Ku Yaha ka Liyahiso ze Swanela

 9. Paulusi sihulu niha n’a li muyahi wa mitomo, n’a na ni buiyakato mañi ku ba ne ba amuhezi niti ya n’a luta?

⁹ Paulusi n’a ñozi kuli: “Yo muñwi h’a ka yaha fa mutomo wo ka gauda, kamba ka silivera, kamba ka macwe a butokwa, kamba ka likota, kamba ka musuhela, kamba ka mwange, musebezi wa mutu ni mutu u ka bonahala. Kakuli la ta lizazi le li ka u bonahalisa, li ka itahisa ka mulilo; mi mulilo u ka lika musebezi wa mutu ni mutu kana u cwañi.” (1 Makorinte 3:12, 13) Paulusi n’a talusañi? Mu nyakisise litaba za makalelo. Paulusi sihulu n’a li muyahi wa mitomo. Mwa misipili ya hae ya bulumiwa, n’a ile mwa munzi ni munzi, inze a kutaza ku ba bañata ba ne ba si ka utwa kale ka za Kreste. (Maroma 15:20) Batu ha ne ba nze ba amuhela niti ya n’a luta, liputeho ne li tomiwa. Paulusi n’a iyakatitwe hahulu ba ba sepahala bao. (2 Makorinte 11:28, 29) Kono musebezi wa hae ne u tokwa kuli a zwelepili ku zamaya. Kacwalo ha s’a tandile likweli ze 18 inze a yaha mutomo mwa Korinte, a funduka ku yo kutaza mwa minzi i sili. Niteñi, n’a lata hahulu ku ziba m’o ba bañwi ne ba zwisezapili musebezi wa n’a kalisize.—Likezo 18:8-11; 1 Makorinte 3:6.

10, 11. (a) Paulusi n’a bonisize cwañi fapano mwahal’a liyahiso ze fitana-fitana? (b) Ki miyaho ye cwañi ye ne kana i bile mwa Korinte wa kwaikale? (c) Ki miyaho ye cwañi sihulu ye kona ku tiyela mulilo, mi Bakreste ba ba tahisa balutiwa ba kona ku ituta tuto ifi ku seo?

¹⁰ Ku bonahala kuli ba bañwi ne ba sa yahi hande fa mutomo wa n’a yahile Paulusi mwa Korinte. H’a patulula butata bo, Paulusi u bonisa fapano mwahal’a mifuta ye mibeli ya liyahiso: gauda, silivera, ni macwe a butokwa kwa lineku le li liñwi; ni likota, musuhela, ni mwange kwa lineku le liñwi. Muyaho u kona ku yahiwa ka liyahiso ze nde, ze tiile, ili ze sa ci ka mulilo; kamba u kona ku eziwa honafo fela ka liyahiso ze si ka tiya, za swalelele, ili ze kona ku ca ka mulilo. Kaniti miyaho ya mifuta ye mibeli yeo ne i atile mwa muleneñi o mutuna cwalo wa Korinte. Ne ku na ni litempele ze tuna ze ne ezizwe ka macwe a matuna, ili a’ tula, mi mwendi likalulo ze ñwi za zona ne li kabisizwe ka gauda ni silivera.b Yona miyaho ye tiile yeo mwendi ne i umbukile litungu, bibuma, ni misika ya litebule ze ne eziwa ka bikota ili za ku lulela ka bucwañi.

12. Bakreste ba mwa Korinte ne ba sa yahi hande cwañi?

¹² Kaniti, Paulusi n’a ikutwa kuli Bakreste ba bañwi mwa Korinte ne ba sa yahi hande. Butata ne li bufi? Sina mutomo wa taba mo u boniseza, puteho yeo ne i kataziwa ki likauhano, ne ba babaza batu ku si na taba ni kuli nto yeo ne i beya buñwi bwa puteho mwa lubeta. Ba bañwi ne ba li, “Na, ni wa Paulusi,” mi ba bañwi ne ba pihelela ba li, “Na, ni wa Apolosi.” Ku bonahala kuli ba bañwi ne ba ikunga ku talifa hahulu. Ha ku komokisi he ha ne ku zwile teñi minahano ya nama, ku sa hula kwa moya, ni ku ata kwa “muna ni lifapano.” (1 Makorinte 1:12; 3:1-4, 18) Mikwa yeo kaniti ne i bonahezi mwa milutelo ya mwa puteho ni mwa bukombwa. Kacwalo ne ba sa ezi hande musebezi wa ku tahisa balutiwa, ku swana inge ne ba yaha ka liyahiso ze si ka tiya. Miyaho ya bona ne i si ke ya banduka mwa “mulilo.” Ki ufi mulilo wa n’a bulela Paulusi?

14. (a) Bakreste ba ba tahisa balutiwa ba kona cwañi ku “sinyehelwa ki mupuzo,” kono ba kona cwañi ku piliswa inge ba ba bandukile mwa mulilo? (b) Lu kona ku nyinyafaza cwañi lubeta lwa ku sinyehelwa ki mupuzo?

¹⁴ Ki manzwi a tahisa nahanisiso ao! Ku ikataza ku tusa mutu ku ba mulutiwa, ni ku mu bona a tulwa ki muliko kamba nyandiso mi wa zwa mwa niti, ku kona ku utwisa butuku luli. Paulusi n’a lumezi seo ha bulela kuli lwa sinyehelwa ki mupuzo mwa miinelo ye cwalo. I kona ku ba nto ye utwisa butuku kuli mane ku piliswa kwa luna ku taluswa ku ba “inge ya bandukile mwa mulilo”—inge mutu ya sinyehezwi ki za hae kaufela mwa mulilo mi yena u pilile ka litohonolo. Lu kona ku nyinyafaza cwañi lubeta lwa ku sinyehelwa ki mupuzo? Mu yahe ka liyahiso ze tiile! Ha lu luta baituti ba luna kuli lu ame lipilu za bona, mi ba susuezwa ku ba ni tulemeno twa Sikreste twa butokwa to tu cwale ka butali, kutwisiso, sabo ya ku saba Jehova, ni tumelo ya niti, u zibe lwa yaha ka liyahiso ze tiile, ze sa ci ka mulilo. (Samu 19:9, 10; Liproverbia 3:13-15; 1 Pitrosi 1:6, 7) Ba ba ipumanela tulemeno to tu cwalo ba ka zwelapili ku eza tato ya Mulimu; ba na ni sepo luli ya ku pila ku ya ku ile. (1 Joani 2:17) Kono lu kona ku sebelisa cwañi swanisezo ya Paulusi? Mu nyakisise mitala ye miñwi.

15. Lu kona ku ikolwisa mwa linzila lifi kuli lu pima ku sa yaha hande baituti ba luna ba Bibele?

¹⁵ Ha lu luta baituti ba Bibele, lu si pahamisi batu ku fita Jehova Mulimu. Mulelo wa luna haki wa ku ba luta ku lu nga ku ba simbule se situna sa butali. Lu bata kuli ba fumane ketelelo ku Jehova, Linzwi la hae, ni kwa kopano ya hae. Kacwalo, ha lu buleli fela maikuto a luna ha lu alaba lipuzo za bona. Kono lu ba luta ku fumana likalabo mwa Bibele ni lihatiso ze ñozwi ki “mutanga ya sepahala, ya na ni kutwisiso.” (Mateu 24:45-47) Ka mabaka a swana ao, lu tokomela ku sa eza lukakatela kwa baituti ba luna ba Bibele. Mwa sibaka sa ku nyema ba bañwi ha ba eza silikani ni bona, lu susueze baituti ba luna ku ‘atamisa’ lilato la bona, ba zibe ni ku itebuha ba bañata mwa puteho ka mo ba konela kaufela.—2 Makorinte 6:12, 13.

16. Maeluda ba kona ku yaha cwañi ka liyahiso ze sa ci ka mulilo?

¹⁶ Maeluda ba Sikreste ni bona ba peta musebezi wa butokwa mwa ku yaha balutiwa. Ha ba luta fapil’a puteho, ba bata ku yaha ka liyahiso ze sa ci ka mulilo. Buikoneli bwa ku luta, yeloseli, ni butu bwa bona li kana za fapanela kwahule, kono ha ba itusisi lifapano zeo kuli ba ipumanele balateleli. (Mu bapanye Likezo 20:29, 30.) Ha lu zibi hande libaka ba bañwi mwa Korinte ha ne ba li, “Na, ni wa Paulusi” kamba, “Na, ni wa Apolosi.” Kono lwa ziba hande kuli maeluda ba ba sepahala bao ne si bona ba ne ba tahisize likauhano ze cwalo. Paulusi n’a sa tabiswi ki lipulelo ze cwalo; n’a li nyazize patalaza. (1 Makorinte 3:5-7) Ka ku swana kacenu, maeluda ba hupule kuli ba lisa “mutapi wa Mulimu.” (1 Pitrosi 5:2, litaku li siyamisizwe ki luna.) Haki wa mutu ufi kamba ufi. Kacwalo maeluda ba hana mukwa wa kuli mutu a buse mutapi kamba sitopa sa maeluda. Ibile fela kuli maeluda ba susuezwa ki takazo ya buishuwo ya ku sebeleza puteho, ku ama lipilu, ni ku tusa lingu ku sebeleza Jehova ka moyo kaufela, ba yaha ka liyahiso ze sa ci ka mulilo.

17. Bashemi ba Bakreste ba ikataza cwañi ku yaha ka liyahiso ze sa ci ka mulilo?

¹⁷ Bashemi ba Sikreste ni bona ba iyakatitwe hahulu taba yeo. Haki mo ba latela ku bona bana ba bona ba pila ku ya ku ile! Ki lona libaka ha ba sebezanga ka t’ata ku “luta” lipilu za bana ba bona likuka za Linzwi la Mulimu. (Deuteronoma 6:6, 7) Ba bata kuli bana ba bona ba zibe kuli niti ki mupilelo o munde, o kolwisa, ili o tabisa, mi haki milao kamba litaba fela ze ñata-ñata. (1 Timotea 1:11) Kuli bashemi ba ba lilato ba yahe bana ba bona ku ba balutiwa ba Kreste ba ba sepahala, ba ikataza ku itutisa liyahiso ze sa ci ka mulilo. Ba sebeza ni bana ba bona ka pilu-telele, ku ba tusa ku kayutula mikwa y’a toile Jehova ni ku hulisa mikwa y’a lata.—Magalata 5:22, 23.