n’a bulezi kuli ki ba ba tabile ba ba nyandiswa kabakala hae, mi muapositola Pitrosi n’a bulezi kuli: “Mu tabe, kabakala kuli mu ngile siemba kwa manyando a Kreste; kuli kanya ya hae ha i ka patuluha, mu kone ku nyakalala ka tabo ye tuna. Ha mu nyefulelwa Libizo la Kreste, mu na ni mbuyoti; kakuli Moya wa kanya, Moya wa Mulimu, u inzi fahalimu a mina.” (1 Pitrosi 4:13, 14; Mateu 5:11, 12) Haiba mu sweli ku tiyela nyandiso ni ku nyandisezwa se si lukile, mu na ni moya ni tumelezo ya Jehova, mi zeo ka buniti fela li tahisa tabo.

12. (a) Ki kabakalañi ha lu kona ku tiyela miliko ya tumelo ka tabo? (b) Ki tuto mañi ye mutomo ye konwa ku itutiwa mwa taba ya Mulivi yo muñwi ya n’a li mwa butanga?

¹² Lu kona ku tiyela litiko za tumelo ka tabo kakuli Mulimu ki yena Masabelo a luna. Seo si bonisizwe hande kwa Samu 42 ni 43. Ka libaka le liñwi, Mulivi yo muñwi n’a li mwa butanga. N’a yawile hahulu bulapeli bwa kwa sibaka se si kenile sa Mulimu kuli mane n’a ikutwile sina tolo ye shwile linyolwa ili ye nyolelwa mezi mwa sibaka se si omile ili se si si na limela. N’a “nyolezwi,” kamba ku lakaza hahulu, Jehova ni tohonolo ya ku lapela Mulimu mwa sibaka sa Hae se si kenile. (Samu 42:1, 2) Se si bonwi sa ya n’a li mwa butanga y’o si swanela ku lu susueza ku bonisa buitebuho kwa neku la swalisano ye lu ikola ni batu ba Jehova. Haiba miinelo ye cwale ka ku beiwa mwa tolongo bakeñisa nyandiso ne i ka lu tibela ku ba ni bona, haike lu nahane fa lika ze tabisa za ku ba hamoho za kwamulaho mwa sebelezo ye kenile mi lu lapelele buitiiso ha lu nze lu “sepa Mulimu” kuli u ka lu kutiseza kwa misebezi ya kamita ni balapeli ba hae.—Samu 42:4, 5, 11; 43:3-5.

‘Mu Sebeleze Jehova Inze Mu Tabile’

13. Samu 100:1, 2 i bonisa cwañi kuli tabo i lukela ku ba muinelo wa sebelezo ya luna ku Mulimu?

¹³ Tabo i lukela ku ba muinelo o mutuna wa sebelezo ya luna ku Mulimu. Seo ne si bonisizwe mwa pina ya buitumelo ili yeo ku yona walisamu n’a opezi kuli: “A mu ezeze [Jehova, NW] lilata la tabo, mina ba lifasi kaufela. A mu sebeleze [Jehova, NW] inze mu tabile; mu itahise fapil’a hae ka lipina.” (Samu 100:1, 2) Jehova ki “Mulimu ya tabile” mi u bata kuli batanga ba hae ba fumane tabo mwa ku taleleza buineelo bwa bona ku yena. (1 Timotea 1:11, NW) Batu ba macaba kaufela ba swanela ku nyakalala ku Jehova, mi lipulelo za luna za tumbo li swanela ku ba ze tiile, inge “lilata la tabo” la mpi ye tulile. Bakeñisa kuli sebelezo ku Mulimu ki ye wetulusa, i swanela ku zamaelela ni ku nyakalala. Kacwalo, walisamu n’a susuelize batu ku taha ku Mulimu “ka lipina.”

14, 15. Samu 100:3-5 i sebeza cwañi kwa batu ba Jehova ba ba tabile kacenu?

¹⁴ Walisamu n’a ekelize kuli: “Mu zibe [mu lemuhe, mu lumele] kuli Muñ’a Bupilo ki Yena Mulimu; ki Yena ya lu bupile, mi lu ba hae; ki luna sicaba sa hae, ni mutapi o liswa ki Yena.” (Samu 100:3) Bakeñisa kuli Jehova ki yena Mubupi wa luna, wa lu ziba sina mulisana mw’a zibela lingu za hae. U lu babalela hande hahulu kuli lu mu lumbe ka buitumelo. (Samu 23) Ka ku ama ku Jehova, walisamu hape n’a opezi kuli: “Mu kene mwa minyako ya hae inze mu itumela, ni mwa malapa a hae inze mu lumbeka; mu itumele ku Yena, mi mu lumbeke Libizo la hae. Kakuli Muñ’a Bupilo u na ni musa, mi sishemo sa hae ki sa kamita; mi ku sepahala kwa hae ku ka na ku ba teñi mwa masika ni masika.”—Samu 100:4, 5.

¹⁵ Kacenu, batu ba ba tabile ba mwa macaba kamukana ba sweli ku kena mwa malapa a sibaka sa Jehova se si kenile kuli ba fe buitumelo ni tumbo. Ka tabo lu lumbeka libizo la Mulimu ka ku bulela hande ka za Jehova kamita, mi tulemeno twa hae to tu tuna tu lu susueza ku mu lumbeka. Ki yo munde hahulu, mi sishemo sa hae se si lilato kamba k’u nga batanga ba hae ka mukekecima ku konwa ku itingiwa kamita, kakuli ku zwelapili ku ya ku ile. Ku isa kwa “masika ni masika,” Jehova wa sepahala mwa ku bonisa lilato ku ba ba eza tato ya hae. (Maroma 8:38, 39) Ka buniti fela, hakulicwalo he, lu na ni libaka le linde la ku ‘sebeleza Jehova inze lu tabile.’

Mu Tabe ka Sepo ya Mina

16. Bakreste ba kona ku taba ka ku ba ni lisepo ni litibelelo lifi?

¹⁶ Paulusi n’a ñozi kuli: “Mu tabe ka sepo.” (Maroma 12:12) Balateleli ba Jesu Kreste ba ba tozizwe ba taba ka sepo ye nde hahulu ya bupilo bo bu s’a shwi mwa lihalimu b’o Mulimu a ba kwalulezi ka Mwan’a hae. (Maroma 8:16, 17; Mafilipi 3:20, 21) Bakreste ba ba na ni sepo ya bupilo bwa kamita fa lifasi-mubu le li li Paradaisi ni bona ba na ni mutomo wa ku taba. (Luka 23:43) Batanga ba Jehova ba ba sepahala kaufela ba na ni libaka la ku taba ka sepo ya Mubuso, kakuli ba k’a ba kalulo ya mulonga w’o wa kwa lihalimu kamba ku pila ka ku busiwa ki ona fa lifasi-mubu. Ki mbuyoti kwa ku tabisa!—Mateu 6:9, 10; Maroma 8:18-21.

17, 18. (a) Ki sifi se ne si bulezwi cimo kwa Isaya 25:6-8? (b) Bupolofita bo bwa Isaya bu swelwi ku talelezwa cwañi cwale, mi ku cwañi ka za talelezo ya bona mwa nako ya kwapili?

¹⁷ Isaya hape n’a bulezi cimo ka za nako ye kwapili ye tabisa ya mufuta wa mutu o ipeya ku utwa. N’a ñozi kuli: “Fa lilundu le, Muñ’a Bupilo u ka lukiseza macaba kaufela mukiti wa lico ze nunile, wa liveine ze munati ze tabusa, ni wa linama ze nunile ze tezi mooko, wa liveine ze tabusa ze shekezi. Fa lilundu le, ku ka zwiswa kapai ka ka silile batu kamukana, ni kubo ye kwahezi macaba kaufela. U mizize lifu ku ya ku ile; Mulena Muñ’a Bupilo u ka takula mioko kwa lipata kamukana, a felise sikobiso sa sicaba sa hae mwa lifasi kaufela; kakuli ki s’a bulezi Muñ’a Bupilo.”—Isaya 25:6-8.

¹⁸ Ze atile za kwa moya ze lu abana teñi kacenu sina balapeli ba Jehova ki mukiti o tabisa luli. Ka buniti fela, tabo ya luna ya yubauka ha lu nze lu sebeleza Jehova ka cisehelo ka ku libelela mukiti wa lika ze nde tenyene zeo a sepisize kwa neku la lifasi le linca. (2 Pitrosi 3:13) Ka mutomo wa sitabelo sa Jesu, Jehova u k’a zwisa “kubo” ye kwahezi mufuta wa mutu kabakala sibi sa Adama. Ku k’a ba ko ku tabisa hakalo ku bona sibi ni lifu li zwisiwa teñi! Ku k’a tabisa hakalo ku amuhela balatiwa ba ba zusizwe, ku lemuha kuli miyoko i felile, ni ku pila fa lifasi-mubu le li li paradaisi, f’o batu ba Jehova ba si ke b’a kobiswa kono ba k’a be ba file Mulimu kalabo ku munyazi yo mutuna, Satani Diabulosi!—Liproverbia 27:11.

19. Lu swanela k’u nga cwañi muhato kwa litibelelo zeo Jehova a lu tomezi sina Lipaki za hae?

¹⁹ Kana ha mu tali tabo ni buitumelo ku ziba seo Jehova a k’a ezeza batanga ba hae? Ka buniti fela, litibelelo ze tuna ze cwalo li ekeza kwa tabo ya luna! Fahalimu a seo, sepo ya luna ye fuyauzwi i lu tahiseza ku talima ku Mulimu wa luna ya tabile, ya lilato, ni ya sishemo ka maikuto a’ swana ni a: “A mu bone, ki Yena Mulimu wa luna, ne lu mu sepile, mi u lu pilisize. Ki Yena Muñ’a Bupilo; ne lu mu sepile. A lu wabelwe, mi lu tabele ku pilisa kwa hae.” (Isaya 25:9) Ka ku toma ka ku tiya sepo ya luna ye nde hahulu mwa munahano, ha lu libiseñi buikoneli kaufela kwa ku sebeleza Jehova ka pilu ye munati.

Ne Mu k’a Alaba Cwañi?

◻ Lu kona ku sebeleza cwañi Jehova ka “pilu ye munati”?

◻ Ki sifi se lu kona ku eza haiba tabo i siyo mwa sebelezo ya luna ku Mulimu?

◻ Ki kabakalañi batu ba Jehova ha ba kona ku ba ni tabo ku si na taba ni nyandiso?

◻ Ki mabaka mañi ao lu na ni ona a ku ba ni tabo ka sepo ya luna?

[Maswaniso a fa likepe 26]

Ku abana mwa miinelo kaufela ya bupilo bwa Sikreste ku k’a ekeza tabo ya luna