Bashemi Ni Bana: Mu Beye Mulimu mwa Sibaka sa Pili!

“Saba Mulimu, mi u mamele milao ya hae.”—MUEKELESIA 12:13.

 1. Ki sabo ifi yeo bashemi ni bana ba tokwa ku hulisa, mi i ka ba tahiseza nto mañi?

BUPOLOFITA bo bu ama Jesu Kreste ne bu bulezi kuli “ku saba [Jehova, NW] ki sona s’a ka tabela.” (Isaya 11:3) Sabo ya hae ka mutomo ne li likute ni ku makala ko ku tungile ka za Mulimu, ili sabo ya ku saba ku sa tabisa Mulimu kakuli n’a mu lata. Bashemi ni bana ba tokwa ku tahisa sabo ye cwalo ya ku saba Mulimu ye swana ni ya Kreste, ili ye ka ba tabisa sina mo ne i tabiselize Jesu. Ba tokwa ku beya Mulimu mwa sibaka sa pili mwa bupilo bwa bona ka ku ipeya ku utwa litaelo za hae. Ka ku ya ka muñoli yo muñwi wa Bibele, “ki yona swanelo kaufela ya mutu.”—Muekelesia 12:13.

 2. Ki ifi ye ne i li taelo ya butokwa ka ku fitisisa ya Mulao, mi ka mutomo ne i filwe ku bomañi?

² Taelo ya butokwa ka ku fitisisa ya Mulao, y’e li lu swanela ku ‘lata Jehova ka pilu, moyo, ni m’ata a luna kaufela,’ ka mutomo ne i filwe kwa bashemi. Seo si boniswa ki manzwi a’ zwelapili a Mulao: “U na ni ku a luta bana ba hao ka tokomelo [manzwi a ka za ku lata Jehova], u be ni ngambolo ka ona, niha u inzi mwa ndu ya hao, niha u zamaya mwa nzila, niha u y’o lobala, niha u zuha.” (Deuteronoma 6:4-7; Mareka 12:28-30) Bashemi kacwalo ne ba laelezwi ku beya Mulimu mwa sibaka sa pili ka ku mu lata bona ka sibili ni ka ku luta bana ba bona ku eza nto ye swana.

Buikalabelo bwa Sikreste

 3. Jesu n’a bonisize cwañi butokwa bwa ku fa mamelelo kwa banana?

³ Jesu n’a bonisize butokwa bwa ku fa nihaiba banana ba banyinyani mamelelo. Ka nako ye ñwi bukaufi ni mafelelezo a bukombwa bwa Jesu bwa fa lifasi-mubu, batu ne ba kalisize ku tisa bana ba bona ba banyinyani ku yena. Ka mo ku bonahalela fela ka ku lumela kuli Jesu n’a patehile hahulu ka ku sa swanelwa ku kataziwa, balutiwa ne ba likile ku hanisa batu. Kono Jesu n’a kalimezi balutiwa ba hae kuli: “Mu tuhele bana ba tahe ku na, mi mu si ke mwa ba hanisa.” Mane Jesu a “ba nga mwa mazoho a hae,” kacwalo ili ku bonisa, ka nzila ye ama maikuto, butokwa bwa ku fa mamelelo kwa banana.—Luka 18:15-17; Mareka 10:13-16.

 4. Ki bomañi ba ne ba filwe taelo ya kuli ba “lute macaba kaufela,” mi seo ne si ka ba tokwa ku eza nto mañi?

⁴ Jesu hape n’a utwahalize hande-nde kuli balateleli ba hae ne ba na ni buikalabelo bwa ku luta ba bañwi kwand’a bana ba bona tota. Hamulaho wa lifu ni zuho ya hae, Jesu “a bonwa ka nako i liñwi ki balumeli ba ba fita mianda iketalizoho”—ku kopanyeleza cwalo ni bashemi ba bañwi. (1 Makorinte 15:6) Ku bonahala kuli seo ne si ezahezi kwa lilundu mwa Galilea k’o baapositola ba hae b’a 11 ni bona ne ba kubukani. Teñi k’o Jesu a susueza b’ote kuli: “Mu ye cwale, mu lute macaba kaufela, . . . Mu ba lute ku mamela ze ni mi laezi kaufela.” (Mateu 28:16-20) Ha ku na Mukreste ya kona ku fa libaka le linde la ku keshebisa taelo yeo! Kuli bondate ni bome ba i pete ku tokwa kuli ba babalele bana ba bona hamohocwalo ni ku abana mwa musebezi wa ku kutaza fa nyangela ni ku luta.

 5. (a) Ki sifi se si bonisa kuli buñata bwa baapositola, haiba isi kaufel’a bona, ne ba li mwa linyalo mi kacwalo ku kona ku ba kuli ne ba na ni bana? (b) Ki kelezo ifi yeo litoho za mabasi ba tokwa k’u nga ka butuna?

⁵ Ka butokwa ni ku fita, nihaiba baapositola ne ba na ni ku beya buikalabelo bwa bona bwa lubasi mwa buitikanelelo ni tamo ya ku kutaza hamohocwalo ni ku lisa mutapi wa Mulimu. (Joani 21:1-3, 15-17; Likezo 1:8) Seo ki ka libaka la kuli buñata bwa bona, haiba isi kaufel’a bona, ne ba li mwa linyalo. Kacwalo muapositola Paulusi n’a talusize kuli: “Kikuli ha lu na tukelo ya ku zamaya lu na ni kaizeli mwa tumelo, ili musal’a luna, sina baapositola ba bañwi, ni banyani ba Mulena, ni Kefasi?” (1 Makorinte 9:5; Mateu 8:14) Baapositola ba bañwi hape ne ba kana ba bile ni bana. Bañoli ba litaba ze ezahezi ba kwa makalelo, ba ba cwale ka Eusebius, ba bulela kuli Pitrosi n’a na ni bana. Bashemi kaufela ba Sikreste ba kwa makalelo ne ba tokwa ku utwa kelezo ya mwa Mañolo ye li: “Mutu h’a sa babaleli banabahabo, sihulu ba ndu i liñwi ni ya hae, ki ya latuzi tumelo, mi u fitwa ki ya si ka lumela.”—1 Timotea 5:8.

Buikalabelo bo Bu Mutomo

 6. (a) Ki likulutendano lifi leo maeluda ba Sikreste ba ba na ni mabasi ba na ni lona? (b) Ki bufi bo bu li buikalabelo bo bu mutomo bwa eluda?

⁶ Bashemi ba Sikreste ba ba na ni mabasi kacenu ba mwa muinelo o swana ni w’ani wa baapositola. Ba lukela ku beya mwa buitikanelelo buikalabelo bwa bona bwa ku babalela butokwi bwa kwa moya ni bwa kwa mubili bwa mabasi a bona ni tamo ya bona ya ku kutaza fa nyangela ni ku lisa mutapi wa Mulimu. Ki musebezi ufi o swanela ku ba mwa sibaka sa pili? The Watchtower ya March 15, 1964, ne i bulezi kuli: “Tamo ya pili [ya ndate] i kwa lubasi lwa hae, mi ka mo ku inezi fela, n’a si ke a swanela ku sebeza sina eluda haiba a sa tokomeli tamo yeo.”

 7. Bondate ba Sikreste ba beya cwañi Mulimu mwa sibaka sa pili?

⁷ Kacwalo bondate ba lukela ku beya Mulimu mwa sibaka sa pili ka ku ipeya ku utwa taelo ya ‘ku hulisa bana ba bona ka temuso ni tuto ya Jehova.’ (Maefese 6:4) Bona buikalabelo b’o ha bu konwi ku fiwa ku mutu yo muñwi u sili, nihaike kuli ndate hape ne a kana a ba ni kalulo ya ku okamela misebezi ya mwa puteho ya Sikreste. Bondate ba ba cwalo ba kona ku babalela cwañi buikalabelo bwa bona—ili ku fumanela lilama za lubasi za kwa mubili, kwa moya, ni mwa maikuto—mi ka nako ye swana, ni ku zamaisa ni ku fa okamelo mwa puteho?

Ku Fa Kemelo ye Tokwiwa

 8. Musal’a eluda u kona ku fa cwañi kemelo ku munn’a hae?

⁸ Ka ku utwahala fela, maeluda ba ba na ni buikalabelo bwa lubasi ba kona ku fumana tuso kwa kemelo. The Watchtower ye amilwe fahalimu ne i talusize kuli musali wa Sikreste u kona ku fa kemelo ku munn’a hae. Ne i bulezi kuli: “U kona ku tahisa kuli ku be ko ku sa pitihanyi ka mo ku konahalela kaufela kwa neku la kuli munn’a hae a itukiseze misebezi ya hae ye fitana-fitana, ni ku tusa ku sa sinya-sinya nako ya bona ya butokwa ka ku ba ni tomahanyo ye nde fa lapa, ku ba ni lico ka nako ye tomilwe, ku itukiseza ku ya kwa mikopano ya puteho ka nako. . . . Mwatas’a ketelelo ya munn’a hae, musali wa Sikreste u kona ku eza ze ñata mwa ku luta bana mwa nzila yeo ba swanela ku zamaya ku yona kuli ba tabise Jehova.” (Liproverbia 22:6) Ee, musali n’a bupilwe kuli a be “mutusi,” mi munn’a hae ka butali u ka amuhela tuso ya hae. (Genese 2:18, NW) Kemelo ya musali i kona ku konisa munn’a hae ku babalela ka buanyu ni ku fita buikalabelo bwa hae bwa mwa lubasi hamohocwalo ni bwa mwa puteho.

 9. Ki bomañi mwa puteho ya mwa Tesalonika ba ne ba susuelizwe ku tusa lilama za puteho ya habo bona?

⁹ Nihakulicwalo, basali ba maeluda ba Sikreste haki bona fela ba ba kona ku abana mwa misebezi ye fa kemelo ku muokameli ya lukela ku ‘lisa mutapi wa Mulimu’ hamohocwalo ni ku babalela b’a ndu ya hae. (1 Pitrosi 5:2) Ki bomañi ba bañwi ba ba kona ku abana ku yona? Muapositola Paulusi n’a susuelize mizwale mwa Tesalonika ku beya mwa munahano bao ‘ba ba ba zamaisa.’ Niteñi ka ku zwelapili ku taluseza bona mizwale bao—sihulu bao ba ba sa zamaisi—Paulusi n’a ñozi kuli: “Banabahesu, lwa mi lemusa kuli mu eleze ba ba sa yi ka mulao; mu tiise ba lipilu ze shekesha; mu babalele ba ba fokozi; mu be ni pilu-telele kwa batu kamukana.”—1 Matesalonika 5:12-14.

10. Ki ku ama kufi ko kunde k’o tuso ye lilato ya mizwale kaufela i na ni kona fa puteho?

¹⁰ Ki ko kunde hakalo mizwale mwa puteho ha ba na ni lilato le li ba susueza ku omba-omba ba lipilu ze shekesha, ku babalela ba ba fokozi, ku eleza ba ba sa yi ka mulao, ni ku ba ni pilu-telele kwa batu kamukana! Mizwale ba mwa Tesalonika, ba ne ba sa z’o amuhela niti ya Bibele ku si na taba ni ku ipumana mwa manyando a matuna, ne ba sebelisize kelezo ya Paulusi ya ku eza seo. (Likezo 17:1-9; 1 Matesalonika 1:6; 2:14; 5:11) Mu nahane ka za ku ama ko kunde k’o swalisano ya bona ye lilato ne i bile ni kona ili kwa ku tiisa ni ku kopanya hamoho puteho kamukana! Ka ku swana, mizwale kacenu ha ba omba-ombana, ku fana kemelo, ni ku elezana, seo si tahisa kuli musebezi wa ku lisa wa maeluda, ili bao hañata ba na ni mabasi a ku babalela, u nolofale hahulu mwa ku u eza.

11. (a) Ki kabakalañi ha ku li ko ku utwahala ku fita fa kutwisiso ya kuli basali ne ba amilwe teñi mwa pulelo ya “banabahesu”? (b) Ki tuso ifi yeo musali wa Sikreste ya ipeya ku utwa a kona ku fa kwa basali ba banca kacenu?

¹¹ Kana basali ni bona ne ba amilwe mwahal’a “banabahesu” bao muapositola Paulusi n’a ñolezi? Ee, ne ba amilwe, kakuli basali ba bañata ne ba bile balumeli. (Likezo 17:1, 4; 1 Pitrosi 2:17; 5:9) Ki tuso ye cwañi ye ne ba kona ku fa basali ba ba cwalo? Kihona, ne ku na ni likalibe mwa puteho ili ba ne ba na ni butata bwa ku zamaisa “litakazo [za bona] za minyaka” kamba ba ne ba fitile fa ku ba “ba lipilu ze shekesha.” (1 Timotea 5:11-13) Basali ba bañwi kacenu ba na ni butata bo bu swana. Se ne ba kana ba tokwa hahulu ka bunolo fela neikana ya ba ku teelezwa ni ku utwelwa butuku. Hañata musali wa Sikreste ya hulile ki yena mutu yo munde ka ku fitisisa ya kona ku fa tuso ye cwalo. Sina ka mutala, u kona ku buhisana butata bwa ka butu ni musali yo muñwi ili b’o munna wa Sikreste ka ili yena fela ne a si ke a kona ku bu talima ka mo ku swanehela. Ka ku koñomeka butokwa bwa ku fa tuso ye cwalo, Paulusi n’a ñozi kuli: “Basali ba ba hulile . . . ba laye ze nde; Kuli ba talifise likalibe, ba ba laye kuli ba late banna ba bona, ba late ni bana ba bona, Ba be ni kutwisiso, ba ipabalele, ba itulele mwa mahae a bona inze ba sebeza, ba be ni musa, ba ipeye kwatas’a banna ba bona, kuli Linzwi la Mulimu li si ke la nyefulwa.”—Tite 2:3-5.

12. Ki ketelelo ya bomañi ye li ya butokwa ku b’ote mwa puteho ku i latelela?

¹² Ki mbuyoti hakalo yeo likaizeli ba ba ikokobeza ba li yona mwa puteho ha ba fa kemelo ka ku swalisana kwa banna ba bona hamohocwalo ni kwa maeluda! (1 Timotea 2:11, 12; Maheberu 13:17) Maeluda ba ba na ni buikalabelo bwa lubasi ba tusiwa ka ku ipitela batu kamukana ha ba swalisana mwa ku tusana ka moya wa lilato ni muta b’ote ba ipeya kwatas’a ketelelo ya balisana ba ba sumekezwi.—1 Pitrosi 5:1, 2.

Bashemi, Ki Sifi se Mu Beya mwa Sibaka sa Pili?

13. Bondate ba bañata ba palelwa cwañi ku kondisa lika mwa lubasi lwa bona?

¹³ Lilimo-limo kwamulaho k’o wa za ku itabisa ya zibahala hahulu n’a talusize kuli: “Ni bona banna ba ba kondisa lika ba zamaisa likopano za pisinisi ze na ni batu ba ba myanda-nda; ba ziba ka mwa ku sebelisanela ni muinelo kaufela, ka mwa ku fela kalimelo ni mwa ku fela mupuzo ku za pisinisi. Kono pisinisi ye tuna ka ku fitisisa yeo ba zamaisa ki lubasi lwa bona mi ha ba i kondisi.” Kabakalañi? Kana haki kabakala kuli ba beya pisinisi ni licisehelo ze ñwi mwa sibaka sa pili mi ba keshebisa kelezo ya Mulimu? Linzwi la hae li bulela kuli: “Manzwi ao, e ni ku laela . . . u na ni ku a luta bana ba hao ka tokomelo.” Mi seo ne si na ni ku eziwa ka zazi ni zazi. Bashemi ba tokwa ku fana nako ya bona isi ka lukokoto—mi sihulu ku fana lilato ni ku iyakatwa kwa bona ko ku tungile.—Deuteronoma 6:6-9.

14. (a) Bashemi ba swanela ku babalela cwañi bana ba bona? (b) Ku luta bana ko ku swanela ku kopanyeleza nto mañi?

¹⁴ Bibele i lu hupulisa kuli bana ki sanda se si zwa ku Jehova. (Samu 127:3) Kana mu babalela bana ba mina sina liluwo la Mulimu, ili mpo yeo a beile mwa pabalelo ya mina? Mwan’a mina ka mo ku kana kwa bela fela u k’a nga muhato haiba mu mu beya mwa mazoho a mina, kacwalo ili ku bonisa pabalelo ni mamelelo ya mina ye lilato. (Mareka 10:16) Kono ku “luta mwana nzila y’a swanela ku zamaya” ku tokwa nto ye fita ku mu kumbata fela ni ku mu tubeta. Kuli a be ni butali bwa ku pima butata bo bu sa lemusehi bwa mwa bupilo, mwana u tokwa hape kalimelo ye lilato. Mushemi u bonisa lilato le li buniti ka ‘ku kalimela mwan’a hae a sa li yo munyinyani.’—Liproverbia 13:1, 24; 22:6.

15. Ki sifi se si bonisa tokwahalo ya kalimelo ya bashemi?

¹⁵ Tokwahalo ya kalimelo ya bashemi i konwa ku bonwa mwa tolongosho ya muelezi wa fa sikolo ka za banana ba ba taha kwa ofisi ya hae: “Ki ba ba shwisa makeke, ba ba lobehile lipilu, ni ba ba si na buisepo. Ba lila ha ba bulela ka za miinelo tota ya lika. Ba bañata—ba bañata hahulu ku fita ba n’a ka nahana mutu—se ba likile ku ipulaya, isiñi ka libaka la kuli ba tabile hahulu ka ku tula tikanyo; ki ka libaka la kuli ba ikutwa hahulu ku tokwa mwangalwa, ku sa iswa pilu, ni ku bombeha kakuli niha ba li banana cwalo se ba ‘itamaisa’ mi w’o ki muinelo o buima hahulu ku bona.” N’a ekelize kuli: “Ki nto ye sabisa ku mwanana ku ikutwa kuli ki yena ya zamaisa lika.” Ki niti, banana ne ba kana ba hana kalimelo, kono ka buniti fela ba itebuha liketelelo ni likaniso za bashemi. Ba tabiswa ki taba ya kuli bashemi ba bona ba na ni pabalelo ka ku ba tomela maciñekelo. “I bile kimululo ye tuna hahulu kwa munahano wa ka,” ki mwa n’a bulelezi ya sa nonoboka yo muñwi y’o bashemi ba hae ne ba mu tomezi maciñekelo.

16. (a) Ki sifi se si ezahala kwa banana ba bañwi ba ba huliselizwe mwa malapa a Sikreste? (b) Ki kabakalañi nzila ya ku sa utwa ya mwana ha i sa talusi fela kuli taelo ye filwe ki bashemi ne i si ye nde?

¹⁶ Niteñi, ku si na taba ni ku ba ni bashemi ba ba na ni lilato ku bona ni ba ba fa tuto ye nde, banana ba bañwi, ka ku swana ni mwana wa sisinyi wa mwa swanisezo ya Jesu, ba hana ketelelo ya bashemi mi ba yauluka. (Luka 15:11-16) Nihakulicwalo, seo ka ili sona ne si kana si sa talusi kuli bashemi ne ba si ka taleleza buikalabelo bwa bona bwa ku luta hande mwan’a bona, sina ka mo i laelela Liproverbia 22:6. Pulelo ya ka za ku ‘luta mwana nzila y’a swanezi ku zamaya mi h’a na ku i keluha’ ne i filwe sina taelo ya ka nañungelele. Ka bumai, ka ku swana sina mwana wa sisinyi y’ani, banana ba bañwi ba ka ‘shungula ku utwa mushemi.’—Liproverbia 30:17.

17. Bashemi ba bana ba ba sa utwi ne ba kana ba omba-ombiwa ki nto mañi?

¹⁷ Ndate wa mwana ya sa utwi n’a lil’okile kuli: “Ni likile hahulu ku fita kwa pilu ya hae. Ha ni zibi sa ku eza kakuli ni likile lika ze ñata hahulu. Ha ku na se si sebelize.” Ku sepiwa kuli, hamulaho wa nako ye ñwi, bona banana ba ba sa utwi ba ba cwalo, ba ka hupula tuto ye lilato ye ne ba fumani ni ku kuta sina mwa n’a kutezi mwana wa sisinyi. Nihakulicwalo, taba ya luli isali teñi ya kuli banana ba bañwi b’a ipangula ni ku eza lika za muzamao o maswe ili ku tiseza bashemi ba bona maswabi a matuna. Bashemi ne ba kana ba omba-ombiwa ki ku ziba kuli nihaiba muluti yo mutuna ka ku fitisisa ya n’a pilile fa lifasi-mubu n’a boni muituti wa hae wa ka nako ye telele Judasi Isikariota a mu beteka. Mi Jehova yena ka sibili ku si na kakanyo n’a swabile hahulu muta ba bañata ba bana ba hae tota ba kwa moya ne ba hanile kelezo ya hae mi ne ba bile bakwenuheli isi ka mulatu wa Hae.—Luka 22:47, 48; Sinulo 12:9.

Bana—Ki Mañi ye Mu ka Tabisa?

18. Bana ba kona ku bonisa cwañi kuli ba beya Mulimu mwa sibaka sa pili?

¹⁸ Jehova u susueza mina ba banca kuli: “Mu utwe bashemi ba mina ku Mulena.” (Maefese 6:1) Ba banca ba beya Mulimu mwa sibaka sa pili ka ku eza seo. Mu si ke mwa ba matanya! “Litanya li shwaula tuto ya ndat’ahe,” ki mo li bulelela Linzwi la Mulimu. Hape ha mu swaneli ku nahana ka muipo kuli mwa kona ku kondisa lika ku si na kalimelo. Taba luli ki ya kuli “ku na ni lusika lwa batu ba ba ipona ku kena, kanti ha ba si ka tapa kale masila a bona.” (Liproverbia 15:5; 30:12) Kacwalo mu ipeye ku utwa ketelelo ya bumulimu—‘mu utwe,’ ‘mu buluke,’ ‘mu si ke mwa libala,’ “mu ise pilu kwateñi,” ‘mu tokomele,’ mi ‘mu si ke mwa tuhela’ litaelo ni kalimelo ya bashemi.—Liproverbia 1:8; 2:1; 3:1; 4:1; 6:20.

19. (a) Ki mabaka a tiile afi ao bana ba na ni ona a ku ipeya ku utwa Jehova? (b) Ba banca ba kona ku bonisa cwañi kuli ki ba ba itebuha ku Mulimu?

¹⁹ Mu na ni mabaka a’ tiile a ku ipeya ku utwa Jehova. Wa mi lata, mi u file milao ya hae, ku kopanyeleza cwalo ni mulao wa kuli banana ba ipeye ku utwa bashemi ba bona, kwa neku la ku mi sileleza ni ku mi tusa ku ikola bupilo bwa tabo. (Isaya 48:17) Hape u file Mwan’a hae kuli a mi shwele ilikuli mu kone ku piliswa kwa sibi ni lifu ni ku ikola bupilo bo bu sa feli. (Joani 3:16) Kana mwa itebuha? Mulimu u sweli ku bona ku zwelela kwa lihalimu, a nze a tatuba pilu ya mina ili ku bona haiba ka niti luli mwa mu lata ni ku itebuha kwa litukiso za hae. (Samu 14:2) Satani ni yena u sweli wa bona, mi u sweli ku nyaza Mulimu, ili ku ipapata kuli ha mu na ku ipeya ku Mu utwa. Ha mu sa ipeyi ku utwa Mulimu mu tabisa Satani mi Jehova u ikutwa ku ‘swaba.’ (Samu 78:40, 41) Jehova u mi kupa kuli: “Mwan’aka u talife, mi u tabise pilu ya ka, mi ni ka kona ku alaba ya ni nyaza.” (Liproverbia 27:11) Ee, puzo ki ya kuli, Ki mañi ye mu ka tabisa, Satani kamba Jehova?

20. Yo munca yo muñwi u bulukile cwañi bundume bwa ku sebeleza Jehova mane nih’a ikutwa boi?

²⁰ Haki ko ku bunolo ku eza tato ya Mulimu ha ku talimanwi ni lisineneketo zeo Satani ni lifasi la hae ba tahisa fahalimu a mina. I kona ku ba nto ye sabisa. Yo munca yo muñwi n’a talusize kuli: “Ku ba ni boi ku swana ni ku utwa silami. Ku na ni se mu kona ku eza ka za teñi.” N’a talusize kuli: “Ha mu shwile silami, mu tina sweta. Haiba mu sa utwa silami, mwa tina ye ñwi. Mi mu zwelapili ku tina nto ye ñwi ku fitela ku hazela ku fela mi mu tuhela ku utwa silami. Kacwalo ku lapela ku Jehova ha mu sabile ku swana inge ku tina sweta ha mu shwile silami. Haiba hamulaho wa tapelo i liñwi ni sa utwa boi, n’a lapela hape, ka ku kuta-kutela, ku fitela ni tuhela ku utwa boi. Mi seo sa sebeza. Se si ni tibezi kwa butata!”

21. Jehova u ka lu tusa cwañi haiba lu lika luli ku mu beya mwa sibaka sa pili mwa bupilo bwa luna?

²¹ Haiba luli lu lika ku beya Mulimu mwa sibaka sa pili mwa bupilo bwa luna, Jehova u ka lu tusa. U ka lu tiisa, ili ku fa tuso ya ka mangeloi ha i tokwahala, sina mwa n’a ezelize ku Mwan’a hae. (Mateu 18:10; Luka 22:43) Mu be ni bundume mina bashemi ni bana kaufela. Mu be ni sabo ye swana ni ya Kreste, mi i ka mi tiseza tabo. (Isaya 11:3) Ee, “saba Mulimu, mi u mamele milao ya hae. Kakuli ki yona swanelo kaufela ya mutu.”—Muekelesia 12:13.

Kana Mwa Kona ku Alaba?

◻ Ki buikalabelo bufi b’o balateleli ba Jesu ba kwa makalelo ne ba tokwa ku beya mwa buitikanelelo?

◻ Ki buikalabelo bufi b’o bashemi ba Sikreste ba lukela ku taleleza?

◻ Ki tuso ifi ye fumaneha kwa maeluda ba Sikreste ba ba na ni mabasi?

◻ Ki sebelezo ifi ya butokwa hahulu yeo likaizeli ne ba kana ba peta mwa puteho?

◻ Ki kelezo ni ketelelo ifi yeo i li ya butokwa hahulu kuli banana ba i utwe?

[Siswaniso se si fa likepe 9]

Hañata musali wa Sikreste ya hulile u kona ku fa kalibe tuso ye tokwiwa

[Siswaniso se si fa likepe 13]

Bashemi ba ba na ni bana ba ba sa utwi ba kona ku fumana ku omba-ombiwa kufi ku zwelela mwa Mañolo?