Ku Kubukanya Linto za kwa Lihalimu ni Za mwa Lifasi

‘Ku lata kwa hae kikuli a kubukanyeze linto kamukana ku Kreste, ni za kwa lihalimu ni za mwa lifasi.’—MAEFESE 1:9, 10.

 1. Ki kufi “ku lata” kwa Jehova ka za lihalimu ni lifasi?

JEHOVA, yena “Mulimu wa kozo,” u lelile kuli ku be ni kozo mwa pupo kamukana. (Maheberu 13:20) N’a susumelize muapositola Paulusi ku ñola kuli “ku lata” kwa Mulimu kikuli “a kubukanyeze linto kamukana ku Kreste, ni za kwa lihalimu ni za mwa lifasi.” (Maefese 1:9, 10) Pulelo ye tolokilwe kuli ‘ku kubukanya’ mwa timana yeo i talusañi luli? Caziba wa Bibele ya bizwa J. B. Lightfoot u li: “Pulelo yeo i talusa swalisano ya pupo kamukana mo ku si ke kwa ba ni lika ze ñwi ze ka kona ku tisa likauhano, kono ili m’o libupiwa kaufela li ka swalisaniswa hamoho ku Kreste. Ha ku sa na ku ba ni sibi, lifu, maswabi, bupalelwi, ni manyando.”

Linto “za kwa Lihalimu”

 2. Linto “za kwa lihalimu” ze tokwa ku kubukanyiwa li yemela bomañi?

² Muapositola Pitrosi n’a talusize hande sepo ye tabisa ya Bakreste ba niti ha n’a ñozi kuli: “Lu talimezi lihalimu le linca, ni lifasi le linca, mo ku yahile Ku Luka.” (2 Pitrosi 3:13) “Lihalimu le linca” le li sepisizwe mwa liñolo leo li talusa tamaiso ye nca ya ku busa, ona Mubuso wa Bumesiya. Linto “za kwa lihalimu” za n’a bulezi Paulusi mwa liñolo la n’a ñolezi Maefese li ka kubukanyezwa “ku Kreste.” Linto za kwa lihalimu zeo ki palonyana ya batu ba ba ketilwe ku yo busa ni Kreste kwa lihalimu. (1 Pitrosi 1:3, 4) Batoziwa ba 144,000 bao ba “liuluzwi mwa lifasi,” ba “liuluzwi mwahal’a batu,” kuli ba yo busa hamoho ni Kreste mwa Mubuso wa hae wa kwa lihalimu.—Sinulo 5:9, 10; 14:3, 4; 2 Makorinte 1:21; Maefese 1:11; 3:6.

 3. Ki kabakalañi ha ku kona ku bulelwa kuli batoziwa ba ‘inzi mwa mabaka a kwa lihalimu’ niha ba sa li fa lifasi?

³ Bakreste ba ba tozizwe ba pepiwa sinca ka moya o kenile kuli ba be bana ba Jehova ba kwa moya. (Joani 1:12, 13; 3:5-7) Ka ku ba bana ‘ba ba añuzwi’ ki Jehova, ba fita fa ku ba banyani ba Jesu. (Maroma 8:15; Maefese 1:5) Kacwalo, niha ba sa li fa lifasi ba bulelwa kuli ba ‘zusizwe hamoho ni ku iniswa hamoho mwa mabaka a kwa lihalimu ku Jesu Kreste.’ (Maefese 1:3; 2:6) Ba mwa sibaka sa kwa moya se si pahami seo kakuli ba “swailwe nombolo ka Moya o Kenile o n’o sepisizwe batu; ona ki swalele ya sanda sa [bona]” se ba bulukezwi kwa lihalimu. (Maefese 1:13, 14; Makolose 1:5) Kacwalo bona bao kona linto “za kwa lihalimu,” ili bao palo ya bona ya n’a zibezi cimo Jehova ne i tokwa ku kubukanyiwa.

Musebezi wa ku Kubukanya Wa Kalisa

 4. Musebezi wa ku kubukanya linto “za kwa lihalimu” ne u kalile lili, mi ne u kalisize kamukwaufi?

⁴ Ka ku ya ka ‘tamaiso’ ya Jehova, kamba nzila ya zamaisa lika ka yona, musebezi wa ku kubukanya linto “za kwa lihalimu” ne u ka kalisa “linako z’a n’a tomile ha li se li petahalile.” (Maefese 1:10) Nako ye tomilwe yeo ne i tile ka Pentekonta ya 33 C.E. Ka lona lizazi leo, baapositola ni sikwata sa balutiwa ba banna ni ba basali, ne ba sululezwi moya o kenile. (Likezo 1:13-15; 2:1-4) Kezahalo yeo ne i bonisize bupaki bwa kuli bulikani bo bunca ne bu kalile ku sebeza, mi ne li fona fo ne i tomezwi puteho ya Sikreste ni sicaba se sinca sa Isilaele wa kwa moya, yena “Isilaele wa Mulimu.”—Magalata 6:16; Maheberu 9:15; 12:23, 24.

 5. Ki kabakalañi Jehova ha n’a ketile “sicaba” se sinca kuli si yole Isilaele wa ka sipepo?

⁵ Bulikani bwa Mulao bo ne bu itamilwe ni Isilaele wa ka sipepo ne bu si ka tahisa “mubuso wa baprisita, ni sicaba se si kenile” se ne si ka sebeleza kwa lihalimu ku ya ku ile. (Exoda 19:5, 6) Jesu n’a bulelezi baeteleli ba Sijuda kuli: “Mu ka amuhiwa mubuso wa Mulimu, mi u ka fiwa sicaba si sili, se si ka beya lukau lwa ona.” (Mateu 21:43) Bakreste ba ba tozizwe ba ba mwa bulikani bo bunca ki bona ba ba eza sicaba seo, sona sa Isilaele wa kwa moya. Ku bona bao, muapositola Pitrosi n’a ñozi kuli: “Mu lusika lo lu ketilwe, mu na ni buprisita bwa silena, mu mushobo o kenile, mu sicaba sa hae tota, kuli mu bulele ze nde za hae Yena ya mi bizelize ku zwa mwa lififi, ni ku kena mwa liseli la hae le li komokisa. Sapili mina ne mu si sicaba, kono cwale mu sicaba sa Mulimu.” (1 Pitrosi 2:9, 10) Maisilaele ba ka sipepo ne se ba tuhezi ku ba sicaba se si itamile bulikani ni Jehova. (Maheberu 8:7-13) Sina mwa n’a bulelezi cimo Jesu, ne ba amuhilwe tohonolo ye ipitezi ya ku ba babusi mwa Mubuso wa Mesiya mi tohonolo yeo ya fiwa kwa batu b’a 144,000 ba Isilaele wa kwa moya.—Sinulo 7:4-8.

Ba Itama Bulikani Bwa Mubuso

6, 7. Ki bulikani bufi bo bu ipitezi bwa n’a itamile Jesu ni banyani ba hae ba ba tozizwe ka moya, mi bulikani bo bu talusañi ku bona?

⁶ Busihu bwa n’a kalisize Jesu ku eza Kupuzo ya lifu la hae, n’a bulelezi baapositola ba hae ba ba sepahala kuli: “Mina mu tiiselize ni na mwa miliko ya ka; mihe ni ka mi fa mubuso, sina ndate h’a ni file ona, kuli mu ce mi mu nwe fa tafule ya ka, mwa mubuso wa ka; mi mu ka ina fa litulo za bulena, mu atule masika a Isilaele a lishumi ka a mabeli.” (Luka 22:28-30) Jesu ha n’a bulela manzwi ao, n’a talusa bulikani bo bu ipitezi bwa n’a itama ni banyani ba hae ba ba tozizwe ka moya ba 144,000, ba ne ba ka zwelapili ku ‘sepahala ku isa lifu’ ni ku bonahaza kuli ki ‘batuli.’—Sinulo 2:10; 3:21.

⁷ Batu ba ba mwa sikwatanyana seo ba itobohile sepo ya ku pila ku ya ku ile fa lifasi sina batu. Ba ka busa ni Kreste kwa lihalimu; mi ba ka ina fa mabona inge ba atula batu. (Sinulo 20:4, 6) Cwale ha lu nyakisiseñi mañolo a mañwi a ama fela batoziwa bao, a bonisa libaka ba “lingu ze ñwi” ha ba sa cangi ni ku nwa liswanisezo za fa Kupuzo.—Joani 10:16.

 8. Bakreste ba ba tozizwe ba bonisañi ka ku ca sinkwa? (Mu bone kakwenda ka ka fa likepe 23.)

⁸ Batoziwa ba kopana ni manyando a swana ni a n’a kopani ni ona Kreste mi ba itatela ku shwa sina mwa n’a shwezi. Paulusi ka ku ba yo muñwi wa sikwata seo, n’a bulezi kuli n’a itukiselize ku itoboha ilikuli a ‘fume Kreste, a zibe Kreste, ni mata a zuho ya hae, ni ku kopana ni yena mwa matomola a hae.’ Kaniti Paulusi n’a itatela ku swana “sina yena mwa lifu la hae.” (Mafilipi 3:8, 10) Bakreste ba ba tozizwe ba bañata ba itiisize ku lwala “lifu la Jesu” mwa mibili ya bona.—2 Makorinte 4:10.

 9. Ki mubili o cwañi o yemelwa ki sinkwa sa fa Kupuzo?

⁹ Ha n’a kalisize ku eza Mulalelo wa Mulena, Jesu n’a ize: “Se, ki mubili wa ka.” (Mareka 14:22) N’a talusa mubili wa hae tota o n’o ka tuha u natakiwa ni ku tanyiswa mali. Sinkwa se si si ka ya mumela ne li swanisezo ye swanela ya mubili wa hae. Libaka? Kakuli mumela mwa Bibele u kona ku talusa sibi kamba bumaswe. (Mateu 16:4, 11, 12; 1 Makorinte 5:6-8) Jesu ne li ya petehile, mi mubili wa hae wa butu ne u si na sibi. N’a ka fa ona mubili o petehile wo sina sitabelo se si lifa libi. (Maheberu 7:26; 1 Joani 2:2) Ka ku eza cwalo n’a ka tusa Bakreste ba ba sepahala kaufela, ibe kuli sepo ya bona ki ya ku yo pila kwa lihalimu kamba ki ya ku pila kamita mwa paradaisi fa lifasi-mubu.—Joani 6:51.

10. Ba ba nwa veine ya fa Kupuzo ba mwa ‘kopano ni mali a Kreste’ kamukwaufi?

¹⁰ Paulusi ha n’a ñola ka za veine ye ba nwanga Bakreste ba ba tozizwe fa Kupuzo, n’a ize: “Sinwiso sa mbuyoti se lu itumela ka sona, kana hasi kopano ni mali a Kreste?” (1 Makorinte 10:16) Ba ba nwa veine yeo ba mwa “kopano ni mali a Kreste” kamukwaufi? Niti ki kuli ha ba abani mwa ku fa sitabelo sa tiululo, kakuli ni bona ka sibili ba tokwa tiululo. Ka ku ba ni tumelo mwa m’ata a mali a Kreste a liulula, libi za bona za swalelwa mi ba beiwa ba ba lukile kuli ba yo pila kwa lihalimu. (Maroma 5:8, 9; Tite 3:4-7) Ka mali a Kreste a n’a suluzwi, ba ba ka yo busa ni Kreste ba 144,000 ba “kenisizwe,” ba ketilwe, mi ba tapisizwe sibi kuli ba be “ba ba kenile.” (Maheberu 10:29; Daniele 7:18, 27; Maefese 2:19) Kaniti, Kreste n’a ‘liululezi Mulimu, ka mali a hae, batu ba ba zwa mwa masika kaufela, ni mwa lipuo, ni mwa mishobo, ni mwa macaba, mi u ba beile ku ba malena ni baprisita ku Mulimu; mi ba ka busa lifasi.’—Sinulo 5:9, 10.

11. Batoziwa ba bonisangañi ha ba nwa veine ya fa Kupuzo?

¹¹ Jesu ha n’a kalisize Kupuzo ya lifu la hae, n’a tambekile baapositola ba hae ba ba sepahala sinwiso sa veine ni ku ba bulelela kuli: “Mu nwele mwateñi kaufela. Kakuli se ki mali a ka, a’ sululelwa ba bañata, bakeñisa swalelo ya libi.” (Mateu 26:27, 28) Sina fela mali a lipoho ni lipuli ha n’a tiisize bulikani bwa Mulao mwahal’a Mulimu ni sicaba sa Isilaele, mali a Jesu ni ona n’a tiisize bulikani bo bunca bwa n’a ka itama Jehova ni Isilaele wa kwa moya, ku kala ka Pentekonta ya 33 C.E. (Exoda 24:5-8; Luka 22:20; Maheberu 9:14, 15) Ka ku nwa veine ye yemela “mali a bulikani,” batoziwa ba bonisa kuli ba itamile bulikani bo bunca mi ba sweli ba tusiwa ki bulikani bo.

12. Batoziwa ba kolobezwa cwañi mwa lifu la Kreste?

¹² Batoziwa hape ba hupuliswa nto ye ñwi. Jesu n’a bulelezi balutiwa ba hae ba ba sepahala kuli: “Mu ka nwela mwa sinwiso se ni ka nwela ku sona, mu kolobezwe ka kolobezo ye ni ka kolobezwa ka yona.” (Mareka 10:38, 39) Muapositola Paulusi hamulaho n’a bulezi za Bakreste kuli ba “kolobelelizwe mwa lifu la [Kreste].” (Maroma 6:3) Batoziwa ba pila bupilo bwa buitomboli. Lifu la bona ki la sitabelo kakuli ba itobohile sepo ya bupilo bwa kamita fa lifasi-mubu. Kolobezo ya Bakreste ba ba tozizwe bao mwa lifu la Kreste i fita fa ku fela muta hamulaho wa ku shwa inge ba sepahala, ba zusiwa sina libupiwa za kwa moya ku yo “busa [sina malena]” ni Kreste kwa lihalimu.—2 Timotea 2:10-12; Maroma 6:5; 1 Makorinte 15:42-44, 50.

Ku Ca ni ku Nwa Liswanisezo

13. Ki kabakalañi ba ba na ni sepo ya ku pila fa lifasi ha ba sa cangi ni ku nwa liswanisezo, kono ki kabakalañi ha ba fumanehanga kwa Kupuzo?

¹³ Bakeñisa kuli ku ca sinkwa ni ku nwa veine ye fitiswa fa Kupuzo ku ama zona lika ze lu nyakisisize zeo kaufela, u zibe he i ka ba mafosisa a matuna haiba ba ba na ni sepo ya ku pila fa lifasi ba ca ni ku nwa. Ba ba na ni sepo ya ku pila fa lifasi ba lemuha kuli bona haki batoziwa ba mubili wa Kreste, ni kuli ha ba yo mwa bulikani bo bunca bwa n’a itamile Jehova ni ba ba ka busa ni Jesu Kreste. Bakeñisa kuli “sinwiso” si yemela bulikani bo bunca, ki ba ba mwa bulikani bo bunca fela ba ba ca ni ku nwa liswanisezo. Batu ba ba libelezi bupilo bo bu sa feli bwa bupetehi fa lifasi-mubu mwatas’a Mubuso ha ba si ka kolobezwa mwa lifu la Jesu mi ha ba si ka bizwa kuli ba yo busa ni yena kwa lihalimu. Ha ne ba ka ca ni ku nwa liswanisezo zeo, neikaba ku eza nto ye sa ba swaneli. Kacwalo ha ba cangi kamba ku nwa liswanisezo, kono ba fumanehanga teñi sina baputehi ba ba bonisa likute kwa Kupuzo. Ba itebuha lika kaufela za ba ezelize Jehova ka Mwan’a hae, ku beya cwalo ni ku swalelwa libi ko ku tiswa ki mali a Kreste a n’a suluzwi.

14. Batoziwa ba tiiswa cwañi kwa moya ki ku ca sinkwa ni ku nwa veine?

¹⁴ Ku swaiwa kwa mafelelezo kwa palonyana ya Bakreste ba ba bizelizwe ku yo busa ni Kreste kwa lihalimu ku tuha ku fela. Ku fitela ba feza bupilo bwa bona bwa buitomboli fa lifasi, batoziwa ba tiiswa kwa moya ka ku canga ni ku nwa liswanisezo za fa Kupuzo. Ba ikutwa ku swalisana ni mizwale ni likaizeli ba bona ba ba tozizwe ka ku ba ba mubili wa Kreste. Ku ca sinkwa ni ku nwa veine ya fa Kupuzo ku ba hupulisa kuli ba swanela ku zwelapili ku sepahala ku isa lifu.—2 Pitrosi 1:10, 11.

Ku Kubukanya Linto “za mwa Lifasi”

15. Ki bomañi ba se ba kubukanyelizwe kwa lineku la Bakreste ba ba tozizwe?

¹⁵ Ku zwa mwa lilimo za ma-1930, palo ye ekezeha ya “lingu ze ñwi,” be si ba “mutapinyana” ili ba ba na ni sepo ya ku pila ku ya ku ile fa lifasi, se ba zwezipili ku tusa batoziwa. (Joani 10:16; Luka 12:32; Zakaria 8:23) Se ba bile balikani ba ba sepahala ba banyani ba Kreste, ba nze ba tusa hahulu mwa musebezi wa ku kutaza “evangeli ye ya mubuso” kuli ibe bupaki kwa macaba kamukana. (Mateu 24:14; 25:40) Ka ku eza cwalo, ba na ni kolo ya ku atulwa hande ki Jesu sina “lingu” za hae ze ka beiwa ku la hae “la bulyo” ha ka taha ku to atula macaba. (Mateu 25:33-36, 46) Ka ku ba ni tumelo mwa mali a Kreste a suluzwi, ba ka ba mwahal’a “buñata bo butuna” bwa batu ba ba ka punyuha “ñalelwa ye tuna.”—Sinulo 7:9-14.

16. Linto “za mwa lifasi” li ka kopanyeleza bomañi, mi linto zeo kamukana li ka ba cwañi ni kolo ya ku ba “bana ba Mulimu”?

¹⁶ Ku swaiwa kwa mafelelezo kwa ba 144,000 ha se ku felile, “moya” wa sinyeho u ka tulukela muinelo wa linto o maswe wa Satani fa lifasi. (Sinulo 7:1-4) Mwa Puso ya Lilimo ze Sikiti ya Kreste ni ba ka busa ni bona sina malena ni baprisita, buñata bo butuna ba ka kopana ni batu ba palo ye tuna ye si ka taluswa ba ba ka zusiwa. (Sinulo 20:12, 13) Bona batu bao ba ka ba ni kolo ya ku pila kamita sina babusiwa ba Mulena wa Bumesiya, yena Kreste Jesu. Kwa mafelelezo a Puso ya Lilimo ze Sikiti, linto kamukana “za mwa lifasi” zeo li ka likwa lwa mafelelezo. Ba ba ka sepahala ba ka añulwa sina “bana ba Mulimu” ba fa lifasi-mubu.—Maefese 1:10; Maroma 8:21; Sinulo 20:7, 8.

17. Mulelo wa Jehova u ka talelezwa cwañi?

¹⁷ Kacwalo ka ku itusisa ‘tamaiso’ ya hae ye butali, kamba nzila ya zamaisa lika ka yona, Jehova u ka be a talelelize mulelo wa hae wa ku ‘kubukanyeza linto kamukana ku Kreste, za kwa lihalimu ni za mwa lifasi.’ Libupiwa ze butali kaufela ze kwa lihalimu ni fa lifasi li ka be li kubukanyizwe hamoho mwa kozo ya pupo kamukana, inze li ipeya ka ku lata kwa bubusi bwa pupo kamukana ya Muleli yo Mutuna, yena Jehova.

18. Batoziwa ni balikani ba bona ba ka tusiwa cwañi ka ku fumaneha kwa Kupuzo?

¹⁸ Tumelo ya batoziwa ba palonyana ni ya bolule-lule ba balikani ba bona ba lingu ze ñwi i ka tiiswa luli ha ba ka kopana la 12 April, 2006! Ba ka eza Kupuzo ya lifu la Kreste, ka ku latelela taelo ya Jesu ya kuli: “Mu eze cwalo kuli mu ni hupule.” (Luka 22:19) Ba ba ka fumaneha kwa Kupuzo kaufela ba swanela ku hupula za ba ezelize Jehova ka Mwan’a hae ya latwa, yena Kreste Jesu.

Lundululo

• Ki ufi mulelo wa Jehova ka za linto za kwa lihalimu ni za mwa lifasi?

• Linto “za kwa lihalimu” ki bomañi, mi ba kubukanyizwe cwañi?

• Linto “za mwa lifasi” ki bomañi, mi ba na ni sepo mañi?

[Mbokisi fa likepe 23]

“Mubili wa Kreste”

Kwa 1 Makorinte 10:16, 17, Paulusi ha n’a talusa butokwa bwa buhobe bwa fa kupuzo kwa banyani ba Kreste ba ba tozizwe ka moya, n’a bulezi za “mubili” ka mukwa o ipitezi. N’a ize: “Buhobe bo lu komauna, kana hasi kopano ni mubili wa Kreste? Luna ba bañata lu eza mubili u li muñwi, kakuli lu ca kaufela kwa buhobe bu li buñwi.” Bakreste ba ba tozizwe ha ba ca buhobe bwa fa Kupuzo, ba zibahaza swalisano ya bona mwahal’a puteho ya batoziwa, ili ye swana sina mubili wo Kreste a li Toho ya ona.—Mateu 23:10; 1 Makorinte 12:12, 13, 18.

[Maswaniso a fa likepe 23]

Ki kabakalañi haili batoziwa fela ba ba canga sinkwa ni ku nwa veine?

[Siswaniso se si fa likepe 25]

Ka tamaiso ya Jehova, libupiwa kaufela za kwa lihalimu ni fa lifasi li ka swalisana